აჭარა. საერთაშორისო გამჭვირვალობა - საქართველოს ცნობით, კორუფციის ნიშნები იკვეთება ბათუმთან ახლოს, Salibauri Hills-ის საცხოვრებელი უბნის მშენებლობის პროექტში, რომელსაც რუსეთის მოქალაქეების კომპანია „ეიჩ გრუპ დეველოპმენტი“ გეგმავს. „კომპანიასთან დაკავშირებულმა საქართველოს ორმა მოქალაქემ ერთსა და იმავე დღეს (2022 წლის 25 ნოემბერს) მმართველ პარტიას ჯამში 40,000 ლარი შესწირა. ორ კვირაში პროექტისთვის კი ხელვაჩაურის საკრებულომ განაშენიანების დეტალური გეგმა (გდგ) დაამტკიცა. შემოწირულებისა და ნებართვის გაცემის თარიღებს შორის სიახლოვე აღძრავს ეჭვს, რომ შემოწირულების მიზანი შესაძლოა მშენებლობის ნებართვის მოპოვება ყოფილიყო“. სრულად... წყარო: transparency.ge

თბილისი. სოციალური სამართლიანობის ცენტრი აქვეყნებს მარიამ ჯანიაშვილის კვლევას: ქვემო ქართლში მცხოვრები აზერბაიჯანელი შშმ თემის გამოცდილება - წვდომა სოციალური დაცვის მექანიზმებზე. „შშმ პირების სოციალურ-ეკონომიკური მოწყვლადობა და შესაბამის სერვისებზე მათი წვდომა მწვავე პრობლემად იკვეთება საქართველოში. მეორე მხრივ, ეთნიკური უმცირესობის წარმომადგენლებს დისკრიმინაციული კანონმდებლობის, პოლიტიკისა და პრაქტიკის გამო, ხშირად არ მიუწვდებათ ხელი მათთვის უმნიშვნელოვანეს სერვისებსა და მომსახურებებზე, მოკლებულნი არიან მთელი რიგი უფლებებითა და თავისუფლებებით სრულად და დაუბრკოლებლად სარგებლობის შესაძლებლობას და განსაკუთრებით მოწყვლადნი ხდებიან სიღარიბის მიმართ. ამ გამოწვევების გათვალისწინებით, სოციალური სამართლიანობის ცენტრის მოცემული კვლევის მიზანია, გამოავლინოს ის ძირითადი ბარიერები, რომელთა წინაშეც ეთნიკური უმცირესობის წარმომადგენელი შშმ პირები დგანან ცენტრალური ხელისუფლების დონეზე არსებული სოციალური დაცვისა და დამოუკიდებელი ცხოვრების ხელშემწყობ მექანიზმებზე წვდომის ნაწილში“. სრულად... წყარო: socialjustice.org.ge

თბილისი. უფლებები საქართველოს ინფორმაციით, თბილისის სააპელაციო სასამართლოში იწყება ქმრის მიერ, ავტობუსში, 31 წლის ქალის მკვლელობის საქმის განხილვა.  2022 წლის მაისში თბილისში, გურამიშვილის გამზირზე №323 ავტობუსში, არასრულწლოვანი შვილების და სხვა მგზავრების თვალწინ, ქმარმა ქალი სასიკვდილოდ დაჭრა. თბილისის საქალაქო სასამართლომ განზრახ მკვლელობაში ბრალდებული 39 წლის მამაკაცი დამნაშავედ ცნო. სასამართლოს განაჩენით, ბრალდებულს 20 წლით თავისუფლების აღკვეთა განესაზღვრა.  „პირველი ინსტანციის სასამართლოს გადაწყვეტილება, თბილისის სააპელაციო სასამართლოში გაასაჩივრა, როგორც საქმის პროკურორმა, ასევე მსჯავრდებული მამაკაცის ადვოკატმა. პროკურორი ითხოვს, სასჯელის სახედ და ზომად, მსჯავრდებულისთვის უვადო თავისუფლების აღკვეთის განსაზღვრას. ყველაზე მკაცრი სასჯელის გამოყენებას ეთანხმება ფემიციდის მსხვერპლის დედაც, რომლის ინტერესების დაცვაშიც „უფლებები საქართველო“ 2023 წლის მარტის ბოლოს ჩაერთო. ორგანიზაცია იმედს გამოთქვამს, რომ თბილისის სააპელაციო სასამართლოში საქმის განხილვისას გათვალისწინებული იქნება ფემიციდის მსხვერპლის დედის პოზიცია უმკაცრესი სასჯელის გამოყენების თაობაზე და არ დაკმაყოფილდება მსჯავრდებული ადვოკატის შესაძლო შუამდგომლობა სამართალწარმოების შეწყვეტის შესახებ“. სრულად... წყარო: rights.ge

თბილისი. საბჭოთა წარსულის კვლევის ლაბორატორიის განცხადებით, ორგანიზაცია განაგრძობს საქართველოს სახელმწიფო არქივების კანონიერი გზით იძულებას უზრუნველყონ არქივებში დაცული ინფორმაციის ღიაობა და ხელმისაწვდომობა. „სამწუხაროდ, ფრაგმენტირებული მეხსიერების აღდგენის მხარდაჭერისა და ტოტალიტარული წარსულის კვლევის ხელშეწყობის ნაცვლად სახელმწიფოს პოლიტიკა გულისხმობს არქივებზე წვდომის ნაბიჯ-ნაბიჯ შეზღუდვასა და მკვლევართათვის ხელის შეშლას. საარქივო დოკუმენტების ასლების გადასაღებად ასტრონომიული გადასახადის დაწესება (მაშინ როცა დღევანდელ ცივილიზებულ მსოფლიოში დოკუმენტებზე უფასო წვდომა მიღებული პრაქტიკაა), პერსონალურ მონაცემთა დაცვის კანონმდებლობის ბოროტად გამოყენება და მკვლევართათვის სამკითხველო სივრცეებში მაქსიმალური დისკომფორტის შექმნა ამ პოლიტიკის მდგენელთა არასრული ჩამონათვალია. ხსენებული პოლიტიკის კიდევ ერთი საკვანძო კომპონენტია საარქივო ფონდებში დაცული მასალების კატალოგების, ანაწერებისა და ბარათების პროაქტიული გამოქვეყნების ნაცვლად მათზე წვდომის სისტემატური შეზღუდვა და კატალოგებს სხვადასხვა ნაწილების განზრახ დამალვა. ამგვარი მიდგომით სახელმწიფო და კერძოდ ეროვნული არქივი განზრახ ხელს უშლის საქართველოს უახლესი ისტორიის შესწავლასა და რუსული საინფორმაციო ომის მიმართ საზოგადოების მედეგობის ზრდას. 2023 წლის 6 აპრილს ეროვნული არქივის წინააღმდეგ სოვლაბმა სარჩელი შეიტანა მოთხოვნილი საჯარო ინფორმაციის გადაცემაზე უარის გამოცხადებისა და მისი არასრულად გამოქვეყნების გამო. სარჩელის მიზანია კატალოგის სხვადასხვა კომპონენტის საჯარო ინფორმაციის სახით გამოთხოვა, შეგროვება და ერთიანად ონლაინ გამოქვეყნება, რაც უახლესი ისტორიის საკვანძო მოვლენების ზუსტი სურათის აღდგენასა და მკვლევართა მუშაობას მნიშვნელოვნად გაადვილებს“. სრულად... წყარო: sovlab.ge

იმერეთი. 7 აპრილს, აკაკი წერეთლის სახელობის ქალაქ ქუთაისის №1 საჯარო სკოლაში, განათლების განვითარების და დასაქმების ცენტრმა (EDEC), მოხალისეობის ციფრული პლატფორმის www.volunteer.ge პრეზენტაცია გამართა.  შეხვედრის მიზანი იყო მონაწილეთა ცნობიერების ამაღლება მოხალისეობრივი საქმიანობის კულტურის და ციფრული მოხალისეობის მნიშვნელობის საკითხებზე. შეხვედრაზე ახალგაზრდები გაეცვნენ ციფრული პლატფორმის www.volunteer.ge მიზნებს, მოხმარების და რეგისტრაციის წესებს. შეხვედრა გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“  ფარგლებში. სრულად... წყარო: ორგანიზაციის გვერდი სოციალურ ქსელში

12 აპრილს, 19:00 საათზე, ილიას სახელმწიფო უნივერსიტეტის უმაღლესი კვლევების ცენტრის პროექტის „საჯარო სფეროს რეკონსტრუქცია საქართველოში“ ფარგლებში, გაიმართება დისკუსია თემაზე „პოპულიზმის ანატომია“. სრულად...

12 აპრილს, 13:00 საათზე, საზოგადოება და ბანკების ერთ-ერთი დამფუძნებელი, გიორგი კეპულაძე ისაუბრებს თემაზე: რატომ არის საქართველოში სესხზე „მაღალი“ საპროცენტო განაკვეთი? სრულად...

თბილისი. პარტნიორობა ადამიანის უფლებებისთვის (PHR) იურიდიული დახმარებით, ანა გოგუაძის საქმემ პერსონალური ასისტენტის ახალი მომსახურება შექმნა. “აღნიშნული სასამართლო გადაწყვეტილებით, საქართველოში პირველად შეიქმნა ფიზიკური შეზღუდვის მქონე პირებისთვის ბინაზე პერსონალური მოვლის სერვისი. კერძოდ „სოციალური რეაბილიტაციისა და ბავშვზე ზრუნვის 2023 წლის სახელმწიფო პროგრამის” ქვეპროგრამებს დაემატა „შშმ პირთა დამოუკიდებელი ცხოვრების ხელშემწყობი ინდივიდუალური დახმარებით უზრუნველყოფის ქვეკომპონენტი“, რომლითაც ისარგებლებს ყველა შშმ პირი, რომელსაც აქვს „ნერვული სისტემის დაავადებებით გამოწვეული თანდაყოლილი ფიზიკური შეზღუდვა და შეფასების შედეგად დადგინდება, რომ გადაუდებლად საჭიროებს პერსონალურ მომვლელს. PHR - ი აგრძელებს შეზღუდული შესაძლებლობის მქონე პირების, ბავშვებისა და ქალების უფლებების დაცვას“. სრულად... წყარო: phr.ge

ყირგიზეთი. 10 აპრილს, ბიშკეკში, საქართველოს სტრატეგიის და განვითარების ცენტრსა და ცენტრალური აზიის ამერიკულ უნივერსიტეტს შორის ურთიერთთანამშრომლობის მემორანდუმი გაფორმდა.  მემორანდუმის მიზანია, უზრუნველყოს მხარეთა შორის თანამშრომლობა, როგორც ერთობლივი პროექტების, სტაჟირების, სტიპენდიების, ტრენინგებისა და ღონისძიებების განხორციელებისთვის, ისევე ახალი კონტაქტების დამყარება. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიის და განვითარების ცენტრი (GCSD) გიზიარებთ სახელმძღვანელოს - „რუსულ სისტემებთან დაკავშირებული მაღალტექნოლოგიური კონვენციური შეიარაღების უკანონო ტრანზაქციების პრევენცია: ოპერაციული სახელმძღვანელო“... „სახელმძღვანელოში ყურადღება გამახვილებულია მაღალტექნოლოგიური კონვენციური იარაღის კომპონენტებისა და სისტემებთან დაკავშირებული სიტუაციის ანალიზზე, ასევე, სანქციების რეჟიმებზე, რომელთა მიზანია, შეუზღუდონ რუსეთს მაღალტექნოლოგიური კონვენციური იარაღის წარმოებისა და გავრცელებისთვის საჭირო კომპონენტებსა და ტრანზაქციებზე წვდომა“. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები განცხადებას ავრცელებენ ხელისუფლების მისამართით და თვლიან, რომ ნებისმიერი საკანონმდებლო ინიციატივა ან მოქმედება, რომელიც ევროკავშირის ძირეულ ფასეულობებს დაუპირისპირდება, იქნება სტატუსის მიღების საბოტაჟი და კონსტიტუციის 78-ე მუხლის საწინააღმდეგო ქმედება. „გასულ თვეში საქართველოს მოქალაქეებმა კიდევ ერთხელ დავამტკიცეთ, რომ ვართ ევროპული ფასეულობების ერთგული და არ ვაპირებთ ევროკავშირში მიმავალი გზიდან გადახვევას. ევროკავშირში გაწევრიანების, როგორც ეროვნული იდეის ირგვლივ ფართო საზოგადოებრივი კონსოლიდაციით ვაჩვენეთ, რომ ქართველი ხალხი ვიმსახურებთ კანდიდატის სტატუსს. სხვადასხვა ინფორმაციით, ევროკომისიამ შესაძლოა 2023 წლის ოქტომბერში გასცეს საქართველოსთვის ევროკავშირის წევრობის კანდიდატის სტატუსის მინიჭების რეკომენდაცია, თუ საქართველო მომდევნო პერიოდში გააგრძელებს რეფორმებზე მუშაობას და არ გააუარესებს ქვეყანაში ადამიანის უფლებებისა და დემოკრატიის მდგომარეობას. კანდიდატის სტატუსის მიღებაზე პასუხისმგებლობა სრულად ეკისრება ხელისუფლებას. აუცილებელია, ხელისუფლებამ გადახედოს და გააძლიეროს ძალისხმევა ისტორიული შესაძლებლობის მისაღწევად. ვაცხადებთ, რომ ჩვენი, სამოქალაქო საზოგადოების ორგანიზაციების, საქმიანობის მთავარი მიზანი კანდიდატის სტატუსის მოპოვებისთვის მაქსიმალური ძალისხმევის გაწევა იქნება“, ნათქვამია ერთობლივ განცხადებაში. სრულად... წყარო: სოციალური სამართლიანობის ცენტრის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ ახალ ანალიტიკურ დოკუმენტს, რომელიც მიმოიხილავს ეროვნული უსაფრთხოების საბჭოსა და მის შემადგენლობაში არსებული უწყებების ინსტიტუციურ მოწყობას, ძირითად ფუნქციებს, მართვისა და ანგარიშვალდებულების საკითხებს.   „საქართველოს უსაფრთხოებას არაერთი რეგიონული და გლობალური გამოწვევა აქვს. ამ პირობებში, პრობლემურია, რომ ქვეყნის ეროვნული დონის კონცეფტუალური დოკუმენტები - ეროვნული უსაფრთხოების კონცეფცია, საფრთხეების შეფასების დოკუმენტი და შესაბამისი სტრატეგიები მოძველებულია და ვერ პასუხობს ახალ გამოწვევებს.  უსაფრთხოების სისტემაში შემავალი ინსტიტუტები ფლობენ ჭარბ ძალაუფლებას, აქვთ არაერთი ბერკეტი, რომელთა გამოყენებითაც მათ შეუძლიათ ადამიანის ფუნდამენტური უფლებების შეზღუდვა“. სრულად... წყარო: socialjustice.org.ge

11 აპრილს, 15:00 საათზე, „სოციალური სამართლიანობის ცენტრი“ დისკუსიას და კვლევის პრეზენტაციას - „ეთნიკური უმცირესობების წარმომადგენლების სოციალური ექსკლუზია“ გამართავს. მისამართი: თბილისი, ჭოველიძის 4 (ძველი 8-10), ღია საზოგადოების ფონდი საქართველო

ამ წუთებში, ერთობლივი პროექტის ფარგლებში სოციალური სამართლიანობის ცენტრი და CRRC - საქართველო 2 ახალი კვლევის პრეზენტაციას მართავს. მისამართი: თბილისი, შოთა რუსთაველის 13 („თბილისი მერიოტი“)

ამ წუთებში, სახალხო დამცველი მე-8 სპეციალური ანგარიშის „დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ“ პრეზენტაციას მართავს. თემა: დაუცველი ჯგუფების თანასწორუფლებიანობის მდგომარეობა და შესაბამისი რეკომენდაციები, 2021 წელი. მის: თელავის ქ.20, სასტუმრო „შერატონ გრანდ მეტეხი პალასი“

თბილისი. „კავკასიური სახლი“ გთავაზობთ საჯარო შეხვედრების ციკლს ფსიქოგანათლების თემაზე. შეხვედრის პირველი თემაა - „ადამიანის ფსიქიკური კეთილდღეობა და მასთან დაკავშირებული გამოწვევები“. მომხსენებელი ლევან ანდრონიკაშვილი - ექიმი, ფსიქიატრი. შეხვედრის თემები: რას ნიშნავს ფსიქიკური ჯანმრთელობა და რატომ არის, რომ ხშირად ადამიანი საკუთარ ფსიქიკურ პრობლემებს ვერ აღიქვამს ჯანმრთელობის პრობლემად; რა სტიგმები არსებობს ფსიქიატრიასთან, როგორც სამედიცინო სფეროსთან მიმართებით ჩვენს საზოგადოებაში და როგორაა მათი გადალახვა შესაძლებელი; როგორ განვასხვავოთ ფსიქოლოგიური და ფსიქიკური პრობლემები ერთმანეთისგან; რომელი მიდგომებია დღეს დასავლურ საზოგადოებაში წამყვანი და როგორია ჩვენი რეალობა ფსიქიკური დაავადებებისა თუ ფსიქოლოგიური პრობლემების მკურნალობისას. დასწრების მსურველებმა, გთხოვთ, შეავსოთ სარეგისტრაციო ფორმა... სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ინფორმაციით, გაეროს ადამიანის უფლებათა საბჭომ მიიღო ახალი რეზოლუცია (#A/HRC/52/L.7) სუფთა, ჯანსაღ და მდგრად გარემოში ცხოვრების უფლების შესახებ. „რეზოლუცია მნიშვნელოვანი დოკუმენტია, ვინაიდან ის კიდევ ერთხელ აღიარებს, რომ სამმაგი პლანეტარული კრიზისი: (მსოფლიო დაბინძურება, ბიომრავალფეროვნების განადგურება და კლიმატის ცვლილება) ადამიანის უფლებათა დაცვის კუთხით ერთ-ერთ უმნიშვნელოვანეს გამოწვევას წარმოადგენს.  კონკრეტულად, ის საფრთხეს უქმნის ადამიანის სიცოცხლეს, მის ფიზიკურ და მენტალურ ჯანმრთელობას, თავშესაფარზე, საკვებზე, სუფთა სასმელ წყალსა და სანიტარიაზე ხელმისაწვდომობის, კულტურულ და სხვა უფლებებს“. სრულად... წყარო: gyla.ge

თბილისი. USAID-ის მხარდაჭერით, „სითი მოლი საბურთალო“ წელსაც მასპინძლობს სააღდგომო გამოფენა-გაყიდვას და მომხმარებლებს მცირე მეწარმეების მიერ დამზადებულ სააღდგომო დეკორაციებს სთავაზობს. თუ გსურთ, რომ დაათვალიეროთ და შეიძინოთ ხელნაკეთი ნივთები მთელი საქართველოდან, მაშინ მობრძანდით პ. ქავთარაძის #1, პირველ სართულზე. სრულად... წყარო: ორგანიზაციის გვერდი სოციალურ ქსელში

კახეთი. 4 და 5 აპრილს სოციალური სამართლიანობის ცენტრის თანამშრომლებმა პანკისის ხეობის მოსახლეობისთვის, სოფელ დუისში და ქორეთში სამართლებრივი დახმარების შეხვედრა გამართეს. სოციალური სამართლიანობის ცენტრის იურისტებმა დაინტერესებულ პირებს მათთვის მნიშვნელოვან საკითხებზე სამართლებრივი კონსულტაცია გაუწიეს. შეხვედრის შედეგად გამოიკვეთა, რომ ადგილობრივებისთვის კვლავ პრობლემურია საქართველოს მოქალაქეობის მიღების საკითხი... ქორეთის მოსახლეობის მიერ მნიშვნელოვან პრობლემად დასახელდა სოფელში არსებული ინფრასტრუქტურული საკითხები. კერძოდ, სოფელში არ არის მოასფალტებული გზა, რის გამოც წვიმიან ამინდში გადაადგილება მნიშვნელოვნად გართულებულია. ამასთან, სოფელში დანიშნული არ არის მუნიციპალური ტრანსპორტი, შესაბამისად, ადგილობრივებს მუნიციპალიტეტის ცენტრამდე  საკვებისა თუ მედიკამენტების შესაძენად გადაადგილება ტაქსით უწევთ, რაც საკმაოდ დიდ თანხებთან არის დაკავშირებული. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: მუნიციპალიტეტების მიერ 2022 წელს გაწეული სარეკლამო ხარჯების ანალიზი. კვლევის მიგნებების თანახმად, 2022 წელს 18-მა მუნიციპალიტეტის მერიამ ჯამურად 503,140 ლარის ღირებულების სარეკლამო მომსახურების ხელშეკრულება გააფორმა. „სახელმწიფო შესყიდვების ელექტრონულ პორტალზე გადამოწმების შედეგად გამოვლინდა, რომ გარკვეულმა მუნიციპალიტეტებმა, რომლებმაც საჯარო ინფორმაციაში მიუთითეს, სარეკლამო ხარჯების არარსებობის შესახებ, IDFI-ის სრულყოფილი ინფორმაცია არ მიაწოდეს, რაც შეიძლება ინფორმაციის დაფარვის მცდელობაზე მიუთითებდეს. კერძოდ, რუსთავისა და ზუგდიდის შემთხვევაში, ორივე მერიამ ორგანიზაციას უპასუხა, რომ მსგავსი ხარჯი 2022 წელს არ ყოფილა გაწეული, თუმცა შესყიდვების ელექტრონული პორტალის თანახმად, აღნიშნულ მერიებს სარეკლამო მომსახურების კონტრაქტები უფიქსირდებათ. მნიშვნელოვანია, რომ რამდენიმე მუნიციპალიტეტს ხელშეკრულება აქვს გაფორმებული ონლაინგამოცემა მარშალპრესთან, რომელიც გამოირჩევა რუსული სამთავრობო და პროპაგანდისტული მედიების მიერ გავრცელებული ინფორმაციის ტირაჟირებით“, ნათქვამია ნაშრომში. გაეცანით IDFI-ის კვლევას აქ... წყარო: idfi.ge

კახეთი. თელავში გამართულ შეხვედრაზე სამოქალაქო საზოგადოების ორგანიზაციების წარმომადგენლებმა განიხილეს სამოქალაქო საზოგადოების როლი საქართველოს ევროინტეგრაციის პროცესში, კერძოდ, თუ რა ფორმით უნდა შეუწყონ ხელი საქართველოსთვის კანდიდატის სტატუსის მინიჭებას. ასევე, სამოქალაქო საზოგადოების წარმომადგენლებმა ერთმანეთს გაუზიარეს ინფორმაცია იმ მიმდინარე თუ დასრულებულ რეფორმებსა და პროექტებზე, რასაც საქართველო ახორციელებს ევროკავშირის მხარდაჭერით. სრულად... წყარო: STAR პროექტის გვერდი სოციალურ ქსელში

გურია. მაკ ჯორჯია რეგიონული საგანმანათლებლო პროგრამის ფარგლებში ახორციელებს საშაბათკვირო აკადემიას 10 პარტნიორ სკოლაში. გასულ კვირას, რეგიონული პროგრამის გუნდი აღნიშნული პროექტით ესტუმრა ჩოჩხათის საჯარო სკოლას. მოსწავლეები ორი დღის განმავლობაში ჩართულნი იყვნენ ორგანიზაციის მიერ შემოთავაზებულ არაფორმალური განათლების აქტივობებში, მათ შორის: ინტელექტუალური შეჯიბრებები; თეატრალური მინი წარმოდგენები; სპორტული აქტივობები; შემეცნებითი თამაშები; დილის გამაჯანსაღებელი ვარჯიშები და სხვა. სრულად... წყარო: ორგანიზაციის გვერდი სოციალურ ქსელში