კამპანია - „უფლება გაქვს იცოდე“
აჭარა. 25 თებერვალს, ბათუმის დემოკრატიული ჩართულობის ცენტრში, აღმოსავლეთ-დასავლეთის მართვის ინსტიტუტის (EWMI) წარმომადგენლებმა ბათუმის ადგილობრივი არასამთავრობო ორგანიზაციების და მედიის წარმომადგენლებთან ღია შეხვედრა გამართეს. შეხვედრაზე დამსწრეები ACCESS-ის პროექტის პირველი წლის მუშაობის შედეგებს გაეცნენ. ასევე იმსჯელეს, თუ როგორ შეიძლება ACCESS-ის პროექტის რესურსების გამოყენება სამოქალაქო სექტორში არსებული პრობლემების და გამოწვევების გადასალახად.
აღმოსავლეთ-დასავლეთის მართვის ინსტიტუტი (EWMI), ამერიკის შეერთებული შტატების საერთაშორისო განვითარების სააგენტოს (USAID) დაფინანსებით, 2014 წლის ნოემბრიდან ახორციელებს 5.5 მილიონი აშშ დოლარის ღირებულების პროექტს - სამოქალაქო საზოგადოების განვითარებისა და მოქალაქეების ჩართულობის პროექტი (ACCESS). პროექტის მიზანია არასამთავრობო ორგანიზაციებსა და მოქალაქეებს შორის თანამშრომლობის გაზრდა, მესამე სექტორის საქმიანობაში მოქალაქეების აქტიურად ჩართვა და საზოგადოებრივი ორგანიზაციების სტაბილური განვითარების მხარდაჭერა.
