თბილისი. 9-10 ნოემბერს, ილიას სახელმწიფო უნივერსიტეტის ორგანიზებით, გაიმართება ჰაკათონი „ციფრული განათლება მომავლისთვის Georgia - Digital Education For Future“, რომელიც საერთაშორისო პროექტის DigiEduHack-ის ფარგლებში ხორციელდება. „პროექტი ორი დღის განმავლობაში მთელს მსოფლიოში ერთდროულად მიმდინარეობს და მონაწილე ქვეყნებს ადგილზე უწევთ თავიანთ გამოწვევებზე მუშაობა. ღონისძიების თანაორგანიზატორები არიან ევროკავშირის დაფინანსებით მიმდინარე პროექტი: „ახალგაზრდული ტექნოლოგიური კლუბების ქსელი” და ინოვაციური განათლების ფონდი“. სრულად... წყარო: ილიას უნივერსიტეტის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) მოსამართლეთა კონფერენციის მიერ იუსტიციის საბჭოში ვადაზე ადრე ორი ახალი წევრის დანიშვნას კლანური მმართველობის მორიგ მანიპულაციად მიიჩნევს. „საბჭოში მოსამართლე წევრების არჩევის პროცესზე დაკვირვება აჩვენებს, რომ ამ უწყებაში მოხვედრის შესაძლებლობა, როგორც წესი, მხოლოდ მოსამართლეთა გავლენიანი ჯგუფის წარმომადგენლებს, ან მათ მიერ ნდობით აღჭურვილ პირებს აქვთ. გავლენიანი ჯგუფი სტრატეგიულ, მნიშვნელოვან თანამდებობებზე მისთვის მისაღებ, ლოიალურად განწყობილი მოსამართლეებს ნიშნავს, რაც ხელს უწყობს ისედაც ფესვგადგმული არაფორმალური იერარქიის კიდევ უფრო განმტკიცებას“, ნათქვამია განცხადებაში. სრულად... წყარო: gyla.ge

კახეთი. USAID/Zrda-სა და პანკისის ხეობის ტურიზმისა და განვითარების ასოციაციის თანამშრომლობით პანკისის ხეობის მოგზაურთა გიდი შეიქმნა. მისი მიზანია პანკისისა და ქისტური ბუნებრივი და კულტურული სიმდიდრისა და მრავალფეროვნების პოპულარიზაცია. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) წარმომადგენლები განაგრძობენ შეხვედრებს სხვადასხვა სპორტში მოასპარეზე ბავშებთან. შეხვედრები იმართება პროექტის „ქალთა მიმართ სექსუალური შევიწროება სპორტში“ ფარგლებში და მათი მიზანია ცნობიერების ამაღლების და პრევენციის მიზნით ახალგაზრდა სპორტსმენებისთვის ძალადობის ფორმებზე და სექსუალურ შევიწროებაზე ინფორმაციის მიწოდება. ამჯერად, ორგანიზაციის ადვოკატები, ონლაინ რეჟიმში ახალგაზრდა მოფარიკავეებს შეხვდნენ. სრულად... წყარო: phr.ge

თბილისი. საქართველოს სამოქალაქო საზოგადოების ორგანიზაციების ნაწილი 2021 წლის მუნიციპალური არჩევნების მიმდინარეობას ეხხმიანებიან. „ტექნიკური ადმინისტრირების თვალსაზრისით, არჩევნების დღე ძირითადად კანონით დადგენილი წესების შესაბამისად წარიმართა. თუმცა, წინასაარჩევნო პერიოდში, არჩევნების დღეს კენჭისყრისა და ხმების დათვლის პროცესში ადგილობრივი და საერთაშორისო სადამკვირვებლო მისიების მიერ გამოვლენილი დარღვევები ცალსახად ნეგატიურად აისახა ამომრჩევლის თავისუფალი ნების გამოვლენაზე, საარჩევნო პროცესისა და შედეგების მიმართ საზოგადოების ნდობაზე. ზოგიერთ მუნიციპალიტეტში მცირე სხვაობის პირობებში, შესაძლოა ამ დარღვევებს შედეგებზე ზეგავლენა მოეხდინა. სამწუხაროა, რომ წინასაარჩევნო პერიოდსა და არჩევნების დღესთან მიმართებაში კვლავაც აქტუალურია ადმინისტრაციული რესურსის ბოროტად გამოყენების, პოლიტიკურად მოტივირებული გათავისუფლებების, საჯარო მოხელეების საარჩევნო მიზნებისთვის გამოყენებისა და ზეწოლა-მუქარის ფაქტებთან დაკავშირებული პრობლემები. სამწუხაროა, რომ დაბალი დემოკრატიული სტანდარტით ჩატარებული ადგილობრივი არჩევნები საზოგადოებაში პოლარიზაციის კიდევ უფრო გაღრმავების მიზეზი შეიძლება გახდეს“... სრულად... წყარო: isfed.ge

თბილისი. სოციალური სამართლიანობის ცენტრი წარმოგიდგენთ თარგმანების კრებულს: „ფსიქიკური ჯანმრთელობა და სისტემური ჩაგვრა“, რომლის მიზანია, მიმოიხილოს ის ფსიქიკური ჯანმრთელობის სისტემაში არსებული მნიშვნელოვანი გამოწვევები და ფსიქოსოციალური საჭიროების მქონე ადამიანების ჩაგვრისა და უგულებელყოფის სხვადასხვა ასპექტები. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტისა (IDFI) და საქართველოს უნივერსიტეტის (UG) ერთობლივი პროგრამის ფარგლებში ჩატარებული სასემინარო კვირის მონაწილეებს სერთიფიკატები გადაეცათ. უნარების განვითარებაზე ორიენტირებული პრაქტიკული კურსი: „რა არის დეზინფორმაცია და როგორ შემიძლია დავუპირისპირდე მას?”, 25-29 ოქტომბრის კვირაში ყოველდღიურად მიმდინარეობდა. მონაწილეები გაეცნენ ყოველდღიური დეზინფორმაციის გადამოწმების მექანიზმებს, დეზინფორმაციის გავრცელების თანამედროვე ხერხებს და იმსჯელეს დეზინფორმაციის წინააღმდეგ ბრძოლაში ჟურანლისტური და მოქალაქეობრივი წვლილის შეტანის გზებზე. სრულად... წყარო: idfi.ge

თბილისი. სოციალური სამართლიანობის ცენტრი აქვეყნებს ვიდეოს, რომელშიც სოციალური პროგრამის დირექტორი, თათული ჭუბაბრია, აანალიზებს, თუ რატომ ცხოვრობენ ფსიქოსოციალური საჭიროების მქონე ადამიანები, მასიურად, დახურული ინსტიტუციების სტაციონარულ სერვისებში და რატომ იხურება 10 წლის წინ დეინსტიტუციონალიზაციის მიზნით შექმნილი სტაციონარული სერვისები მულტიპროფილურ კლინიკებში. წყარო: socialjustice.org.ge

თბილისი. ეუთო/ოდირი და ევროპარლამენტი საქართველოს ადგილობრივი თვითთმართველობის არჩევნების მეორე ტურის დაკვირვების შედეგებზე განცხადებას აქვეყნებს. „მუნიციპალურ ორგანოთა არჩევნების მეორე ტური ზოგადად კარგად ადმინისტრირებული იყო, მაგრამ უწყვეტმა პოლარიზაციამ და ნეგატიური რიტორიკის გამწვავებამ პროცესზე უარყოფითად იმოქმედა. კამპანია კონკურენტული იყო და ხასიათდებოდა ეროვნულ საკითხებზე ფოკუსირებით, რამაც ადგილობრივი საკითხები დაჩრდილა. ზოგადად კანდიდატებს კამპანიის თავისუფლად წარმართვა შეეძლოთ, მაგრამ ამომრჩევლებთა დაშინებისა და ზეწოლის ბრალდებები შენარჩუნდა. რესურსებს შორის მკვეთრმა დისბალანსმა და ხელისუფლებაში ყოფნით მინიჭებულმა შეუსაბამო უპირატესობამ საასპარეზო პირობები შეცვალა. არჩევნების დღემ მთლიანობაში მშვიდად ჩაიარა და კარგად იყო ადმინისტრირებული. თუმცა საარჩევნო უბნების გარეთ პარტიების მხარდამჭერებს შორის დაპირისპირებისა და ორმხრივი პროვოკაციების ერთეული შემთხვევა დაფიქსირდა. ბოლოდროინდელი საკანონმდებლო ცვლილებების მიუხედავად, რომელთა მიხედვითაც საარჩევნო უბნის გარეთ 100 მეტრის პერიმეტრში შეკრებები აიკრძალა, საერთაშორისო საარჩევნო სადამკვირვებლო მისიის დამკვირვებლებმა აღნიშნეს, რომ მათ მიერ მონახულებული საარჩევნო უბნების 29 პროცენტში, დროდადრო შეიმჩნეოდა ცალკეულ პირთა ჯგუფების დამაშინებელი ყოფნა უშუალოდ საარჩევნო უბნების მიმდებარე ტერიტორიაზე“... სრულად... წყარო: www.osce.org

თბილისი. ევროკავშირი მადლობას უხდის ამომრჩევლებს, საარჩევნო ადმინისტრაციის თანამშრომლებს და ადგილობრივ დამკვირვებლებს არჩევნებში მათი ძალისხმევისა და ჩართულობისთვის COVID-19 პანდემიის პირობებში. „გულითადად მივესალმებით ეუთო/ოდირის და ევროპარლამენტის საარჩევნო სადამკვირვებლო მისიას მეორე ტურის დროსაც. მისიამ კვლავ დაასკვნა, რომ არჩევნები ზოგადად კარგად ადმინისტრირებული და საარჩევნო კამპანია კონკურენტული იყო, თუმცა მან ასევე დააფიქსირა ნეგატიური რიტორიკის გამწვავება, ამომრჩევლებთა დაშინებისა და ზეწოლის შენარჩუნებული ბრალდებები და რესურსებს შორის მკვეთრი დისბალანსი, რომელმაც მმართველ პარტიას უპირატესობა მიანიჭა და საასპარეზო პირობები შეცვალა. პირველი ტურის შემდეგ განვაცხადეთ, რომ მასთან დაკავშირებით დაფიქსირებული არაკეთილსინდისიერი პრაქტიკა საქართველოში ნორმად არ უნდა იქცეს. ვწუხვართ, რომ ეს არჩევნები ამ მიმართებაში დაკარგული შესაძლებლობა იყო. საერთაშორისო დამკვირვებლების მკაფიო შეფასების მიუხედავად, ძირითადი ხარვეზების აღმოსაფხვრელად არსებითი ნაბიჯები არ გადაიდგა. პირიქით, გაჩნდა ახალი ხარვეზები, განსაკუთრებით საქართველოს პოლიტიკური ლიდერების მხრიდან ადმინისტრაციული რესურსების ბოროტად გამოყენებისა და ძალადობრივი რიტორიკის კუთხით, რამაც კიდევ უფრო გაამწვავა ისედაც ღრმა პოლიტიკური პოლარიზაცია“. სრულად... წყარო: eeas.europa.eu

თბილისი. „საერთაშორისო გამჭვირვალობა – საქართველომ“ მუნიციპალიტეტის ორგანოთა არჩევნების მეორე ტურს მთელი ქვეყნის მასშტაბით 250-მდე დამკვირვებლით გაუწია მონიტორინგი. ორგანიზაციის ცნობით, 150-მდე წვრილი და შედარებით სერიოზული დარღვევა დაფიქსირდა. TI Georgia-ს დამკვირვებლებმა საუბნო და საოლქო საარჩევნო კომისიებში მთლიანობაში 23 საჩივარი დაწერეს. სამართლიანი არჩევნებისა და დემოკრატიის საერთაშორისო საზოგადოება ხაზს უსვამს ჟურნალისტებისა და დამკვირვებლების მიმართ ძალადობრივი შემთხვევების სიხშირეს, პირების მიერ კენჭისყრაში განმეორებით მონაწილეობის ფაქტებს, ბიულეტენების არასწორად და სავარაუდოდ, მიზანმიმართულად გაბათილების შემთხვევებს... საქართველოს ახალგაზრდა იურისტთა ასოციაციაც (საია) განსაკუთრებით მიუთითებს ორგანიზაციის სადამკვირვებლო მისიისა და ჟურნალისტების მიმართ სიტყვიერი და ფიზიკური შეურაცხყოფის ფაქტებზე. ორგანიზაციის წარმომადგენლებმა ხარვეზებს შორის აღრიცხეს: წილისყრის პროცედურის, მარკირებისა და ხმის მიცემის წესების დარღვევა, COVID-19-ის რეგულაციების დაუცველობა, საარჩევნო დოკუმენტაციის არასათანადოდ შევსება/გამოქვეყნება. წყარო: ორგანიზაციების ვებგვერდები

1 ნოემბერს, 20:00 საათზე, გაიმართება შეხვედრა თემაზე: მოზარდობის პერიოდის პრობლემები პანდემიის პირობებში. სრულად...

1 ნოემბერს, 19:00 საათზე, გაიმართება შეხვედრა თემაზე: „მედიაციის პროცესში ადვოკატი-მედიატორის თვალით დანახული გამოწვევები“. სრულად...

1 ნოემბერს, 18:00 საათზე, გაიმართება შეხვედრა თემაზე: ფონოლოგიური ცნობიერების განვითარება. სრულად...

თბილისი. „საერთაშორისო გამჭვირვალობა - საქართველო“ 2021 წლის 30 ოქტომბრის მუნიციპალიტეტის ორგანოთა არჩევნების მეორე ტურს 250-მდე დამკვირვებლით გაუწევს მონიტორინგს. ორგანიზაციის სტაციონარული დამკვირვებლები 28 საარჩევნო ოლქში 170 საარჩევნო უბანზე იქნებიან გადანაწილებულნი. გარდა ამისა, საარჩევნო პროცესებს 30 მობილური ჯგუფიც მიადევნებს თვალს.  სრულად... წყარო: transparency.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ არსებულ ვითარებაში იუსტიციის უმაღლეს საბჭოს მოსამართლე წევრის/წევრების არჩევას გაუმართლებლად მიიჩნევს. „მოსამართლეთა XXX კონფერენციის ჩატარება 2021 წლის 31 ოქტომბერს იგეგმება. დღის წესრიგის მიხედვით, კონფერენციამ საქართველოს იუსტიციის უმაღლესი საბჭოს მოსამართლე წევრი/წევრები უნდა აირჩიოს. აღსანიშნავია, რომ იუსტიციის უმაღლესი საბჭოს არც ერთ მოსამართლე წევრს უფლებამოსილების ვადა არ ამოწურვია, ხოლო უფლებამოსილების ვადამდე ადრე შეწყვეტის შესახებ ინფორმაცია საჯარო არ გამხდარა. შესაბამისად, დღემდე უცნობია, საბჭოს რომელი წევრი ტოვებს შემადგენლობას და რა საფუძვლით. ასევე უცნობია ახალი წევრის კანდიდატების თაობაზე“. სრულად... წყარო: coalition.ge

თბილისი. სამართლიანი არჩევნებისა და დემოკრატიის საერთაშორისო საზოგადოება 2021 წლის თვითმმართველობის არჩევნების მეორე ტურს იმ 20 მუნიციპალიტეტში დააკვირდება, სადაც მერის არჩევნების მეორე ტური იმართება. ISFED განსაკუთრებით აქცენტირებული იქნება 8 მუნიციპალიტეტზე, მათ შორის 5 თვითმმართველ ქალაქსა (თბილისი, რუსთავი, ბათუმი, ფოთი და ქუთაისი) და 3 თვითმმართველ თემზე (ზუგდიდი, ოზურგეთი და თელავი). სრულად... წყარო: isfed.ge

თბილისი. გაეროს ბავშვთა ფონდი UNICEF გამოდის ახალი ინიციატივით მოსწავლეებისთვის, მშობლებისა და მასწავლებლებისთვის.  გაეროს ბავშვთა ფონდის ინფორმაციით, 14-დან 17 წლამდე 1500-ზე მეტ მოზარდს საქართველოს საჯარო სკოლებიდან, მათ მშობლებსა და მასწავლებლებს ექნებათ საშუალება, ჩაერთონ ახალ ინიციატივაში, რომელსაც ორგანიზაცია „აზარტული თამაშების კვლევისა და ლუდომანიის პრევენციის ცენტრთან“ და განათლებისა და მეცნიერების სამინისტროსთან ერთად განახორციელებს.  „ინიციატივის მიზანია, აზარტული თამაშებზე დამოკიდებულების არიდება და მოზარდებისთვის ჯანსაღი გარემოს შეთავაზება პირისპირი ტრენინგების, საჯარო ღონისძიებების და სოციალური მედიის საშუალებით“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი „სხვა კუთხის“ ახალ ეპიზოდს გთავაზობთ. თემები: რას ნიშნავს სახელმწიფო ვალი და რა პოლიტიკა აქვს ამ მხრივ საქართველოს? არის თუ არა საფრთხე, რომ წლის ბოლოს საქართველოს საგარეო ვალმა კანონმდებლობით დადგენილ ნიშნულს გადააჭარბოს? წყარო: socialjustice.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: პოლიტიკური პარტიების შემოწირულებები: სტატისტიკა და კორუფციის რისკების შემცველი შემთხვევები. „2021 წლის 1 იანვრიდან 25 ოქტომბრის ჩათვლით 25-მა პოლიტიკურმა პარტიამ ჯამში 23 227 322 ლარის ოდენობის შემოწირულება მიიღო, რომლის 71% - 16 585 660 ლარი „ქართულ ოცნებაზე” მოდიოდა, მეორე იყო პარტია „ლელო” 2 330 556 ლარით, ხოლო მესამე - „ერთიანი ნაციონალური მოძრაობა” 2 212 912 ლარით. მმართველი პარტიის შემომწირველმა იურიდიულმა პირებმა და ფიზიკურ პირ შემომწირველებთან დაკავშირებულმა კომპანიებმა 2021 წელს ჯამში დაახლოებით 155 მლნ ლარის ღირებულების სახელმწიფო ტენდერები მოიგეს და 6 მლნ ლარის ღირებულების გამარტივებული სახელმწიფო შესყიდვის კონტრაქტები მიიღეს. ამ კომპანიებმა და მათთან პირდაპირ ან ირიბად დაკავშირებულმა შემომწირველებმა იგივე პერიოდში 3 მლნ ლარამდე გაიღეს „ქართული ოცნების” სასარგებლოდ“, ნათქვამია ბლოგპოსტში. სრულად... წყარო: transparency.ge

თბილისი. სოციალური სამართლიანობის ცენტრი აქვეყნებს ვიდეოს, რომელიც აღწერს თუ როგორი ტემპით მიმდინარეობს ვაქცინაციის პროცესი ეთნიკური უმცირესობებით დასახლებულ რეგიონებში და რა განსხვავებაა, ამ მხრივ, ცენტრსა და ამ რეგიონებს შორის.     წყარო: socialjustice.org.ge

თბილისი. სამართლიანმა არჩევნებმა სოციალური მედიის მონიტორინგის მეოთხე შუალედური ანგარიში წარადგინა. „მასში აღწერილია არჩევნებში მონაწილე პოლიტიკური პარტიებისა და მუნიციპალიტეტების მერობის ფეისბუქგვერდების აქტივობა, ასევე პოლიტიკური და საარჩევნო მიზნით მოქმედ ანონიმურ და ღია ფეისბუქგვერდებზე დაკვირვების შედეგები და სხვა მნიშვნელოვანი ტენდენციები“. სრულად... წყარო: isfed.ge