აჭარა. 12 სექტემბერს, ბათუმის დემოკრატიული ჩართულობის ცენტრში, აჭარის გარემოს დაცვისა და ბუნებრივი რესურსების სამმართველომ ადგილობრივ მოსახლეობასთან, საზოგადოებრივ და მედია ორგანიზაციებთან ერთად 2015 წლის პროგრამული ბიუჯეტი განიხილა. სამომავლოდ დაახლოებით 7 მილიონნახევარი ლარია გაწერილი. სამმართველოს ხელმძღვანელმა მიმდინარე წლის შედეგებიც შეაჯამა. ჩატარებული კვლევების თანახმად, შემცირებულია ზღვის წყლის, მდინარის კალაპოტის და ჰაერის დაბინძურების მაჩვენებელი. ზღვის დაბინძურებისას, სამმართველოს ხელმძღვანელის განმარტებით, მთავარი პრობლემა – დაბალი სამოქალაქო ცნობიერებაა. შეხვედრაზე ასევე განაცხადეს, რომ წელიწადში ორჯერ უკანონო ნაგავსაყრელების მონიტორინგი ხორციელდება. რაც შეეხება ტყით სარგებლობის საკითხებს, აჭარა-გურიის მასშტაბით სამეცნიერო ექსპედიცია ჩატარდა და სამომავლოდ ხე-ტყის მოპოვების პროცედურების გამარტივება დაიგეგმა.