თბილისი. „საქართველოს ახალგაზრდა კონსტიტუციონალისტთა ასოციაციის" წარმომადგენლებმა შეხვედრა გამართეს საქართველოს ცენტრალურ საარჩევნო კომისიაში მსჯავრდებულის საარჩევნო უფლებასთან დაკავშირებით. ორგანიზაციის წარმომადგენლებმა შეხვედრის მონაწილეებს გააცნეს ინიციატივა, რომელიც გულისხმობს სასჯელაღსრულების დაწესებულებაში მყოფი პირებისათვის აქტიური საარჩევნო უფლების ჩამორთმევას არა დანაშაულის სიმძიმის, არამედ დანაშაულის კატეგორიისა და ინდივიდუალური გარემოებების გათვალისწინებით სასამართლოს გადაწყვეტილებით. სრულად... წყარო: gyca.ge

გურია. 26 ნოემბერს, ქალთა ძალადობის წინააღმდეგ მიმართული აქცია გაიმართა ოზურგეთში. აქციაში ხელისუფლების, არასამთავრობო და მედიის წარმომადგენელები მონაწილეობდნენ. „დღეს ერთიანდება ყველა ის ადამიანი, ვინც არის ძალადობის წინააღმდეგ. მივმართავთ საზოგადოებას, ჩვენ, ყველას ერთად და თითოეულს ცალ-ცალკე, შეგვიძლია შევცვალოთ არსებული მდგომარეობა, ნუ დავხუჭავთ თვალს ქალის მიმართა ძალადობაზე, ჩვენ ბევრნი ვართ! ჩვენ შეგვიძლია შევცვალოთ არსებული მდგომარეობა.” – განაცხადა აქციის ერთ-ერთმა მონაწილემ, მარინა ვასაძემ.

25 ნოემბერს, საქართველოს 23 ქალაქში აქცია - „ქალზე ძალადობა დანაშაულია - შეაჩერე" - გაიმართა. აქციის ორგანიზატორია „ქალთა მოძრაობა". აქციის პარალელურად, მონაწილეები ხელს აწერდნენ პეტიციას, რომელშიც იმ აუცილებელ ნაბიჯებზეა საუბარი, რომელიც ხელისუფლებამ ქალთა მიმართ ძალადობის შესაჩერებლად უნდა გადადგას.  25 ნოემბერს მსოფლიო ქალთა მიმართ ძალადობის აღმოფხვრის საერთაშორისო დღეს აღნიშნავს. ამავე დღეს  16-დღიანი საერთაშორისო კამპანია იწყება გენდერული ძალადობის წინააღმდეგ, რომლის მიზანიც საზოგადოებრივი ცნობიერების ამაღლებას და გენდერული ძალადობის მსხვერპლთა მიმართ სოლიდარობის დემონსტრირებაა. პეტიციაზე ხელის მოწერა ნებისმიერ მსურველს, ონლაინ შეუძლია. პეტიცია წყარო: ორგანიზაციის გვერდი სოციალურ ქსელში    

თბილისი. სახალხო დამცველმა ქალთა მიმართ ძალადობის აღმოფხვრის საერთაშორისო დღესთან დაკავშირებით განცხადება გაავრცელა. „სასიცოცხლოდ მნიშვნელოვანია ყველანაირი ძალისხმევა იქნეს გამოყენებული ქალთა მიმართ ძალადობის პრევენციის, შესაძლო მსხვერპლთა დაცვისა და დახმარებისათვის. აუცილებელია სახელმწიფო ხელისუფლების ორგანოებმა გამოიყენონ ყველა არსებული ბერკეტი ძალადობის შესაჩერებლად. საზოგადოებამ უნდა დაარღვიოს დუმილი და ხმამაღლა თქვას, რომ ქალთა მიმართ ძალადობა საზოგადოებისათვის საშიში დანაშაულია", ნათქვამია განცხადებაში. სრულად... წყარო: ombudsman.ge

თბილისი. არასამთავრობო ორგანიზაციები - ადამიანის უფლებათა ცენტრი და „ყოფილი პოლიტპატიმრები - ადამიანის უფლებებისათვის" განცხადებას ავრცელებენ. „მივესალმებით საქართველოს პრეზიდენტის ინიციატივას, დაიწყოს ფართო დისკუსია უვადო პატიმრობაში მყოფი მოქალაქეების საქმეების შესწავლის თაობაზე. ... მიგვაჩნია, რომ უვადო პატიმრობაში მყოფი პატიმრების საქმეების შესწავლისას, გათვალისწინებული უნდა იყოს ერთი მხრივ, ბრალდების სიმძიმე და ჩადენილი დანაშაულით დამდგარი შედეგები, მეორე მხრივ კი მსჯავრდებულთა ჯანმრთელობის მდგომარეობა ან სხვა განსაკუთრებული გარემოებები”, ნათქვამია განცხადებაში. სრულად... წყარო: humanrights.ge

თბილისი. საქართველოს ახალგაზრდა იურისტთა ასოციაციამ გენდერული ძალადობის წინააღმდეგ აქტივიზმის 16 დღიან კამპანიასთან დაკავშირებით განცხადება გაავრცელა. კამპანიაში აქტიური მონაწილეობის პარალელურად, საია აგრძელებს ძალადობის მსხვერპლი ქალებისათვის უფასო სამართლებრივი დახმარების პროგრამას და ქალთა თანასწორობის იდეის ადვოკატირებას. ორგანიზაცია თბილისის, ქუთაისის, ბათუმის, ოზურგეთის, ზუგდიდის, თელავის, გორის, რუსთავისა და დუშეთის ოფისებში საია ქალთა მიმართ ძალადობის და ქალთა დისკრიმინაციის თემასთან დაკავშირებით საზოგადოებრივი ცნობიერების ამაღლებისა და სამოქალაქო განათლების მიმართულებით  ღონისძიებებს გამართავს. კამპანიის ფარგლებში დაგეგმილია საჯარო შეხვედრები ადგილობრივ ხელისუფლებასთან, სამართალდამცავებთან, მედიის, არასამთავრობო სექტორის, სკოლებისა და უმაღლესი საგანმანათლებლო დაწესებულებების წარმომადგენლებთან. სრულად... წყარო: gyla.ge

კახეთი. თელავის ახალგაზრდული ცენტრის ორგანიზებით გრძელდება ძალადობის კვირეული. კვირეულის ფარგლებში ცენტრის ახალგაზრდებმა საინფორმაციო კამპანია ,,დუმილი თანამონაწილეობაა" - გამართეს. დარიგდა საინფორმაციო ბუკლეტები ქალაქის ქუჩებში, რომლებშიც მითითებული იყო ოჯახური ძალადობის ცხელი ხაზის ტელეფონის ნომერი. აქტივობა განხორციელდა პროექტის - ,,ეროვნული ინტეგრაციის გაძლიერება საქართველოში,, (ANI) - ფარგლებში, რომელსაც ახორციელებს საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო: ორგანიზაციის გვერდი სოციალურ ქსელში

თბილისი. ორგანიზაციამ „ვიმეგობროთ უსინათლოებთან" უსინათლოთა საერთაშორისო დღეს გამოკითხვა ჩაატარა. კითხვები ეხებოდა უსინათლო და მცირემხედველი ადამიანის უფლებებს საქართველოში. შედეგების შესახებ ორგანიზაცია პარტნიორ არასამთავრობო ორგანიზაციებთან ერთად, უახლოეს დღეებში გამართავს პრესკონფერენციას.  გამოკითხვის შედეგები წყარო: ორგანიზაციის გვერდი სოციალურ ქსელში

თბილისი. 20 ნოემბერს სახალხო დამცველთან არსებული ეროვნულ უმცირესობათა და რელიგიათა საბჭოების წევრები საქართველოს პრეზიდენტს შეხვდნენ. ეროვნულ უმცირესობათა საბჭოში საქართველოში მცხოვრები ეთნიკურ უმცირესობათა წარმომადგენლები, ხოლო რელიგიათა საბჭოში მოქმედი რელიგიურ კონფესიებია გაერთიანებული. საბჭოების წევრებმა საქართველოს პრეზიდენტს გიორგი მარგველაშვილს მათ წინაშე არსებული პრობლემებისა და აქტუალური საკითხების შესახებ მოახსენეს. საუბარი შეეხო ეთნიკური და რელიგიური უმცირესობების უფლებების  დაცვას, სამოქალაქო ინტეგრაციას, სახელმწიფო ენის სწავლებას, განათლებისა და კულტურის საკითხებს. განიხილეს რესტიტუციასთან დაკავშირებული პრობლემები და ახლო წარსულში მომხდარი დისკრიმინაციული და ქსენოფობიური ინციდენტები. სრულად... წყარო: ombudsman.ge

ქვემო ქართლი. 23 ნოემბერს, ორგანიზაცია „პარტნიორობა ადამიანის უფლებებისთვის" და მარნეულის ახალგაზრდული ცენტრის ორგანიზებით მარნეულის ახალგაზრდებისთვის ჩატარდა სემინარი - „ქალთა მიმართ ძალადობა". სემინარის მონაწილე ახალგაზრდები მიღებულ ინფორმaციას გადასცემენ თავიანთ თანატოლებს მარნეულის რეგიონის სხვადასხვა სოფელში.  ტრენინგი ხორციელდება მარნეულის ახალგაზრდული ცენტრის მიერ, პროექტის - „საქართველოს ეროვნული ინტეგრაციის გაძლიერების" - ფარგლებში. წყარო: ორგანიზაციის გვერდი სოციალურ ქსელში

თბილისი. „ფრონტლაინ კლუბში"  ქუჩაში მცხოვრები და მომუშავე ბავშვების თემაზე დისკუსია გაიმართა. ღონისძიება ჩატარდა „ფრონტლაინ ჯორჯია" კლუბის და ჟურნალ „ლიბერალის" ერთობლივი პროექტის - „დისკუსიები ბავშვთა უფლებების თემაზე" ფარგლეებში, გაეროს ბავშვთა ფონდის მხარდაჭერით. დისკუსიაში მონაწილეობა მიიღეს ჯანდაცვის სამინისტროს, ევროკავშირის წარმომადგენლობის და საქართველოს კარიტასის წარმომადგენლებმა. წყარო: ორგანიზაციის გვერდი სოციალურ ქსელში

თბილისი. 20 ნოემბერს გაეროს ბავშვის უფლებათა კონვენციის 25 წლისთავის  აღსანიშნავად, სახალხო დამცველის ორგანიზებით თბილისის მე-60 საბავშვო ბაღის ტერიტორიაზე 100 ძირი ნერგი დაირგა.გამწვანების აქციაში სახალხო დამცველის აპარატის თანამშრომლებთან ერთად სახალხო დამცველის ბავშვის უფლებების ცენტრთან არსებული ახალგაზრდული საბჭოს წევრები და თბილისის ევროპული სკოლის მოსწავლეები იღებდნენ მონაწილეობას. წყარო:  www.ombudsman.ge

იმერეთი. 20 ნოემბერს საქართველოს ახალგაზრდა იურისტთა ასოციაციის ქუთაისის ფილიალში ბავშვთა უფლებათა კონვენციის 25-ე წლისთავთან დაკავშირებით ფილიალის სამოქალაქო განათლების სკოლის მოსწავლეებისათვის ჩატარდა სემინარი - „ბავშვთა უფლებები". სემინარს საია-ს ქუთაისის ფილიალის თავმჯდომარე გიორგი ჭიქაბერიძე და იურისტი მაკა ცერცვაძე უძღვებოდნენ. სემინარის მიზანი იყო მოსწავლეებისათვის ბავშვთა უფლებათა კონვენციით გათვალისწინებული ბავშვთა უფლებების გაცნობა. წყარო: ორგანიზაციის გვერდი სოციალურ ქსელში

თბილისი. ბავშვის უფლებათა კონვენციის 25 წლისთავთან დაკავშირებით, პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის ინიციატივით და საქართველოში გაეროს ბავშვთა ფონდის ორგანიზებით, თბილისის პარლამენტის შენობაში სპეციალური ღონისძიება გაიმართა. ღონისძიებაში მონაწილეობა საკანონმდებლო ორგანოს და აღმასრულებელი ხელისუფლების, საქართველოში აკრედიტებულმა დიპლომატიური კორპუსის და საერთაშორისო ორგანიზაციების წარმომადგენლებმა, სამოქალაქო საზოგადოებამ და ბავშვებმა მიიღეს. წყარო: ორგანიზაციის გვერდი სოციალურ ქსელში

თბილისი. „ქალთა მოძრაობა" სოციალურ ქსელში ვიდეო-მიმართვებს ავრცელებს. საზოგადოებისთვის ცნობილი სახეები, სამოქალაქო საზოგადოების წარმომადგენლები, მოქალაქეები მოუწოდებენ ხალხს მივიდნენ 25 ნოემბერს აქციაზე - „ქალზე ძალადობა დანაშულია, შეაჩერე!".   ვიდეო მიმართვები წყარო: ორგანიზაციის გვერდი სოციალურ ქსელში

იმერეთი. საქართველოს სკაუტური მოძრაობის იმერეთის ორგანიზაციის ოფისში გაიმართა ტრენინგი - „ძალადობა შინ და გარეთ”. ტრენინგს უძღვებოდა არასამთავრობო ორგანიზაცია „იმპულსი 91" -ის დამფუძნებელი ქრისტინე მაღლაკელიძე.ტრენინგის მსვლელობისას გამახვილდა ყურადღება საკითხებზე: ძალადობის ფორმები და კომპონენტები, საერთაშორისო სტანდარტები და ადგილობრივი საკანონმდებლო სივრცე, ძალადობის პრევენციის მექანიზმები.ტრენინგის ბოლოს გაიმართა დისკუსია.

თბილისი. 18 ნოემბერს სახალხო დამცველმა პრესკონფერენცია გამართა ადამიანის უფლებების საკითხებში უკრაინის საპარლამენტო კომისართან ვალერია ლუტკოვსკასთან  და უკრაინის მთავრობისა და პარლამენტის დელეგაციის წევრებთან ერთად.პრესკონფერენციაზე სახალხო დამცველმა უკრაინის ომბუდსმენთან თანამშრომლობის გაღრმავებაზე ისაუბრა.უკრაინის ომბუდსმენმა ვალერია ლუტკოვსკამ კი საქართველოს გამოცდილებაზე და მიმდინარე წლის მარტში გაფორმებული ადამიანის უფლებათა საკითხებზე თანამშრომლობის გაღრმავების მიზნით გაფორმებულ  მემორანდუმზე ისაუბრა.უკრაინის დელეგაციის ვიზიტი ორგანიზებულია გაეროს განვითარების პროგრამის (UNDP) მიერ. სრულად... წყარო: www.ombudsman.ge

აჭარა. 15 ნოებერს, „დისეიბილითი რაითს ინთერნეიშენალისა" და ,,პარტნიორობა ადამიანის უფლებებისთვის" წარმომადგენლები შეზღუდული შესაძლებლობის მქონე ბავშვების მშობლებს, შეზღუდული შესაძლებლობის მქონე პირთა ორგანიზაციებსა და სამოქალაქო სექტორის წარმომადგენლებს შეხვდნენ. შეხვედრის მიზანი აჭარის რეგიონში, არსებული პრობლემების იდენტიფიცირება და სამომავლო თანამშრომლობის დაგეგმვა იყო. შეხვედრას შეზღუდული შესაძლებლობის მქონე პირები  და მათი უფლებების დამცველი ორგანიზაციების წარმომადგენლები ესწრებოდნენ.

თბილისი. ქალთა საინფორმაციო ცენტრი საბი ბერიანის მკვლელობასთან დაკავშირებით განცხადებას ავრცელებს. „მიგვაჩნია, რომ დეტალები, რომელიც მკვლელობასთან დაკავშირებით იკვეთება, დანაშაულს კიდევ უფრო ამძიმებს. დაუშვებელია, 21-ე საუკუნის საქართველოში ხდებოდეს ადამიანების დევნა, შევიწროვება და მათი სიცოცხლის ხელყოფა იდენტობის ნიადაგზე. ლგბტ თემის წარმომადგენელთა დისკრიმინაცია არღვევს არა მარტო ადამიანის უფლებებს, არამედ ეწინააღმდეგება საქართველოს კონსტიტუციის ძირეულ პრინციპებს და საქართველოს კანონს დისკრიმინაციის ყველა ფორმის აღმოფხვრის შესახებ.მოვუწოდებთ შინაგან საქმეთა სამინისტროს, გამოძიების პროცესი წარიმართოს გამჭვირვალედ და მიუკერძოებლად. ასევე ვთხოვთ მედიასაშუალებებს, განსაკუთრებული სიფრთხილით მოეკიდონ მსგავსი შემთხვევების გაშუქებას და არ დაუშვან სიძულვილის ენის გამოყენება!", ნათქვამია განცხადებაში. წყარო: ორგანიზაციის გვერდი სოციალურ ქსელში

აჭარა. 11 ნოემბერს, ბათუმის ერას მოედანზე ქალთა მიმართ ძალადობის წინააღმდეგ აქცია გაიმართა -  „ერთად შევქმნათ სიკეთის ჯაჭვი", „ძალადობას უპასუხეთ სიკეთის ჯაჭვის შექმნით", „ბოლო არ არსებობს" - ლოზუნგებითა და თეთრი ბაფთებით. აქციას საფუძვლად ბოლო პერიოდში გაზრდილი ფემიციდის შემთხვევები და ქალთა მიმართ გახშირებული ძალადობა დაედო. კამპანიის მიზანს სხვადასხვა სფეროს წარმომადგნელების სიკეთის ჯაჭვში გაერთიანება, ძალადობის სიკეთის ენითა და სიკეთის კეთების მოწოდებით დაპირისპირება წარმოადგენდა. აქციაში სტუდენტები, არასამთავრობო სექტორის წარმომადგენლები, ხელოვანები და რიგითი ბათუმელები მონაწილეობდნენ. აქცია ბათუმის დემოკრატიული ჩართულობის ცენტრთან არსებული კლუბ „აქტიური მოქალაქეების" გაერთიანების ორგანიზებით ჩატარდა.დანართი

თბილისი. არასამთავრობო ორგანიზაცია „კოალიცია ბავშვებისა და ახალგაზრდების კეთილდღეობისათვის" განცხადებას ავრცელებს. „ ბოლო პერიოდში სხვადასხვა საინფორმაციო სააგენტოების მიერ, ე.წ. „კრიმინალურ ქრონიკებში" გავრცელდა ინფორმაცია ბავშვთა მიმართ განხორციელებული სექსუალური ძალადობის შესახებ. გავრცელებული ინფორმაცია შეიცავდა ისეთი სახის მინიშნებებს, რომლის შედეგად შესაძლებელი იყო ძალადობის მსხვერპლი ბავშვის იდენტიფიცირება. „კოალიცია ბავშვებისა და ახალგაზრდების კეთილდღეობისათვის" მოუწოდებს საინფორმაციო სააგენტოებს, ზოგადად ჟურნალისტებს უფრო მეტი პასუხისმგებლობით მოეკიდონ ესეთ სენსიტიურ საკითხებზე ინფორმაციის გაშუქებას, დაიცვან ბავშვთა კონფიდენციალობა, რათა თავიდან იქნეს აცილებული ძალადობის მსხვერპლ ბავშვთა მეორადი ვიქტიმიზაცია.ამასთანავე კოალიცია გამოთქვამს მზადყოფნას ამ საკითხთან დაკავშირებით კონსულტაცია გაუწიოს შესაბამის საინფორმაციო სააგენტოებს, რათა მომავალში უკეთ იყოს დაცული ბავშვთა უფლებები ესეთი სახის შეცდომებისგან”, ნათვამია გავრცელებულ განცხადებაში. წყარო: ორგანიზაციის გვერდი სოციალურ ქსელში

სამცხე–ჯავახეთი. 12 ნოემბერს, არასამთავრობო ორგანიზაციების „ყველა ყველასთვის" და „ხელმისაწვდომი გარემო ყველასთვის" წარმომადგენლები ქალაქ ახალციხის მერიის ხელმძღვანელობას შეხვდნენ და შეზღუდული შესაძლებლობების მქონე პირების პრობლემებზე ისაუბრეს. შეზღუდული შესაძლებლობების მქონე პირთა საჭიროებები და ადგილობრივ 2015 წლის ბიუჯეტში გასათვალისწინებელი სერვისები – ეს შეხვედრის დროს განხილული ძირითადი საკითხები იყო. არასამთავრობო ორგანიზაციის წარმომადგენლებმა ადგილობრივ თვითმმართველობას შშმ პირების ადაპტაციისათვის აუცილებელი პირობების შექმნისკენ მოუწოდეს და ამ კუთხით მომავალი წლის ბიუჯეტის დაგეგმვაში მონაწილეობის სურვილი გამოთქვეს. მერიის ხელმძღვანელობამ განმარტა, რომ ახალციხის მერია ამ საკითზე სხვადასხვა მიმართულებით იმუშავებს.