აჭარა. 12 თებერვალს, ბათუმის დემოკრატიული ჩართულობის ცენტრში, ქუთაისის განათლების განვითარების და დასაქმების ცენტრის ორგანიზებით პროექტის პრეზენტაცია გაიმართა. პროექტი - „შშმ პირთა განათლების და დასაქმების თანაბარი შესაძლებლობების ადვოკატირება ლობირება" - გულისხმობს თბილისში, თელავში, ბათუმსა და ქუთაისში დასაქმების ცენტრების შექმნას, რომელთანაც პროექტის ფარგლებში გადამზადებული დასაქმების კონსულტანტები შშმ პირებსა და დამსაქმებელს ერთმანეთთან დააკავშირებენ. გარდა ამისა პროექტის ბენეფიციარები გაივლიან ტრენინგებს პირადი რეზიუმეს შედგენასა და სამოტივაციო წერილის მომზადების კუთხით. ასევე, ყველა რეგიონში ორგანიზება გაუკეთდება დასაქმების ფორუმებს, სადაც შშმ პირთა დასაქმების შესახებ ინფორმაციის გავრცელებას შეეწყობა ხელი. პროექტი საინტერესოა იმ კუთხითაც, რომ მასში ჩართული 120 შშმ პირი გაივლის ანაზღაურებად სტაჟირებას. პროექტის პრეზენტაციას, საზოგადოებრივი ორგანიზაციები და ბათუმში მცხოვრები შეზღუდული შესაძლებლობის მქონე პირები ესწრებოდნენ.