თბილისი. ინფორმაციის თავისუფლების განვითარების ინსტიტუტი (IDFI) აქვეყნებს Freedom House-ის ყოველწლიური ანგარიშის მიმოხილვას ინტერნეტის თავისუფლების შესახებ.

„საქართველომ 100-დან 25 ქულა აიღო და ინტერნეტ თავისუფლების მხრივ შეფასდა, როგორც „თავისუფალი" ქვეყანა. ამის მიუხედავად, 2015 წელთან შედარებით, ქვეყნის ქულა ერთით შემცირდა.

ანგარიში დადებითად აფასებს საქართველოს საკონსტიტუციო სასამართლოს გადაწყვეტილებას, რომელმაც არაკონსტიტუციურად სცნო სამართალდამცავი ორგანოების პირდაპირი ტექნიკური ხელმისაწვდომობა მაიდენტიფიცირებელ მონაცემებზე (metadata).

სხვა მნიშვნელოვან ტენდენციებთან ერთად, ანგარიში მიმოიხილავს საერთაშორისო პლატფორმების, Wordpress-ისა და Youtube-ის დაბლოკვის შემთხვევებს, რომლებმაც, სავარაუდოდ, უარყოფითად იმოქმედა საქართველოს ამ წლის შედეგებზე", ნათქვამია ორგანიზაციის ვებ-გვერდზე.

წყარო: idfi.ge