თბილისი. ანდრია გოცირიძე, კიბერუსაფრთხოების საგანმანათლებლო კვლევითი ცენტრის CYSEC-ის დამფუძნებელი ბლოგპოსტში საუბრობს ჟენევის სამიტზე და შეხვედრაზე განხილულ კიბერუსაფრთხოების თემაზე. „ბაიდენმა პუტინს იმ დარგების სია გადასცა, რომლებზე თავდასხმაც ვაშინგტონისთვის წითელი ხაზი იქნება, თუმცა რუსეთის პრეზიდენტმა, როგორც მოსალოდნელი იყო, უარყო კიბერშეტევებთან რუსეთის კავშირი. სამიტს, რომელმაც გაამძაფრა განცდა, რომ უახლოეს პერიოდში რუსეთის მხრიდან კიბერსივრცეში პასუხისმგებლობის მქონე ქცევა ნაკლებად სავარაუდოა, წინ რამდენიმე მნიშვნელოვანი კიბერშეტევა უსწრებდა“. სრულად... წყარო: www.gfsis.org

თბილისი. ინფორმაციის თავისუფლების განვითარების ინსტიტუტმა (IDFI) ჩაატარა ფართომასშტაბიანი კვლევა, რომლის ფარგლებშიც შეისწავლა საქართველოს სახელმწიფოს კონტროლირებად ტერიტორიაზე არსებული კომუნისტური, ტოტალიტარული რეჟიმის სახელწოდებების მატარებელი დასახლებული პუნქტების, ქუჩების, სკვერების, მოედნების და სხვა  ტერიტორიების ტოპონიმიკა. „შესწავლილი 80 დასახლებული პუნქტიდან საბჭოთა ტოტალიტარული ტოპონიმები გვხვდება 46 პუნქტში. 35 დასახლებულ პუნქტში გვხვდება ისეთი პიროვნებების, მოვლენების, ორგანიზაციების სახელების მატარებელი ადგილები, რომლებსაც მიუძღვით განსაკუთრებული დანაშაული საქართველოსა, თუ კაცობრიობის წინაშე. ტოპონიმებში ფიგურირებს პიროვნებები, რომელთა სახელებსაც თანამედროვე რუსული პროპაგანდა აქტიურად იყენებს“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტმა (IDFI) თბილისის მერიასთან თანამშრომლობითა და USAID-ის პროექტის დემოკრატიული მმართველობის ინიციატივა საქართველოში (USAID GGI) ფინანსური მხარდაჭერით, ღია მონაცემთა პორტალის კონცეფციის ონლაინ საჯარო განხილვა მოაწყო. „ღონისძიების მიზანი იყო თბილისის მერიის ღია მონაცემთა პორტალის კონცეფციის საზოგადოებისთვის წარდგენა, და დოკუმენტთან დაკავშირებით მოსაზრებებისა და შენიშვნების მოსმენა ადგილობრივი დაინტერესებული მხარეებისგან, მათ შორის სამოქალაქო საზოგადოების, აკადემიური წრეების, ბიზნესისა და მედიის წარმომადგენლებისგან“. სრულად... წყარო: idfi.ge

თბილისი. 27 ივნისს, ევროკავშირი-საქართველოს ასოცირების შეთანხმების ხელმოწერის მეშვიდე წელი შესრულდა. „მიუხედავად იმისა, რომ ეს ტექნიკური დოკუმენტია, ის ასახავს ჩვენს საერთო ღირებულებებსა და მიზნებს. იგი წარმოადგენს პოტენციალის გამოვლენის გასაღებს, რომლის მიზანიც ერთად გვაქვს დასახული. გილოცავთ იუბილეს როგორც საქართველოს, ასევე ევროკავშირს! იმედი მაქვს, რომ გავაგრძელებთ ერთობლივ ძალისხმევას ჩვენი პარტნიორობის კიდევ უფრო გაღრმავებისთვის და მომავალ წლებში კიდევ უფრო დაახლოებისათვის“, ამბობს კარლ ჰარცელი, ევროკავშირის ელჩი საქართველოში. სრულად... წყარო: ევროკავშირის გვერდი სოციალურ ქსელში

საზოგადოებრივი ორგანიზაციების საარსებო გარემოს მონიტორინგის ინსტრუმენტის – სსო მეტრის გაფართოვება იგეგმება. ინსტრუმენტის შემუშავებაში აღმოსავლეთ ევროპის 800–ზე მეტი ორგანიზაცია მონაწილეობდა.  შეგახსენებთ, რომ საერთაშორისო სტანდარტებზე დაფუძნებული ეს ინსტრუმენტი მოიცავს 10 სხვადასხვა სფეროს და ინდიკატორს, რომლითაც იზომება სსო–ების საარსებო გარემო - როგორც საკანონმდებლო, ასევე პრაქტიკული კუთხით. სსო მეტრი დაყოფილია 2 ძირითად ნაწილად: 1. ფუნდამენტური უფლებები და თავისუფლებები, რომელიც არის სამოქალაქო საზოგადოების არსებობის საფუძველი. 2. აუცილებელი პირობები, რომლებიც უზრუნველყოფს დამატებით მხარდაჭერას და მნიშვნელოვანია სამოქალაქო საზოგადოების განავითარებისთვის. ინსტრუმენტის საფუძველზე მომზადებულია რეგიონული ანგარიშები, მათ შორის საქართველოს შესახებ. საქართველოში კვლევას სამოქალაქო საზოგადოების ინსტიტუტი (CSI) არასამეწარმეო სამართლის ევროპული ცენტრთან (ECNL) თანამშრომლობით აწარმოებს.  უახლოეს მომავალში, როგორც ზემოთ აღვნიშნეთ იგეგმება ინსტრუმენტის დახვეწა. კერძოდ ECNL, სამოქალაქო საზოგადოების ინსტიტუტთან და სხვა პარტნიორებთან ერთად გეგმავს ინსტრუმენტს ქულების შეფასების სისტემა დაუმატოს. რაც დაინტერსებულ პირებსა და მხარეებს საშუალებას მისცეს შეადაროს კვლევის შედეგები წლების, სფეროების, ქვეყნების მიხედვით.  გარდა ამისა, მომდევნო წლებში გაფართოვდება ინსტრუმენტის საკვლევი არეალი – მაგალითად, სამოქალაქო ჯგუფებზე ციფრული ტექნოლოგიების ან ხელოვნური ინტელექტის საშუალებით გავლენის შეფასება. ასევე იგეგმება სსო მეტრის, როგორც მონიტორინგის საშუალების, მომხმარებლების – სსო–ებისა და აქტივისტების წრის გაფართოება სამიზნე ქვეყნებში.  ახალი ინიციატივები და ცვლილებები განხორციელდება პროექტის – „სსო მეტრი: ხელსაყრელი გარემოს და ძლიერი საზოგადოებრივი ორგანიზაციების მეგზურის“ ფარგლებში. მას არაკომერციული სამართლის ევროპული ცენტრი (ECNL), ევროკავშირის ფინანსური მხარდაჭერით, პარტნიორ ორიგანიზაციებთან: საერთაშორისო გამჭვირვალობა – სომხეთი (TIAC); შპს MG ქონსალთინგი (აზერბაიჯანი), სამოქალაქო საზოგადოების ინსტიტუტი (საქართველო), პრომო-ლექს ასოციაცია (მოლდოვა), უკრაინის დამოუკიდებელი პოლიტიკური კვლევების ცენტრი (უკრაინა) – ერთად ახორციელებს.

თბილისი. საქართველოში სოციალური მეწარმეობის ხელშეწყობის მიზნით ევროკავშირმა 12 ახალგაზრდულ სტარტაპ პროექტს გრანტი გადასცა, ევროკავშირი ახალგაზრდობისთვის (EU4Youth) პროექტის „სოციალური მეწარმეობა საქართველოსა და სომხეთში“ (SEAG) ფარგლებში. პირველ შვიდ გამარჯვებულ ახალგაზრდა სოციალურ მეწარმესთან საგრანტო ხელშეკრულებაზე ხელმოწერის ცერემონიალი ქალაქ რუსთავში მდებარე, ერთ-ერთ გამარჯვებულ სოციალურ საწარმოში, კაფე „კაფუნეში“ გაიმართა.  პროექტი მიზნად ისახავს საქართველოსა და სომხეთში მცხოვრებ ახალგაზრდებს დაეხმაროს საჭირო უნარებისა და ცოდნის განვითარებაში და მისცეს უნიკალური შესაძლებლობა განავითარონ არსებული ან დააფუძნონ სოციალური მიზნის მქონე ახალი მდგრადი ბიზნესი. სრულად... წყარო: eeas.europa.eu

თბილისი. სამოქალაქო პლატფორმა „არა-ფობიას!“ გმობს თეა დარჩიას განცხადებას როგორც ისლამოფობიურს და რელიგიის ნიშნით დისკრიმინაციის წამახალისებელს. „თეა დარჩიას განცხადება აღვივებს სტერეოტიპულ წარმოდგენებს იმასთან დაკავშირებით, რომ ქართველი მხოლოდ მართლმადიდებელი შეიძლება იყოს („აღარაფერი ქართული მათში აღარ არის“). სწორედ ამგვარი დამოკიდებულებები უწყობს ხელს საზოგადოებაში რელიგიის ნიშნით დისკრიმინაციასა და რელიგიურ კონფლიქტებს. ასეთ ვითარებაში კი ჟურნალისტებს აკისრიათ განსაკუთრებული პასუხისმგებლობა, არ გახდნენ სტერეოტიპული წარმოდგენების გავრცელების ხელშემწყობნი“, ნათქვამია განცხადებაში. სრულად... წყარო: www.gdi.ge

თბილისი. მაკ ჯორჯიას ინფორმაციით, საქართველოს 6 სამიზნე მუნიციპალიტეტში დამოუკიდებელი ცხოვრების ცენტრების ფუნქციონირება დაიწყო. „დამოუკიდებელი ცხოვრების ცენტრების მიზანია შეზღუდული შესაძლებლობის მქონე პირთა თემის საინფორმაციო მხარდაჭერა, მათი საჭიროებების იდენტიფიცირება, სერვისებზე ხელმისაწვდომობის ზრდის ადვოკატირება“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი (ყოფილი EMC) ნამახვანი ჰესის მიერ გამომუშავებული ელექტროენერგიის ექსპორტის შესაძლებლობის შესახებ ანალიზს გთავაზობთ. „სახელმწიფო უწყებების წარმომადგენლები ნამახვანი ჰესის სარგებლიანობაზე საუბრისას, სხვა საკითხებთან ერთად, ხშირად, ხაზს უსვამენ პროექტის მნიშვნელობას ქვეყნის ენერგოდამოუკიდებლობის განმტკიცებაში. ეს მტკიცება ენერგოდამოუკიდებლობის შესახებ, მორიგია ხმამაღალ განცხადებებს შორის, რომელიც ხშირად ისმის ხელისუფლების წარმომადგენლების მხრიდან და რომელსაც ხელშეკრულების ტექსტი – ინვესტორსა და მთავრობას შორის გაფორმებული შეთანხმების შინაარსი – ზურგს არ უმაგრებს“. სრულად... წყარო: socialjustice.org.ge

თბილისი. მითების დეტექტორის მასალაში საუბარია Deepfake მეთოდით გაყალბებულ პოსტზე, რომელშიც ბრიტანეთის დედოფალი ელიზაბეტ II თითქოს „მოსახლეობის პროგრამირებას“ ახდენს. „სამყარო სამყაროს“ მიერ გავრცელებულ პოსტს დართული აქვს კადრი ფილმების სერიიდან Resident Evil და ვიდეო ამერიკელი მწერალი დოლორეს ქენონის შესახებ. გაყალბებულ პოსტში დედოფალს კორონავირუსის აგებულების მსგავსი ბროში აქვს დაბნეული, მის უკან ნაძვის ხეზე კი, ასევე, კორონავირუსის აგებულებასთან მიმსგავსებული სათამაშო კიდია.  „გავრცელებული ინფორმაცია, თითქოს დედამიწის მოსახლეობის 1%-ს დანარჩენი მოსახლეობა დაპროგრამებული ჰყავს და ამ ყველაფერში დედოფალი ელიზაბეტ II-ა ჩართული, კონსპირაციაა. ფოტო, რომელიც პოსტს თან ერთვის, Deepfake ვიდეოს ფრაგმენტია, ხოლო ნამდვილ ვიდეოში დედოფალს SARS-COV-2 ვირუსის აგებულების მსგავსი გულსაბნევი და ნაძვის ხის სათამაშო არ აქვს“. მასალის თანახმად, Deepfake მეთოდით ვიდეოში შესაძლებელია ერთი ადამიანის სხეულს სხვა ადამიანის სახე, მიმიკები (მაგ: თვალის დახამხამება) „მივაბათ“. ამ მეთოდით ნებისმიერი პირის გამოსვლის გაყალბებაა შესაძლებელი და საკმაოდ ოსტატურადაც. სრულად... წყარო: mythdetector.ge

ლექსიკონში შესულია კორპორაციულ პასუხისმგებლობასთან და მდგრად განვითარებასთან დაკავშირებული ტერმინები და კონცეფციები. მაგალითად: მდგრადი განვითარების ანგარიში, კორპორაციული მდგრადობა, მწვანე მარკეტინგი და ა.შ.). ასევე, უფრო თართოდ გავრცელებული ტერმინები, რომლებიც მნიშვნელოვანი და არსებითია კორპორაციული პასუხისმგებლობის კონტექტსშიც. ლექსიკონი შეიქმნა CSRDG-ის კორპორაციული სოციალური პასუხისმგებლობის პროგრამის მიერ, პროექტის "სამოქალაქო საზოგადოების ინიციატივის" ფარგლებში, ევროკავშირისა და კორნად ადენაუერის ფონდის მხარდაჭერით. წიგნის ავტორია ლელა ხოფერია. ლექსიკონი...

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, საქართველოს პარლამენტმა, 77 ხმით 2-ის წინააღმდეგ, მესამე მოსმენით დაამტკიცა ცვლილებები „ინფორმაციული უსაფრთხოების შესახებ” კანონში, რომელიც წინააღმდეგობაში მოდის ევრო დირექტივის (ქსელებისა და ინფორმაციული სისტემების (Network and Information Systems (NIS)) დირექტივა) ცალკეულ მოთხოვნებთან. „ინიცირებული ცვლილებები, დარეგისტრირების დღიდან, ფართო მსჯელობისა და კრიტიკის საგანია სამოქალაქო საზოგადოების, კერძო სექტორისა და სფეროს ექსპერტების მხრიდან. IDFI აქტიურად მონაწილეობდა კანონპროექტის განხილვის, ცვლილებებთან დაკავშირებული რისკების შესწავლისა და ანალიზის პროცესში. პარლამენტის მიერ მიღებული ცვლილებები კარდინალურად ცვლის საქართველოს კიბერუსაფრთხოების სისტემას და შეიცავს მნიშვნელოვან რისკებს“, ნათქვამია განცხადებაში. სრულად... წყარო: idfi.ge

სამცხე-ჯავახეთი. 9-10 ივნისს, საქართველოს წითელი ჯვრისა და წითელი ჯვრის საერთაშორისო კომიტეტის წარმომადგენლებმა განახორციელეს საველე ვიზიტი ახალქალაქის მუნიციპალიტეტში, სადაც გაიმართა საინფორმაციო შეხვედრა მოხალისეებთან. „აღსანიშნავია, რომ დაინტერესებულ პირთა მობილიზებისა და მოხალისეობრივი მოძრაობის გაძლიერების მიზნით ახალქალაქში წითელი ჯვრის მოქმედმა ლიდერმა მოხალისეებმა კარგად გამოიყენეს შესაძლებლობა და ქ. ახალციხეში 10 ივნისს გამართულ ახალგაზრდობის დასაქმების ფორუმზე 65-მდე მსურველი მოხალისედ დაარეგისტრირეს“. სრულად... წყარო: ორგანიზაციის გვერდი სოციალურ ქსელში

თბილისი. დეზინფორმაციის კვლევების მიმართულებით კვლევის არეალისა და თანამსრომლობის გაღრმავების, ასევე საკვლევი თემების გაფართოების მიზნით, ინფორმაციის თავისუფლების განვითარების ინსტიტუტის (IDFI) დეზინფორმაციისა და მეხსიერების კვლევების მიმართულების ორგანიზებით, 2021 წლის 1 ივნისს გაიმართა დისკუსია. კონფერენციაში მონაწილეობდნენ წამყვანი სამეცნიერო ცენტრები და მედიაორგანიზაციები როგორც საქართველოდან, ისე ცენტრალური ევროპის ქვეყნებიდან, რომელთაც დიდი ტრადიცია და მრავალფეროვანი სპეციალიზაცია აქვთ დეზინფორმაციის კვლევასა და გაშუქებაში, ისევე როგორც მის წინააღმდეგ ბრძოლაში. კონფერენციაზე განიხილეს მთავარი მიღწევები დეზინფორმაციის კვლევებში სხვადასხვა ორგანიზაციის კონტექსტში, ისევე როგორც საუკეთესო პრაქტიკები დეზინფორმაციის სოციო-პოლიტიკური ეფექტების გასანეტრალებლად. სრულად... წყარო: idfi.ge

თბილისი. მითების დეტექტორის ინფორმაციით, 26 მაისს ფეისბუქმა დეზინფორმაციული შინაარსის შესახებ საკუთარი პლატფორმის მომხმარებლების ინფორმირებისთვის ახალი მექანიზმები აამოქმედა. „იქნება ეს ყალბი ან შეცდომაში შემყვანი ინფორმაცია COVID-19-ისა და ვაქცინების, კლიმატის ცვლილებების, არჩევნების თუ სხვა თემების შესახებ, ფეისბუქი ამიერიდან მეტად ეცდება, რომ მსგავსი დეზინფორმაცია მათ აპლიკაციაში შედარებით ნაკლებმა მომხმარებელმა ნახოს“. სრულად... წყარო: mythdetector.ge

თბილისი. სოციალური სამართლიანობის ცენტრი (ყოფილი EMC) გთავაზობთ სტატიას კრებულიდან - „ექსტრაქტივისტული გადაკვეთები პოლიტიკა, ეკოლოგია და სოციალური ველი“.  „[მაკროეკონომიკული მონაცემებიდან] გამომდინარე, შეიძლება დავასკვნათ, რომ საქართველო მთლიანობაში არ წარმოადგენს ექსტრაქტივისტულ ეკონომიკას. იმის მიუხედავად, რომ რეგიონულ დონეზე – მაგალითად, ჭიათურაში, ტყიბულსა და კაზრეთში – ჩვენ ვხვდებით ერთგვარად „მინიექსტრაქტივისტულ“ მოდელებს, რომლებიც იმეორებენ ექსტრაქტივისტული ეკონომიკის მახასიათებლებს – სამუშაო ძალის კანონგარეშე ექსპლუატაციას, კერძო კომპანიების პოლიტიკურ დომინაციას ადგილობრივებზე, ფორმალური დასაქმების მონოსექტორულ (ან მონოინდუსტრიულ) ბაზარს, ბუნებრივი რესურსების ექსპლუატაციას და სხვ. („მწვანე ალტერნატივა“ 2018)“. სრულად... წყარო: socialjustice.org.ge

თბილისი. 20-21 მაისს ღია მმართველობის მუდმივმოქმედმა საპარლამენტო საბჭომ და საბჭოსთან არსებული საკონსულტაციო ჯგუფის წევრებმა სამუშაო შეხვედრა გამართეს. „შეხვედრის ფარგლებში, დამსწრეებმა 2021-2022 წლების საქართველოს ღია პარლამენტის სამოქმედო გეგმის შემუშავების მიზნით წარდგენილ ინიციატივებზე იმსჯელეს. „ღია მმართველობის მუდმივმოქმედი საპარლამენტო საბჭოსა და საკონსულტაციო ჯგუფის მუშაობა სამოქალაქო საზოგადოების ორგანიზაციებსა და სახელმწიფო უწყებას შორის წარმატებული თანამშრომლობის თვალსაჩინო მაგალითია“ - აღნიშნავს IDFI-ის დირექტორი, გიორგი კლდიაშვილი. ღონისძიება ორგანიზებულია #IDFI-სთან თანამშრომლობით, ევროკავშირისა (#EU) და გაეროს განვითარების პროგრამის (#UNDP) ხელშეწყობით. სრულად... წყარო: idfi.ge

ქვემო ქართლი. სოციალური სამართლიანობის ცენტრი (ყოფილი EMC) ეხმაურება ქვემო ქართლში, გაგის ციხეზე აღმართული ჯვრის დაზიანების ფაქტს და საქართველოს შინაგან საქმეთა სამინისტროს მომხდარის დაუყოვნებლივ გამოძიებისკენ მოუწოდებს. „აღნიშნული ინციდენტის დროული გამოძიება არსებითად მნიშვნელოვანია ამ საკითხით რელიგიური და პოლიტიკური სპეკულირების თავიდან აცილების მიზნით. სამწუხაროდ, ცალკეული ულტრაკონსერვატიული შოვინისტური კლერიკალური და სამოქალაქო ჯგუფები ბოლო წლებში ცდილობენ მარნეულში სოციალური მშვიდობის დარღვევას და რელიგიური და ეთნიკური საკითხების ინსტრუმენტალიზებას“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) აქვეყნებს სტატიას „ექსტრაქტივისტული რეჟიმები და ჩამორთმევა დაგროვებით ჭიათურაში“ კრებულიდან - „ექსტრაქტივისტული გადაკვეთები პოლიტიკა, ეკოლოგია და სოციალური ველი“. სრულად... წყარო: socialjustice.org.ge

24 მაისს გაიმართება საერთაშორისო დისკუსია: საგანგებო მდგომარეობა, ძირითადი თავისუფლება და პანდემიის შემდგომი ნაბიჯები. დისკუსიის ორგანიზატორები არიან: არასამეწარმეო სამართლის საერთაშორისო ცენტრი (ICNL) და შვედეთის საერთაშორისო განვითარების თანამშრომლობის სააგენტო.  აქტუალური დისკუსიის სპიკერების, დღის წესრიგის გასაცნობად და რაც მთავარია რეგისტრაციისთვის ესტუმრეთ ვებგვერდს www.icnl.org

თბილისი. უფლებები საქართველოს ინფორმაციით, „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონში 2021 წლის 12 მაისიდან ცვლილებები შედის. კერძოდ, თავშესაფრის მაძიებელი საქართველოში ბინადრობის ნებართვის გაცემის მიზნებისთვის არ ჩაითვლება საქართველოში კანონიერად მყოფ პირად; თავშესაფრის მაძიებლის სტატუსის მქონე პირები ვერ წარადგენენ განაცხადს ბინადრობის ნებართვაზე მათი საიდენტიფიკაციო მოწმობების საფუძველზე; ვიდრე თავშესაფრის მაძიებლის განაცხადი საქართველოში თავშესაფრის მიღების შესახებ განხილვაში იქნება, მათ ეზღუდებათ ბინადრობის ნებართვაზე განაცხადის წარდგენის შესაძლებლობა. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) და მედიის განვითარების ფონდი (MDF) აქვეყნებს ერთობლივ ანგარიშს ნიკა მელიას დაკავებასთან დაკავშირებული ანტიდასავლური ნარატივების, აქტორებისა და Facebook-ზე მადისკრედიტირებელი კამპანიის შესახებ...  „მელიას დაკავების შემდეგ, გააქტიურდნენ როგორც ხელისუფლების და ქართული ოცნების მხარდამჭერი, ასევე ოპოზიციის მადისკრედიტირებელი გვერდები. წარსულ გამოცდილებასა და ადგილობრივი ორგანიზაციების კვლევებზე დაყრდნობით, პოლიტიკურად მოტივირებული ანონიმური გვერდები აქტიურდებიან ხელისუფლებისთვის კრიტიკული მოვლენების დროს და ახდენენ სოციალურ მედიაში მოსაზრებების მობილიზებას ქართული ოცნებისა და ხელისუფლების დღის წესრიგის შესაბამისად. დასავლელი პარტნიორებისა და ადგილობრივი სამოქალაქო საზოგადოების მკაცრი შეფასებების ფონზე, პრო-სახელისუფლებო და ქართული ოცნების მხარდამჭერმა გვერდებმა სცადეს მელიას დაკავების და მთავარი ოპოზიციური პარტიის ოფისში შეჭრის გამართლება გზავნილით კანონის უზენაესობის შესახებ“. ანგარიში მომზადდა ინფორმაციული სანდოობის პროგრამის (GIIP) ფარგლებში  წყარო: isfed.ge