თბილისი. „ინფორმაციის თავისუფლების განვითარების ინსტიტუტმა" (IDFI) მოამზადა კვლევა სარეზერვო ფონდის ხარჯვასთან დაკავშირებით. დოკუმენტის მიხედვით, გამოვლენილ პრობლემებს შორის ერთ-ერთი მთავარი გაუმჭვირვალე შესყიდვები და თანხების არაეფექტიანი განკარგვის რისკი იყო. IDFI-ს განსაკუთრებული ყურადღება საგარეო საქმეთა სამინისტრომ მიიპყრო.

„კვლევის ფარგლებში დავაკვირდით ყველა სახელმწიფო უწყებას, რომელმაც მიიღო თანხა მთავრობის სარეზერვო ფონდიდან არაფორსმაჟორული ხარჯის გასაწევად. ჩვენი ყურადღება მიიქცია საგარეო საქმეთა სამინისტროს ერთ-ერთმა შესყიდვამ", - ვკითხულობთ IDFI-ს მიერ გავრცელებულ ინფორმაციაში, - „საგარეო საქმეთა სამინისტროს მიერ ლეონიძის ქ. N3-ში მდებარე შენობა-ნაგებობის ადაპტაცია-ცვლილების და საპროექტო სამუშაოს შესყიდვა შეიცავს რისკებს, რომლებიც აღნიშნულ შესყიდვას საეჭვოს ხდის. კერძოდ: შესასყიდ სამუშაოზე ელექტრონული ტენდერი არ გამოცხადდა; დადებული ხელშეკრულება არაა ატვირთული სახელმწიფო შესყიდვების მონაცემთა ბაზაში; ხელშეკრულება გაფორმდა კომპანიასთან, რომელიც დაარსდა ხელშეკრულების ხელმოწერამდე 1 დღით ადრე; კომპანიის მფლობელსა და შემსყიდველი უწყების მინისტრის მოადგილეს შორის არის ნათესაური კავშირი; კომპანიას ხელშეკრულების გაფორმებიდან ერთი წლის განმავლობაში მონაწილეობა არ მიუღია სხვა სახელმწიფო შესყიდვაში".

წყარო: ორგანიზაციის ვებგვერდი