თბილისი. 31 იანვარს, თბილისის ახალგაზრდულ ცენტრში ახალი წევრებისთვის სამუშაო-საორიენტაციო შეხვედრა ჩატარდა. ცენტრის ახალმა წევრებმა ინფორმაცია მიიღეს პროექტის მიზნების, ახალგაზრდული კომპონენტის მიმართულებების და ცენტრის ძირითადი აქტივობების შესახებ. წყარო:ორგანიზაციის გვერდი სოციალურ ქსელში

გურია. 30 იანვარს, ლიდერთა სკოლისა და ახალგაზრდული ცენტრის წევრები სახალხო დამცველის ბავშვთა უფლებების ცენტრის უფროსს და მართლმსაჯულების დეპარტამენტის წარმომადგენელს შეხვდნენ.  შეხვედრაზე ახალგაზრდებმა ომბუდსმენის აპარატის წარმომადგენლებს ქალაქში მცხოვრები ეთნიკური უმცირესობის (ბოშების) ერთი ოჯახის პრობლემაც გააცნეს.  წყარო:ახალგაზრდა პედაგოგთა კავშირის გვერდი სოციალურ ქსელში

გურია. 30 იანვარს, „გურიის ახალგაზრდული რესურსცენტრის" ორგანიზებით ოზურგეთში სამოქალაქო განათლებისა და პედაგოგთა გადამზადების პროგრამის შუალედური შემაჯამებელი ღონისძიება ჩატარდა. შემაჯამებელ ღონისძიებაზე პრეზენტაციები წარმოადგინეს სამოქალაქო კლუბების წევრმა მოსწავლეებმა. საანგარიშო პერიოდში განხორციელებული მცირე გრანტების შესახებ ისაუბრეს ლანჩხუთის მუნიციპალიტეტის სოფელ ჩიბათის სამოქალაქო კლუბის წევრმა მოსწავლემ და კლუბის მეურვე პედაგოგმა.  წყარო: gyrc.wordpress.com

სამეგრელო. 30 იანვარს, „საერთაშორისო გამჭვირვალობა - საქართველოსა" და ზუგდიდის შოთა მესხიას სახელმწიფო სასწავლო უნივერსიტეტს შორის ურთიერთთანამშრომლობის მემორანდუმი გაფორმდა. დოკუმენტს ხელი უნივერსიტეტის რექტორმა და ორგანიზაციის ზუგდიდის წარმომადგენლობის ხელმძღვანელმა მოაწერეს. მემორანდუმის ხელმომწერთა მიზანია სტუდენტების დახმარება ხარისხიანი იურიდიული განათლების მიღებასა და თვითრეალიზებაში; სტუდენტების სამართლებრივი მართლშეგნების დონის ამაღლება და გამოცდილების გაზიარება და პროფესიული უნარ-ჩვევების ჩამოყალიბების ხელშეწყობა. შოთა მესხიას სახელობის უნივერსიტეტის სტუდენტებს მიეცემათ საშუალება მონაწილეობა მიიღონ ორგანიზაციის მიერ ჩატარებულ სემინარებსა და ტრენინგებში; ასევე, ჩაერთონ „საერთაშორისო გამჭვირვალობა - საქართველოს" სასამართლო მონიტორინგის პროგრამაში. წყარო:ორგანიზაციის გვერდი სოციალურ ქსელში

კახეთი. თელავის განათლების, განვითარებისა და დასაქმების ცენტრმა „სამოქალაქო განათლებისა და პედაგოგთა გადამზადების პროექტის" ფარგლებში შუალედური ღონისძიება მოაწყო. შეხვედრაზე მონაწილე ახალგაზრდება განხორციელებული პროექტების პრეზენტაცია გამართეს. ერთ–ერთი ასეთი პროექტი იყო ველისციხის საჯარო სკოლის სამოქალაქო კლუბის, რომელიც გურჯაანის მუნიციპალიტეტის საკრებულომ 130000 ლარით დააფინანსა. შეხვედრას ესწრებოდნენ პროგრამაში ჩართული კახეთის რეგიონის მუნიციპალიტეტების საჯარო სკოლების დირექტორები და პედაგოგები.

იმერეთი. 28 იანვარს, სამოქალაქო განათლებისა და პედაგოგთა გადამზადების პროგრამის ფარგლებში ქუთაისის პარტნიორი სკოლების სამოქალაქო კლუბების წევრებისათვის ტრენინგი - „არასრულწლოვანთა დანაშაულებანი-განრიდება და მედიაცია" - ჩატარდა. ტრენინგს ახალგაზრდა იურისტთა ასოციაციის იურისტი უძღვებოდა. სამოქალაქო კლუბების წევრები გაეცნენ დანაშაულის და სასჯელის არსს; იურიდიული და ფიზიკური პირის პასუხისმგებლობის საკითხებს დანაშაულთან მიმართებაში; განსხვავებებს დანაშაულებებს შორის. განიხილეს კონკრეტული საქმეები, რომლის მიხედვითაც განსაზღვრეს პასუხისმგებლობის ფორმები, რომელიც ამა თუ იმ სამართალდარღვევის შემთხვევაში დგება. წყარო:ორგანიზაციის გვერდი სოციალურ ქსელში

თბილისი. 29 იანვარს, არასამთავრობო ორგანიზაცია „სიდას" ინიციატივა – „უფროსი მეგობრის" მონაწილეები, თავისუფალ თეატრში სპექტაკლს დაესწრნენ. დაგეგმილი ღონისძიების ფარგლებში, თავისუფალ თეატრში ახალგაზრდებმა რეჟისორ ავთო ვარსიმაშვილის სპექტაკლი ნახეს. ღონისძიება ჩატარდა პროექტ „არასრულწლოვანთა მარლთმსაჯულების რეფორმის მხარდაჭერა ქვემო ქართლსა და სამცხე ჯავახეთის ეროვნული უმცირესობების თემებში" ფარგლებში, რომელიც დაფინანსებულია ევროკავშირის მიერ. წყარო:cida.ge

თბილისი. „კულტურულ ურთიერთობათა ცენტრი — კავკასიური სახლი" ახორციელებს პროექტს - „რეგიონალური თანამშრომლობა მშვიდობისა და სტაბილურობისათვის". პროექტი მიზნად ისახავს გააძლიეროს ადგილობრივი სამოქალაქო საზოგადოების უნარიანობა, მოაგვაროს რეგიონალური კონფლიქტები და შექმნას საქართველოს, სომხეთის, აზერბაიჯანისა და თურქეთის ახალგაზრდა პროფესიონალების თანამშრომლობის პლატფორმა. პროექტის ფარგლებში 5–11 თებერვალს ჩატარდება სასწავლო და დიალოგის შეხვედრები, რომელშიც მონაწილებას მიიღებენ ქართველი, სომეხი, აზერბაიჯანელი და თურქი ახალგაზრდა მკვლევარები, ანალიტიკოსები, ჟურნალისტები და აქტივისტები. მონაწილეები შეხვდებიან, როგორც საქართველოს მთავრობის, ასევე საერთაშორისო და ადგილობრივი არასამთავრობო ორგანიზაციების წარმომადგენლებსა და დამოუკიდებელ ექსპერტებს. 11 თებერვალს, დასკვნითი ნაწილის ფარგლებში კულტურულ ურთიერთობათა ცენტრ - კავკასიურ სახლში ჩატარდება საჯარო დისკუსია, სადაც მონაწილეები წარმოადგენენ საკუთარ ხედვებს რეგიონალურ თანამშრომლობასთან დაკავშირებით და უპასუხებენ აუდიტორიის კითხვებს. პროექტი ხორციელდება ბრიტანეთის საგარეო საქმეთა სამინისტროს კონფლიქტის პრევენციის ფონდის ფინანსური მხარდაჭერით. წყარო:ორგანიზაციის გვერდი სოციალურ ქსელში

იმერეთი. 29 იანვარს, სამოქალაქო განათლებისა და პედაგოგთა გადამზადების პროგრამის ფარგლებში, სამოქალაქო კლუბი დაარსდა ვანის პირველ საჯარო სკოლაში. ახლადშექმნილ სამოქალაქო კლუბს კონსულტაციები გაეწია კლუბის სტრუქტურისა და ფუნქციონირების შესახებ. შეხვედრის მონაწილეები გაეცვნენ წლის სამუშაო გეგმის პრიორიტეტებს და იქვე შეიმუშავეს თავიანთი კლუბების სამუშაო გეგმები. ასევე, სამოქალაქო განათლებისა და პედაგოგთა გადამზადების პროგრამის ფარგლებში სოციალური მედიის კოორდინატორმა ტრენინგი ჩაატარა სოციალური მედიის თემაზე. ტრენინგზე მყოფი 17 მსმენელი გაეცნო ბლოგების დარეგისტრირებას და მის მართვას, ელექტრონული ფოსტის გამოყენებას. წყარო:ორგანიზაციის გვერდი სოციალურ ქსელში

ქვემო ქართლი. 28 იანვარს, დმანისის ახალგაზრდული ცენტრის წევრები სოფელ განთიადის საჯარო სკოლას ესტუმრნენ. ცენტრის წევრებმა თანატოლებს ჩაუტარეს ტრენინგი ეკოლოგიაზე. ახალგაზრდებმა თანატოლებს წარუდგინეს პრეზენტაცია ეკოლოგიის არსზე, ეკოლოგიური გარემოს ცვლილებებზე და ამ ცვლილებებით გამოწვეულ პრობლემებზე. ტრენინგის მონაწილეებს შორის გაიმართა დისკუსიაც, თუ რამდენად დიდია ადამიანის გავლენა ეკოლოგიურ გარემოს ცვლილებებზე. ტრენინგის ბოლოს გაიმართა ფილმის ჩვენება. წყარო:ორგანიზაციის გვერდი სოციალურ ქსელში

ქვემო ქართლი. 29 იანვარს, სიქას ორგანიზებით ჩატარდა ქვემო ქართლში „სამოქალაქო განათლებისა და პედაგოგთა გადამზადების პროგრამის" 2013 წლის ივლისი - დეკემბრის თვეებში შესრულებლი აქტივობების შემაჯამებელი ღონისძიება. ქვემო ქართლის სასკოლო სამოქალაქო კლუბების წევრებმა წარმოადგინეს პრეზენტაციები საანგარიშო პერიოდში შესრულებული სამუშაოს შესახებ. წყარო:ორგანიზაციის გვერდი სოციალურ ქსელში

თბილისი. 28 იანვარს „ჟურნალისტური ეთიკის ქარტიამ" და „გაეროს ბავშვთა ფონდმა" ჟურნალისტებს ახალი პროექტი  წარუდგინეს. პროექტი, რომელიც 5 თვის განმავლობაში, 15 იანვრიდან 1 ივნისამდე გაგრძელდება, ქართულ მედიაში ბავშვთა საკითხების ეთიკური გაშუქების მხარდაჭერას ითვალისწინებს. მონიტორინგის მიზანი იმის დადგენაა, თუ რამდენად იცავს მედია ბავშვთა საკითხების გაშუქებისას საერთაშორისო თუ ადგილობრივ სტანდარტებს და ეთიკურ ნორმებს. გარდა ამისა, ის ჟურნალისტებისთვის ტრენინგის ჩატარებასა და მედიასაშუალებების რედაქტორებთან შეხვედრა-დისკუსიებს გამართვას მოიცავს.  მონიტორინგის ფარგლებში ერთი შუალედური და ერთი საბოლოო ანგარიში გამოქვეყნდება. შემაჯამებელი ანგარიშის პრეზენტაციაზე „ჟურნალისტური ეთიკის ქარტია" და „გაეროს ბავშვთა ფონდი" მონიტორინგის განმავლობაში გამოვლენილ საუკეთესო ნამუშევრების ავტორებს დააჯილდოვებს.  სრულად წყარო: www.media.ge

თბილისი. ახალგაზრდულმა მოძრაობა „დავითიანნმა" ღია წერილი გაავრცელა, რომლითაც უკრაინელ ახალგაზრდებს მიმართავს. „ქართველი ახალგაზრდები თანადგომასა და მხარდაჭერას გიცხადებთ, არა მხოლოდ როგორც ჩვენს მეგობრებს, არამედ როგორც თანამებრძლებს საერთო საქმეში. საქმეში, რომელსაც ევროპული სტრუქტურებისა და დემოკრატიზაციისკენ სვლა ჰქვია. ქართველებსა და უკრაინელებს ბევრი საერთო აქვს დაწყებული სარწმუნოებით და დამთავრებული თავისუფლებისაკენ მუდმივი სწრაფვით.  ჩვენ თვალს-ყურს ვადევნებთ კიევსა და მთელს უკრაინაში მიმდინარე პროცესებს, ვცდილობთ აქტიურად ვიყოთ ჩართულები და მიმდინარე მოვლენებზე ჩვენი პოზიცია მივაწვდინოთ თანატოლებსა და მეგობრებს სხვადასხვა ქვეყნებში", ნათქვამია განცხადებაში.  სრულად წყარო:davitianni.ge

იმერეთი. 27 იანვარს, ქუთაისის ახალგაზრდული ცენტრის წევრებისათვის ორგანიზება გაუკეთდა სემინარს: „სტიგმა და სტერეოტიპები ეთნიკური უმცირესობების საკითხებთან დაკავშირებით". სემინარს მოწვეული ტრენერი, ფსიქოლოგი ირაკლი ჯულაყიძე უძღვებოდა და მას ცენტრის 32 წევრი დაესწრო. ღონისძიება მიზნად ისახავდა ახალგაზრდებს მიეღოთ ინფორმაცია თუ რა არის ყველაზე კარგი გზა ინტეგრაციისათვის, თუ როგორ უნდა მოხდეს აზროვნების შეცვლა ეთნიკურ უმცირესობებში და ეთნიკურ ქართველებში, როგორ უნდა ვებრძოლოთ სტიგმას და სტერეოტიპებს ეთნიკურ უმცირესობებთან მიმართებაში. სესიის მიმდინარეობისას განიხილეს საკითხები: ეროვნული უმცირესობათა დაცვის (ჩარჩო) კონვენციის 30- ე მუხლი, თვითმყოფადობის დაცვა, განათლების რეფორმა და ეროვნული უმცირესობები, ეროვნული უმცირესობების ინტეგრაცია და სასაზღვრო პრობლემები, მედია საშუალებები და ეროვნული უმცირესობები, ეროვნული უმცირესობები და რელიგია, სამოქალაქო საზოგადოება და რელიგია. წყარო:ორგანიზაციის გვერდი სოციალურ ქსელში

შიდა ქართლი. 23 იანვარს, საზოგადოება „ბილიკმა" სამოქალაქო განათლებისა და პედაგოგთა გადამზადების პროგრამის ფარგლებში 2013 წლის ივლისი-დეკემბერის პერიოდში განხორციელებული საქმიანობის ანგარიში წარადგინა. პროგრამის ფარგლებში სასკოლო სამოქალაქო კლუბების წევრებმა არაერთი პრობლემა გამოავლინეს. მათი მოგვარების მიზნით მოსწავლეთა მიერ ადვოკატირების კამპანიის თუ სხვადასხვა აქტივობების განხორციელებით, ადგილობრივი მუნციპალიტეტის და არასამთავრობო სექტორის ხელშეწყობით, ბევრი საკითხი დადებითად გადაწყდა. ღონისძიებას ესწრებოდნენ ადგილობრივი მუნიციპალიტეტისა და არასამთავრობო სექტორის, მედიის წარმომადგენლები. ასევე, პარტნიორი სკოლების დირექტორები და სამოქალაქო განათლების პედაგოგები.

თბილისი. 25 იანვარს საქართველოს საზოგადოებრივ საქმეთა ინსტიტუტში თბილისელი და ახალქალაქელი სტუდენტების შეხვედრა გაიმართა „ახალგაზრდა კონსტიტუციონალისტთა ასოციაციის" წარმომადგენლებთან. ღონისძიების ფარგლებში ორგანიზაციის წარმომადგენელმა ისაუბრა ახალგაზრდების როლზე დემოკრატიული მმართველობის დამკვირდრების პროცესში, ასევე სტუდენტებს გაუზიარა თავისი ორგანიზაციის სამუშაო გამოცდილება და უამბო, თუ რა წარმატებებს მიაღწიეს ახალგაზრდების ჩართულობის გაზრდის მიმართულებით. შეხვედრა ჩატარდა „ლევან მიქელაძის სახელობის ფონდის" პროექტის „ახალგაზრდული ინიციატივების ხელშეწყობა ეთნიკური უმცირესობებისთვის" ფარგლებში. სრულად წყარო: www.osgf.ge

იმერეთი. სამეცნიერო–ინტელექტუალური კლუბი „თაობათა დიალოგი" ქუთაისის მერიის ახალგაზრდობის საქმეთა სამსახურთან ერთად იწყებს ახალ ახალგაზრდულ პროექტს – მოდელირებულ, სიმულაციურ თამაშს „ღია თვითმმართველობა". პროექტი ერთი წლის განმავლობაში გაგრძელდება და მასში მონაწილეობის მიღება შეუძლიათ ქუთაისის სახელმწიფო და კერძო უმაღლესი სასწავლებლების მე–2, მე–3 კურსის სტუდენტებს და მაგისტრატურის 1 კურსელებს. მონაწილეები მიიღებენ შემდეგ გამოცდილებას: კანონების წაკითხვა და გააზრება; გადაწყვეტილების მიღების უნარ–ჩვევა; გუნდური მუშაობის უნარ–ჩვევა; საკუთარი შესაძლებლობების წარმოჩენის უნარ–ჩვევა; სტრატეგიის დასახვისა და შესრულების უნარ–ჩვევა. მონაწილეობის მსურველებმა უნდა შეავსონ აპლიკაცია. სულ პროგრამაში მონაწილეობისთვის შეირჩევა 50 ახალგაზრდა. აპლიკაცია წყარო: თაობათა დიალოგის ვებგვერდი სოციალურ ქსელში

თბილისი. 24 იანვარს, თბილისის სახელმწიფო უნივერსიტეტში არასამთავრობო ორგანიზაციამ „ლიბერალურმა აკადემია თბილისმა" გამართა საინფორმაციო შეხვედრა სტუდენტებთან. შეხვედრის მიზანი იყო სტუდენტებისთვის ვიზის ფასილიტაციის ხელშეკრულების, სავიზო კოდექსის, მათი იმპლემენტაციის შედეგების, სავიზო დიალოგისა და მასთან დაკავშირებული პროცესების შესახებ მიეწოდებინათ ინფორმაცია. გარდა ამისა, შეხვედრის მონაწილეები გაეცნენ ორგანიზაციის მიმდინარე პროექტის – „ვიზის ლიბერალიზაციის პერსპექტივები: სამოქალაქო ჩართულობა და ადვოკატირების" ფარგლებში დაგეგმილი ფოტოკონკურსის პირობებს. წყარო: ლიბერალური აკადემია თბილისის ვებგვერდი სოციალურ ქსელში

იმერეთი. 24 იანვარს, ქუთაისის განათლების განვითარების და დასაქმების ცენტრის ინიციატივით სამოქალაქო განათლების და პედაგოგთა გადამზადების პროგრამის ფარგლებში, ქუთაისის საჯარო სკოლების, სამოქალაქო კლუბის წევრები ჟურნალისტ დავით ლიკლიკაძეს შეხვდნენ. მან ახალგაზრდებს გაუზიარა თავისი შეხედულებები სხვადასხვა საკითხებზე, ისაუბრა სხვადასხვა ქვეყნების ტრადიციებზე და რა თქმა უნდა, ჟურნალისტურ საქმიანობაზე. წყარო:cso.ge

ქვემო ქართლი. 17 იანვარს დმანისის ახალგაზრდული ცენტრის წევრებისათვის ჩატარდა ტრენინგი თემაზე: „ერთად გავხადოთ ჩვენი გზები უსაფრთხო და მეგობრული". მოწვეულმა ტრენერმა ისაუბრა საგზაო უსაფრთხოების შესახებ, რის შემდეგაც ტრენინგის მონაწილეების შორის გაიმართა დისკუსია საგზაო შემთხვევების გამომწვევ მიზეზებზე, შედეგებსა და ამ პრობლემის აღმოფხვრის გზებზე. ღონისძიება პროექტ – „ეროვნული ინტეგრაციის გაძლიერება საქართველოში" – ფარგლებში ჩატარდა, რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო: დმანისის ახალგაზრდული ცენტრის ვებგვერდი სოციალურ ქსელში

თბილისი. 27 იანვარს 2013 წლის მოწვევის საქართველოს ახალგაზრდული პარლამენტის შემაჯამებელი ღონისძიება გაიმართა. შეხვედრას საქართველოს პარლამენტის, საზოგადოებრივი ორგანიზაციების და ბიზნესის წარმომადგენლები ესწრებოდნენ. შეხვედრა საქართველოს ახალგაზრდული პარლამენტის დამფუძნებელმა თეონა ლავრელაშვილმა გახსნა. მან ახალაგზრდული პარლამენტის მიღწევების და სამომავლო გეგმების შესახებ ისაუბრა. ღონისძიების ბოლოს, საქართველოს ახალგაზრდული პარლმანეტის ადმინისტრაციამ ახლაგზრდული პარლამენტის წევრები სერთიფიკატებით დააჯილდოვა.

ზუგდიდი. 25–26 იანვარს ასოციაცია ,,ათინათში" ჩატარდა ტრეინინგი ახალგაზრდული ცენტრის წევრებისათვის თემაზე ,,ადვოკატირება’’. შეხვედრის მონაწილეებმა განიხილეს ისეთი საკითხები, როგორიცაა: ადვოკატირების არსი და მნიშვნელობა, პროცესის დაგეგმვა და ძირითადი მახასიათებლები, ადვოკატირება საქართველოში და სხვა. ტრეინინგის შემდეგ მონაწილეები შეძლებენ ადვოკატირების, როგორც საზოგადოების/თემის გააქტიურებისა და მიზნის მიღწევის ერთ–ერთი ხერხის არსისა და მნიშვნელობის გააზრებას. ღონისძიება ჩატარდა ეროვნული ინტეგრაციის გაძლიერების პროგრამის ფარგლებში, რომელსაც საქართველოს გაეროს ასოციაცია ამერიკის შეერთებული შტატების საერთაშორისო განვითარების ფინანსური მხარდაჭერით ახორციელებს. წყარო: ზუგდიდის ახალგაზრდული ცენტრის გვერდი სოციალურ ქსელში