თბილისი. მედიისა და საინფორმაციო წიგნიერების გლობალური კვირეულის აღსანიშნავად, USAID გთავაზობთ ვიდეო გაკვეთილებს, რომელშიც, წამყვანი დავით გორგილაძე დეტალურად განმარტავს, თუ როგორ ვმართოთ ფეისბუქი, დავიცვათ პირადი ინფორმაცია და ციფრული ჰიგიენის სხვა ნიუანსები.  „თითოეული ვიდეო გათვლილია მნიშვნელოვან თემებზე, მაგალითად, როგორ აგროვებს და აანალიზებს ფეისბუქის ალგორითმი პირად ინფორმაციას და ინტერესებს, რატომ და როგორ იყენებენ კერძო ბიზნესები ან პოლიტიკური აქტორები ამ ინფორმაციას და როგორ შეიძლება მომხმარებლის ნების საწინააღმდეგოდ მისი მონაცემების ბოროტად გამოყენება. დღევანდელი ვიდეოს თემაა საკუთარი ალგორითმის კონტროლი“. წყარო: ორგანიზაციის გვერდი სოციალურ ქსელში

EUvsDiSinfo-ს ცნობით, რუსეთის მიზანმიმართულ თავდასხმას მშვიდობიან მოსახლეობაზე უკრაინაში თან ახლავს დეზინფორმაციის კამპანიები. კრემლის ერთ-ერთი სიცრუის თანახმად, კამიკაძე დრონებმა იერიში მხოლოდ არასაცხოვრებელ უბნებზე მიიტანეს. სინამდვილეში კი, რუსეთი მიზანმიმართულად უმიზნებს მშვიდობიან მოსახლეობას. კიევში დრონების თავდასხმის შედეგად, სულ მცირე, 4 ადამიანი დაიღუპა. სამიზნეებს შორისაა ქალაქის ცენტრში მდებარე 120 წლის წინ აშენებული საცხოვრებელი კორპუსი. სრულად... წყარო: ევროკავშირის გვერდი სოციალურ ქსელში

სამცხე-ჯავახეთი. სოციალური სამართლიანობის ცენტრი აქვეყნებს გოჰარ აღჯოიანის ბლოგპოსტს: მოქალაქეობის გარეშე დარჩენილები. „2008 წლის აგვისტოს ომის შემდეგ რუსეთში საქართველოს მოქალაქეების შესვლა, იქ ხანგრძლივი დროის განმავლობაში დარჩენა და დასაქმება გართულდა. შრომით მიგრაციაში წასულ ხალხს რუსეთში ყოფნა და მუშაობა საქართველოს მოქალაქეობის პასპორტით მხოლოდ სამი თვის განმავლობაში შეეძლოთ. ამ პოლიტიკურმა რეალობამ გამოიწვია ის, რომ ადამიანების უმეტესობამ ჯავახეთში საქართველოს მოქალაქეობასთან ერთად, სომხეთის მოქალაქეობაც მიიღო, რაც მათ რუსეთში მუშაობის და საბაზისო შემოსავლის მიღების შესაძლებლობას აძლევდა. თუმცა, მალევე, ვისაც საზღვარზე დაუფიქსირდა ორმაგი მოქალაქეობა, ჩამოერთვათ საქართველოს პასპორტები და შესაბამისად, საქართველოს მოქალაქეობაც. კანონის აღსრულება კიდევ უფრო გამკაცრდა 2013 წლიდან და ათასობით ადამიანმა აღმოაჩინა, რომ ისინი საქართველოს მოქალაქეობის გარეშე დარჩნენ“. სრულად... წყარო: socialjustice.org.ge

თბილისი. 18 ოქტომბერს საქართველოს ახალგაზრდა იურისტთა ასოციაციამ (საია) საკონსტიტუციო სასამართლოს წარუდგინა წერილობითი მოსაზრება საქართველოს მთავრობის სარჩელთან დაკავშირებით, რომელიც პრეზიდენტისაგან ითხოვს მის მიერ წარდგენილი პირების ელჩის თანამდებობაზე დანიშვნას. ორგანიზაცია არ იზიარებს მთავრობის მოსაზრებას იმის თაობაზე, რომ პრეზიდენტის უფლებამოსილება - მთავრობის წარდგინებით დანიშნოს და გაათავისუფლოს ელჩები - ცერემონიალურია. „საქართველოს კონსტიტუციის 52-ე მუხლის პირველი პუნქტის „ა“ ქვეპუნქტი, სიტყვა-სიტყვით, არ იძლევა იმგვარი დასკვნის გაკეთების შესაძლებლობას, რომ საქართველოს პრეზიდენტმა აუცილებლად უნდა დააკმაყოფილოს მთავრობის მოთხოვნა - ელჩის თანამდებობაზე დანიშნოს ან თანამდებობიდან გაათავისუფლოს ის პირი, ვინც მთავრობას სურს. პრეზიდენტის მიერ ელჩის დანიშვნის ფუნქცია არ არის ცერემონიული, განსხვავებით, მაგალითად, პრემიერ-მინისტრის თანამდებობაზე დანიშვნის უფლებამოსილებისაგან“, ნათქვამია ორგანიზაციის ბლოგპოსტში. სრულად... წყარო: www.gyla.ge

იმერეთი-სამეგრელო-გურია. ინფორმაციის თავისუფლების განვითარების ინსტიტუტმა (IDFI) ქუთაისის, ლანჩხუთისა და ზუგდიდის მუნიციპალიტეტებში რეპრესირებულთა საკითხზე საინფორმაციო შეხვედრები და „რადიო თავისუფლების“ ფილმის „დახვრეტილთა სასაფლაო ბათუმში“ ჩვენება გამართა. სრულად... წყარო: idfi.ge

თბილისი. სოციალური სამართლიანობის ცენტრი წარმოგიდგენთ გიორგი ჩუბინიძის სტატიას ნაღმების თეორიაზე. „„ნაღმების თეორიის“ არსი შემდეგში მდგომარეობს: საბჭოთა კავშირის სახელს ამოფარებული რუსეთი სსრკ-ს შექმნის დღიდან საქართველოში ქმნის ეთნიკურობაზე დაფუძნებულ ავტონომიურ რესპუბლიკებსა და ოლქებს, რომლის ნამდვილი მიზანი დასაბამიდანვე დამოუკიდებელი ქართული სახელმწიფოს მთლიანობის მორღვევა იყო“. სრულად...  წყარო: socialjustice.org.ge

აჭარა. გაეცანით ირმა ზოიძისა და მირზა მამულაძის მიერ მომზადებულ სტატიას ბათუმში ავარიული სახლების დემონტაჟის შესახებ. სტატია მომზადდა IDFI-ის მიერ გამოცხადებული პროექტების კონკურსის ფარგლებში. „ბათუმში ბიზნეს საქმიანობის მთავარი წამყვანი მიმართულება მშენებლობაა. საქართველოს სტატისტიკის ეროვნული სამსახურის ინფორმაციით, წლებია, ძირითადი სამშენებლო ობიექტები აპარტამენტები და საცხოვრებელი სახლებია. ადგილობრივი ხელისუფლება, ტრადიციულად, მენაშენეებს სიმაღლის გადამეტების საშუალებას აძლევს, ნებართვის სანაცვლოდ კი მუნიციპალური საბინაო ფონდისთვის გარკვეული რაოდენობის ბინას ითხოვს. რამდენი სახლია ამ ეტაპზე ფონდში, ბათუმის მერია ამის შესახებ ინფორმაციას არ ასაჯაროებს, თუმცა ცნობილია, რომ ამ ქონებას მერია ახლა ავარიული სახლების პროგრამაში ჩასართავადაც იყენებს“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის ანალიტიკოსის თამარ ხუხიას ბლოგპოსტს - საბჭოში გადაწყვეტილების მიღების წესი - რას ამბობს საქართველოს კონსტიტუცია. „საია მიიჩნევს, რომ ორმაგი 2/3-ით გადაწყვეტილების მიღების წესი სრულ თანხვედრაშია კონსტიტუციის ჩანაწერთან. ჩანაწერი ერთადერთ აკრძალვას გულისხმობს - უფრო დაბალი კვორუმით პირის დანიშვნას, სხვა შემთხვევაში კი კონსენსუსზე ორიენტირებული გადაწყვეტილების მიღების შესაძლებლობას იძლევა. გარდა ამისა, კლანური მმართველობის შესასუსტებლად ერთადერთი საშუალება ჩაკეტილი სისტემის გარეთ არსებული კადრების შედინებაა, მათ შორის, იუსტიციის საბჭოში. საია-ს პოზიციას კონსტიტუციური სამართლის სპეციალისტებიც იზიარებენ“. სრულად... წყარო: www.gyla.ge

თბილისი. 13 ოქტომბერს გამოქვეყნდა საქართველოს სახალხო დამცველის კანდიდატად მსურველ პირთა შეფასების შედეგები. შედეგებზე ინფორმაცია გაავრცელა რამდენიმე მედია საშუალებამ სადაც წარმოდგენილი იყო კანდიდატთა რეიტინგიც. მედიაში გავრცელებული ქულათა რეიტინგის შედგენისას არ იქნა გათვალისწინებული საკონკურსო კომისიის წევრთა მიერ კანდიდატის შეფასებისგან თავის შეკავების შემთხვევები. ინფორმაციის თავისუფლების განვითარების ინსტიტუტის (IDFI) შეფასებით, კანდიდატთა შედეგების რეიტინგის შედგენისას აუცილებელია გათვალისწინებული იყოს რეალურად რამდენ კომპონენტში შეფასდა კანდიდატი, დაჯამდეს მხოლოდ შეფასებული კომპონენტები და წარმოდგენილი იქნეს საშუალო არითმეტიკული ქულა. სხვაგვარად, კანდიდატთა სარეიტინგო სიის შედგენისას უნდა იყოს გათვალისწინებული მხოლოდ ის კრიტერიუმები, რომლებშიც კანდიდატი შეფასდა. სრულად... წყარო: idfi.ge

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის ოფისის სამოქალაქო საბჭოს ორგანიზებით, ახალციხეში, გრიგოლ ხანძთელისა და გიორგი მთაწმინდელის ქუჩების მაცხოვრებლების 140 ხელმოწერა შეგროვდა. მოსახლეობა ითხოვს კანალიზაციის, სანიაღვრე არხებისა და ტროტუარების მოწყობას და კორპუსის გარე ფასადის რეაბილიტაციას. ორგანიზაცია მოუწოდებს ახალციხის მერიასა და გაერთიანებული წყალმომარაგების კომპანიას, განიხილონ მიმართვა და გადაჭრან ადგილობრივი მაცხოვრებლების პრობლემები. სრულად... წყარო: ორგანიზაციის გვერდი სოციალურ ქსელში

გურია და იმერეთი. 11-12 ოქტომბერს, ინფორმაციის თავისუფლების განვითარების ინსტიტუტმა (IDFI) რეგიონული ინიციატივების ცენტრ „ნათელი მომავალთან“ თანამშრომლობით ოზურგეთისა და ხონის მუნიციპალიტეტებში რეპრესირებულთა საკითხზე პრეზენტაცია და „რადიო თავისუფლების“ ფილმის „დახვრეტილთა სასაფლაო ბათუმში“ ჩვენება გამართა. სრულად... წყარო: idfi.ge

თბილისი. საქართველოს პოლიტიკის ინსტიტუტი (GIP) აქვეყნებს ნინო სამხარაძის ბლოგპოსტს: რა სახე აქვს პოლარიზაციას საქართველოში და როგორ გავზომოთ ის?. „მიუხედავად იმისა, რომ დისკუსია პოლარიზაციის საზიანო ეფექტებსა და დეპოლარიზაციის აუცილებლობაზე, დიდი ხანია, აქტიურად მიმდინარეობს, ჯერ კიდევ ბუნდოვანია საქართველოში არსებული პოლარიზაციის ბუნება, აქტორები და მახასიათებლები. ნაშრომი წარმოადგენს მცდელობას, პასუხი გასცეს კითხვებს, თუ რა სახე აქვს პოლარიზაციას დღეს საქართველოში და რა კრიტერიუმებით შეიძლება შევაფასოთ ის“. სრულად... წყარო: gip.ge

ამერიკა. 11-13 ოქტომბერს საქართველოს სახალხო დამცველი ნინო ლომჯარია ოფიციალური ვიზიტით იმყოფებოდა ვაშინგტონში, სადაც შეხვედრები გამართა აშშ-ს სენატის, პრეზიდენტის ადმინისტრაციისა და სახელმწიფო დეპარტამენტის მაღალი თანამდებობის პირებთან, ასევე საერთაშორისო ორგანიზაციების ხელმძღვანელებთან. ომბუდსმენის განცხადებით, ამერიკელი პარტნიორების მთავარი გზავნილია, რომ ამერიკის შეერთებული შტატები ურყევად იდგება საქართველოს გვერდით, მანამ, სანამ ქართველ ხალხს ექნება სურვილი მიიღოს დახმარება დემოკრატიული განვითარების პროცესში. სრულად... წყარო: ombudsman.ge

სამეგრელო. საერთაშორისო გამჭვირვალობა - საქართველო წალენჯიხის მერისთვის საკუთარი საცხოვრებელი სახლის წინ ავტომობილის დაწვის ფაქტს ეხმაურება. „გია ხარჩილავა ქვეყნის მასშტაბით ერთადერთი ოპოზიციონერი მერია და იგი ავტომობილის დაწვას თავის საქმიანობას უკავშირებს. აღნიშნული ფაქტი კიდევ ერთხელ ადასტურებს, რომ ქვეყანაში არსებული პოლიტიკური პოლარიზაციის მაღალი დონე და მმართველი პარტიის აგრესიული რიტორიკა პოლიტიკური ოპონენტებისა და ხელისუფლების მიმართ კრიტიკულად განწყობილი ჯგუფებისთვის ფიზიკური უსაფრთხოების პრობლემას ქმნის. მოვუწოდებთ შინაგან საქმეთა სამინისტროს, მყისიერად და მიუკერძოებლად გამოიძიოს წალენჯიხის მერის ავტომობილის დაწვის ფაქტი და საზოგადოებას გამოძიების შედეგებზე ინფორმაცია მიაწოდოს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. რონდელის ფონდი აქვეყნებს ზურაბ ბატიაშვილის ბლოგპოსტს: წყლის რესურსების დეფიციტი ახლო აღმოსავლეთში და მისი გავლენა რეგიონში მიმდინარე პროცესებზე. „ახლო აღმოსავლეთი ერთ-ერთი ყველაზე უწყლო რეგიონია მსოფლიოში და რაც დრო გადის, აქ წყლის დეფიციტთან დაკავშირებული პრობლემები სულ უფრო მატულობს. წყლის დეფიციტს მრავალი ფაქტორი განაპირობებს: დემოგრაფიული აფეთქების შედეგად მოსახლეობის სწრაფი ზრდა და ქაოსური ურბანიზაცია, გლობალური დათბობა და კლიმატის ცვლილება, ქვეყნებს შორის დაპირისპირებები, სამოქალაქო ომები, წყლის არსებული რესურსების არაეფექტური გამოყენება და ა.შ.“ სრულად... წყარო: ორგანიზაციის გვერდი სოციალურ ქსელში

თბილისი. კომპანია ACT - Analysis and Consulting Team - ორგანიზაცია საფარი/Sapari-ს დონაციის პლატფორმის საკომუნიკაციო სტრატეგიის შექმნაში უწევს კონსულტაციას. გაიგეთ მეტი... პრო ბონო მედიაცია ხორციელდება პროექტის „სამოქალაქო საზოგადოების ინიციატივის“ ფარგლებში, ევროკავშირისა (EU) და კონრად ადენაუერის ფონდის (KAS) მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ ვიდეოს, სადაც კითხვებს პასუხობენ სხვადასხვა კონფესიის წარმომადგენელი სასულიერო პირები. „შეგახსენებთ, 2021 წლის სექტემბერში მედიებმა დაუცველი ვებგვერდის ბმული მიიღეს, რომელზე ატვირთული ათასობით დოკუმენტიც სასულიერო პირების შესახებ ჩანაწერებს შეიცავდა“. სრულად... წყარო: socialjustice.org.ge

თბილისი. მაკლეინის ასოციაციის ინფორმაციით, წელს „მესტუმრე-ს“ ფარგლებში 65 მოხალისე გაერთიანდა, რომლებიც ხანდაზმულების მეგობრები და თანამოსაუბრენი გახდნენ. „მესტუმრე“ ექვსი თვის განმავლობაში გაგრძელდება და მასში, მთელი საქართველოს მასშტაბით, 8 ხანდაზმულთა სახლის ბენეფიციარები მიიღებენ მონაწილეობას. სრულად... წყარო: ორგანიზაციის გვერდი სოციალურ ქსელში

თბილისი. რონდელის ფონდის ინფორმაციით, უკრაინელები წინ მიიწევენ მდინარე ოსკილთან და ქალაქ ლიმანთან. იხილეთ ინფორმაცია მიმდინარე რუსეთ-უკრაინის ომის შესახებ „რუსეთის სამხედრო ძალების მიმოხილვის“ 72 -ე სპეციალურ გამოშვებაში. სრულად... წყარო: gfsis.org.ge

თბილისი. 23 სექტემბერს, საქართველოს პარლამენტში გაიმართა დისკუსია: „სოციალური მეწარმეობა საქართველოში - არსებული მდგომარეობა, მიმდინარე გამოწვევები და საკანონმდებლო აღიარების შესახებ ინიციატივები“. დისკუსიის საკითხებს წარმოადგენდა: სოციალური მეწარმეობის არსი და მნიშვნელობა; სოციალური მეწარმეობის სახელმწიფო მხარდაჭერის საერთაშორისო ტენდენციები; სოციალური მეწარმეობის მხარდაჭერა საქართველოს საერთაშორისო ვალდებულებების გათვალისწინებით; სოციალური მეწარმეობა საქართველოში - ადგილობრივი კონტექსტი და გამოწვევები; სოციალური მეწარმეობის საკანონმდებლო აღიარების მნიშვნელობა; სოციალური მეწარმეობის საკანონმდებლო რეგულირების ინიციატივები. სრულად... ღონისძიება საქართველოს პარლამენტის წევრის, მარიამ ლაშხისა და სსიპ-საქართველოს პარლამენტის კვლევითი ცენტრის ინიციატივით და ორგანიზებით, სამოქალაქო საზოგადოების ინსტიტუტის (CSI), საქართველოს სტრატეგიული კვლევებისა და განვითარების ცენტრისა (CSRDG) და სოციალურ საწარმოთა ალიანსის (SEA) თანამონაწილეობით გაიმართა.

თბილისი. თუ ხართ ბიზნეს კომპანია და გინდათ, ერთ სივრცეში შეხვდეთ სოციალურ საწარმოებს მთელი საქართველოს მასშტაბით, გაეცნოთ მათ პროდუქციას და მომსახურებას, შეუერთდით B2B გამოფენას, რომელსაც 30 სექტემბერს საქართველოს სტრატეგიული კვლევებისა და განვითარების ცენტრი ევროკავშირის პროექტის ფარგლებში აწყობს. სრულად... წყარო: ორგანიზაციის გვერდი სოციალურ ქსელში

თბილისი. ღია საზოგადოების ფონდის ინფორმაციით, უკრაინელი მოქალაქეების საცხოვრებლის უზრუნველყოფისთვის შექმნილ ფონდში, დაახლოებით 260 ათასი ლარი შეგროვდა. აქედან: ღია საზოგადოების ფონდის შემოწირულობა 150 ათასი ლარია; მოქალაქეთა შემოწირულობები კი 110 ათასი ლარი. სრულად... წყარო: ორგანიზაციის გვერდი სოციალურ ქსელში