აჭარა. სოციალური სამართლიანობის ცენტრის ინფორმაციით, მოსახლეობის პროტესტის შედეგად ბათუმის საკრებულომ დღის წესრიგიდან ამოიღო ბულვარში პლაჟის ნაწილის კერძო სასტუმროზე გადაცემის საკითხი, რამაც დროებით, თუმცა შეაჩერა საჯარო სივრცეების მიტაცების და განკერძოების მძიმე და დამაზიანებელი პროცესი. აჭარის მთავრობის ხელმძღვანელის, თორნიკე რიჟვაძის განმარტებით, რომ მორატორიუმი შეეხება მხოლოდ ახალ სამშენებლო პროექტებს და ის არ გავრცელდება იმ მშენებლობებზე, სადაც ძირითადი ნებართვები უკვე გაცემულია. ნებართვები კი შეგახსენებთ, რომ გაცემულია რივიერასა და ბათუმი ამბასადორის მშენებლობაზე. ორგანიზაცია მიიჩნევს, რომ ეს განმარტება ეჭვისქვეშ აყენებს თავად მორატორიუმის მიზანს, რომელიც ამ პირობებში ვერ შეძლებს რეალურად დაიცვას ბათუმის ისტორიული და კულტურული ღირებულება. სრულად... წყარო: ორგანიზაციის გვერდი სოციალურ ქსელში  ფოტო: ნეტგაზეთი

თბილისი. საქართველოს ახალგაზრდა იურისტთა ასოციაცია (საია) აქვეყნებს ნინო კაპანაძის ბლოგპოსტს: კიდევ ერთი ნეგატიური დასკვნა ვენეციის კომისიისა და ოდირისგან. „როგორც აღმოჩნდა, ვენეციის კომისიისა და ეუთო/ოდირის დასკვნა სრულად შეესაბამება საიას მიერ პარლამენტში გაგზავნილ მოსაზრებებსა და არგუმენტაციას, რომელთა წინასწარ გაცნობის ობიექტური შესაძლებლობა ინიციატორს კომისიისთვის დახმარების თხოვნით მიმართვამდე ჰქონდა. მათი გააზრების შემთხვევაში მმართველი ძალა გადაურჩებოდა საერთაშორისო ფორმატიდან ცივი წყლის გადასხმის არასასიამოვნო ეფექტს, ხოლო ქვეყანა - კანონის უზენაესობისა დაპოლიტიკური პლურალიზმის საკითხებში „ცუდი განზრახვების“ მქონის იარლიყს“. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტმა (IDFI) და უკრაინის განმათავისუფლებელი მოძრაობის შესწავლის ცენტრმა (Центр досліджень визвольного руху / Center for Research of the Liberation Movement) ურთიერთთანამშრომლობის მემორანდუმი გააფორმეს. „უკრაინის განმათავისუფლებელი მოძრაობის შესწავლის ცენტრი 2002 წელს დაარსებული არასამთავრობო ორგანიზაციაა, რომელიც შეისწავლის მე-20 საუკუნის უკრაინის განმათავისუფლებელი მოძრაობებს, იკვლევს მეხსიერებას და ტოტალიტარული წარსულის შედეგების დაძლევის პროცესებს ყოფილი საბჭოთა კავშირსა და სოციალისტური ბლოკის ქვეყნებში. ვინაიდან IDFI-ს მეხსიერებისა და დეზინფორმაციის კვლევების მიმართულება აღნიშნულ საკითხებზე მუშაობს საქართველოში, შესაბამისად, ორგანიზაციებს შორის გაფორმდა მემორანდუმი, რომელიც მიზნად ისახავს სამომავლოდ საერთო პროექტების დაგეგმვას, გამოცდილების გაზიარებას, ქვეყნებში საარქივო ღიაობის ადვოკატირებას და საზოგადოებისთვის აქტუალურ სხვა საკითხებზე მუშაობას“. სრულად... წყარო: idfi.ge

კახეთი. ცოდნის კაფე სოციალურად შეჭირვებული ხანდაზმულების დასახმარებლად გთავაზობთ, 5 ლარად შეიძინოთ კოსმოს მრავალჯერადი გამოყენების პირბადე და კოსმოს გუნდი მას თქვენი სახელით გადასცემს ხანდაზმულს. „Პანდემიამ განსაკუთრებით შეცვალა ხანდაზმული ადამიანების ყოველდღიურობა, პროდუქტებისა თუ საყოფაცხოვრებო ნივთების სიას შეემატა პირბადე. Პირბადეს უსაფრთხოდ რომ ატარებდნენ, თვეში 10 ლარამდე უნდა გადადონ მათი ისედაც მცირე პენსიიდან მათივე უსაფრთხოებაში. P.S. გუნდში „კოსმო“ ერთიანდებიან ახალგაზრდები ყვარლიდან ცოდნის კაფეს ასაშენებელი კამპანიის ფარგლებში". სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) მეხსიერებისა და დეზინფორმაციის კვლევების მიმართულების ხელმძღვანელი, ანტონ ვაჭარაძე ონლაინ საერთაშორისო კონფერენციაზე „არქივები - საზღვრები, იდენტობა, აღქმა“ მოხსენებით წარდგა. „კონფერენციაზე ანტონ ვაჭარაძემ ისაუბრა თემაზე: „სახელმწიფო არქივების ღიაობა კორონავირუსის პანდემიის პირობებში ყოფილ საბჭოთა რესპუბლიკებში და აღმოსავლეთის ბლოკის ქვეყნებში“ და განიხილა კვლევის მთავარი მიგნებები. მოხსენებამ დაინტერესება გამოიწვია დამსწრეებსა და პანელისტებს შორის და დაიგეგმა მისი უფრო ფართო მასშტაბით წარდგენა და გაცნობა ევროპული საარქივო საზოგადოებისთვის“. სრულად... წყარო: idfi.ge

თბილისი. „მითების დეტექტორმა” იმ ფოტოს წარმომავლობა გაარკვია, რომლითაც საქართველოს თავდაცვის მინისტრის მოადგილემ დავით სუჯაშვილმა მესაზღვრეებს 21 მარტს ფეისბუკზე პროფესიული დღე მიულოცა. ფოტოზე რუსი მესაზღვრეა აღბეჭდილი და მოგვიანებით სუჯაშვილმა ამ ფაქტთან დაკავშირებით ბოდიში მოიხადა. მომხდარი კი გვერდის ადმინისტრატორის გაუფრთხილებლობით ახსნა. „yandex.ru-ს საძიებო სისიტემით აღნიშნული ფოტოს ყველაზე ადრე გამოქვეყნებული ვერსია 2019 წლის წლის 28 მაისით თარიღდება. მასალაში, სათაურით “ФСБ-ს სასაზღვრო ოფისი სამხრეთ ოსეთში: ხალხს შეუძლია მშვიდად იძინოს” (Погрануправление ФСБ в Южной Осетии: народ может спать спокойно) აღნიშნული ფოტო შემდეგი აღწერით გვხვდება: “რუსი მესაზღვრეები სამხრეთ ოსეთის სადარაჯოზე” (Российские пограничники на страже границ Южной Осетии)“. სრულად... წყარო: mythdetector.ge

თბილისი. ეკონომიკური პოლიტიკის კვლევის ცენტრი (EPRC) აქვეყნებს დოკუმენტს: ჯო ბაიდენი, რუსეთი, უკრაინა და საქართველო. „ახალი ადმინისტრაციის საქართველოსა და უკრაინაზე გავლენას დრო აჩვენებს. ახლავე შეიძლება ითქვას, რომ რუსეთის ექსპანსიის წინააღმდეგ მიმართული ძალისხმევა, კორუფციის წინააღმდეგ ბრძოლა და დემოკრატიული ინსტიტუტების ჩამოყალიბება ბაიდენის დღის წესრიგში პრიორიტეტულ ადგილებს ინარჩუნებენ. დემოკრატია და კანონის უზენაესობა კითხვის ნიშნის ქვეშ დგას როგორც უკრაინაში, ისე საქართველოში“. სრულად... წყარო: ორგანიზაციის გვერდი სოციალურ ქსელში

კახეთი. 10-11 მარტის საქველმოქმედო კავშირ „თემის“ ერთი საამქროს კუთხეში ცეცხლი გაჩნდა. „თემის შოკირებულმა, თუმცა მამაცმა თანამშრომლებმა და მეგობრებმა სოფლიდან სცადეს მზარდი ცეცხლის შიშველი ხელებითა და ვედროებით ჩაქრობა. მეხანძრეები გვიან მოვიდნენ, თუმცა მაინც შეძლეს ცეცხლის ჩაქრობა და კიდევ უფრო მეტი ზარალის აცილება. ცეცხლს შეეწირა სახურავი და ჭერი. საამქროში იდგა ელექტრო მანქანები, რომლებიც ცეცხლის შედეგად დაზიანდა. დაზიანებული საამქროს აღსადგენად, შესაძლებელია შემოწირულობის განხორციელება“. დახმარების სურვილის შემთხვევაში ანგარიშის ნომერია: GE87TB7934736080100002  სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიის და განვითარების ცენტრი (GCSD) გთავაზობთ კვლევას - „საინფორმაციო ომის მეთოდების ტრანსფორმაცია თანამედროვე საკომუნიკაციო შესაძლებლობების განვითარების ფონზე“. ნაშრომი სრულად იხილეთ ბმულზე... „საინფორმაციო ომი, „ფეიკ ნიუსები“, დეზინფორმაცია, ეს ის ტერმინებია, რომლებმაც ჩვენს ყოველდღიურ ცხოვრებაში ადგილი დაიმკვიდრა. ექსპერტები და ანალიტიკოსები აქტიურად მუშაობენ საინფორმაციო ომის გამოწვევებთან გასამკლავებლად, თუმცა მნიშვნელოვანია ამ პროცესში გავითვალისწინოთ არამარტო ამჟამინდელი გარემოებები, არამედ წარსულიც”. სრულად... წყარო: ორგანიზაციის გვერდი სოციალურ ქსელში

თბილისი. ეკონომიკური პოლიტიკის კვლევის ცენტრი (EPRC) აქვეყნებს დოკუმენტს: „სოციალური დაცვის სისტემის განვითარების სტრატეგიული ხედვა“. დოკუმენტი მოიცავს ავტორთა შორის შეჯერებულ ძირითად დებულებებს, რომელთაც, ორგანიზაციის აზრით, ქვეყნისა და საზოგადოებისათვის ოპტიმალური სოციალური დაცვის მოდელის შექმნა უნდა დაემყაროს. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის ინფორმაციით, საჯარო რეესტრის ეროვნულმა სააგენტომ 2021 წლის 11 მარტს შეაჩერა კომუნიკაციების კომისიის მიერ შპს ,,კავკასუს ონლაინში“ დანიშნული სპეციალური მმართველის რეგისტრაცია. „აღსანიშნავია, რომ 2020 წლის 9 ივლისს IDFI-მ გამოაქვეყნა სტატია სახელწოდებით „საქართველოს კომუნიკაციების ეროვნული კომისიის საქმიანობაში არსებობს გამჭვირვალობის ხარვეზები”, რომელშიც განხილული და შეფასებულია კომისიის რამდენიმე პრობლემური გადაწყვეტილება. მათ შორისაა კომისიის გადაწყვეტილება შპს “კავკასუს ონლაინის” საქმიდან გამომდინარე წარდგენილ საკანონმდებლო ცვლილებებთან დაკავშირებით. IDFI აღნიშნულ სტატიაში აკრიტიკებდა წარდგენილ ცვლილებებს და წერდა, რომ დროებითი მმართველის დანიშვნა წარმოდგენილი ცვლილებებით სცდებოდა კომუნიკაციების კომისიის მანდატსა და კომპეტენციას“. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) ტყიბულის შახტში დასაქმებულ ერთ-ერთ მეშახტეს შახტებში არსებულ მძიმე სამუშაო პირობებზე ესაუბრა. „დღეს ტყიბულელი მეშახტის მთავარი წუხილი ისაა, რომ სახლიდან გასვლისას უკან ცოცხალი და ჯანმრთელი დაბრუნების გარანტია არ აქვს. უსაფრთხოება მთავარი პრობლემაა. წინა პერიოდებთან შედარებით დიდი განსხვავება არ არის. უამრავი ტრაგიკული შემთხვევის გამომწვევი მიზეზების აღმოსაფხვრელად არანაირი ძირეული ცვლილება არ გაკეთებულა. ერთადერთი, რაც ახალმა კომპანიამ მოიგონა გაზის აპარატურის დაყენებაა და „ლავების“ აფეთქების დროს ხალხი გამოყავთ. ნახშირის მოპოვება იქნება თუ დამუშავება არაფერი არ შეცვლილა. პრობლემა რასაც ამდენ ტრაგიკულ შემთხვევამდე მივყავართ „კამერული“ სისტემით ნახშრის მოპოვებაა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიზს: პეტიციების სისტემის მნიშვენლობა მოქალაქეთა მონაწილეობისთვის: საერთაშორისო მაგალითები და საქართველოს პრაქტიკა. „მნიშვნელოვანია, პეტიციების შესაგროვებლად დაწესებული მინიმალური ზღვარი საწყის ეტაპზე იყოს დაბალი, რათა მისმა შედარებით მაღალმა ოდენობამ, პირიქით, არ დანერგოს ნიჰილისტური განწყობა აქტიურ მოქალაქეებში. უმნიშვნელოვანესია საჯარო დაწესებულებების ანგარიშვალდებულება და გამჭვირვალობა, რაშიც მოიაზრება წარდგენილი, ასევე, დაკმაყოფილებული პეტიციების შესახებ ინფორმაციის პროაქტიული ხელმისაწვდომობა, წარმატებული პეტიციების განხილვის პროცესის ღიაობა და საბოლოო გადაწყვეტილების დასაბუთება“.  სრულად... წყარო: idfi.ge

სამეგრელო. „საერთაშორისო გამჭვირვალობა - საქართველოს“ ზუგდიდის ოფისისა და ორგანიზაციის სამოქალაქო საბჭოების წევრების ორგანიზებით, 10 მარტს, ზუგდიდსა და წალენჯიხაში შეხვედრები გაიმართა. „ზუგდიდში, თაბუკაშვილის ქუჩაზე მდებარე დევნილთა დასახლების მცხოვრებლები გზის ორი მონაკვეთის რეაბილიტაციას ითხოვენ. სოფელ ონარიის მცხოვრებთა მოთხოვნა საკანალიზაციო და სანიაღვრე სისტემის მოწყობა, გზის მოასფალტება, მათ შორის ზუგდიდის ინფექციურ საავადმყოფომდე მისასვლელი გზის მოწესრიგებაა. წალენჯიხაში, დაბა ჯვარში კი მოსახლეობა კორპუსების გადახურვას, დაზიანებული საკანალიზაციო სისტემის რეაბილიტაციას და უწყვეტ წყალმომარაგებას ითხოვს. ზუგდიდსა და დაბა ჯვარში გამოვლენილი პრობლემების გადასაჭრელად პეტიციისა და წერილობითი მიმართვის ორგანიზება უკვე დავიწყეთ და შესაბამის უწყებებს უახლოეს მომავალში მივმართავთ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს დოკუმენტს: სასესხო და საკრედიტო ურთიერთობებზე პანდემიის გავლენის შედეგად ქვეყანაში არსებული მძიმე სოციალური მდგომარეობა. „პანდემიის პირობებში მოსახლეობის დიდი ნაწილი ვერ ახერხებს სასესხო/საკრედიტო ვალდებულებების შესრულებას. აგრეთვე, გამოწვევაა ამ პრობლემების გადაწყვეტის სამართლებრივი მხარეც. კონსტიტუციის თანახმად, საქართველო არის სოციალური სახელმწიფო და ის ზრუნავს საზოგადოებაში სოციალური სამართლიანობის, თანასწორობისა და სოლიდარობის პრინციპების განმტკიცებაზე. ამიტომ, მნიშვნელოვანია, ხელისუფლებამ გააანალიზოს სასესხო და საკრედიტო ურთიერთობებზე კრიზისის გავლენის მასშტაბი/სიმწვავე, მხედველობაში მიიღოს როგორც ავტორიტეტული ქსელის რეკომენდაციები, ისე სხვა ქვეყნების საუკეთესო პრაქტიკა და გადადგას ქმედითი ნაბიჯები ქვეყანაში არსებული მძიმე სოციალური პირობების გასაუმჯობესებლად“, ნათქვამია დოკუმენტში. სრულად... წყარო: gyla.ge

თბილისი. 4 მარტს ინფორმაციის თავისუფლების განვითარების ინსტიტუტმა (IDFI) კვლევის „მხილების ინსტიტუტის გამოწვევები საქართველოში - კანონმდებლობა და პრაქტიკა“ ონლაინ პრეზენტაცია გამართა. „კვლევის მიზანია, კანონმდებლობის ანალიზისა და პრაქტიკის შესწავლის გზით დაადგინოს საქართველოს საჯარო დაწესებულებებში მხილების შემთხვევების სიმცირის მიზეზი, აღმოაჩინოს ხარვეზები და განსაზღვროს კონკრეტული რეკომენდაციები მათი აღმოფხვრის მიზნით". კვლევა და ძირითადი მიგნებები იხილეთ აქ... წყარო: idfi.ge

თბილისი. #გვარიდამიბრუნე - სამოქალაქო კამპანიაა, რომლის ფარგლებშიც აზერბაიჯანელი აქტივისტები თავიანთი გვარების რუსული დაბოლოების აზერბაიჯანულით შეცვლას ითხოვენ. „ჩვენ ვართ ის ადამიანები, რომლებიც მუდამ თან ვატარებთ პირადობის მოწმობას, დოკუმენტს, რომელიც ერთის მხრივ ჩვენს სახელმწიფოებრივ იდებტობას წარმოაჩენს, თუმცა, საკუთარ პირადობის მოწმობაზე დაკვირვება გვახსენებს ჩვენი ქვეყნის და გვარების ოკუპაციასაც. ეს კი ჩვენ ხშირად გვაბრაზებს, გვაღიზიანებს, გულს გვკტენს“. კამპანიას ორგანიზებას უწევს პლატოფრმა „სალამი“ EWMI ACCESS-ის მხარდაჭერით. სრულად... წყარო: პლატფორმა „სალამის“ გვერდი სოციალურ ქსელში

თბილისი. 10 მარტს, 16:00 საათზე, საქართველოში ამერიკის საელჩოს ფეისბუქ გვერდზე ალუმნი საგრანტო პროგრამის შესახებ კითხვა-პასუხის სესია გაიმართება. „შეკითხვები აღნიშნულ დროს აშშ-ის საელჩოს ფეისბუქის გვერდზე გამოქვეყნებული პოსტის კომენატრებში მოგვწერეთ“. სრულად... წყარო: აშშ-ს საელჩო გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეო რეპორტაჟს, რომელიც მომზადებულია პროექტის - „ქმედუნარიანობის ინსტიტუტის განხორციელების ხელშეწყობა საქართველოში“ ფარგლებში. „2014 წელს საკონსტუტიციო სასამართლომ ასეულობით შეზღუდული შესაძლებლობის მქონე ადამიანს წართმეული სამოქალაქო უფლებები დაუბრუნა. მათ აღარ ანიჭებენ ქმედუუნაროს სტატუსს და აღარ უნიშნავენ მეურვეს. დამოუკიდებლად ცხოვრებაში ახლა მათ საკუთარი ნებით არჩეული მხარდამჭერი ეხმარებათ“. სრულად... წყარო: emc.org.ge

თბილისი. 1921 წლის 25 თებერვალს რუსეთის მე-11 არმია საქართველოს დემოკრატიულ რესპუბლიკაში შემოიჭრა. საქართველოს უახლესი ისტორიის ამ ერთ-ერთ უმძიმეს თარიღთან დაკავშირებით ინფორმაციის თავისუფლების განვითარების ინსტიტუტმა (IDFI), პარტნიორი ორგანიზაციების მხარდაჭერით, გამართა არა ერთი ღონისძიება, რომელთა მიზანიც იყო საზოგადოებაში საბჭოთა ოკუპაციის შესახებ ცნობიერების ამაღლება, თავისუფლებისთვის მებრძოლი ადამიანებისა და ეროვნული სულისკვეთების წარმოჩენა, ქვეყნის დამოუკიდებლობის იდეისათვის მსხვერპლად შეწირული გმირებისათვის პატივის მიგება. იხ. აქტივობები სრულად... წყარო: idfi.ge

თბილისი. კავკასიის გარემოსდაცვითი არასამთავრობო ორგანიზაციების ქსელი (CENN) გიზიარებთ ცნობილი იტალიელი მზარეულის, ენზო ნერის რამდენიმე მნიშვნელოვან რჩევას საკვების ნარჩენების შესამცირებლად.  1. საკვები შეიძინე გონივრულად; 2. პროდუქტები/კერძები სწორად შეინახეთ; 3. იყავი ორგანიზებული; 4. გადაამზადე თანამშრომლები; 5. უსასყიდლოთ გაეცი საკვები; 6. საკვების ნარჩენები გამოიყენე ახალი დანიშნულებით; სრულად... წყარო: ორგანიზაციის გვერდი სოციალურ ქსელში

თბილისი. საქართველოს პოლიტიკის ინსტიტუტის (GIP) ინფორმაციით, მმართველმა პარტია „ქართულმა ოცნებამ“ გააჟღერა, რომ 2024 წლისთვის საქართველო ევროკავშირის წევრობის ოფიციალური განაცხადის გაკეთებას გეგმავს. ორგანიზაციის თხოვნით, შერჩეულმა ექსპერტებმა საფრანგეთიდან, გერმანიიდან და შვედეთიდან შემდეგ სამ შეკითხვას უპასუხეს:  „ევროკავშირის წინაშე არსებული ბოლოდროინდელი გამოწვევების გათვალისწინებით, რა შეიძლება იყოს საქართველოს ევროპულ ამბიციებთან, კერძოდ, 2024 წელს ევროკავშირის წევრობაზე განაცხადის გაკეთების ინიციატივასთან დაკავშირებული რისკები და მოსალოდნელი სარგებელი? თუ საქართველო გადაწყვეტს ევროკავშირის წევრობაზე ოფიციალური განაცხადის გაკეთებას, უმჯობესი იქნება ამის გაკეთება დამოუკიდებლად თუ უკრაინასა და მოლდოვასთან ერთად? როგორ უნდა გაუმკლავდეს საქართველოს მთავრობა ევროკავშირის სკეპტიციზმს ასოცირებული ქვეყნების ევროპული მისწრაფებების მიმართ?“ გაეცანით ექსპერტთა კომენტარს… წყარო: gip.ge