თბილისი. საქართველოს ახალგაზრდა იურისტთა ასოციაციის (საია) ინფორმაციით, განათლების საერთაშორისო ცენტრი სასამართლოს გადაწყვეტილებას არ ასრულებს. „2015 წლის წელს ქამრან მამედოვი საზღვარგარეთ სამაგისტრო პროგრამის დაფინანსების მოსაპოვებლად მონაწილეობდა განათლების საერთაშორისო ცენტრის მიერ გამოცხადებულ კონკურსში. საკონკურსო კომისიის გადაწყვეტილებით მას დაფინანსებაზე დაუსაბუთებლად ეთქვა უარი. ქამრან მამედოვმა კომისიის გადაწყვეტილება საიას დახმარებით სასამართლოში გაასაჩივრა. მისი სარჩელი თბილისის სააპელაციო სასამართლოს 2017 წლის 12 ივლისის გადაწყვეტილებით დაკმაყოფილდა და ბათილად იქნა ცნობილი კონკურსის შედეგები, რის საფუძველზეც განათლების საერთაშორისო ცენტრს დაევალა საქმის გარემოებების დამატებითი გამოკვლევის გზით ახალი აქტის მიღება. გადაწყვეტილება კანონიერ ძალაში შევიდა საქართველოს უზენაესი სასამართლოს 2018 წლის 11 იანვრის განჩინების საფუძველზე, თუმცა ადმინისტრაციულ ორგანოს კანონიერ ძალაში შესული გადაწყვეტილების აღსრულების პროცედურები ამ დრომდე არ დაუწყია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ღია საზოგადოების ფონდი (OSGF) შრომის უფლებადარღვეული მოქალაქეებისთვის უფასო სამართლებრივ კონსულტაციაზე განცხადებას ავრცელებს. „ჩვენთვის ცნობილია, რომ არაერთმა დასაქმებულმა დაკარგა სამსახური ან სხვაგვარად დაერღვა შრომის უფლება. ზოგიერთ შემთხვევაში, დამსაქმებელმა თანამშრომლები იძულებით და არაანაზღაურებად შვებულებაში გაუშვა. არსებობს ისეთი შემთხვევებიც, როდესაც დასაქმებულების შესაბამისი სამართლებრივი საფუძვლისა და დასაბუთების გარეშე დაუკავეს ხელფასი ან მისი ნაწილი ან თვითიზოლაციის წესის დარღვევას და სამსახურში გამოცხადებას აიძულებდნენ. ეს მხოლოდ მცირე ჩამონათვალია შრომის უფლების შესაძლო დარღვევებისა. უფასო სამართლებრივი კონსულტაციის მისაღებად შეგიძლიათ მიმართოთ ჩვენს პარტნიორ ორგანიზაციებს – საქართველოს ახალგაზრდა იურისტთა ასოციაცია, Emc • ადამიანის უფლებების სწავლებისა და მონიტორინგის ცენტრი და სოლიდარობის ქსელი/Solidarity Network. შესაძლებლობის ფარგლებში, იურისტები მოგაწვდიან ინფორმაციას თქვენი უფლებებისა და სამართლებრივ გამოსავალს შემოგთავაზებენ. საჭიროების შემთხვევაში, დაგეხმარებიან, მოამზადოთ სარჩელი ან სხვა იურიდიული დოკუმენტაცია“, ნათქვამია განცხადებაში. სრულად... წყარო: osgf.ge

დღეს, 16:30 საათზე, გაიმართება ონლაინ სემინარი: „ქალები გარემოსდაცვითი და სოციალური სამართლიანობისთვის". ხანგრძლივობა: 1 საათი ბმული... ID (სმარტფონებისთვის) - 413-320-264 ინიციატივა ხორციელდება პროექტის - „ტყის მდგრადი მართვა საქართველოში ფარგლებში“, „ავსტრიის თანამშრომლობა განვითარებისათვის“ ფინანსური მხარადჭერით. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს ბლოგპოსტს: COVID-19-თან დაკავშირებული გამოწვევები შრომით ურთიერთობებში (დროებითი შრომისუუნარობისა და შვებულების გამო შრომითი ურთიერთობის შეჩერება). „საქართველოში კორონავირუსის გავრცელება მნიშვნელოვანი გამოწვევაა, როგორც ჯანმრთელობის, ისე - ეკონომიკური და სამართლებრივი თვალსაზრისით. პანდემიის გავრცელებამ გავლენა მოახდინა შრომით ურთიერთობებზეც. დღეის მდგომარეობით, მთავრობის მიერ გაცემული რეკომენდაციებისა და უსაფრთხოების ზომებიდან გამომდინარე, დამსაქმებლები ეფექტიანი ღონისძიებების განსაზღვრის აუცილებლობის წინაშე აღმოჩნდნენ. არსებული მდგომარებობის პირობებში, აქტუალურია შემდეგი საკითხები:  - შრომის კანონმდებლობით განსაზღვრული რა უფლებები და ვალდებულებები გააჩნიათ თვითიზოლაციასა და კარანტინში მყოფ პირებს;  - შეუძლია თუ არა დამსაქმებელს დასაქმებულის შვებულებაში მისი ნების საწინააღმდეგოდ გაშვება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „სამოქალაქო საზოგადოების განვითარების ინიციატივის“ განმახორციელებელი ორგანიზაციები ყურადღებით ადევნებენ თვალს ბოლო დროს საქართველოსა და მსოფლიოში ახალი პანდემიის, #COVID-19-ის, ირგვლივ განვითარებულ მოვლენებს. „ვირუსის გავრცელების დღიდან ზედმიწევნით ვიცავთ ჯანდაცვის მსოფლიო ორგანიზაციის, საქართველოს მთავრობისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაცემულ რეკომენდაციებს. ჩვენი კონსორციუმის წევრებისთვის თანამშრომელთა, ბენეფიციართა და პარტნიორთა ჯანმრთელობა და კეთილდღეობა უპირველესი ღირებულებაა. ვირუსის გავრცელების რისკის მომატების დღიდან კონსორციუმის წევრმა ყველა ორგანიზაციამ მიიღო შესაბამისი ზომები, რათა შეემცირებინა ვირუსის გავრცელების შესაძლებლობა, კერძოდ: გადადო თანამშრომელთა და ექსპერტთა საერთაშორისო და ქვეყნის შიდა მივლინებები; შეხვედრები და ღონისძიებები გადაიტანა ონლაინ რეჟიმში; შემოიღო ჰიგიენის წესების დაცვის განსაკუთრებული ზომები საკუთარ ოფისებში“, ნათქვამია განცხადებაში. სრულად... წყარო: პროექტის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: რა უნდა ვიცოდეთ სამსახურიდან გათავისუფლების შემთხვევაში. „იმ შემთხვევაში თუ დაცულია ყველა ზემოთ ჩამოთვლილი წინაპირობა და მაინც არსებობს საქართველოს შრომის კოდექსის 37-ე მუხლის პირველი პუნქტის „ა“ ქვეპუნქტით თქვენი გათავისუფლების საფუძველი, დამსაქმებელი ვალდებულია:  1. 30 კალენდარული დღით ადრე წინასწარი წერილობითი შეტყობინების გამოგზავნით გაცნობოთ მოსალოდნელი გათავისუფლების თაობაზე და გადაგიხადოთ 1 თვის კომპენსაცია.  2. გაგაფრთხილოთ გათავისუფლების თაობაზე არანაკლებ 3 კალენდარული დღით ადრე წინასწარი წერილობითი შეტყობინების გამოგზავნით და გადაგიხადოთ კომპენსაცია  არანაკლებ 2 თვის შრომის ანაზღაურების ოდენობით. აღნიშნულის გათვალისწინებით თუ მიიჩნევთ რომ თქვენი უფლებები შეილახა, გაგათავისუფლეს სამსახურიდან უკანონოდ ან არ მოგეცათ შესაბამისი კომპენსაცია, უფლებამოსილი ხართ მიმართოთ სასამართლოს კანონით განსაზღვრული წესით“. სრულად... წყარო: gyla.ge

თბილისი. საქართველოს სახალხო დამცველი, ნინო ლომჯარია აქვეყნებს ინფორმაციას ადამიანის უფლებების სტანდარტების შესახებ პანდემია/ეპიდემიის დროს. ომბუდსმენი შექმნილ ვითარებაში ადამიანის უფლებების დაცვის სტანდარტების შესახებ ხშირად დასულ შეკითხვებს პასუხიბს. სრულად... წყარო: ombudsman.ge

თბილისი. „კონსტიტუციის 42-ე მუხლის“ ინფორმაციით: აზერბაიჯანელი ჯურნალისტი და უფლებადამცველი აფგან მუხთარლი თავისუფალი. „არჩილ ჩოფიკაშვილს აფგან მუხთარლის მეუღლემ ლეილა მუსტაფაევამ ბერლინიდან შეატყობინა, რომ აფგან მუხთარლი პატიმრობიდან გაათავისუფლეს და რამდენიმე საათში იგი ბერლინში ჩადის. აზერბაჯანელი ჟურნალისტი და უფლებადამცველი აფგან მუხთარლი თბილისიდან 2017 წლის 29 მაისს გაიტაცეს, აზერბაიჯანში გადაიყვანეს და გამოგონებული ბრალდების საფუძველზე 6 წელი მიუსაჯეს. გატაცებული ჟურნალისტის ინტერესებს საქართველოში და ევროპის ადამიანის უფლებათა დაცვის საერთაშორისო სასამართლოში „თბილისის ადამიანის უფლებათა სახლის“ წევრი ორგანიზაციის „კონსტიტუციის 42-ე მუხლის“ იურისტი არჩილ ჩოფიკაშვილი და ნიკოლოზ ლეგაშვილი იცავენ, საქმეს მინიჭებული აქვს პრიორიტეტი და უახლოეს პერიოდში სასამართლო გადაწყვეტილებას მიიღებს მოპასუხე სახელმწიფოების - საქართველოსა და აზერბაიჯანის მიმართ“, ნათქვამია ორგანიზაციი ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი (UNICEF) აქვეყნებს ბლოგპოსტს პანდემიის პერიოდში ამოყალიბებულ სტიგმებზე. „პანდემიის პერიოდში ერთ-ერთ საშიშროებას წარმოადგენს სოციალური სტიგმა, რაც ხშირად დაავადებულებისადმი სტერეოტიპებისა და იარლიყების მიწებებაში, მათ დისკრიმინაციაში გამოიხატება. სტიგმასთან ბრძოლა მნიშვნელოვანია, რადგან მან შეიძლება: უბიძგოს ადამიანებს, დისკრიმინაციის თავიდან აცილების მიზნით დამალონ დაავადება; ხელი შეუშალოს ადამიანებს, რომ მყისიერად მიმართონ სამედიცინო დაწესებულებას; თავი შეაკავებინოს მათ ჯანსაღი ქცევისგან; მოერიდეთ გადამოუწმებელი ინფორმაციის გავრცელებას. - არასწორი წარმოდგენები, ჭორები და მცდარი ინფორმაცია ხელს უწყობს სტიგმას და დისკრიმინაციას, რაც აფერხებს დაავადებაზე რეაგირების ეფექტიანობას“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, რუსეთის ფედერაციამ კომპენსაცია გადაუხადა 2006 წელს რუსეთიდან კოლექტიური გამოძევების შედეგად დაზარალებულ იმ მოქალაქეებს, რომლებსაც ადამიანის უფლებათა ევროპულ სასამართლოში ინდივიდუალური საჩივრები ჰქონდათ წარდგენილი. „ამ ეტაპზე რუსეთის ფედერაციამ საიას დაცვის ქვეშ მყოფ 7 პირს ჩაურიცხა ევროპული სასამართლოს 2019 წლის 26 მარტის გადაწყვეტილებით მიკუთვნებული კომპენსაცია, ხოლო ერთ მომჩივანთან მიმართებით საია აგრძელებს კომუნიკაციას რუსეთის ფედერაციასთან“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ადამიანის უფლებათა ევროპულ სასამართლოში მომჩივანსა და სახელმწიფოს შორის მორიგება არ შედგა გენდერის სამართლებრივი აღიარების საქმეზე. „აღნიშნული საქმე ტრანსგენდერი მამაკაცის, ნიკოლო ღვინიაშვილისთვის საიდენტიფიკაციო დოკუმენტებში სასურველი გენდერის ასახვაზე ეროვნული ორგანოების უარს შეეხება“.  სრულად... წყარო: gyla.ge

თბილისი. გენდერული საინფორმაციო ქსელის ინფორმაციით, საქსტატის მონაცემებით, 2019 წლის IV კვარტალში საქართველოში კაცების საშუალო თვიური ნომინალური ხელფასი ქალების ხელფასზე 575 ლარით მეტი „სტატისტიკის ეროვნული სამსახურის” ანგარიშის თანახმად, 2019 წლის IV კვარტალში ქალების საშუალო ხელფასი 1 018.5 ლარით, ხოლო კაცების - 1 593.2 ლარით განისაზღვრა და ხელფასების წლიურმა ზრდამ, შესაბამისად, 112.5 და 124.7 ლარი შეადგინა. საქმიანობის სახეების მიხედვით კაცების ხელფასი თითქმის ყველა სექტორში აღემატებოდა ქალების ხელფასს“, ნათქვამია პლატფორმის ვებგვერდზ სრულად... წყარო: ginsc.net

თბილისი. საქართველოს ახალგაზრდა იურისტთა ასოციაციის ინფორმაციით, 27 იანვარს, საქართველოს სახალხო დამცველმა დაადგინა, რომ „იდენტობას“ მიმართ ბათუმის შოთა რუსთაველის სახელმწიფო უნივერსიტეტმა და აკაკი წერეთლის სახელობის ქალაქ ბათუმის საჯარო ბიბლიოთეკამ განახორციელეს სექსუალური ორიენტაციისა და საქმიანობის სფეროს ნიშნით პირდაპირი დისკრიმინაცია. „იდენტობას“ ინტერესებს საია იცავდა. „ომბუდსმენმა რეკომენდაციით მიმართა ბათუმის შოთა რუსთაველის სახელმწიფო უნივერსიტეტს და აკაკი წერეთლის სახელობის ქალაქ ბათუმის საჯარო ბიბლიოთეკას, რათა შეემუშავებინათ დისკრიმინაციის აკრძალვის და პრევენციის პოლიტიკის შიდა დოკუმენტი და მომავალი საქმიანობა წარემართათ თანასწორობის პრინციპის დაცვით“. ბათუმის უნივერსიტეტმა რეკომენდაციების შესასრულებლად აქტივობები დაგეგმა, ხოლო ბიბლიოთეკამ ომბუდსმენის რეკომენდაცია ცნობად მიიღო და სამომავლოდ გაითვალისწინებენ.  სრულად... წყარო: gyla.ge

თბილისი. 17 მარტს, EMC-ის წარმომადგენლებმა და ტყიბულში არსებული ძიძიგურის სახელობის შახტის მეშახტეებმა ერთობლივი პრესკონფერენცია გამართეს. „მეშახტეები რამდენიმე დღეა უარს აცხადებენ შახტში მუშაობაზე, იქ არსებული საფრთხისშემცველი სამუშაო გარემოს გამო. EMC მხარდაჭერას უწევს ძიძიგურის შახტის მეშახტეებს და მოუწოდებს სახელმწიფოს, გაითვალისწინოს მისივე დაკვეთით შესრულებული აუდიტის დასკვნის რეკომენდაციები და უსაფრთხო სამუშაოს გარემოს უზრუნველყოფამდე შეაჩეროს ნახშირმოპოვებითი სამუშაობი შახტებში და დაიცვას მეშახტეების შრომითი უფლებები“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. შშმ პირთა უფლებებზე მომუშავე ორგანიზაციები და აქტივისტები “შშმ პირთა უფლებების შესახებ” კანონპროექტის განხილვისას ეფექტიან ჩართულობას ითხოვენ.  „მოგეხსნებათ, საკითხის მნიშვნელობიდან და აქტუალობიდან გამომდინარე, სასიცოცხლოდ მნიშვნელოვანია აღნიშნული კანონის პროექტის განხილვაში შშმ პირთა თემის წარმომადგენლების, მშობლების და შშმ პირთა უფლებებზე მომუშავე ორგანიზაციების ჩართულობა, ვინაიდან არ მოხდეს რაიმე არასწორი გადაწყვეტილების მიღება. ამავდროულად აღვნიშნავთ, რომ ჯანდაცვის მსოფლიო ორგანიზაციის და საქართველოს დაავადებათა კონტროლის ეროვნული ცენტრის პირდაპირი რეკომენდაციაა, რომ კორონავირუსული ინფექციის საფრთხის გამო, მაქსიმალური დაცვა სჭირდება შშმ თემს, ვინაიდან სწორედ ისინი წარმოადგენენ ერთ-ერთ რისკ-ჯგუფს. შესაბამისად, ერთი მხრივ კანონის პროექტის განხილვაში მათი მონაწილეობა დიდ საფრთხეს წარმოადგენს მათი ჯანმრთელობისთვის, მეორე მხრივ კი, შშმ თემის ჩართულობის გარეშე მათთან დაკავშირებულ კანონპროექტზე მუშაობა აბსოლუტურად აზრს მოკლებულია, რაც ეწინააღმდეგება გაეროს შშმ პირთა უფლებების კონვენციას“, ნათქვამია ერთობლივ განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) თეონა ბაკურიძის სამსახურიდან გათავისუფლების გადაწყვეტილებას ეხმიანება. ორგანიზაცია მიიჩნევს, რომ მაუწყებლის დირექტორის, გიორგი კოხრეიძის მიერ მიღებული ბრძანება უკანონო და დაუსაბუთებელია და ის ახალი მენეჯმენტის მიერ მაუწყებლის დამოუკიდებლობის ხელყოფის წინასწარ ორგანიზებული და ორკესტრირებული პროცესის კიდევ ერთი მძიმე გამოვლინებაა. სრულად... წყარო: emc.org.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის უზენაესი სასამართლოს თავმჯდომარის თანამდებობაზე ასარჩევად ნინო ქადაგიძის წარდგენას ეხმიანება. „მნიშვნელოვანია, რომ საბჭომ ნინო ქადაგიძის წარდგენის შესახებ გადაწყვეტილება მხოლოდ უზენაესი სასამართლოს მოსამართლეებთან დახურულ კარს მიღმა გამართული კონსულტაციების საფუძველზე მიიღო. საკითხის განხილვაში ჩართული არ ყოფილან პირველი და მეორე ინსტანციის მოსამართლეები, სამოქალაქო საზოგადოების წარმომადგენლები და სხვა დაინტერესებული პირები. პროცესის მიმართ ზემოაღნიშნული კითხვებისა და თავად კანდიდატის უზენაეს სასამართლოში მოსამართლედ განწესების ისტორიის გათვალისწინებით, კოალიცია გაუმართლებლად მიიჩნევს, უზენაესი სასამართლოს თავმჯდომარის პოზიციაზე ნინო ქადაგიძის წარდგენას და მოუწოდებს დეპუტატებს უარი თქვან წარდგენილი კანდიდატის მხარდაჭერაზე“, ნათქვამია კოალიციის განცხადებაში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაცია (საია) მოწვეული ექსპერტის, ფატი ჩაფიჩაძის ბლოგპოსტს: დროში დაკარგული მართლმსაჯულება. "დაზარალებული პატიმრების უმრავლესობამ მოიხადა სასჯელი და სამართლის მოლოდინში მყოფნი, შესაძლოა ქუჩაშიც არაერთხელ შეხვედრილან იმ ადამიანებს, რომლებსაც, მათ მიმართ სავარაუდო უმძიმესი დანაშაულის ჩადენაში ედებათ ბრალი. სასამართლო არ ფიქრობს, რომ კანონიერი გზით სავარაუდო დამნაშავეების დასჯის მიუღწევლობამ, რა შედეგებამდე შეიძლება მიიყვანოს ამგვარი შეხვედრით ხელახლა ვიქტიმიზებული ადამიანი. იყო არბიტრი, არ ნიშნავს განყენებულად წარმართავდე პროცესს, მოსამართლეს 6 წლის განმავლობაში წუთით მაინც რომ წარმოედგინა, რას ნიშნავს განიცადო წამება/არაადამიანური მოპყრობა ან რას ნიშნავს ბრალს გდებდნენ ამგვარი დანაშაულის ჩადენაში, შეძლებდა კანონმდებლობით დადგენილ გონივრულ ვადაში, საქმეზე შემაჯამებელი გადაწყვეტილების მიღებას და მისი უპირველესი ამოცანის შესრულებას - ჭეშმარიტების დადგენას", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი სახელმწიფო დეპარტამენტის მიერ მშრომელთა უფლებრივი მდგომარეობის შესახებ გამოქვეყნებულ ანგარიშს მიმოიხილავს. "ანგარიშის თანახმად, საქართველოში შრომის არასათანადო პირობები სხვადასხვა კომპონენტში გამოიხატება. მათ შორის არის მინიმალური ხელფასის საკითხი, რომელიც კერძო თუ საჯარო სექტორში დასაქმებულებისთვის ოფიციალურ საარსებო შემოსავლის დონეზე დაბალი იყო", ნათქვამია ორგანიზაციის ვებგვერდზე. სრულად...  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: ქართულ კანონმდებლობაში უსახლკარო პირის დეფინიცია საერთაშორისო სტანდარტებს არ შეესაბამება. „ეროვნულ კანონმდებლობაში უსახლკარობის დეფინიცია ხარვეზიანი და ბუნდოვანია და არ შეესაბამება საერთაშორისო სტანდარტებს. ცნების ბუნდოვანება იწვევს სხვადასხვა სოციალურად მოწყვლადი ჯგუფის გარიყვას საცხოვრისის პოლიტიკის ხედვის არეალიდან“, ნათქვამია ორგანიზაციის ვებგვერდზე. სრულად... წყარო: emc.org.ge

აშშ-ის საელჩოებს მთელი მსოფლიოდან წვლილი შეაქვთ ადამიანის უფლებების ყოველწლიურ ანგარიშში. "ჩვენი დიპლომატები აგროვებენ, აანალიზებენ და თავს უყრიან სხვადასხვა წყაროდან, მათ შორის სამთავრობო სააგენტოებიდან, არასამთავრობო ორგანიზაციებიდან, მედია და სხვა წყაროებიდან მიღებულ ინფორმაციას. 2019 წლის ანგარიში ხელმისაწვდომია ბმულზე..." წყარო: ამერიკის საელჩოს გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვლოგპოსტს: დომინანტური მზერა აზერბაიჯანელი თემის მიმართ. „ვიდეოში მკვლევარები, ადგილობრივი აქტივისტები საუბრობენ ქვემო ქართლის რეგიონში კულტურული დომინაციისა და ადგილობრივი ეთნიკური უმცირესობების კულტურის წაშლის ნიშნებზე. მოქალაქეობის შესახებ გაბატონებული არაინკლუზიური გაგება, რომელიც მოქალაქეობას დომინანტური რელიგიური და ეთნიკური მარკერებით განსაზღვრავს და ეთნიკურ და რელიგიურ უმცირესობებს სტუმრის, ან უცხოს სტატუსით მონიშნავს, ცხადია გამრიყავ გარემოს ქმნის“, ნათქვამია ორგანიზაციის ვებგვერდზე. სრულად... წყარო: emc.org.ge