იმერეთი. 12 ივლისს ქუთაისში საარჩევნო სისტემების საერთაშორისო ფონდისა და ცესკო–ს ორგანიზებით კონფერენცია გაიმართა. მასში ცენტრალური კომისიის თავმჯდომარესთან, ზურაბ ხარატიშვილთან ერთად მონაწილეობა იმერეთის საოლქო საარჩევნო კომისიების თავმჯდომარეებმა, მედიასაშუალებების რედაქტორებმა, პროდიუსერებმა და გამომცემლებმა მიიღეს. ცესკო-მ ჟურნალისტებს 2012 წლის პარლამენტის არჩევნებისთვის მოსამზადებელ პროცესში უკვე განხორციელებულ და უახლოეს მომავალში დაგეგმილი ღონისძიებების შესახებ ინფორმაცია გააცნო. დამსწრე საზოგადოება ასევე ცესკოს გრძელვადიან - 2012-2014 წლებზე გაწერილ სამოქმედო გეგმას გაეცნო. მსგავსი შეხვედრები ცენტრალურ საარჩევნო კომისიას უახლოეს მომავალში დაგეგმილი აქვს აჭარის, გურიისა და სამეგრელოს მედიაწარმომადგენლებთან. 

შიდა ქართლი. 5 ივლისს გორში, კოალიციის - „არჩევნის თავისუფლებისთვის" და გორის დემოკრატიული ჩართულობის ცენტრის ორგანიზებით, შედგა შეხვედრა ადგილობრივ საზოგადოებრივი და მედია ორგანიზაციების წარმომადგენლებთან, სტუდენტებთან და აქტიურ მოქალაქეებთან, რომლებიც დაინტერესებულნი არიან საარჩევნო გარემოს გაუმჯობესების საკითხებით. შეხვედრის მიმდინარეობისას ისაუბრეს მოწვეულმა სტუმრებმა, ექსპერტმა მედია საკითხებში ლაშა ტუღუშმა და ექსპერტმა საარჩევნო საკითხებში ირაკლი მელაშვილმა. მათ მიაწოდეს ინფორმაცია დამსწრეებს იმ საკანონმდებლო ცვლილებებზე, რომელიც ავალდებულებს საკაბელო ოპერატორებს თავის პაკეტში შეიტანონ ყველა ის არხი, რომელიც ჩართული იქნება წინასაარჩევნო პროცესების გაშუქებაში. განხილულ იქნა ის დადებითი და უარყოფითი მხარეები, რომლებიც ჩადებულია ამ კანონში. საუბარი შეეხო აგრეთვე, შიდა ქართლში არსებულ მედია სივრცეს და იმ პრობლემებს, რომლებსაც აქვთ ადგილი ყოფილი სამხრეთ ოსეთის მიმდინარე სოფლებში. კერძოდ, ეს სოფლები  მაღალი ხარისხით იღებენ რუსეთის ტელეკომპანიების გადაცემებს, ხოლო ქართული არხები ვრცელდება ხარვეზებით. ამის შემდეგ გაიმართა დისკუსია, რომელშიც მონაწილეობდნენ როგორც ორგანიზატორები და მოწვეული სტუმრები.

იმერეთი. 28 ივნისს, საქართველოს ჟურნალისტური ეთიკის ქარტიის საბჭოს წევრები ადგილობრივ ჟურნალისტებს შეხვდნენ და ჟურნალისტურ საქმიანობაში ეთიკური კუთხით არსებული პრობლემები განიხილეს. ქარტიის წარმომადგენლების განცხადებით, მათ მიზანს ქარტიის, როგორც თვითრეგულირების მექანიზმის პოპულარიზაცია და  მოქალაქეებისათვის მის შესახებ ინფორმაციის მიწოდება წარმოადგენს.საქართველოს ჟურნალისტური ეთიკის ქარტია 2009 წლის დეკემბერში შეიქმნა. ბოლო მონაცემებით, ქარტიაზე ხელმომწერთა რიცხვი 213-ს შეადგენს.

კახეთი.22-23 ივნისს, გურჯაანში, გაზეთ „კახეთის ხმის" ოფისში სამოქალაქო განვითარების ინსტიტუტმა შეხვედრა გამართა ახალი პროექტის შესახებ „მოქალაქე ჟურნალისტები თავისუფალი და სამართლიანი არჩევნებისთვის". ახალი პროექტის მიზანია საქართველოს სხვადასხვა ქალაქებში მოქალაქე ჟურნალისტების მოძებნა და მათ მიერ საარჩევნო თემაზე საჭირო მასალის მიწოდება. პროექტი ხორციელდება საქართველოს 11 ქალაქში. პროექტის ხელმძღვანელია ჟურნალისტი, მედია ექსპერტი ია ანთაძე. პროექტის განმავლობაში ყველა ქალაქში მომზადდება სტატია წინასწარ შეთანხმებულ 10 თემაზე. სულ 110 სტატია. პროექტში ასევე ჩართულები იქნებიან პროფესიონალი ჟურნალისტები, რომლებიც მოქალაქე ჟურნალისტებთან ერთად მასალას მიაწვდიან ორგანიზაციას. მასალის მიწოდება შესაძლებელია მეილზე info@cdi.org.ge  და ტელეფონზე (790) 88 99 00. მიწოდებული მასალა განთავსდება ვებგვერდზე www.cdi.org.ge. დამატებითი ინფორმაცია იხილეთ ამავე ვებგვერდზე.

თბილისი. 22 ივნისს, საქართველოს ჟურნალისტური ეთიკის ქარტიამ და სლოვაკურმა არასამთვრობო ორგანიზაციამ „მემო 98–მა" ერთობლივი მედიამონიტორინგის პროექტი წარადგინეს. ორგანიზაციების მიერ შერჩეული 6 მონიტორი წინასაარჩევნოდ 11 ტელეკომპანიას დააკვირდება. კერძოდ, ისინი სატელევიზიო არხებზე 7 საათიდან 12 საათამდე ტრანსლირებულ ყველა გადაცემის კონტენ–ანალიზს ჩაატარებენ. ორგანიზაციის წარმომადგენლების თქმით მონიტორები კონკრეტული ტელეარხების მიერ გავრცელებული კონტენტის შესაბამისობას გამოიკვლევენ მაუწყებელთა ეთიკის კოდექსთან და ჟურნალისტური ეთiკის ქარტიის ნორმებთან მიმართებაში. მონიტორინგი 1 ივლისიდან დაიწყება და არჩევნების დღემდე გაგრძელდება. მონიტორები დააკვირდებიან შემდეგ ნაციონალურ არხებს: „საზოგადოებრივ მაუწეყებელს", „რუსთავი 2–ს", „იმედს", ასევე ისეთ ტელევეზიებსაც, რომელთა მაუწყებლობა თბილისიდან ხორციელდება, მაგალითად „მაესტრო", „რეალტივი", „კავკასია", „მეცხრე არხი". მონიტორების ყურადღების ცენტრში ასევე მოექცა რეგიონული მაუწყებლები, იმერთში „რიონი" და "მეგატივი", ხოლო აჭარაში „აჭარის ტელევიზია" და „25–ე არხი".  პროექტი „ღია საზოგადოება–საქართველოს" დაფინანსებით ხორციელდება.  

თბილისი. სამოქალაქო განვითარების ინსტიტუტი ტელეკომპანიებისა და საზოგადოების საინფორმაციო პრიორიტეტების შესაბამისობის კვლევის მეოთხე ორკვირიან პერიოდს აჯამებს და იმ საკითხებს გამოყოფს, რომლებიც ყველაზე მეტად და აქტიურად შუქდებოდა ქართულ ტელევიზიებში.  მონიტორინგი 2012 წლის 2 აპრილს დაიწყო და მოიცავს შემდეგ ტელევიზიებს: საზოგადოებრივი მაუწყებელი ,  „იმედი",  „რუსთავი 2" ,  „მაესტრო" , „კავკასია" , „რეალ ტვ", „მეცხრე არხი". წყარო: cdi.org.ge  ტელეკომპანიებისა და საზოგადოების საინფორმაციო პრიორიტეტების შესაბამისობის კვლევა მონიტორინგის პერიოდი: 11.05.12-24.05.12 მონიტორინგის პერიოდი: 27.04.12–10.05.12 მონიტორინგის პერიოდი: 13.04.12–26.04.12 მონიტორინგის პერიოდი: 2.04.12–12.04.12

თბილისი. „ეს შენ გეხებას" მონაწილე ორგანიზაციები სპეციალურ განცხადებას ავრცელებენ 14 ივნისს პარლამენტის იურიდიული კომიტეტის წარმომადგენლებთან შეხვედრის შემდეგ. განცხადებაში ნათქვამია, რომ შეხვედრაზე კაპმანიის მიერ ინიცირებული წინადადება მედია სფეროში „Must Carry-ისა და Must Offer-ის რეგულაცების დანერგავზე მმართველმა პარტიამ არ გაითვალისწინა. კამპანია „ეს შენ გეხება" ხელმოწერების შეგროვებას იწყებს, რათა ეს პრინციპი საკანონმდებლო ინიციატივად იქცეს.  წყარო: www.esshengexeba.ge  განცხადება

თბილისი.11 ივნისს საქართველოს ახალგაზრდა იურისტთა ასოციაციამ გამართა კვლევის პრეზენტაცია, რომელშიც გაანალიზებულია Must Carry-სპრინციპი სხვადასხვა ქვეყნის (ამერიკის და ევროკავშირის ქვეყნების) კანონმდებლობის მაგალითზე. ასევე განხილულია ეს საკითხი ქართულ რეალობაშიც. Must carry-ის პრინციპი გულისხმობს კანონისმიერ სავალდებულო ტრანზიტის იდეას, რომ საკაბელო ქსელების ოპერატორებს დაეკისროთ საქართველოს საზოგადოებრივი მაუწყებლის, სათემო მაუწყებლებისა და თანამგზავრული მაუწყებლების სატელევიზო სიგნალების სავალდებულო წესით რეტრანსლაცია იმ შემთხვევაში, თუ ეს შედის მაუწყებლების ინტერესებში. კვლევის ავტორების აზრით, ამგვარი მიდგომა ხელს შეუწყობს მედია პლურალიზმს საქართველოში. ამ ინიციატივის ძირითადი კრიტიკა მოდის იმაზე, რომ იგი კერძო ბიზნესში, ამ შემთხვევაში საკაბელო ოპერატორების საქმეში ჩარევას და რეგულაციებს გულისხმობს, თუმცა კვლევის და საკანონმდებლო ინიციატივის ავტორთა აზრით, ასეთ შემთხვევაში საზოგადოებრივი ინტერესი გადაწონის კერძო ბიზნესის ინტერესებს და მოქალაქეთა ინფორმირებულობის სასარგებლოდ გამართლებულია გარკვეული შეზღუდვების დაწესება. Must carry-ის პრინციპის სამშობლო ამერიკის შეეთებული შტატებია, თუმცა იგი ევროპის ქვეყნებშიც მოქმედებს. ამ პრინციპზე დაყრდობით კამპანიის – „ეს შენ გეხებას"–  ფარგლებში პარლამენტში უკვე შეტანილია კანონპროექტი, რომელიც გულისხმოს ცვლილებების განხორციელებას როგორც საარჩევნო კოდექსში, ასევე სხვა საკანონმდებლო აქტებში. ამ კანონებში შესატანი ცვლილებები და დამატებები ორ საკითხს ეხება: 1. მაუწყებლობის ტრანზიტი (სავალდებულო/ფასიანი); 2. საავტორო და მომიჯანვე უფლებების სფეროში საქართველოს კომუნიკაციების ეროვნული კომისიის უფლებამოსილებები. კვლევა "Must Carry - სხვა ქვეყნების კანონმდებლობისა და გამოცდილების ანალიზი, მოთხოვნილებები ქართულ სამაუწყებლო ბაზარზე"

თბილისი. 11 ივნისს, 17 საათზე საქართველოს პარლამენტის იურიდიულ საკითხთა კომიტეტში კამპანიის –  „ეს შენ გეხება" –  მონაწილე ორგანიზაციების მიერ მომზადებული საკანონმდებლო წინადადებების ავტორები შეხვდებიან იურიდიული კომიტეტის თავმჯდომარეს. საკანონმდებლო წინადადებები ითვალისწინებს „საარჩევნო კოდექსში" ცლილებებსა და მედია გარემოს გაჯანსაღებას საარჩევნო პერიოდში. შეგახსენებთ, აღნიშნული წინადადებებით კამპანიის მონაწილეებმა 7 მაისს მიმართეს საქართველოს პარლამენტს. წყარო: http://esshengexeba.ge/

შიდა ქართლი. 8-9 ივნისს გორის დემოკრატიული ჩართულობის ცენტრში „სამოქალაქო განვითარების ინსტიტუტმა" გამართა შეხვედრები პროექტის - „მოქალაქე ჟურნალისტები გამჭვირვალე და სამართლიანი არჩევნებისთვის" – ფარგლებში. პროექტი დაფინანსებულია გაერთიანებული ერების დემოკრატიის ფონდის (UNDEF) მიერ. 8 ივნისს შედგა ორი შეხვედრა. პირველზე  მიწვეული იყვნენ პოლიტიკური პარტიების წარმომადგენლები. მათგან უშუალოდ შეხვედრას დაესწრნენ: „ნაციონალური მოძრაობის", კოალიცია „ქართული ოცნების", „ერთიანი ნაციონალური მოძრაობის", „ახალი მემარჯვენეების", „ქართული პარტიის", „ქრისტიან–დემოკრატიული მოძრაობის" და  „დემოკრატიული მოძრაობის" წევრები. მეორე შეხვედრას ესწრებოდნენ ადგილობრივი საზოგადოებრივი ორგანიზაციების და მედიის წარმომადგენლები. შეხვედრას უძღვებოდა „სამოქალაქო განვითარების ინსტიტუტის" ხელმძღვანელი ია ანთაძე. საუბარი შეეხო არსებულ საარჩევნო გარემოს და საზოგადოების მონაწილეობის მნიშვნელობას მისი გაუმჯობესების საქმეში. 9 ივნისის შეხვედრები ასევე ორ ეტაპად შედგა: პირველ შეხვედრას ესწრებოდნენ ადგილობრივი ახალგაზრდები, ხოლო მეორეს - აქტიური მოქალაქეები. მათთან საუბარი წარიმართა ასევე საარჩევნო გარემოს შესახებ. ყურადღება გამახვილდა თუ როგორ შეეძლოთ მოქალაქეებს გამოეყენებინათ „სამოქალაქო განვითარების ინსტიტუტის" რესურსი როგორც წინასაარჩევნო პერიოდში, ისევე კენჭისყრის დღეს  დარღვევების შემჩნევის შემთხვევაში.

სამცხე–ჯავახეთი. 4 ივნისს, ახალციხეში, საზოგადოებრივი ორგანიზაციის ,,დემოკრატ მესხთა კავშირის” ოფისში მედიისა და ჟურნალისტური ეთიკის საკითხებზე გაიმართა პრეზენტაცია.აღნიშნული მომზადდა პროექტის –,,ეროვნული ინტეგრაციის გაძლიერება საქართველოში” –ფარგლებში და მას ეკატერინე კაჭკაჭიშვილი უძღვებოდა. აღნიშნულ პროექტს ,,დემოკრატ მესხთა კავშირი” საქართველოს გაეროს ასოციაციისა და ორგანიზაცია USAID-ის მხარდაჭერით 2012 წლის 22 მარტიდან ახორციელებს და მასში 16-25 წლამდე სხვადასხვა ეთნიკური წარმომავლობის ახალგაზრდაა ჩართული.

თბილისი.  ინტერნიუს–საქართველომ გამოაქვეყნა ქართულ პრესაში სიძულვილის ენის მონიტორინგის მესამე კვარტალური ანგარიში. მონიტორინგი განხორციელდა 2011 წლის 1 დეკემბრიდან 2012 წლის 29 თებერვლამდე. სრულად...  წყარო: media.ge

თბილისი. რეგიონული მედიის ასოციაციამ, დიპლომატიური კორპუსის, საზოგადოებრივი ორგანიზაციების წარმომადგენლებთან და ჟურნალისტებთან, 11 მაისს სასტუმრო „თბილისი მარიოტში" შეხვედრა გამართა. ორგანიზატორებმა მოწვეულ სტუმრებს წარუდგინეს ბეჭდური მასალა – „წინასაარჩევნო პერიოდში რეგიონული მედიის წარმომადგენლებზე განხორციელებული ზემოქმედების ფაქტები". ბეჭდურ მასალაში ასახულია ჟურნალისტური საქმიანობის ხელისშეშლის 17 შემთხვევა. რომელთა ნაწილზეც უშუალოდ, თავად იმ  ჟურნალისტებმა ისაუბრეს, რომლებიც თავიანთ პროფესიულ საქმიანობაში წინააღმდეგობას წააწყდნენ.  რეგიონული მედიის ასოციაციამ ამ საკითხებზე გადაღებული ფილმის ჩვენებაც მოაწყო, შეხვედრის ბოლოს გაიმართა დისკუსია.

შიდა ქართლი. გორის დემოკრატიული ჩართულობის ცენტრში გაიმართა შეხვედრა, რომელიც მიეძღვნა საჯარო ინფორმაციის ხელმისაწვდომობას. შეხვედრაში მონაწილეობდნენ საზოგადოებრივი ორგანიზაციებისა და მედიის წარმომადგენლები. შეხვედრას უნდა დასწრებოდნენ ადგილობრივი თვითმმართველობის წარმომადგენლები, თუმცა გარკვეული მიზეზების გამო (ცენტრალური ხელისუფლების წარმომადგენლების სტუმრობა) მათ ვერ შეძლეს შეხვედრაში მონაწილეობა. შეხვედრაზე ნაჩვენები იყო სტუდია „მონიტორის" მიერ შექმნილი ფილმი, რომელიც ინფორმაციის მოპოვებისა და ჟურნალისტური გამოძიების ჩატარების საკითხებს ეხებოდა, რომლის შემდგომ გაიმართა დისკუსია, რომელშიც აქტიურად იყვნენ ჩართულნი მედიის წარმომადგენლები.

თბილისი. ქართული მედიის სამართლებრივი დაცვის ცენტრი შეშფოთებას გამოთქვამს ჟურნალისტებისთვის პროფესიულ საქმიანობისას უკანონოდ ხელშეშლის ფაქტებთან დაკავშირებით. წყარო: www.gyla.ge ვრცლად

თბილისი. გაეროს განვითარების პროგრამა (UNDP) და ევროკავშირი 2012 წლის საპარლამენტო არჩევნებისთვის იწყებენ მედიის მონიტორინგის ახალ ეტაპს. პროექტის განხორციელებაში მონაწილეობას მიიღებს ოთხი ორგანიზაცია: კავკასიის კვლევითი რესურსების ცენტრი (CRRC) სამართლიანი არჩევნებისა და დემოკრატიის საერთაშორისო საზოგადოება (ISFED); ინტერნიუსი საქართველო და საქართველოს საზოგადოებრივ საქმეთა ინსტიტუტი (GIPA). მონიტორინგი უახლოეს მომავალში დაიწყება და დეკემბრამდე გაგრძელდება. ახალი პროექტის წარდგენის პარალელურად, გაეროს განვითარების პროგრამამ წარმოადგინა 2011 წელს არასამთავრობო ორგანიზაციების მიერ ჩატარებული და დასრულებული მედია მონიტორინგის შედეგები, რომელიც მოიცავდა სოციალურ, საარჩევნო, სამოქალაქო საზოგადოების, თვითმმართველობის, ადამიანის უფლებების საკითხების მედიაში გაშუქების ხარისხობრივ და თვისობრივ ანგარიშებს.