NAEC სასამართლო გადაწყვეტილების აღსრულებაზე უარს ამბობს და აბიტურიენტს გამოცდის ჩაბარების უფლებას ართმევს
თბილისი. პარტნიორობა ადამიანის უფლებებისთვის (PHR) ინფორმაციით, „შეფასებისა და გამოცდების ეროვნული ცენტრი“ უარს აცხადებს სასამართლო გადაწყვეტილების აღსრულებაზე.
„როგორც ცნობილია, PHR იცავს აბიტურიენტის უფლებებს, რომელიც ისტორიის გამოცდაზე ვერ გამოცხადდა ჯანმრთელობის მდგომარეობის გამო.
ორგანიზაციის მიმართვის საფუძველზე, თბილისის საქალაქო სასამართლომ 24 საათში მიიღო განჩინება და „შეფასებისა და გამოცდების ეროვნულ ცენტრს“ დაავალა აბიტურიენტის დაშვება ისტორიის დამატებით გამოცდაზე.
28 ივლისს, მივმართეთ გამოცდების ეროვნულ ცენტრს სასამართლო განჩინების დაუყონებლივ აღსრულების მიზნით.
02 აგვისტოს გამოცდების ეროვნული ცენტრმა სასამართლო გადაწყვეტილების აღსრულებაზე უარი განაცხადა იმ საფუძვლით, რომ ისტორიის დამატებითი გამოცდა 25 ივლისს ჩაატარა.
სასამართლო გადაწყვეტილების აღუსრულებლობა სისხლის სამართლის დანაშაულია. ამასთან, დროებითი განჩინება, თავისი ბუნებით გულისხმობს მის დაუყონებლივ აღსრულებას.“
„პარტნიორობა ადამიანის უფლებებისთვის“ (PHR) მიმართავს გამოცდების ეროვნულ ცენტრს, უზრუნველყონ აბიტურიენტის განათლებისა და საქმის სამართლიანი განხილვის უფლების დაცვა და მისცენ აბიტურიენტს საშუალება, დაწეროს ისტორიის დამატებითი გამოცდა.
წყარო: ორგანიზაციის გვერდი სოციალურ ქსელში
