თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED), დღეს, 2017 წლის ადგილობრივი თვითმმართველობის არჩევნების წინასაარჩევნო გარემოს მონიტორინგის პირველი შუალედური ანგარიში გამოაქვეყნა. ანგარიში მოიცავს 24 ივლისიდან 4 სექტემბრის ჩათვლით პერიოდს, აგრეთვე მოვლენებს, რომელთა განვითარება 24 ივლისამდე დაიწყო და მონიტორინგის პერიოდშიც მიმდინარეობდა.

ანგარიშის მიხედვით, წინასაარჩევნო კამპანია, ძირითადად, მშვიდ გარემოში მიმდინარეობდა, თუმცა, გამოვლინდა ფიზიკური დაპირისპირების 2; ზეწოლა-მუქარის 2; სავარაუდოდ პოლიტიკური ნიშნით სამსახურიდან გათავისუფლების 1; ადმინისტრაციული რესურსის გამოყენების 3; დამკვირვებლისთვის ხელის შეშლის 1 ფაქტი. ანგარიშში, ასევე, აღნიშნულია, რომ 8 საარჩევნო ოლქში გარკვეული ხარვეზებით წარიმართა საუბნო საარჩევნო კომისიების დაკომპლექტება; ადგილი ჰქონდა ოპოზიციური კანდიდატების საწინააღმდეგოდ მიმართულ დეზინფორმაციის კამპანიას სოციალური ქსელების მეშვეობით; ამასთან, საყურადღებო იყო საბიუჯეტო რესურსების სავარაუდო მობილიზების შემთხვევებისა და უფასო სამედიცინო მომსახურების გაწევის შემთხვევები.

წყარო: ორგანიზაციის ვებგვერდი