სამცხე–ჯავახეთი. პროექტის, „დემოკრატია იწყება შენით” ფარგლებში, 17-20 იანვარს  საქართველოს 20 მასწავლებელი ერევანს სტუმრობდა. ქართველმა, სომეხმა და აზერბაიჯანელმა პედაგოგებმა ერთმანეთს გამოცდილება და იდეები  გაუზიარეს და  ინტეგრირებული გაკვეთილების დაგეგმვაზე იმუშავეს. აქვე გადაწყდა ასოციაციის შექმნა, რომელიც იქნება დამაკავშირებელი მასწავლებლებსა და განათლების სამინისტროს შორის.  შეხვედრაზე მასწავლებელთა ურთიერთობის სამი რგოლი განიხილეს: ურთიერთობა სკოლებში,  ქვეყნის შიგნით და სამხრეთ კავკასიის ქვეყნებში.

პროექტი „დემოკრატია იწყება შენით” მესამე წელია ხორციელდება ფონდ „კონრად ადენაუერისა” და თბილისის პოლიტიკური სკოლის მიერ. პროექტი სამხრეთ კავკასიის სამ ქვეყანას: საქართველოს, სომხეთსა და აზერბაიჯანს მოიცავს. თითოეული ქვეყნიდან 20 სკოლა და 10 მასწავლებელია შერჩეული. შარშან და შარშანწინ მასწავლებლები საქართველოში შეიკრიბნენ, წელს კი სტუმრებს ერევანმა უმასპინძლა.