სამეგრელო. არასამთავრობო ორგანიზაცია „საუნჯე" გაეროს განვითარების პროგრამის (UNDP) მხარდაჭერით ახორციელებს პროექტს „თანამშრომლობა ბინათმესაკუთრეთა ამხანაგობების განვითარებისათვის", რომელის ფარგლებშიც, ქალაქ ზუგდიდის და ქალაქ ფოთის მუნიციპალიტეტებში შეიქმნება ბინათმესაკუთრეთა ამხანაგობები, მობინადრეები შეიძენენ საჭირო უნარ-ჩვევებს და შეიქმნება ბინათმესაკუთრეთა ამხანაგობების ქსელი, რომელიც ითანამშრომლებს ადგილობრივი თვითმმართველობის ორგანოებთან.

პროექტის პრეზენტაცია ქალაქ ფოთის და ზუგდიდის მუნიციპალიტეტებში შედგა. ორივე მუნიციპალიტეტში ქალაქის მერებმა გამოთქვეს თანამშრომლობის მზაობა ბინათმესაკუთრეთა ამხანაგობების განვითარებისათვის.

ქალაქ ფოთის მუნიციპალიტეტის მერიას ბინათმესაკუთრეთა ამხანაგობების პროგრამის შემუშავებისათვის „საუნჯე" გაუწევს კონსულტაციას და გაუზიარებს სხვა ქალაქებისა და ქვეყნების გამოცდილებას.

ქალაქ ზუგდიდში პირველად 2016 წელს იქნა მიღებული პროგრამა, რომელიც ორასი ათასი ლარით დაფინანსდა, თუმცა აღნიშნული პროგრამის დახვეწა და მერიის შესაბამისი სამსახურის თანამშრომელთა გადამზადების პროცესი მიმდინარეობს.

აღნიშნული პროგრამა ხორციელდება პროექტის: „რეგიონული და ადგილობრივი განვითარების ხელშეწყობა საქართველოში" (RLD), რომელსაც ახორცილებს გაეროს განვითარების პროგრამა (UNDP),სამხრეთ კავკასიაში შვეიცარიის თანამშრომლობის ოფისისა (SCO) და ავსტრიის განვითარების სააგენტოს(ADC) დაფინანსებით.

წყარო: ორგანიზაცია „საუნჯე"