სიახლეები
შიდა ქართლი. გორის დემოკრატიული ჩართულობის ცენტრში ორგანიზაციებმა – უსაფრთხო მსოფლიო და კავკასიის კვლევითი რესურსების ცენტრმა გამართეს კვლევის შედეგების პრეზენტაცია. კვლევა ჩატარდა ცხინვალის რეგიონის გამყოფი ხაზის მოსაზღვრე ოთხ არეალში: ატოც-დირბში, ნიქოზი-მერეთში, ფლავისმან-ბერშუეთსა და წითელუბან-ლამისყანაში. პრეზენტაციას ესწრებოდნენ: ევროკავშირის მონიტორინგის მისიის, საერთაშორისო და ადგილობრივი საზოგადოებრივი ორგანიზაციების, საკრებულოს და სამხარეო ადმინისტრაციის წარმომადგენლები. შეხვედრის დროს ორგანიზატორმა ორგანიზაციებმა ისაუბრეს კვლევის მეთოდებსა და შედეგების შესახებ. ასევე, შედარდა წინა კვლევისა და ამჟამინდელი კვლევის შედეგები, რამაც გამოკვეთა ცვლილებები აღნიშნულ ზონაში მცხოვრები მოსახლეობის უსაფრთხოების კუთხით.
აჭარა. საქართველოს ახალგაზრდა იურისტთა ასოციაციის ინიციატივით გაიმართა შეხვედრა თემაზე – „რეგიონი და ადამიანის უფლებები". შეხვედრაზე რეგიონში ადამიანის უფლებების მიმართულებით მომუშავე საზოგადოებრივმა ორგანიზაციებმა, დამსწრე საზოგადოებას ბავშვთა უფლებების, საკუთრების უფლების, გამოხატვის თავისუფლების, სამოქალაქო ჩართულობის და დევნილთა მდგომარეობის მიმართულებით არსებული ვითარება გააცნეს. პრეზენტაციის შემდეგ გაიმართა დისკუსია, სადაც ყველა მნიშვნელოვანი და პრობლემატური საკითხი განიხილეს და გაანალიზეს.
შეხვედრას ესწრებოდნენ ადგილობრივი საზოგადოებრივი ორგანიზაციების წარმომადგენლები, სტუდენტები და უფროსკლასელები.
თბილისი. საქართველოში თურქეთის საელჩოსთან საზოგადოებრივმა ორგანიზაციამ „ლგბტ საქართველომ" საპროტესტო აქცია გამართა. ისინი ამ აქციით თურქეთში ბოლო პერიოდში მოკლული ტრანსგენდერი ადამიანების ფაქტებს გამოეხმაურნენ და გამოძიების დაწყებას მოითხოვეს.
აქცია ჰომოფობიის წინააღმდეგ ბრძოლის საერთაშორისო დღესთან დაკავშირებით გაიმართა.
ორგანიზაციამ ოფიციალური წერილიც მოამზადა თურქეთის საელჩოში გადასაცემად.
სრულად დოკუმენტი
თბილისი. ნიდერლანდების სამეფოს მხარდაჭერით საზოგადოებრივი ორგანიზაცია „იდენტობა" ახალ პროექტს იწყებს. პროექტი სტუდენტებში ჰომოფობიის პრობლემის შესახებ ინფორმირებულობის გაზრდას ისახავს მიზნად. პროექტის ფარგლებში სტუდენტებისთვის საჯარო შეხვედრები და ტრენინგები მოეწყობა. ასევე გაიმართება აკადემიური კონფერენცია, რომელშიც კონკურსის წესით შერჩეული სტუდენტები ლგბტ უფლებების საკითხებზე მომზადებულ აკადემიურ ნაშრომს წარმოადგენენ.