სამეგრელო. პროექტის „სამეგრელო-ზემო სვანეთის რეგიონში სახალხო დამცველის ოფისის გაძლიერება" მხარდაჭერით, ჟურნალისტებისა და ადგილობრივი თვითმართველობების წარმომადგენლებისთვის ტრენინგი გაიმართა. „გენდერული საკითხებისა და ჟურნალისტური ეთიკის გაშუქების თემაზე გამართულ ტრენინგზე განიხილეს გენდერული თანასწორობის, სექსიზმის, სტერეოტიპული დამოკიდებულების და სქესის ნიშნით დისკრიმინაციის საკითხები", ნათქვამია სახალხო დამცველის ოფიციალურ ვებ-გვერდზე. სრულად... წყარო: www.ombudsman.ge

თბილისი. არასამთავრობო ორგანიზაციები რუსთავი 2-ის მხარდამჭერთა დაკავებას და მათთვის ორთვიანი წინასწარი პატიმრობის შეფარდებას ეხმაურებიან. „მოვუწოდებთ საქართველოს ხელისუფლებას და სამართალდამცავ ორგანოებს, ერთი მხრივ, პატივი სცენ საქართველოს კონსტიტუციით აღიარებულ შეკრებებისა და მანიფესტაციების თავისუფლებას, მეორე მხრივ კი მოახდინონ სათანადო და ერთგვაროვანი რეაგირება ერთმანეთის იდენტურ კანონდარღვევებზე და აღნიშნული დააფუძნონ კანონის წინაშე თანასწორობის ფუნდამენტურ პრინციპს", ნათქვამია ერთობლივ განცხადებაში. სრულად... წყარო: gdi.ge

სამცხე-ჯავახეთი. 4 ოქტომბერს, ქალთა პოლიტიკურ გააქტიურებასთან დაკავშირებით, ახალციხის გენდერის მედიაცენტრში, გაიმართა „გენდერული საუბრები”, რომელშიც მონაწილეობა მიიღეს ადგილობრივმა ლიდერმა ქალებმა, არასამთავრობო ორგანიზაციებმა, თვითმმართველობებში გენდერის მრჩეველებმა და ადგლობრივი მედიის წარმომადგენლებმა. „დისკუსია ინიციატივებისათვის” პროექტის „აირჩიე თანასწორობა” ფარგლებში გაიმართება, რომელსაც "ჟურნალისტთა ქსელი გენდერული თანასწორობისთვის" ახორციელებს, საარჩევნო სისტემების განვითარების, რეფორმებისა და სწავლების ცენტრის მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) მედიისა და ტელეკომუნიკაციების მიმართულების ხელმძღვანელმა ეუთოს მე-12 სამხრეთ კავკასიურ კონფერენციაზე მოხსენება გააკეთა. მოხსენება შეეხო თემას: „ციფრულ მაუწყებლობაზე საქართველოს გადასვლა და მისი გავლენა მედია პლურალიზმზე". „უჩა სეთურმა შეაჯამა საქართველოში ციფრულ მაუწყებლობაზე გადასვლის პროცესი და კონფერენციის მონაწილეებს მიაწოდა ინფორმაცია ყველა ეტაპის შესახებ, რომელიც განხორციელდა სახელმწიფო სტრატეგიის შექმნიდან მის სრულ რეალიზაციამდე", ნათქვამია ორგანიზაციის განცხადებაში. სრულად... წყარო: idfi.ge

თბილისი. 29 სექტემბერს, „თბილისი მარიოტში" გაიხსნა სამხრეთ კავკასიის ქვეყნების მე-12 მედია კონფერენცია. შეხვედრაში მონაწილეობდნენ რეგიონის ქვეყნების წარმომადგენლები: ჟურნალისტები, მედია მენეჯერები, უფლებადამცველები, არასამთავრობო ორგანიზაციების ლიდერები და ექსპერტები, ოფიციალური პირები. ასევე, საერთაშორისო ინსტიტუტების წარმომადგენლები და მედიის თავისუფლების საკითხებში ეუთოს წარმომადგენლობის ოფისი. 2015 წლის ორდღიანი კონფერენციის თემაა: გაციფვრა, როგორც მედიის თავისუფლების ინსტრუმენტი. სრულად... წყარო: ორგანიზაციის ვებ-გვერდი სოციალურ ქსელში

თბილისი. პარლამენტის თავმჯდომარემ მედიასაშუალებების წარმომადგენლებთან შეხვედრისას განაცხადა, რომ მედიასთან ურთიერთობის ახალ ფორმატს - მედიაცენტრში შეხვედრებს ეყრება საფუძველი. „დავით უსუფაშვილის განცხადებით, ცოტა ხნის წინ საქართველოს პარლამენტში ჩატარებულ ღია მმართველობის პარტნიორობის საკანონმდებლო ღიაობის სამუშაო ჯგუფის კონფერენციაზე განხილვის მთავარი თემა პარლამენტის და საკანონმდებლო პროცესის ღიაობა იყო. ... „საჭიროა მეტი და უფრო ინოვაციური მიდგომები იმისთვის, რომ პარლამენტის საქმიანობა ადეკვატურად იქნეს მიტანილი საზოგადოებამდე და პირიქით, საზოგადოების განწყობები პარლამენტამდე. ამიტომ, მინდა, რომ შემოგთავაზოთ ეს ფორმატი," ნათქვამია ორგანიზაციის ვებ-გვერდზე. სრულად... წყარო: www.media.ge

აჭარა. 27 სექტემბერს, ბათუმის ხელოვნების უნივერსიტეტში გაიმართა დისკუსია თემაზე „ქართული მედიის პრობლემები და გამოწვევები". დისკუსიის მომხსენებელმა, ჟურნალისტმა ზვიად ქორიძემ ისაუბრა ქართული მედიის პრობლემებსა და გამოწვევებზე. ასევე, მოხსენებაში ზვიად ქორიძემ განიხილა, თუ რა შეიცვალა მედიაში 2012 წლის საპარლამენტო არჩევნების შემდეგ. სრულად... წყარო: ორგანიზაციის ვებ-გვერდი სოციალურ ქსელში

აჭარა. 20 სექტემბერს, პროექტის „სამოქალაქო პასუხისმგებლობის გაძლიერება ახალგაზრდებში" ფარგლებში ჩატარდა საგანმანათლებლო ტრენინგი თემაზე: „როგორ ვიმუშაოთ ახალ ამბებზე". პროექტის უმთავრესი მიზანია ხელი შეუწყოს ჯანსაღი აზრისა და დამოკიდებულებების გაზრდას ახალგაზრდებში, აგრეთვე დემოკრატიული და ლიბერალური ღირებულებებისა და ფასეულობების შესახებ ცნობიერების ამაღლებას, ტოლერანტული გარემოს გაძლიერებას და მოქალაქე ჟურნალისტის როლის გაცნობიერებით სამოქალაქო პასუხისმგებლობის გაზრდას... სრულად... წყარო: ორგანიზაციის ვებ-გვერდი სოციალურ ქსელში

თბილისი. „საქართველოს ახალგაზრდა იურისტთა ასოციაცია" ეხმაურება 15 სექტემბერს ოზურგეთში განვითარებულ მოვლენებს. „ერთიანი ნაციონალური მოძრაობის" წევრების და „თავისუფალი ზონის" წევრის დაკავებასთან დაკავშირებით, იმავე დღეს, ტელეკომპანია ,,მაესტროს" რეპორტიორმა ირაკლი ვაჩიბერაძემ კითხვით მიმართა პრემიერ-მინისტრ ირაკლი ღარიბაშვილს. ირაკლი ვაჩიბერიძე აღნიშნავს, რომ ამ კითხვის დასმის გამო მის მიმართ ადგილი ჰქონდა მუქარას შსს გურიის სამხარეო სამმართველოს უფროსის კობა ცერცვაძის მხრიდან. ჟურნალისტი აღნიშნავს, რომ კობა ცერცვაძემ მას არ მისცა საშუალება მოეპოვებინა პრემიერის პასუხი მის შეკითხვებზე", ნათქვამია ორგანიზაციის ვებ-გვერდზე. საია მოუწოდებს საქათველოს მთავარ პროკურატურას დაიწყოს ჟურნალისტის წინააღმდეგ შესაძლო დანაშაულის გამოძიება, სამართალდამცავ ორგანოებს კი ქალაქის იერსახის დამახინჯების თავიდან ასაცილებლად ,,სიტყვისა და გამოხატვის თავისუფლების შესახებ" კანონის გამოყენებას ურჩევს. სრულად... წყარო: gyla.ge

თბილისი. ქარტიის საბჭო, 15 სექტემბერს მომხდარ ინციდენტს ეხმიანება. „ტელეკომპანია "მაესტროს” რეპორტიორის, ირაკლი ვაჩიბერიძის ინფორმაციით, ირაკლი ღარიბაშვილისთვის მის მიერ დასმული შეკითხვის გამო შსს-ს გურიის სამხარეო მთავარი სამმართველოს უფროსმა კობა ცერცვაძემ "გვერდზე გაიყვანა” და ახსნა-განმარტებები მოსთხოვა. ეს, ამ თვეში, სახელმწიფო მოხელეების მხრიდან ჟურნალისტებისთვის პროფესიულ საქმიანობაში ხელის შეშლის უკვე მეორე შემთხვევაა," ნათქვამია ქარტიის განცხადებაში. საქართველოს ჟურნალისტური ეთიკის ქარტია შეახსენებს სახელმწიფო მოხელეებს, „რომ ჟურნალისტისთვის პროფესიულ საქმიანობაში ხელის შეშლა სისხლის სამართლის კოდექსით დასჯადი ქმედებაა და მოუწოდებს სამართალდამცველ ორგანოებს, დროული და ადეკვატური რეაგირებისკენ", ნათქვამია ვებ-გვერდზე. სრულად... წყარო: www.media.ge

თბილისი. კოალიციამ „მედია ადვოკატირებისთვის" 10 სექტემბერს მიმართა საზოგადოებრივი მაუწყებლის გენერალურ დირექტორს და სამეურვეო საბჭოს თავმჯდომარეს. რათა „წერილობით და საჯაროდ განმარტონ ეკა მიშველაძის პოლიტიკური გადაცემიდან ჩამოშორების მიზეზი", ნათქვამია ინფორმაციის თავისუფლების განვითარების ინსტიტუტის ვებგვერდზე გავრცელებულ ინფორმაციაში. სრულად... წყარო: idfi.ge

თბილისი. კამპანია „ეს გეხებაში" ჩართული საზოგადოებრივი ორგანიზაციები ერთობლივ განცხადებას ავრცელებენ და სამართალდამცავ ორგანოებს ჟურნალისტ ეკა მიშველაძის განცხადების საფუძველზე გამოძიების დაწყებისკენ. „დაუყოვნებლივ დაიწყონ ჟურნალისტის საჯარო განცხადების საფუძველზე გამოძიება და თუ ადგილი ჰქონდა უკანონო თვალთვალსა და მიყურადებას, დამნაშავეები გამოავლინონ. წინააღმდეგ შემთხვევაში, ხელისუფლებას დაეკისრება პოლიტიკური პასუხისმგებლობა ქვეყანაში ჟურნალისტური საქმიანობისა და ოპოზიციური პოლიტიკური საქმიანობის გამო მოქალაქეების თვალთვალსა და მათზე განხორციელებულ ზეწოლაზე", ნათქვამია განცხადებაში. სრულად... წყარო: gyla.ge

თბილისი. 5 სექტემბერს, ჟურნალისტური ეთიკის ქარტიამ განიხილა მედიის განვითარების ფონდის (MDF), საქართველოს დემოკრატიული ინიციატივისა (GDI) და ტოლერანტობისა და მრავალფეროვნების ინსტიტუტის (TDI) სარჩელი. სარჩელი ეხებოდა gurianews.com-ზე გამოქვეყნებულ ერთ–ერთ სტატიას. საბჭომ ორგანიზაციების სარჩელი დააკმაყოფილა. სრულად... წყარო: www.gdi.ge

თბილისი. 4 სექტემბერს, კოალიციის „მედიის ადვოკატირებისათვის" ორგანიზებით მრგვალი მაგიდა გაიმართა. პრეზენტაციის შემდეგ მედია გამოწვევებზე დისკუსია გაიმართა და მიმდინარე ცვლილებები გაანალიზდა. კოალიცია უარყოფითად აფასებს ტელეკომპანია „იმედის" საზოგადოებრივ-პოლიტიკური გადაცემების დახურვას. ორგანიზაციის აზრით, „რუსთავი 2"-სა და უფრო ადრე ტელეკომპანია „მაესტროზე" განვითარებული მოვლენები, არა მარტო ამცირებს მედიაპლურალიზმს საქართველოში, არამედ მიუთითებს მედიის თავისუფლების შეზღუდვის საფრთხეზე 2016 წლის არჩევნების წინა პერიოდში. სრულად... წყარო: www.osgf.ge

თბილისი. ჟურნალისტური ეთიკის ქარტიის საბჭო ეხმაურება პირველ სექტემბერს ქედაში მომხდარ ინციდენტს, რომლის დროსაც „აჭარის საზოგადოებრივი მაუწყებლის ინფორმაციით, ტელეკომპანიის ჟურნალისტს სიტყვიერი და ფიზიკური შეურაცხყოფა მიაყენეს. ... საბჭო შეშფოთებას გამოთქვამს მომხდარის გამო, მოუწოდებს აჭარის ავტონომიური რესპუბლიკის მთავრობას, ასევე აჭარის რესპუბლიკის პროკურატურას დროული და ადეკვატური რეაგირებისკენ...", ნათქვამია განცხადებაში. სრულად... წყარო: media.ge

თბილისი. საქართველოს ახალგაზრდა იურისტთა ასოციაცია უკიდურესად უარყოფითად აფასებს პოლიტიკური თოქ-შოუების „რეაქციისა" და „იმედია კვირის" დახურვის ფაქტს. „სამაუწყებლო საქმიანობა დაკავშირებულია მაღალ სოციალურ პასუხისმგებლობასთან და საკუთრების ტიპის მიუხედავად (კერძო თუ საზოგადოებრივი), მაუწყებელმა პატივი უნდა სცეს საზოგადოების მოლოდინებს. ამ ვალდებულებებზე მიუთითებს საქართველოს კანონმდებლობით დადგენილი მთელი რიგი მოთხოვნები და პასუხისმგებლობებიც, რაც სამაუწყებლო ბიზნესის კომერციულ ინტერესებთან შესაბამისობის უზრუნველყოფას ისახავს მიზნად", ნათქვამია ორგანიზაციის განცხადებაში. საია მოუწოდებს ტელეკომპანიის მესაკუთრეებსა და ხელმძღვანელებს განსაკუთრებული სიფრთხილით მოეკიდონ სამაუწყებლო ბიზნესის მართვას... სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) „რეაქციისა" და „იმედის კვირის" შესახებ ტელეკომპანია „იმედის" განცხადებას ეხმაურება. „დასანანია, რომ ტელეკომპანია „იმედის" მხრიდან აღნიშნული გადაცემების დახურვასთან დაკავშირებით საკმარისი განმარტება არ გაკეთებულა. მიუხედავად იმისა, რომ „იმედი" კერძო ტელეკომპანიაა, საზოგადოების მაღალი ინტერესიდან გამომდინარე, ვფიქრობთ ასეთი განმარტების გაკეთება აუცილებელია, მით უფრო, რომ პოლიტიკურ ზეწოლაზე ღიად საუბრობენ თავად გადაცემის ავტორები. ამასთანავე, სრულიად გაურკვეველია, რის საფუძველზე მოხდა ისეთი გადაცემების დახურვა, რომელთა რეიტინგი განსაკუთრებით მაღალია", ნათქვამია განცხადებაში. სრულად... წყარო: www.isfed.ge

თბილისი. საერთაშორისო გამჭვირვალობა საქართველო ტელეკომპანია „იმედის" მიერ გავრცელებულ ოფიციალურ განცხადებას ეხმიანება. 29 აგვისტოს ტელეკომპანია „იმედმა" საზოგადოებრივ-პოლიტიკური გადაცემების დროებით შეჩერების შესახებ განცხადება გაავრცელა. გადაცემები „რეაქცია" და „იმედის კვირა" ახალი სეზონიდან „იმედზე" აღარ გავა. ტელეარხის ოფიციალური განცხადების მიხედვით, არხზე საზოგადოებრივ-პოლიტიკური გადაცემების ფორმატის ცვლილება იგეგმება, ახალ პროდუქტს კი მაყურებელს 2016 წლიდან შესთავაზებენ. „... ტელეკომპანია „იმედი", როგორც კერძო კომპანია, სრულიად თავისუფალია არხის საქმიანობის, მისი საკადრო თუ საინფორმაციო პოლიტიკის დაგეგმვისას. თუმცა, როგორც საერთო ეროვნული მაუწყებელი, ის ანგარიშვალდებულია საზოგადოების წინაშე. აქედან გამომდინარე, „საერთაშორისო გამჭვირვალობა - საქართველოს" მიაჩნია, რომ არხის ხელმძღვანელობამ დროულად უნდა განმარტოს საკუთარი გადაწყვეტილების მიზეზები და მოტივები", ნათქვამია განცხადებაში. სრულად... წყარო: transparency.ge

თბილისი. ჟურნალისტური ეთიკის ქარტიის საბჭო ეხმაურება ტელეკომპანია „იმედის" მიერ გავრცელებულ ოფიციალურ განცხადებას, რომელიც საზოგადოებრივ–პოლიტიკურ ტოკ–შოუებს ეხება. „...ქარტიის საბჭო მიიჩნევს, რომ ახალი სატელევიზიო სეზონის წინ ორი რეიტინგული საზოგადოებრივ-პოლიტიკური ტოკ-შოუს დახურვა უარყოფითად აისახება როგორც მედიის მრავალფეროვნებაზე, ისე პოლიტიკური პროცესის მიმდინარეობაზე ქვეყანაში. ვფიქრობთ, რომ საზოგადოებრივ-პოლიტიკური გადაცემების სეზონის გახსნის 2016 წლამდე გადატანა სატელევიზიო სივრცეში პოლიტიკური დისკურსის საკმაოდ ხანგრძლივ დეფიციტს წარმოქმნის", ნათქვამია media.ge–ზე. სრულად... წყარო: media.ge

თბილისი. მაღალი საჯარო ინტერესის გათვალისწინებით, სახალხო დამცველმა შეისწავლა თბილისის საქალაქო სასამართლოს სამოქალაქო საქმეთა კოლეგიის მიერ 2015 წლის 5 აგვისტოს მიღებული განჩინება რუსთავი 2-თან დაკავშირებით. განჩინების მიხედვით, სასამართლომ ყადაღა დაადო შპს „სამაუწყებლო კომპანია რუსთავი 2"-ის პარტნიორების წილებს. სახალხო დამცველი თვლის, რომ „სასამართლოს განჩინება სარჩელის უზრუნველყოფის ღონისძიების გამოყენების შესახებ, არღვევს უფლებათა შეზღუდვის თანაზომიერების პრინციპს. სასამართლომ საკუთრების უფლება შეზღუდა იმაზე მეტად, ვიდრე ამას მოითხოვს მოსარჩელის ლეგიტიმური მიზანი, რამაც, თავის მხრივ, შესაძლოა რეალური საფრთხე შეუქმნას დამოუკიდებელი ტელეკომპანიის მიერ გამოხატვის თავისუფლების რეალიზებას". სახალხო დამცველი გააგრძელებს დაკვირვებას და მისი მანდატის ფარგლებში საქმის შესწავლას. სრულად... წყარო: www.ombudsman.ge

თბილისი. საქართველოს სახალხო დამცველმა რეკომენდაციით მიმართა ახმეტის მუნიციპალიტეტის გამგებელს მედია საშუალებისთვის ინფორმაციის არგაცემის კანონიერების თაობაზე. 2015 წლის 1 ივნისს, ახმეტის მუნიციპალიტეტის გამგეობამ უარი უთხრა კახეთის საინფორმაციო ცენტრს მუნიციპალიტეტის გამგებლის წარმომადგენლების ვინაობისა და საკონტაქტო ინფორმაციის გაცემაზე, სახალხო დამცველი თვლის, რომ ამ ფაქტით კახეთის საინფორმაციო ცენტრს კანონმდებლობით მინიჭებული ინფორმაციის მიღების თავისუფლება შეეზღუდა. სრულად წყარო: ombudsman.ge

თბილისი. საქართველოს ახალგაზრდა იურისტთა ასოციაცია რუსთავი 2-თან დაკავშირებულ მოვლენებს ეხმაურება. საია თვლის, რომ სამაუწყებლო კომპანიასთან დაკავშირებული სამართლებრივი დავა გამჭვირვალობისა და საჯაროობის მაღალი სტანდარტით უნდა წარიმართოს, პოლიტიკოსებმა კი თავი უნდა შეიკავონ შეფასებებისგან, რომლებიც სასამართლოს გადაწყვეტილებების დამოუკიდებლობაზე გავლენას მოახდენს. „საია მიიჩნევს, რომ სასამართლოს განჩინება არ შეესაბამება დასაბუთების იმ მაღალ სტანდარტს, რომელიც გამოყენებულ უნდა იქნეს ყველა შემთხვევაში, როდესაც ერთმანეთის პირისპირ დგას არამხოლოდ ორი კერძო სუბიექტის ინტერესი, არამედ ასევე მაღალი საზოგადოებრივი ინტერესი და მისთვის შეუქცევადი ზიანის მიყენების საფრთხე", ნათქვამია განცხადებაში. სრულად... წყარო: gyla.ge