თბილისი. არასამთავრობო ორგანიზაციებმა 19 თებერვალს ტელევიზიების მიერ ვიდეო მასალის გავრცელების შესახებ განცხადება გააკეთეს. „ტელეკომპანია „რუსთავი 2"–მა და შემდეგ უკვე სხვა ტელეკომპანიებმა, გაავრცელეს 2004 წლის 24 ნოემბერს მომხდარი ე.წ. სპეციალური ოპერაციის ამსახველი ვიდეო მასალა" – ნათქვამია განცხადებაში, სადაც არასამთავრობოები მოუწოდებენ მედიასაშუალებებს არ გაავრცელონ გადაუმოწმებელი, ღირსების შემლახველი და პირადი ცხოვრების ხელმყოფი მასალები, რითაც შეიძლება ხელი შეუწყონ დაინტერესებული მხარეების ინტერესების ტირაჟირებას. „ყველა ტელეკომპანიამ, რომელმაც გაავრცელა ეს კადრები, დაარღვია „მაუწყებელთა ქცევის კოდექსის" 35-ე მუხლის მე-20, 23-ე და 24-ე პუნქტები. კერძოდ, 23-ე პუნქტი: „ტანჯვისა და მწუხარების ამსახველი საარქივო მასალის (დანაშაულის ჩათვლით) გამოყენებისას, მაუწყებელი უნდა შეეცადოს შეამციროს ის პოტენციური ტრავმა, რომელიც შესაძლოა ამ მასალამ მიაყენოს მასში ასახულ პიროვნებას და/ან მის ნათესავებს", – ნათქვამია განცხადებაში. 20 თებერვალს გავრცელებულ განცხდებას 9 არასამთავრობო ორგანიზაცია აწერს ხელს.  სრულად წყარო:media.ge

კახეთი. არასამთავრობო ორგანიზაცია ,,მედია ცენტრმა კახეთმა", თელავის მედია კაფეში, 18 თებერვალს, ჟურნალისტური ეთიკის ქარტიის გასვლით ღონისძიებას უმასპინძლა. შეხვედრას, ადგილობრივი მედიისა და სამოქალაქო სექტორის წარმომადგენლები ესწრებოდნენ. ქარტიის საბჭოს თავმჯდომარის, გიორგი მგელაძეს თქმით, შეხვედრები რეგიონული მედიის წარმომადგენლებსა და მოქალაქეებთან თელავიდან დაიწყო და  სხვა მუნიციპალიტეტებშიც გაგრძელდება: ,,შეხვედრა  საინფორმაციო ხასიათის იყო  და მოიცავდა იმ ძირითად საკითხებს, რომელიც შეეხება ეთიკის ქარტიის  პრინციპებს. გარდა ამისა, დამსწრე საზოგადოებას გავაცანით ქარტიის მიერ ბოლო დროს დაგეგმილი სიახლეები. პირველი გასვლითი შეხვედრა თელავში ჩავატარეთ და დაგეგმილი გვაქვს სხვა მუნიციპალიტეტებშიც ანალოგიური გასვლითი ღონისძიებების ჩატარება’’– განაცხადა გიორგი მგელაძემ.

თბილისი. ორგანიზაცია „იდენტობამ" ჟურნალისტებისთვის სახელმძღვანელო – „შესავალი ლგბტ ჟურნალისტიკაში" – გამოსცა. წიგნში ყურადღება გამახვილებულია ისეთ საკითხვებზე, როგორიცაა მედია აქტივიზმის როლი ლგბტ მოძრაობაში, სპეციალიზებული ლგბტ მედია (პრესა, რადიო, ტელევიზია). დეტალურად არის განხილული ქართულ მედიაში ამ საკთხთან დაკავშირებით მომზადებული მასალები. სახელმძღვანელო  წყარო: media.ge

თბილისი. საქართველოს რეგიონულ მაუწყებელთა ასოციაციას  გერმანე სალია უხელმძღვანელებს. ფოთის ტელეკომპანია „მეცხრე ტალღის" ხელმძღვანელი პოსტზე ერთი წლით აირჩიეს. თავჯდომარესთან ერთად ყოველწლიურ კრებაზე ასოციაციამ საბჭოს ახალი წევრები და სარევიზიო კომისიის ახალი შემადგენლობა აირჩია. საქართველოს რეგიონულ მაუწყებელთა ასოციაცია 22 რეგიონულ  ტელევიზიას აერთიანებს.  წყარო:media.ge

თბილისი. ჟურნალისტური ეთიკის ქარტიამ 13 თებერვალს დისკუსია გამართა თემაზე „უწყობს თუ არა ხელს მედია სექსუალური უმცირესობების მიმართ სტერეოტიპული დამოკიდებულებების ჩამოყალიბებას?". დისკუსიის მონაწილეებმა მედიის მიერ გამოვლენილი ჰომოფობიური დამოკიდებულებების შემთხვევები განიხილეს და მაგალითად შინაგან საქმეთა სამინისტროს მიერ გავრცელებული მასალა მოიყვანეს, რომელიც ყველა ტელეკომპანიის ეთერში გავიდა. „მაუწყებელს შეუძლია  თქვას, რომ მაქვს ეს კადრები, მაგრამ არ გავუშვებ. მის კონკურენტსაც აღარ ექნება იმის ხიბლი, რომ გაუშვას. ამის შემდეგ მოსახლეობას ექნება საშუალება აირჩიოს, როგორი არხის ყურება უნდა. მედიას პრეცენდენტები ანვითარებს. საჭიროა მოქმედება სწორედ პრეცენდენტების შექმნის გზით", აღნიშნა ჟურნალისტური ეთიკის ქარტიის საბჭოს წევრმა ზვიად ქორიძემ.  წყარო:media.ge

თბილისი. ჟურნალისტური ეთიკის ქარტის საბჭო საქართველოს ქალაქებში შეხვედრებს ადგილობრივი საზოგადოების წარმომადგენლებთან, არასამთავრობო ორგანიზაციებთან და ჟურნალისტებთან გამართავს. საბჭოს წევრები ქარტიის წინაშე არსებულ გამოწვევებსა და სამოქმედო გეგმებზე ისაუბრებენ. პირველი გასვლითი ვიზიტი 18 თებერვალს კახეთის სამ ქალაქში: თელავში, გურჯაანსა და საგარეჯოშია დაგეგმილი.  შეხვედრებზე საბჭოს მიერ 7 თებერვალს მიღებულ გადაწყვეტილებაზეც ისაუბრობენ, რომლის მიხედვითაც საბჭო განსაკუთრებულ მასალებზე საკუთარი ინიციატივით დასკვნებს მოამზადებს და გამოაქვეყნებს. „ჩვენი მიზანია პროფესიული სტანდარტების დანერგვა და ნდობის ამაღლება მედიის მიმართ, ამიტომ,   მიგვაჩნია, რომ  არ უნდა  დარჩეს ქარტიის და მისი საბჭოს ყურადღების მიღმა რეზონანსული სტატიები, ტელე და რადიო რეპორტაჟები", განაცხადა ჟურნალისტური ეთიკის ქარტიის საბჭოს წევრმა ზვიად ქორიძემ.  წყარო:media.ge

თბილისი. IREX G-MEDIA-ის მიერ დაფინანსებული პროექტის ფარგლებში მაუწყებლობს სამოქალაქო ინტერნეტ მაუწყებლობა „ნაკადი". იგი დაინტერესებულ არასამთავრობო ორგანიზაციებსა და პირებს ინფორმაციის მოძიების, მიღებისა და გავრცელებისათვის ახალი შესაძლებლობის გამოყენების  საშუალებას აძლევსა. „ნაკადი" არასამთავრობო ორგანიზაციებს აქტივობების შეუზღუდავ და ონლაინ ტელე–მაუწყებლობის საშუალებით პირდაპირ ეთერს სთავაზობს. რაც ერთის მხრივ ხელს უწყობს ორგანიზაციების საქმიანობის გავრცელებას, ახალი საინფორმაციო–საკომუნიკაციო ტექნოლოგიების დანერგვას.  წყარო: livestream.com/nakadi

თბილისი. "ევროკავშირის პრიზი ჟურნალისტიკაში 2012"“ გამარჯვებულები გამოვლინდნენ. საუკეთესო საგამოძიებო სტატიისთვის პრიზი "Georgia Today"-ს ჟურნალისტმა, მაია ედილაშვილმა მიიღო. პრიზი საუკეთესო ტელე და რადიო რეპორტაჟში კი სტუდია "მონიტორის" ჟურნალისტმა, სალომე ცეცხლაძემ. საუკეთესო ვებგვერდის, ბლოგისა და სოციალური ქსელის პროფილისთვის, ბლოგერი გიორგი კიკონიშვილი დაჯილდოვდა. წყარო:Media.ge

თბილისი. ეროვნულ ბიბლიოთეკასთან პარასკევს განვითარებული მოვლენები, რომლებიც პრეზიდენტის გამოსვლას უკავშირდებოდა, საქართველოს უმსხვილესმა ტელეკომპანიებმა ფართოდ გააშუქეს. საერთაშორისო გამჭვირვალობა - საქართველომ ყურადღება გაშუქების ასპექტებზე გაამახვილა და 12 თებერვალს ამ საკითხზე გავრცელებულ ინფორმაციაში ნათქვამია, რომ ზოგიერთი ტელეკომანიის მიერ მომზადებული სიჟეტები მიკერძოებული იყო. "ძველმა ჩვევებმა ტელემაუწყებლებსაც შეახსენა თავი, რაც საბოლოო ჯამში პოლიტიკურად მიკერძოებულ გაშუქებაში გამოიხატა."მეცხრე არხმა" და "იმედმა" უკვე დამონტაჟებულ სიუჟეტებში დაპირისპირება "ქართული ოცნების" სასარგებლოდ, „"რუსთავი 2”"-მა კი "ნაციონალური მოძრაობის" სასარგებლოდ გააშუქა. "მაესტრომ" და "საზოგადოებრივმა მაუწყებელმა" მაყურებელს მეტნაკლებად დაბალანსებული რეპორტაჟები შესთავაზეს", ნათქვამია ინფორმაციაში. სრულად  წყარო: transparency.ge

თბილისი. კოალიცია „მედიის ადვოკატირებისათვის“ მიესალმება  საქართველოს ეკონომიკისა და მდგრადი განვითარების სამინისტროში ციფრულ მაუწყებლობაზე გადასვლისთვის სპეციალური საბჭოს შექმნას სამოქალაქო საზოგადოების მონაწილეობით. თუმცა კოალიცია გამოხატავს შეშფოთებას სამუშაოს ნელი ტემპით მიმდინარეობის გამო, – ნათქვამია განცხადებაში, რომელიც 12 თებერველს კოალიციამ გაავრცელა. სრულად წყარო: media.ge

თბილისი. კონსტიტუციონალიზმის კვლევისა და ხელშეწყობის რეგიონალური ცენტრი ჟურნალისტებისთვის მიზნობრივი კვალიფიკაციის ამაღლების კურსებს გამართავს.  „კონსტიტუციონალიზმის გაკვეთილები“ მარტი, აპრილი, მაისის თვეებში გაიმართება. გამართული ლექციები და პრაქტიკული მეცადინეობები დაკავშირებული იქნება რეალურ მოვლენებთან და კონსტიტუციოური პროექტის შემუშავება–განხილვაში მონაწილე პოზიციებთან. წყარო: ორგანიზაციის გვერდი სოციალურ ქსელში

სამცხე-ჯავახეთი. საერთაშორისო გამჭვირვალობა - საქართველო ბაკურიანში ჟურნალისტებისთვის ტრენინგებს მართავს ტრენინგის თემატიკაა: საკუთრების უფლებები და საქართველოში ამ საკითხის ირგვლივ არსებული პრობლემები. ტრენინგზე, რომელსაც საქართველოს სხვადასხვა რეგიონში მომუშავე ჟურნალისტები ესწრებიან, გაეცნობიან სასამართლოს მონიტორინგის შედეგებს. საერთაშორისო გამჭვირვალობა-საქართველოს მედია ანალიტიკოსები მამუკა ანდღულაძე და მატიას ჰუტერი არსებულ მედიაგარემოზე ისაუბრებენ და ჟურნალისტებს მისცემენ პრაქტიკულ რჩევებს ჟურნალისტური საქმიანობის ეფექტურად განხორციელების შესახებ.  წყარო: media.ge

თბილისი. 31 იანვარს GIPA და კლუბ ფრონტლაინ ჯორჯიას ორგანიზებით გაიმართა დისკუსია – სოციალური ქსელები და ჟურნალისტური ეთიკის სტანდარტები. რა არის სოციალური ქსელები ჟურნალისტებისთვის - პერსონალური თუ საჯარო სივრცე? როგორ აღიქვამს აუდიტორია მათ პოსტებს ფეისბუქზე? სად გადის ზღვარი პირად შეხედულებებსა და რედაქციის პოზიციას შორის? როგორ ვიყოთ მოქნილები და ამავე დროს არ დავკარგოთ პასუხისმგებლობის გრძნობა? - ეს არის ის კითხვები, რაზეც 31 იანვარს პასუხის გაცემას ცდილობდნენ კლუბ „ფრონტლაინ ჯორჯიას” დისკუსიის მონაწილეები. სოციალურ ქსელებში ქცევის წესები არ შეუმუშავებიათ მონაწილეებს, რადგან ეს, მათი აზრით კიდევ მრავალი განხილვის თემაა. თუმცა შეთანხმდნენ, რომ სოციალურ ქსელებში ჟურნალისტის ქმედებამ არ უნდა იქონიოს გავლენა მისი და გამოცემის სანდოობასა და მიუკერძოებლობაზე. წყარო: media.ge ჩანაწერი – სოციალური ქსელები და ჟურნალისტური ეთიკის სტანდარტები წყარო: სამოქალაქო ინტერნეტ მაუწყებლობა ნაკადი.

თბილისი. აშშ-ის საელჩო საქართველოში და საერთაშორისო კვლევისა და გაცვლების საბჭო (IREX) საქართველოს მედია პარტნიორობის პროგრამის (GMPP) ფარგლებში 2013 წლის კონკურსის გამარჯვებულ მედიასაშუალებებს გამოაცხადა. ესენია ბორჯომის ტელევიზია (ბორჯომი), მეცხრე ტალღა (ფოთი,) და რადიო ძველი ქალაქი (ქუთაისი). GMPP აშშ-ის მთავრობის მიერ დაფინანსებული სამწლიანი პროგრამაა, რომელიც ქართული მედიასაშუალებების პროფესიულ განვითარებას უწყობს ხელს. გასული წლის წლის დეკემბერში, პროგრამის ფარგლებში ჩატარდა ინტენსიური კონკურსი ქართული რეგიონული ტელევიზიებისა და რადიოებისთვის. კონკურსის საფუძველზე შეირჩა ორი ტელევიზია და ერთი რადიო, რომლებიც 2013 წლის პარტნიორობის პროგრამაში მიიღებენ მონაწილეობას. სრულად წყარო: irex.ge

თბილისი. „საქართველოს ხელისუფლების შეცვლა – 2012" – ასე ჰქვია დოკუმენტურ ფილმს, რომელიც გოუ ჯგუფმა შექმნა. გოუ ჯგუფის ერთ–ერთი ძირითადი პროექტია „სტუდია თვითმხილველი", რომელიც აერთიანებს პროფესიონალ და მოქალაქე ჟურნალისტებს რეგიონის მასშტაბით და ქმნის დოკუმენტურ ფილმებს, როგორც ალტერნატივას ტრადიციული პრესისა და ტელევიზიის. ამჯერადაც მათ მიერ შექმნილი ფილმი საქართველოს სხვადასხვა ქალაქებში მიმდინარე წინასაარჩევნო და არჩევნების დღის ამსახველ პროცესებზეა. ასევე ცვლილებების შესახებ მოგვითხრობს, რასაც მოსახლეობა ითხოვდა. წყარო: ორგანიზაციის გვერდი სოციალურ ქსელში    

იმერეთი.ამ თემაზე 24 იანვარს, ქუთაისში, დემოკრატიული ჩართულობის ცენტრში დისკუსია გაიმართა. დისკუსიას ჟურნალისტი დავით ლიკლიკაძე უძღვებოდა. შეხვედრაზე განიხილეს მედიის თავისუფლების ხარისხი საქართველოში, თუ რა როლი მიუძღვის მასობრივ საინფორმაციო საშუალებებს დემოკრატიული საზოგადოების ფორმირების პროცესში და როგორია მოსახლეობის დამოკიდებულება მედიის მიმართ. შეხვედრაზე გამოიკვეთა აზრი, რომ დღევანდელი მდგომარეობით ქართული მედია არ არის ბოლომდე თავისუფალი, ქვეყანაში არსებობს რადიომაუწყებლობა ან ბეჭდური მედია, რომელიც სახელმწიფო ორგანოებისგან დამოუკიდებლად არსებობს, თავისუფალია, მაგრამ მათ არ აქვთ საშუალება და ფინანსური მხარდაჭერა საქართველო სრული მასშტაბით მოიცვან. დისკუსია ორგანიზებული იყო „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით.

შიდა ქართლი. საზოგადოება „ბილიკმა" პროექტის – „ჩემს თავზე საუბარი" – შედეგების პრეზენტაცია გამართა. მოეწყო პროექტის ფარგლებში გადაღებული ფოტოების გამოფენა და ფილმების ჩვენება. პროექტში, რომელიც „ღია საზოგადოების ფონდის” ფინანსური მხარდაჭერით განხორციელდა ჩართულნი იყვნენ ქართველი, აზერბაიჯანელი, სომეხი და ჩეჩენი მოზარდები. პროექტი მიზნად ისახავდა მედია კლუბების ჩამოყალიბებას, რომლის წევრებიც შეძლებდნენ საკუთარი აზრის თავისუფლად გამოხატვას, სხვადასხვა აქტივობებში ჩართვას, დებატების და დისკუსიების გამართვას საზოგადოებისთვის მნიშვნელოვან საკითხებზე და პუბლიკაციების მომზადებას მედიასაშუალებებისთვის. პროექტის ფარგლებში ჟურნალისტიკის სტუდიის სხვადსხვა ტრენინგ–კურსი გაირა 100–მდე მოზარდმა, რომლებმაც შეისწავლეს საგაზეთო ჟურნალისტიკა, ფოტოგრაფია და მცირეფორმატიანი ფილმების წარმოება. მოეწყო 2 საზაფხულო მედიაბანაკი დაბა ურეკში, რომელშიც ჩართული იყო 80–მდე მოზარდი. გაიმართა 3 ფოტოგამოფენა. პროექტი 2 წლის მანძილზე – 2011 წლის 1 იანვრიდან 2012 წლის 31 დეკემბრამდე ხორციელდებოდა.

თბილისი.საქართველოს ჟურნალისტური ეთიკის ქარტიის” წევრი ჟურნალისტების ნაწილის მოსაზრებით, ქარტიის წესდებაში ცვლილება უნდა შევიდეს, რის მიხედვითაც ქარტიის საბჭოს წევრს არჩევისას ერთი წლის მანძილზე არ უნდა ჰქონდეს დარღვეული ეთიკის პრინციპები. ამის შესახებ დისკუსია წევრებმა ქარტიის Facebook- ის გვერდზე დაიწყეს. ქარტიის თავმჯდომარის, გიორგი მგელაძის განმარტებით, ამ თემაზე ქარტიის საბჭოს წევრებს არ უმსჯელიათ, თუმცა მისი პირადი მოსაზრებაა, რომ ასეთი ცვლილება, მართლაც შეუწყობს ხელს საბჭოს მიმართ ნდობის გაზრდას. „ჟურნალისტებისთვისაც იქნება სამაგალითო, რომ საბჭოში  არიან ადამიანები, ვისაც ეთიკასთან პრობლემები არ აქვთ” ამბობს მგელაძე. სრულად წყარო:media.ge

თბილისი. ინფორმაციის თავისუფლების განვითარების ინსტიტუტმა (idfi) ციფრული მაუწყებლობის დახმარების სახელმწიფო სტრატეგიის განსაზღვრისათვის კვლევა ჩაატარა. მასში მოცემული ინფორმაცია ემყარება ევროპის კანონმდებლობას, ევროკომისიის პრაქტიკას, განმარტებებს, რომლებიც რეალიზებულია, როგორც ევროკავშირის წევრი ქვეყნების პრაქტიკაში, ასევე ევროპის სხვა ქვეყნების გაციფრულების სტრატეგიებში. კვლევა ასევე მოიცავს სახელმწიფოს მიერ მაუწყელობის სფეროს ოპერატორების დაფინანსების გზებს. რეკომენდაციები „ციფრული მაუწყებლობის დახმარების სახელმწიფო სტრატეგიის განსაზღვრისათვის” წყარო: idfi.ge

თბილისი. „ზაზა დარასელის ფონდი" პრეზიდენტის ფონდიდან მიღებულ ორასი ათას ლარს კულტურული მედიის განვითარებისთვის გამოიყენებს - ამის შესახებ „ზაზა დარასელის ფონდის” ხელმძღვანელმა, ნინო დარასელმა Media.Ge-ს განუცხადა. დარასელის თქმით, ფონდი რამდენიმე დღეში გამოაცხადებს გრანტს კულტურული პროექტებისთვის. „ეს შეიძლება იყოს პერფორმანსები, არტაქციები, საგამოფენო სივრცე, მულტიმედიური პროექტი. გრანტი გაიცემა როგორც სოციალური მედიისთვის, ისე ბეჭდური და სხვა ტიპის მედიებისთვის”, - ამბობს დარასელი. სრულად წყარო: media.ge

თბილისი. საზოგადოებრივი მაუწყებლის საქმიანობისას ფინანსურ გამჭვირვალობას, მაუწყებლის სამეურვეო საბჭოს პასუხისმგებლობის გაზრდისა და აჭარის ტელევიზიისათვის საზოგადოებრივი მაუწყებლის სტატუსის მინიჭებას განიხილავდნენ ეროვნულ ბიბლიოთეკაში შეკრებილი საკანონმდებლო ინიციატივის ავტორები და დაინტერესებული პირები. შეხვედრა კოალიციის მედია ადვოკატირებისთვის ინიციატივით, 10 იანვარს, გაიმართა. მწვავე დისკუსია, სამეურვეო საბჭოს დაკომპლექტების წესმა გამოიწვია. ყველაზე დიდი დროც ამ საკითხს დაეთმო. კანონპროექტის მიხედვით, საზოგადოებრივი მაუწყებლის სამეურვეო საბჭოს წევრთა რაოდენობა 15-დან 9-მდე უნდა შემცირდეს. საიდანაც 3-3 წევრი საპარლამენტო უმრავლესობისა და უმცირესობის კვოტით აირჩევა და მათ პარლამენტი უმრავლესობით დაამტკიცებს, 2 წევრს სახალხო დამცველი დაასახელებს. მეცხრე კანდიდატი კი, ავტომატურად აჭარის ტელევიზიის წარმომადგენელი იქნება. ცვლილების მიხედვით, საბჭოს წევრებს პარლამენტის წევრთა უმრავლესობამ უნდა დაუჭიროს მხარი. დისკუსიის მონაწილეთა ნაწილი არ ეთანხმებოდა იმ მოსაზრებას, რომ საბჭოს კანდიდატები პოლიტიკური ჯგუფების კვოტების მიხედვით უნდა აირჩნენ. მათი აზრით, ეს უფრო გაზრდის პოლიტიკოსების გავლენას საზოაგდოებრივ მაუწყებელზე. კანონპროექტის ავტორების თქმით კი. აბსოლუტურად პოლიტიკური გავლენებისაგან დაცული საბჭო ვერ იქნება, რადგან მას პარლამენტი ირჩევს. საბჭოს დამოუკიდებლობას მათი აზრით, სახალხო დამცველის მიერ დანიშნული წევრები უზრუნველყოფენ. სრულად წყარო: www.media.ge

თბილისი. „მშვიდობის, დემოკრატიის და განვითარების კავკასიური ინსტიტუტი" პრეზიდენტის ფონდიდან მიღებულ 800 ათასი ლარს თავისუფალი მედიის, ადგილობრივი თვითმმართველობების, რელიგიური და ეთნიკური უმცირესობების პროგრამების განსახორციელებლად გამოიყენებს. ამის შესახებ ფონდის თავმჯდომარემ გია ნოდიამ, 8 იანვარს გამართულ პრესკონფერენციაზე განაცხადა. 800 ათასი ლარი „მშვიდობის, დემოკრატიის და განვითარების კავკასიური ინსტიტუტმა" პრეზიდენტის ადმინისტრაციაში სპეციალურად შექმნილი „სამოქალაქო სექტორისა და თავისუფლი მედიის განვითარების ხელშემწყობი" პროექტის ფარგლებში მიიღო. საკონკურსო კომისიის გადაწყვეტილებით კონკურში ასევე კიდევ ერთმა ორგანიზაციამ „ზაზა დარასელის ჟურნალისტიკის განვითარების ფონდმა" გაიმარჯვა. იგი 200 000 ლარს მიიღებს. „მშვიდობის, დემოკრატიის და განვითარების კავკასიური ინსტიტუტი" გრანტების გაცემისას პრიორიტეტს მოქალაქეების გააქტიურებისა და ინტერნეტ-მედიის განვითარებისთვის შეთავაზებულ პროექტებს მიანიჭებს. ინსტიტუტში პროგრამის ამოქმედებამდე იგეგმება გამგეობის შექმნა, რომელიც საზოგადოებაში მაღალი რეპუტაციის მქონე ადამიანებით დაკომპლექტდება. მისი თქმით, სავარუდოდ, იანვრის თვე დაეთმობა გამგეობის შექმნას და პროცედურების განსაზღვრას დაეთმობა. საგრანტო განაცხადების მიღებას პროგრამაში მონაწილეობისთვის კი თებერვლიდან დაიწყებენ. წყარო: media.ge