იმერეთი. 5 ივლისს, ქუთაისში, განათლების განვითარების და დასაქმების ცენტრის ორგანიზებით, იმერეთის რეგიონში მცხოვრები ახალგაზრდებისთვის ვორკშოპი ჩატარდა. ახალგაზრდებში მოხალისეობის კულტურის პოპულარიზაცია, სამოქალაქო აქტივიზმის შესახებ დიალოგის წარმართვა, ფორმალური და არაფორმალური მოხალისეობის მაგალითები, ლიტერატურა, წიგნიერება მოქალაქეობა და მისი როლი სამოქალაქო საზოგადოების განვითარებაში – ეს გახლდათ ქუთაისში ორგანიზებული ვორკშოფის ძირითადი საკითხები. შეხვედრას მწერალი გიორგი კეკელიძე უძღვებოდა. შეხვედრა გაიმართა პროექტის „სამოქალაქო საზოგადოების ინიციატივის“ ფარგლებში, რომელიც ევროკავშირის და ადენაუერის ფონდის ფინანსური მხარდაჭერით ხორციელდება.  წყარო: განათლების განვითარების და დასაქმების ცენტრი

ქვემო ქართლი. გაეროს სახლს, სამოქალაქო განვითარების სკოლის მეორე ნაკადის მონაწილეები ესტუმრნენ. სკოლა ქვემო ქართლის რეგიონში მცხოვრებ 70-ზე მეტ ახალგაზრდას აერთიანებს და მათ არაფორმალურ განათლებას ემსახურება. 6 თვის განმავლობაში სკოლის მონაწილეები, ლექციებისა და საჯარო დისკუსიების მეშვეობით, ადამიანის უფლებებთან, მრავალფეროვნებასა და თანასწორობასთან, მედიასა და ციფრულ წიგნიერებასთან, დისკრიმინაციისა და ძალადობის აღმოფხვრასთან დაკავშირებულ საკითხებს გაეცნენ. „წითელი ხიდის“ სამოქალაქო განვითარების სკოლა, გაეროს განვითარების პროგრამის, და ნორვეგიის მხარდაჭერით და საქართველოს პარლამენტის ეროვნულ ბიბლიოთეკასთან თანამშრომლობით შეიქმნა. სრულად...  წყარო: გაეროს განვითარების პროგრამა

სამცხე–ჯავახეთი. 50 სკოლის მოსწავლე საქართველოს 26 მუნიციპალიტეტიდან მწვანე ბანაკში შეიკრიბა. გარემოს დაცვის ექსპერტების დახმარებით, ახალგაზრდები კლიმატის ცვლილების შესახებ საინტერესო და სასარგებლო ინფორმაციას მიიღებენ, ხოლო შემდეგ, ადგილობრივ გარემოსდაცვით პროექტებს დაგეგმავენ. მწვანე ბანაკი „კლიმატის ელჩები“ უკვე მეოთხედ იმართება. ამ საგანმანათლებლო ინიციატივას უძღვებიან გაეროს განვითარების პროგრამა და გარემოსდაცვითი ინფორმაციისა და განათლების ცენტრი კლიმატის მწვანე ფონდის, საქართველოს, შვედეთისა და შვეიცარიის ხელშეწყობით.  სრულად... წყარო: გაეროს განვითარების პროგრამა

პატნიორობა ადამიანის უფლებებისთვის აქვეყნებს ინფორმაციას გაეროს ბავშვთა უფლებების კომიტეტის გადაწყვეტილებას ნინოწმინდის საქმეზე. რა დაევალა სახელმწიფოს – გაეცანით ორგანიზაციის ინფორმაციას. წყარო: ორგანიზაციის გვერდი სოციალურ ქსელში

ქვემო ქართლი. 22 ივნისს მედიის თვითრეგულირების თემაზე იმიტირებული პროცესი მარტყოფში, ახალგაზრდების მონაწილეობით, მედიის განვითარების ფონდმა გამართა. მარტყოფში გამართული შეხვედრა ბავშვთა დანაშაულის გაშუქებას ეხებოდა. ახალგაზრდებმა ამ თემაზე სასწავლო ფილმი ნახეს, რის შემდეგაც გუნდებად დაიყვნენ და იმიტირებული პროცესი გამართეს. პროექტი, ხარისხიანი მედია და მედიის გაცნობიერებული მოხმარება მედეგი საზოგადოებისთვის (ConMeCo), ხორციელდება დოიჩე ველე აკადემიის მიერ მედიის განვითარების ფონდთან და ადამიანის უფლებათა ცენტრთან თანამშრომლობით, ევროკავშირის ფინანსური მხარდაჭერით და გერმანიის ეკონომიკური განვითარებისა და თანამშრომლობის ფედერალური სამინისტროს თანადაფინანსებით. წყარო: მედიის განვითარების ფონდი

იმერეთი. "მწვანე განათლება"- ასე ერქვა მოხალისეობრივ აქტივობათა ციკლს, რომელიც სამი თვის განმავლობაში სოფელ გეგუთის N1 საჯარო სკოლის მოსწავლეების მიერ მეორადი რესურსის შეგროვებას და მისგან საჭირო და განახლებული ნივთების შექმნას ისახავდა მიზნად. გამოყენებული ბოთლებით, ქსოვილით და ერთჯერადი ჭიქებით, მე-10 და მე-11 კლასის მოსწავლეები კრეატიულ და ამავე დროს ძალიან საინტერესო ნივთებს ქმნიდნენ. ინიციატივას განათლების განვითარების და დასაქმების ცენტრის მიერ დაქირავებული ექსპერტი ეკატერინე ნადირაძე ხელმძღვანელობდა.  აქტივობა განხორციელდა განათლების განვითარების და დასაქმების ცენტრის (EDEC) მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის “სამოქალაქო საზოგადოების ინიციატივა“ ფარგლებში.  წყარო: EDEC

თბილისი. 35 წლის წინ მსოფლიომ მიიღო ბავშვის უფლებათა კონვენცია და აღიარა, რომ ბავშვებს აქვთ უფლებები, მათ შორის აზრის გამოხატვის და გადაწყვეტილების მიღებაში მონაწილეობის უფლება. საქართველო კონვენციას 30 წლის წინ, 1994 წელს შეუერთდა.  „ბავშვების აქტიური მონაწილეობის მნიშვნელობა ხაზგასმულია საქართველოს ბავშვის უფლებათა კოდექსშიც. ყველა ბავშვს აქვს უფლება, თავისუფლად გამოთქვას საკუთარი აზრი ისეთ საკითხებზე, რაც მას ეხება და მნიშვნელოვანია ამ აზრის გათვალისწინება ბავშვებთან დაკავშირებული გადაწყვეტილებების მიღებისას“, ნათქვამია გაეროს ბავშვთა ორგანიზაციის გვერდზე სოციალურ ქსელში.  წყარო: გაეროს ბავშვთა ორგანიზაცია საქართველოში

სამეგრელო. ათინათის პროექტის "ახალგაზრდების ჩართულობა და განვითარება" ფარგლებში, პარტნიორი სკოლის მოსწავლეებისთვის ჩატარდა ტრენინგი თემაზე - მოხალისეობა. ტრენინგის მიზანი იყო ახალგაზრდებში მოხალისეობრივი კულტურის განვითარება და მათი წახალისება აქტიურად ჩაერთონ საზოგადოებრივ საქმიანობაში. ახალგაზრდებმა მიიღეს ინფორმაცია მოხალისეობის არსზე, მის უპირატესობებსა და დადებით გავლენაზე საზოგადოებრივ ცხოვრებაზე.  პროექტი “ახალგაზრდების ჩართულობა და განვითარება” ხორციელდება აშშ საერთაშორისო განვითარების სააგენტოს პარტნიორობა მეტი გამძლეობისა და მედეგობისთვის პროგრამის ფარგლებში, გაეროს განვითარების პროგრამის და გაეროს ბავშვთა ფონდის მიერ და ამერიკელი ხალხის დახმარებით აშშ საერთაშორისო განვითარების სააგენტოსთან ერთად.  წყარო: ათინათი

შიდა ქართლი. 1 ივნისს მედიის განვითარების ფონდის მედიაწიგნიერების გუნდი გორს ეწვია.  ორგანიზაციის წარმომადგენლები ახალგეზრდებს ესაუბრნენ, თუ როგორ უნდა გაარჩიონ ერთმანეთისგან დეზინფორმაცია, მცდარი და დამაზიანებელი ინფორმაცია, როგორ გადავამოწმონ წყაროს სანდოობა და მანიპულაციური ვიზუალი. მედიის განვითარების ფონდის (MDF) სემინარი გაეროს განვითარების ფონდის პროგრამის – „მრავალფეროვნებაშია" – ფარგლებში ტარდება და ახალგაზრდებისთვის მედიაწიგნიერებასთან ერთად ციფრული წიგნიერების სემინარებსაც ითვალისწინებს.  სრულად...  წყარო: მედიის განვითარების ფონდი

თბილისი. სოციალური სამართლიანობის ცენტრი ბავშვთა დღისადმი მიძღვნილ პუბლიკაციას აქვეყნებს.  საქსტატის მონაცემებზე დაყრდნობით, ორგანიზაცია ავრცელებს ინფორმაციას, რომ „2023 წლის მონაცემებით, ბავშვთა 16% აბსოლუტურ სიღარიბეში ცხოვრობს. ეს მონაცემი სიღარიბის მთელი ქვეყნის მასშტაბით საშუალო მაჩვენებელსა (11.8%) და სხვა ასაკობრივ მაჩვენებლებსაც (18-64 წწ - 11.5 %; 65 წ. და მეტი - 8 %) მნიშვნელოვნად აღემატება“. სრულად...  წყარო: სოციალური სამართლიანობის ცენტრი

სამცხე–ჯავახეთი. დემოკრატიული ჩართულობის ცენტრების ქსელის ახალციხის ოფისში „ადამიანის უფლებებისა და დემოკრატიული მოქალაქეობის შესახებ“ ტრენინგი გაიმართა. ახალგაზრდებმა იმსჯელეს და მიიღეს ინფორმაცია ადამიანის საყოველთაო უფლებებზე და განიხილეს ამ კუთხით არსებული გამოწვევები, დადგეს სიმულაციები საზოგადოების სხვადასხვა ტიპების შესახებ, განიხილეს თუ რას ნიშნავს დემოკრატია, დემოკრატიული მოქალაქეობა და რატომაა მნიშვნელოვანი თოთოეული ადამიანის უფლებების დაცვა ქვეყნის განვითარებისთვის.  სრულად... წყარო: დემოკრატიულიჩართულობის ცენტრების ქსელი

თბილისი. გაეროს ბავშვთა ფონდი პუბლიკაციას აქვეყნებს. რას ნიშნავს ბავშვზე მორგებული მართლმსაჯულება. გაეცანით პუბლიკაციას, რომელიც საქართველოს სახალხო დამცველის მიერ, გაეროს ბავშვთა ფონდთან თანამშრომლობით და ევროკავშირის ფინანსური მხარდაჭერით შეიქმნა. სრულად.. წყარო: გაეროს ბავშვთა ფონდი

იმერეთი. ეკონომიკური პოლიტიკის კვლევის ცენტრი, ევროკავშირის მიერ დაფინანსებული პროექტის „ერთიანი საქართველო - ევროპისთვის“ ფარგლებში, 14-დან 18 წლამდე ახალგაზრდებს აძლევს შესაძლებლობას გაიმარჯვონ კონკურსში და გახდნენ 4 დღიანი საზაფხულო ბანაკის მონაწილე. პროექტის ფარგლებში დაგეგმილია 5 ბანაკის ჩატარება, ჯამში 250 მონაწილით, ივლისში, საქართველოში.  ამ საკითხზე, 18 მაისს ქუთაისში, სასტუმრო ‘ბესტ ვესთერნში’ გაიმართა საინფორმაციო შეხვედრა ახალგაზრდებთან.  სრულად...  წყარო: ეკონომიკური პოლიტიკის კვლევის ცენტრი

თბილისი.„ახალგაზრდა პედაგოგთა კავშირმა“ პროექტის „უკეთესი განათლება, გადაწყვეტილების მიღების პროცესში მონაწილეობა და სოციალური სარგებლის ხელმისაწვდომობა“ ფარგლებში, დაიწყო პოზიტიური მშობლობის ტრენინგების ციკლი, ოჯახის გაძლიერების მომსახურებაში ჩართული მშობლებისათვის. სატრენინგო მოდულის სესიები ემსახურება ცნობიერების ამაღლებას შემდეგ საკითხებზე: აღზრდის ეფექტური მეთოდები, ბავშვთა შრომა, რთული ქცევის მართვა, კომუნიკაციის გაუმჯობესება ინტერპერსონალურ ურთიერთობებში, აღზრდის სტილი, მიჯაჭვულობა, ბავშვის ფსიქოლოგიური საჭიროებები, თვითშეფასების განვითარება და სხვა. პროექტი ხორციელდება გერმანული ფონდის „Brot für die Welt“-ის ფინანსური მხარდაჭერით. სრულად... წყარო: ახალგაზრდა პედაგოგთა კავშირი

თბილისი. 25 აპრილის განათლების განვითარების და დასაქმების ცენტრის (EDEC) და შიდა ქართლის რეგიონული ჰაბის - „საზოგადოება ბილიკის“ ორგანიზებით, გაიმართა მოხალისეობის რეგიონული ფორუმი. ფორუმის მიზანია შიდა ქართლის რეგიონის ახალგაზრდებში მოხალისეობის კულტურის პოპულარიზაცია, მოხალისეების მიმღებ ორგანიზაციებსა და მოხალისეობით დაინტერესებულ პირებს შორის კომუნიკაციის ხელშეწყობა, ასევე, მოსახლეობაში რეგიონული საზოგადოებრივი ორგანიზაციების ცნობადობის გაზრდა, მათი საქმიანობის, განხორციელებული პროექტების შესახებ რეგიონის მოსახლეობის ინფორმირება და სამოქალაქო საზოგადოების ორგანიზაციების მიმართ ნდობის ამაღლება.  ღონისძიება გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (2021-2025) ფარგლებში. სრულად...  წყარო: საზოგადოება ბილიკი

გურია. 24 მარტს, ოზურგეთში, განათლების განვითარების და დასაქმების ცენტრის ორგანიზებით, გურიაში მცხოვრები ახალგაზრდებისთვის სამუშაო შეხვედრა ჩატარდა. სამუშაო შეხვედრა ორგანიზებული იყო განათლების განვითარების და დასაქმების ცენტრის (EDEC) მიერ, ევროკავშირისა და კონრად ადენაუერის ფონდის ფინანსური მხარდაჭერით, პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტს „სამოქალაქო საზოგადოების ინიციატივა“ ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად – საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: განათლების განვითარების და დასაქმების ცენტრი

სამცხე-ჯავახეთი.ახალციხის ახალგაზრდული ცენტრის წევრების ინიციატივით, საზოგადოებრივმა ორგანიზაცია დემოკრატ მესხთა კავშირმა პრეზენტაცია თემაზე: მრავალფეროვნების მართვა გამართა. ღონისძიება დაიგეგმა USAID-ის პროგრამის ერთიანობა მრავალფეროვნებაშია, ფარგლებში, რომელსაც ახორციელებს UNA Georgia • საქართველოს გაეროს ასოციაცია USAID-ის ფინანსური მხარდაჭერით. სრულად... წყარო: დემოკრატ მესხთა კავშირი

თბილისი. კონსულტაციის და ტრენინგების ცენტრი აქვეყნებს ინფორმაციას, 2023 წლის 21 ნოემბერს, ევროკავშირის მიერ მიღებულ „სანსებასტიანის დეკლარაციის“ შესახებ, რომელიც სასკოლო კვებას ეხება. "ევროკავშირის წევრი ქვეყნები თანხმდებიან, რომ უფასო სასკოლო კვების უზრუნველყოფა ყველაზე ეფექტიანი ღონისძიებაა სასურსათო დაუცველობის, ბავშვთა სიღარიბისა და სოციალური გარიყულობის აღმოსაფხვრელად.  დეკლარაცია მოუწოდებს ყველა ქვეყანას, საწყის ეტაპზე, სასკოლო დღის მანძილზე, უზრუნველყოს სულ მცირე ერთი უფასო კვება ყველა ბავშვისთვის ვისაც ეს სჭირდება და თანდათან მიაღწიოს საყოველთაო დაფარვას".  სრულად...  წყარო: ctc.org.ge

თბილისი.18 მარტს, 19:00 საათზე, GIPA-ში, გაიმართება სამართლიანი არჩევნებისა და დემოკრატიის საერთაშორისო საზოგადოების (ISFED) მიერ ორგანიზებული საჯარო ლექცია: „შენი ხმის მნიშვნელობა 2024 წლის არჩევნებზე“.  შეხვედრას გაუძღვება “სამართლიანი არჩევნების” აღმასრულებელი დირექტორი, ნინო დოლიძე.  სრულად... წყარო: სამართლიანი არჩევნები

აჭარა. ბათუმის ახალგაზრდულ ცენტრში გაიმართა შეხვედრა თემაზე – მრავალფეროვნება. მონაწილეებმა პრაქტიკული და ჯგუფური აქტივობების, შემდგომ კი დისკუსიით გაიაზრეს მრავალფეროვნების დადებითი და უარყოფითი მხარეები. შეხვედრა გაიმართა პროგრამის „ერთიანობა მრავალფეროვნებაშია“.  პროგრამა ხორციელდება საქართველოს გაეროს ასოციაციის (UNAG) მიერ, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით, რეგიონში პროგრამის პარტნიორია თავისუფალ ჟურნალისტთა სახლი.  წყარო: ბათუმის ახალგაზრდული ცენტრი

აჭარა. „ჩაერთე მართვის“ ბათუმის კლუბის წევრი ახალგაზრდები აგრძელებენ ადვოკატირების კამპანიას. ამ მიზნით მათ სხვადასხვა აქტივობები განახორციელეს. კლუბის მონაწილეთა ნაწილმა, მონაწილეობითი მექანიზმების შესახებ ცნობიერების ამაღლების და ადგილობრივი საჭიროებების მოკვლევის მიზნით, ხანდაზმულებთან და მოხალისეებთან გამართა შეხვედრა.  ახალგაზრდების ნაწილი კი ბათუმის დამოუკიდებელი ცხოვრების ცენტრის წარმომადგენლებს შეხვდნენ და ბათუმის ერთ–ერთი ქუჩის ადაპტირების საკითხებზე მონიტორინგი ჩაატარეს.  „ჩაერთე მართვის“ კლუბის წევრების მონიტორინგის მიზანია შედეგებზე დაყრდნობით სარეკომენდაციო წინადადებების შემუშავება და მუნიციპალიტეტის წარმომადგენლებისთვის განსახილველად წარდგენა.  კლუბი „ჩაერთე მართვაში“ საქართველოს 4 რეგიონში ფუნქციონირებს. კლუბები შეიქმნა კამპანიის „ჩაერთე მართვის“ ფარგლებში, რომელსაც სამოქალაქო საზოგადოების ინსტიტუტი (CSI), აშშ–ის საერთაშორისო განვითარების სააგენტოს ადგილობრივი თვითმმართველობის პროგრამის ფარგლებში. წყარო: ჩაერთე მართვაში

თბილისი. სამართლიანი არჩევნები კავკასიის უნივერსიტეტის სტუდენტებისთვის იწყებს სასერტიფიკატო კურსს “დეზინფორმაცია და პროპაგანდისტული ნარატივები სოციალურ მედიაში”.  სასწავლო კურსის ფარგლებში სტუდენტები მიიღებენ ზოგად ცოდნას დეზინფორმაციისა და პროპაგანდის შესახებ, ასევე გამოიმუშავებენ ინფორმაციის გადამოწმებისა და დეზინფორმაციის ამოცნობის უნარებს.  კურსის ბოლოს სტუდენტები წარადგენენ ესეებს, ხოლო ორი საუკეთესო სტუდენტი გაივლის სტაჟირებას სამართლიანი არჩევნების სოციალური მედიის მონიტორინგის გუნდში.  წყარო: სამართლიანი არჩევნები