თბილისი. საქართველოს მთავრობამ, მიმდინარე წლის აპრილის თვეში, პარლამენტში - „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ" საქართველოს კანონის პროექტი წარადგინა.

„წარმოდგენილი განცხადების მიზანს არ წარმოადგენს ახალი კანონის პროექტის სრული და საფუძვლიანი შეფასება, თუმცა გვსურს ყურადღება გავამახვილოთ ერთ საკითხზე, რომელიც გვაძლევს საფუძველს ვივარაუდოთ, რომ კანონპროექტში მისი ასახვა „პანორამა თბილისის" პროექტს უნდა უკავშირდებოდეს.

გვსურს საზოგადოებას შევახსენოთ, რომ „პანორამა თბილისის" პროექტის სამივე სამშენებლო ლოკაცია ქალაქის ისტორიულ ნაწილში ხორციელდება. დადასტურებული ინფორმაციით, სამი სამშენებლო ლოკაციიდან ორი, „სოლოლაკის მაღლობი" და „სოლოლაკის ბაღები" თბილისის ისტორიული ლანდშაფტის დაცვის ზონაშია მოქცეული, რაც ამ ზონაში სამშენებლო სამუშაოებს კრძალავს. აღნიშნული სამშენებლო ნებართვები საიას თბილისის საქალაქო სასამართლოში აქვს გასაჩივრებული, რაზეც დღემდე მიმდინარეობს დავა", ნათქვამია ორგანიზაციის ვებ-გვერდზე.

წყარო: gyla.ge