თბილისი. 21 დეკემბერს, შაბათს, 16:00 საათზე, საქართველოს პარლამენტის წინ, ჟურნალისტური ეთიკის ქარტიის ორგანიზებით საპროტექსტო აქცია გაიმართება. მედიის წარმომადგენლები ბოლო პერიოდში მომრავლებულ ხელშეშლის ფაქტებს გააპროტესტებენ. ქარტიის დაკვირვებით, ჟურნალისტების მიმართ განხორციელებულ ძალადობებსა და ხელშეშლაზე ხელისუფლების რეაქცია არ არის სათანადო. ხშირად ზეწოლის ფაქტებზე დაწყებული გამოძიება ფორმალურ სახეს ატარებს და არ მიმდინარეობს კანონით დადგენილი წესით და შესაბამისი კვალიფიკაციით. არცთუ იშვიათად მაღალი პოლიტიკური თანამდებობის პირები თავად ახდენენ მედიაზე ძალადობის წახალისებას. სრულად...  წყარო: https://www.qartia.ge

თბილისი. დღეს, ადამიანის უფლებების სწავლების და მონიტორინგის ცენტრმა (EMC) პოლიციის საქმიანობაში არასათანადო მოპყრობის პრევენციის შესახებ კვლევის პრეზენტაცია გამართა.  კვლევა, EMC-ს წარმოებაში არსებულ სისხლის სამართლის საქმეთა ანალიზზე დაყრდნობით, მიმოიხილავს პოლიციის საქმიანობაში არასათანადო მოპყრობის განმაპირობებელ ფაქტორებს. დოკუმენტი ასევე, მოიცავს საერთაშორისო სტანდარტებსა და რამდენიმე ქვეყნის კარგი პრაქტიკის მიდგომებს.  სრულად...  კვლევა...   წყარო: https://emc.org.ge

თბილისი. ადამიანის უფლებათა ცენტრი ლაგოდეხის პოლიციის უფროსის და სხვა პოლიციელების სავარაუდო დანაშაულის დროულ და ეფექტიან გამოძიებას მოითხოვს.  ადამიანის უფლებათა ცენტრის კახეთის ოფისი იცავს ტარიელ შეითნიშვილს, რომელიც პოლიციამ 1 დეკემბერს დააკავა ადმინისტრაციული წესით, პოლიციისათვის წინააღმდეგობის გაწევის ბრალდებით. დაკავებისას პოლიციელებმა გამოიყენეს ფიზიკური ძალა, რის შედეგადაც ტარიელ შეითნიშვილის ჯანმრთელობას სერიოზული ზიანი მიადგა.  ადამიანის უფლებათა ცენტრი მოითხოვს სახელმწიფო ინსპექტორის სამსახურის საგამოძიებო დეპარტამენტმა დროულად და ეფექტიანად გამოიძიოს პოლიციის მხრიდან განხორციელებული სავარაუდო ძალადობისა და დამამცირებელი მოპყრობის ფაქტი.  სრულად…  წყარო: http://www.humanrights.ge

თბილისი. 2019 წლის 18 დეკემბერს საქართველოს სახალხო დამცველი ნინო ლომჯარია სახელმწიფო ინსპექტორს ლონდა თოლორაიას შეხვდა, 15 წლის ლუკა სირაძის გარდაცვალების ფაქტობრივი გარემოებების შესახებ დამატებითი ინფორმაციის მისაღებად. სახალხო დამცველი მომხდარ ფაქტს სისტემურ პრობლემად აფასებს და აცხადებს, რომ საგამოძიებო უწყებამ გამოკითხვა არასრულწლოვანთა მართლმსაჯულების კოდექსის დარღვევით ჩაატარა და რომ პოლიციის განყოფილებაში გარდაცვლილისა და სხვა ბავშვებისთვის არა თუ კეთილგანწყობილი, არამედ პირიქით, მტრული გარემო იყო შექმნილი; ამიტომ ბავშვები ვერ გრძნობდნენ თავს დაცულად, რაც შეიძლება მათზე ზეწოლად ჩაითვალოს. სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC), ლუკა სირაძის გარდაცვალების გამო, განცხადებას ავრცელებს.  „აღნიშნული ტრაგიკული შემთხვევა კიდევ ერთხელ ააშკარავებს სახელმწიფო უწყებებში არსებულ სისტემურ გამოწვევებს. საგანმანათლებლო და სამართალდამცავმა სამსახურებმა ვერ შეძლეს მოზარდის ინდივიდუალური საჭიროებების გამოკვეთა და ამ საჭიროებებზე მორგებული მხარდამჭერი სოცილური და ფსიქოლოგიური მიდგომების გატარება. ეს საქმე ააშკარავებს განათლების, მართლმსაჯულების და სოციალური მხარდაჭერის სისტემების გაუმართაობას და მათ შორის კოორდინაციის და ურთიერთგაძლიერების მიდგომის სისუსტეს. ცხადია, ამ პირობებში მიუღწეველი რჩება „არასრულწლოვნების მართლმსაჯულების კოდექსის“ მიზნები, რომლის ამომავალ პრინციპს მართლმსაჯულების პროცესში ბავშვის საუკეთესო ინტერესების დაცვა წარმოადგენს. ამავდროულად, სახელმწიფოს მხრიდან არასაკმარისი ყურადღება ეთმობა ზოგადად სუიციდის პრევენციის სტრატეგიის შემუშავებასა და იმპლემენტაციას“, - ვკითხულობთ განცხადებაში.  სრულად...  წყარო: https://emc.org.ge

თბილისი. 18 დეკემბერს, ღია საზოგადოების ფონდისა და კოალიციის დამოუკიდებელი და გამჭვირვალე მართლმსაჯულებისათვის ორგანიზებით, გამოქვეყნდა კვლევა 2009 წელს სისხლის სამართლის კოდექსის ცვლილებების შესახებ. კვლევა ავლენს, რომ ქართული სისხლის სამართლის მართლმსაჯულება კვლავ რჩება ბუნდოვანი ტრანსფორმაციის ეტაპზე. საპროცესო კოდექსის ისეთი მნიშვნელოვანი ელემენტი, რომელიც ნაფიც მსაჯულთა სასამართლოა, ამ დრომდე არ არის სრულყოფილად ამოქმედებული. არ არის უზრუნველყოფილი მხარეთა თანასწორობა მტკიცებულებების მოპოვებისას, ვინაიდან კვლავაც მნიშვნელოვნადაა შეზღუდული დაცვის მხარის შესაძლებლობა საქმე დამოუკიდებლად და სრულყოფილად აწარმოოს. სრულად...  წყარო: https://osgf.ge

თბილისი. საია-ს ადვოკატი სახელმწიფო ინსპექტორის სამსახურში ლუკა სირაძის საქმის მასალებს გუშინ გვიანობამდე ეცნობოდა და ახლა ორგანიზაცია შსს-ს მინისტრისა და მისი მოადგილის, ნინო ცაციაშვილის გადადგომას ითხოვს.  „ამ დროისათვის, საქმის მასალებით დგინდება, რომ არასრულწლოვანზე ზეწოლას პოლიციის მინიმუმ კიდევ 3 თანამშრომელი ახორციელდება, რომელთა ვინაობაც დადგენილი არ არის. ასევე, დასტურდება, რომ ბავშვი პოლიციის განყოფილებაში მშობლის გარეშე დროის სხვადასხვა მონაკვეთში, მხოლოდ პოლიციის თანამშრომელთა გარემოცვაში რამდენჯერმე დარჩა. მათ შორის, ბავშვს ცალკე ესაუბრებოდა ამავე განყოფილების უფროსის მოადგილე“, - ვკითხულობთ საია-ს მიერ გავრცელებულ განცხადებაში, - „აღსანიშნავია, რომ 15 დეკემბერს, შინაგან საქმეთა მინისტრის მოადგილე, ნინო ცაციაშვილი საგანგებოდ გამართულ პრესკონფერენციაზე უარყოფდა ბავშვის განცალკევებით გამოკითხვის და მასზე პოლიციის განყოფილებაში განხორციელებული ზეწოლის ფაქტს. პოლიტიკური პასუხისმგებლობა პოლიციის განყოფილებაში მომხდარ დანაშაულზე ეკისრება შინაგან საქმეთა მინისტრს და მის მოადგილეს, ნინო ცაციაშვილს. საია მოითხოვს მათ დაუყოვნებლივ დატოვონ დაკავებული თანამდებობები“.  სრულად...  წყარო: https://gyla.ge

აჭარა. მსმ-სათვის სისხლის დონორობაზე დადგენილი აკრძალვა საკონსტიტუციო სასამართლომ კიდევ ერთხელ არაკონსტიტუციურად სცნო.  2019 წლის 17 დეკემბერს საკონსტიტუციო სასამართლომ კიდევ ერთხელ არაკონსტიტუციურად სცნო მსმ-ისათვის (მამაკაცი, რომელსაც სექსი აქვს სხვა მამაკაცთან) დაწესებული არაგონივრული აკრძალვა, ყოფილიყო სისხლის დონორი.  აღნიშნულ საქმეში მოსარჩელე მხარეს წარმოადგენდნენ თანასწორობის მოძრაობისა და საიას იურისტები.  სრულად...  წყარო: https://gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, დაშავებული არასრულწლოვნის გამოკითხვაში ის გამომძიებელი მონაწილეობდა, რომელიც ე.წ. ყინწვისის სპეცოპერაციის გახმაურებულ საქმეშიც ფიგურირებს. „საქართველოს ახალგაზრდა იურისტთა ასოციაცია ჩართულია პოლიციელთა მხრიდან არასრულწლოვანზე პოლიციის განყოფილებაში განხორციელებული ფსიქოლოგიური ძალადობის საქმეში, რამაც მოზარდი სავარაუდოდ თვითმკვლელობის მცდელობამდე მიიყვანა. 2019 წლის 16 დეკემბერს ტელეკომპანია ,,იმედის“ დილის ეთერში არასრულწლოვნის საქმეზე განმარტებები გააკეთა გამომძიებელმა მარიანა ჩოლოიანმა, რომელიც 2019 წლის 10 და 11 დეკემბერს მონაწილეობდა არასრულწლოვნის გამოკითხვის პროცესში. მისი განმარტებით, არასრულწლოვანზე არანაირი სახის ძალადობა არ განხორციელებულა. აღსანიშნავია, რომ გამომძიებელი, მარიანა ჩოლოიანი ასევე, ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში“, - ნათქვამია ორგანიზაციის მიერ გავრცელებულ ინფორმციაში, - „საია მიმართავს სახელმწიფო ინსპექტორის სამსახურს: გამოძიების მიმდინარეობისას საფუძვლიანად შეამოწმოს/გამოიკვლიოს მარიანა ჩოლოიანის მიერ საჯაროდ გაკეთებული განმარტებების შინაარსი და მათი ნამდვილობა მით უფრო იმ პირობებში, რომ ამ გამომძიებლის მიერ ე.წ. ყინწვისის საქმეში მიცემული ახსნა-განმარტება და შედგენილი დოკუმენტების ნამდვილობა არ დადასტურდა“. სრულად...  წყარო: https://gyla.ge

თბილისი. უზენასი სასამართლოს ნაწილობრივ დაკომპლექტების შემდეგ, 16 დეკემბერს, პირველად შეიკრიბა და ორგანიზაციულ საკითხებზე იმსჯელა პლენუმმა. საია, რომელიც აკვირდება სასამართლო სისტემაში მიმდინარე პროცესებს, მათ შორის, უზენაესი სასამართლოს მოსამართლეთა შერჩევის პროცედურებს, პლენუმის სხდომას უნდა დასწრებოდა, თუმცა, სხდომა დაიხურა, რის გამოც ორგანიზაციას მონიტორინგის საშუალება არ მიეცა.  „კანონის მიხედვით, უზენაესი სასამართლოს პლენუმის სხდომები, როგორც წესი საჯაროა, რაც იმას ნიშნავს, რომ ის ღია უნდა იყოს თუ არ არსებობს რაიმე პატივსადები საფუძველი, უფრო მაღალი ღირებულების მქონე საჯარო ინტერესი. სახალხო დამცველის ინფორმაციით გადაწყვეტილების მოტივი მოსამართლეთათვის მსჯელობისთვის კომფორტული გარემოს შექმნა იყო“, - ვკითხულობთ, ამ ფაქტთან დაკავშირებით, საია-ს მიერ გავრცელებულ განცხადებაში.  სრულად... წყარო: https://gyla.ge

აჭარა. საია ადმინისტრაციულ სამართალდარღვევათა კოდექსის კიდევ ერთ მუხლს საკონსტიტუციო სასამართლოში ასაჩივრებს. დღეს საქართველოს ახალგაზრდა იურისტთა ასოციაციამ შპს „ბექანასის“ სახელით საკონსტიტუციო სასამართლოს მიმართა. დავის საგანია ადმინისტრაციულ სამართალდარღვევათა კოდექსის 571-ე მუხლი, რომლის მიხედვითაც სათანადო ლიცენზიის გარეშე წიაღისეულით სარგებლობა იწვევს სამართალდამრღვევის დაჯარიმებას 1000-დან 1500 ლარამდე, ასევე სამართალდარღვევის იარაღისა და სამართალდარღვევის ობიექტის კონფისკაციას. სრულად...  წყარო: https://gyla.ge

თბილისი. „კონსტიტუციის 42-ე მუხლი“ პარლამენტის მიერ უზენაესი სასამართლოს 14 მოსამართლის არჩევას ეხმაურება.  „ორგანიზაცია „კონსტიტუციის 42-ე მუხლი“ უარყოფითად აფასებს საქართველოს პარლამენტის მიერ მიმდინარე წლის 12 დეკემბერს უზენაესი სასამართლოს 14 მოსამართლის არჩევას და მიიჩნევს, რომ პარლამენტის ეს გადაწყვეტილება დადებით შედეგს არ მოუტანს სასამართლოს დამოუკიდებლობას და სასამართლოს მიმართ ნდობას“, - ნათქვამია ორგანიზაციის მიერ გავრცელებულ განცხადებაში.  სრულად...  წყარო: https://article42.ge

თბილისი. 2019 წლის 26 ნოემბერს საქართველოს პრეზიდენტმა N556 ბრძანებულებით შეწყალების ახალი წესი დაამტკიცა.  შეწყალების ახალი წესი ძველი პროცედურისგან მნიშვნელოვნად განსხვავდება, რის გამოც, საქართველოს სახალხო დამცველი საზოგადოებისთვის განმარტებას აკეთებს.  სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: როგორ დაკომპლექტდა უზენაესი სასამართლო - მოკლე მიმოხილვა.  "არჩეულ მოსამართლეთა უმრავლესობა სასამართლო სისტემაში არსებული კლანის ინტერესების გამტარებელია, ან უზენაესი სასამართლოს მოსამართლედ დანიშვნამდე იკავებდა ამჟამინდელ ხელისუფლებაში მაღალი რანგის თანამდებობას და მათ საქმიანობას უკავშირდება ადამიანის უფლებების დარღვევის შემთხვევები, ან პოლიტიკურად მოტივირებული გადაწყვეტილებები. შეგვიძლია ვთქვათ, რომ მათი უმრავლესობა არ სარგებლობს საზოგადოების ლეგიტიმაციით“, ნათქვამია ორგანიზაციის ვებგვერდზე. სრულად... წყარო: emc.org.ge

აჭარა. ნათია ზოიძემ აჭარის ავტონომიური რესპუბლიკის პროკურორს მიმართა. მის ინტერესებს საქართველოს ახალგაზრდა იურისტთა ასოციაცია იცავს. აჭარის ტელევიზიის დირექტორის მოადგილე მიიჩნევს, რომ გიორგი კოხრეიძის ქმედებებში შესაძლოა იკვეთებოდეს სისხლის სამართლის კოდექსით გათვალისწინებული დანაშაულის ნიშნები. სრულად...  წყარო: https://gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამარ გვასალიას კვლევას: „ოპერატიული საქმიანობა სამართალდამცავ ორგანოებში“. „კანონმდებლობის და პრაქტიკის ანალიზმა გამოკვეთა ის ძირითადი პრობლემები, რაც სამართალდამცავი ორგანოების ოპერატიულ საქმიანობას ახლავს. ოპერატიული საქმიანობა არ შეესაბამება საპოლიციო საქმიანობის დემოკრატიულ მექანიზმებს და საფრთხეს უქმნის ადამიანის ფუნდამენტური უფლებების დაცვას“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის იურიდიულ კომიტეტში უზენაესი სასამართლოს მოსამართლეობის კანდიდატების მოსმენის პროცესს აფასებს. „კოალიცია მიიჩნევს, რომ არაკომპეტენტური და არაკეთილსინდისიერი კანდიდატების დანიშვნა, აზრს დაუკარგავს საქართველოს პარლამენტში წარმართულ ღია, გამჭვირვალე, კონსტრუქციულ პროცესს, დიდი ხნით დაასამარებს სასამართლოს გაჯანსაღებისა და საზოგადოებრივი ნდობის დაბრუნების შანსს. მოვუწოდებთ კანონმდებლებს, ვენეციის კომისიის რეკომენდაციის შესაბამისად არ შეავსოს ვაკანტური თანამდებობები სრულად და მოსამართლეთა მხოლოდ ის მინიმალური ოდენობა დანიშნოს, რომელიც აუცილებელია უზენაესი სასამართლოს ფუნქციონირებისთვის“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო ქალთა მიმართ ძალადობასთან დაკავშირებულ საკანონმდებლო ცვლილებებს მიმოიხილავს. „საქართველოს პარლამენტი განიხილავს „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ საქართველოს კანონში ცვლილებებს. კანონპროექტის მიზანია ძალადობის ჩამდენ პირთა მიმართ გამოყენებული შემზღუდავი ღონისძიებების ეფექტიანობის გაზრდა, მსხვერპლთა დაცულობის ამაღლება და ამ მიმართულებით სახელმწიფო პოლიტიკის გამკაცრება“ - აღნიშნულია მიმოხილვაში. სრულად... წყარო: https://www.transparency.ge

თბილისი. საქართველოს ახალგაზრდა იურისტთა ასოციაციის ცნობით, 2019 წლის 11 დეკემბერს, არასრულწლოვანმა თვითმკვლელობა სავარაუდოდ საგამოძიებო ორგანოს თანამშრომლების მიერ განხორციელებული ფსიქოლოგიური ძალადობის გამო სცადა. იგი საცხოვრებელი კორპუსის მე-9 სართულიდან გადმოხტა და ამჟამად კომატოზურ მდგომარეობაში იმყოფება.  „თვითმკვლელობის მცდელობას წინ უსწრებდა დიდუბე-ჩუღურეთის პოლიციის პირველ განყოფილებაში 2019 წლის 10 დეკემბერს (დაახლოებით 17:00-23:00 საათამდე) და 11 დეკემბერს (დაახლოებით 11:00-12:00 საათამდე) არასრულწლოვნის გამოკითხვა, რა დროსაც იგი პოლიციელთა მხრიდან ფსიქოლოგიური ძალადობის მსხვერპლი გახდა“, - ნათქვამია საია-ს მიერ გავრცელებულ ინფორმაციაში“, - „ მოვუწიდებთ: სახელმწიფო ინსპექტორის საგამოძიებო სამსახურს - დროულად ჩაატაროს ეფექტიანი, ობიექტური და მიუკერძოებელი გამოძიება არასრულწლოვნის მიმართ პოლიციის განყოფილებაში განხორციელებული უკანონო ქმედებების ფაქტზე; საქართველოს გენერალურ პროკურატურას - თვითმკვლელობამდე მიყვანის საქმე გამოსაძიებლად დაუქვემდებაროს სახელმწიფო ინსპექტორის სამსახურს“.  სრულად...  წყარო: https://gyla.ge

თბილისი. ადამიანის უფლებებზე მომუშავე ორგანიზაციებმა სასამართლო სისტემის გარშემო მიმდინარე პროცესები გააპროტესტეს. „2019 წლის 12 დეკემბერს საქართველოს პარლამენტმა უზენაესი სასამართლოს 14 მოსამართლე დაამტკიცა. მათი უმრავლესობა სასამართლო სისტემაში არსებული კლანის ინტერესების გამტარებელია, ან იკავებს ამჟამინდელ ხელისუფლებაში მაღალი რანგის თანამდებობებს“. სრულად... წყარო: ორგანიზაციის გვერდი სოციალურ ქსელში

თბილისი. GIZ-სამართლის პროგრამა აქვეყნებს უჩა თოდუას სახელმძღვანელოს: მეწარმეთა შესახებ საქართველოს კანონი სასამართლო გადაწყვეტილებებში. „ნაშრომში სისტემატიზებულია 2001 წლიდან დღემდე ყველა ინსტანციის სასამართლოს მიერ „მეწარმეთა შესახებ“ საქართველოს კანონის ნორმათა ინტერპრეტაციები, რეზიუმეებით, მოკლე შეჯამებებით, საკვანძო თემატიკისა და განმარტებული ნორმების მითითებით. წარმოდგენილ ნაშრომში გაანალიზებული თითოეული სასამართლო გადაწყვეტილების სრული ვერსია განთავსებულია სასამართლო პრაქტიკის საძიებო სისტემა „თემიდას“ ვებ-გვერდზე www.temida.ge. თემიდა • temida.mylaw.ge  სახელმძღვანელოს ელ.ვერსია… წყარო: GIZ-ის გვერდი სოციალურ ქსელში სამართალი

თბილისი. საქართველოს ახალგაზრდა იურისტთა ასოციაცია (საია) საქართველოს პარლამენტის იურიდიულ საკითხთა კომიტეტის სხდომიდან მედიის წარმომადგენლების მანდატურის სამსახურის თანამშრომლების მიერ ძალის გამოყენებით გამოძევებას ეხმაურება. „საქართველოს უზენაესი სასამართლოს მოსამართლეობის კანდიდატების კენჭისყრის საკითხის განხილვის გაშუქება მნიშვნელოვანია პროცესის გამჭვირვალობისთვის. დაუშვებელია მედიის წარმომადგენლებთან მსგავსი მოქცევა. მანდატურის სამსახურის თანამშრომელთა ქცევა კი, პარლამენტის აპარატის მიერ უნდა იქნას შესწავლილი. საია მოუწოდებს საქართველოს პარლამენტს, უზრუნველყოს მედიის წარმომადგენლების დაუბრკოლებელი მუშაობა პარლამენტში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში