თბილისი. საქართველოს ახალგაზრდა იურისტთა ასოციაცია (საია) მოუწოდებს კომუნიკაციების ეროვნულ კომისიას არ გასცდეს უფლებამოსილების ფარგლებს. „კიდევ ერთხელ გვინდა აღვნიშნოთ, რომ ,,მაუწყებლობის შესახებ" საქართველოს კანონის 63-ე მუხლის თანახმად, ,,მაუწყებელი პასუხს არ აგებს წინასაარჩევნო და სოციალური რეკლამების შინაარსზე. წინასაარჩევნო და სოციალური რეკლამების შინაარსზე პასუხისმგებლობა საქართველოს კანონმდებლობით დადგენილი წესით ეკისრება შესაბამისი რეკლამის დამკვეთს." შესაბამისად, კომისია ვერ შეაფასებს პოლიტიკური რეკლამის შინაარს (მათ შორის ვერც არაეთიკურობისა და არასათანადოობის კუთხით), რადგან მისი რეგულირების სფეროში შემავალი სუბიექტები პასუხს არ აგებენ ამ შინაარსზე", ნათქვამია განცხადებაში. სრულად... წყარო: gyla.ge

თბილისი. საერთაშორისო გამჭვირვალობა - საქართველოს განცხადებით, რომ კომუნიკაციების კომისიის ქმედებები საარჩევნოდ ადმინისტრაციული რესურსის გამოყენების ნიშნებს შეიცავს. „პირველ რიგში, უნდა აღინიშნოს, რომ კომისიის განცხადება და თავმჯდომარის წერილი მაუწყებლებისადმი არ წარმოადგენს სამართლებრივ აქტს და შესაბამისად არ წარმოშობს იურიდიულ შედეგებს. შესაბამისად, სახეზე გვაქვს კომისიის და მისი თავმჯდომარის ერთგვარი რეკომენდაცია, რომელიც მიმართულია კონკრეტული მაუწყებლებისა და პოლიტიკური გაერთიანებების შეზღუდვისაკენ", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია (საია) კომუნიკაციების ეროვნული კომისიის მიერ მაუწყებლებისთვის პოლიტიკური რეკლამის ამოღების თაობაზე გაგზავნილ წერილს ეხმიანება. „მიგვაჩნია, რომ კომისიის თავჯდომარის წერილი არ წარმოადგენს კომისიის სამართლებრივ აქტს, არ არის მაუწყებლებისთვის სავალდებულო შესასრულებლად, შეიცავს გამოხატვის თავისუფლების შეზღუდვის საფრთხეებს და ეწინააღმდეგება საქართველოს კანონმდებლობას... ამასთან, მიგვაჩნია, რომ კომისიის წერილი წინააღმდეგობაში მოდის საქართველოს კანონმდებლობასთან. მოვუწოდებთ საქართველოს კომუნიკაციების ეროვნულ კომისიას პატივი სცეს გამოხატვის თავისუფლებას, იმოქმედოს კანონმდებლობით დადგენილი წესით და არ გასცდეს მის უფლებამოსილებას", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო წარმოგიდგენთ დავით ლიკლიკაძის სექტემბრის თვის გადაცემას „ვილიკლიკოთ ევროპაზე". სრულად... წყარო: www.transparency.ge

თბილისი. საქართველოს დემოკრატიული ინიციატივა გთავაზობთ სოფო გელავას და დალი ქურდაძის საჯარო ლექციას თემაზე „პროპაგანდა და ყალბი ინფორმაცია", რომელიც გაიმართა პროექტის „თავისუფლების სკოლა - Liberty School" ფარგლებში. პროქტი განხორციელდა „საქართველოს დემოკრატიული ინიციატივის" ეგიდით, საქართველოს გაეროს ასოციაციისა და აშშ-ს საერთაშორისო განვითარების სააგენტოს ფინანსური მხარდაჭერით. სრულად... წყარო: ორგანიზაციის ვებგვერდი სოციალურ ქსელში

თბილისი. პლატფორმა „არა ფობიას!" ხელმომწერი ორგანიზაციები 17 სექტემბერს, „რუსთავი 2-ის" საინფორმაციო გამოშვება „კურიერის" ეთერში, ჭყონდიდის მიტროპოლიტ, მეუფე პეტრეს მიერ გაკეთებულ განცხადებას ეხმაურებიან. „სასულიერო პირმა, საეკლესიო მსახურების შემდეგ, ამბიონიდან, ქვეყანაში მიმდინარე პოლიტიკურ პროცესების შეფასებისას განაცხადა, რომ მე-18, მე -19 საუკუნეებში ფრანგი მისიონერები მოტყუებით ქადაგებდნენ კათოლიციზმს, ხოლო საქართველოში კათოლიკე მოსახლეობას, მათი თანამედროვეები გაუკუღმართებულ და წამხდარი აზროვნების მქონედ მიიჩნევდნენ. ამ ნეგატიურ კონტექსტში მოიხსენია მეუფე პეტრემ პრეზიდენტობის ერთ-ერთი კანდიდატი სალომე ზურაბიშვილი. მიგვაჩნია, რომ სასულიერო პირის მხრიდან პოლიტიკოსის მიმართ გაკეთებული განცხადება სცილდება ჯანსაღი კრიტიკის ფარგლებს და ქსენოფობიური და ანტიკათოლიკური კონოტაცია შეიძინა, რაც შეურაცხყოფს კათოლიკურ ეკლესიასა და მის მრევლს, რადგან რელიგიური და ეროვნული ნიშნით დისკრიმინაციული ხასიათისაა. ასევე გვსურს, ყურადღება გავამახვილოთ მედიის პასუხისმგებლობის საკითხზეც. მსგავსი ქსენოფობიური განცხადებების უკრიტიკოდ, სარედაქციო კომენტარის გარეშე გაშუქება, რომელშიც მკაფიოდ იქნება აღნიშნული განცხადების დისკრიმინაციული ბუნება არ შეესაბამება მაღალ პროფესიულ სტანდარტებს და ეთიკურ ჟურნალისტიკას", ნათქვამია ერთობლივ განცხადებაში. სრულად... წყარო: mdfgeorgia.ge

თბილისი. ,,ლიბერალის" რედაქტორ ზურაბ ვარდიაშვილზე განხორციელებულ თავდასხმასთან დაკავშირებით, კოალიცია „მედიის ადვოკატირებისთვის" განცხადებას ავრცელებს. „დღეს გამოძიების მთავარი ვერსიაა, რომ ზურაბ ვარდიაშვილი თავდამსხმელებს შეეშალათ სხვა პიროვნებაში და სინამდვილეში სულ სხვა პირთან აპირებდნენ ანგარიშსწორებას, რომელმაც შემთხვევამდე ერთი დღით ადრე იჩხუბა და აღნიშნა რომ ზურაბ ვარდიაშვილი იყო. თუმცა, შემთხვევიდან მეორე დღეს გამომძიებელი ,,ლიბერალის" რედაქტორს დაჟინებით უმეორებდა, რომ სწორედ მან იჩხუბა და ამ მოტივით დაესხნენ თავს. პირველ რიგში, შეშფოთებას გამოვთქვამთ გამოძიების მხრიდან მსგავსი ზედაპირული დამოკიდებულების გამო და მოვუწოდებთ მას, მეტი ყურადღებით მოეკიდოს საქმეს. ამავდროულად, აუცილებელია დადგინდეს, ხომ არ უკავშირდებოდა ,,ლიბერალის" რედაქტორზე თავდასხმა მის ჟურნალისტურ საქმიანობას", - ხაზგასმულია განცხადებაში. სრულად  წყარო: http://qartia.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) კომუნიკაციების ეროვნული კომისიის თავმჯდომარის, კახა ბექაურის მიერ პრესკონფერენციაზე გაკეთებულ განცხადებას პასუხობს. „14 სექტემბერს კომუნიკაციების კომისიის თავმჯდომარემ კახა ბექაურმა პრესკონფერენცია გამართა და თავს დაესხა „სამართლიან არჩევნებს" 13 სექტემბერს გამოქვეყნებულ ანგარიშის გამო, რომელშიც შეფასებული იყო კომისიის მიერ მაუწყებლებისთვის საზოგადოებრივი აზრის კვლევის გადამოწმებაზე პასუხისმგებლობის დაკისრება და „რუსთავი 2"-ის საქმის განხილვა" , - ვკითხულობთ განცხადებაში, - „ბექაურის პრესკონფერენცია ცალსახად მიმართული იყო ორგანიზაციის საქმიანობის დისკრედიტაციისკენ. „სამართლიან არჩევნებზე" თავდასხმის მიზნით გამართულ პრესკონფერენციაზე კომისიის თავმჯდომარის ბრალდებები იყო არათანმიმდევრული, დაუსაბუთებელი და აზრს მოკლებული. სხვადასხვა უსაფუძვლო ბრალდებებთან ერთად, პრესკონფერენციაზე და შემდეგ გავრცელებულ პრესრელიზში ბექაური მიმართავდა „სამართლიანი არჩევნების" დონორებს ორგანიზაციის დაფინანსების გადახედვასთან დაკავშირებით. „სამართლიანი არჩევნები" კახა ბექაურის, როგორც სახელმწიფო ადმინისტრაციული ორგანოს ხელმძღვანელის მხრიდან გაკეთებულ მადისკრედიტირებელ განცხადებებს აფასებს, როგორც ზეწოლას და ორგანიზაციის საქმიანობის შეზღუდვის მცდელობას, რაც სრულიად დაუშვებელია და დემოკრატიული განვითარებისთვის საფრთხეს წარმოადგენს". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია აქვეყნებს განცხადებას ტელეკომპანია „იბერიასთან" დაკავშირებით გავრცელებული აუდიოჩანაწერების შესახებ. „გავრცელებული ჩანაწერები, შესაძლოა, შეიცავდეს სისხლის სამართლის კოდექსით გათვალისწინებულ დანაშაულის ნიშნებს. საია მოუწოდებს საგამოძიებო ორგანოებს დროულად, სრულყოფილად და ჯეროვნად შეისწავლონ აღნიშნული ფაქტი და მოახდინონ შესაბამისი რეაგირება", - ნათქვამია განცხადებაში, - „ამასთან, მნიშვნელოვანია მიმდინარე პროცესებში დაცული იქნეს ჟურნალისტთა უფლებები. თანამშრომლებმა დღემდე არ იციან გააგრძელებს თუ არა ტელევიზია მუშაობას. მაუწყებლობის შეწყვეტა წინასაარჩევნო პერიოდში კი, კიდევ უფრო მეტ კითხვას გააჩენს". სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" (TI) აცხადებს, რომ ზაზა ოქუაშვილისა და ლევან ყიფიანის საუბრის ფარული ჩანაწერი კორუფციის შესაძლო შემთხვევაზე მიუთითებს. „პირველ რიგში, ჩვენთვის მიუღებელია, რომ, ბიზნესდავების გამო, პრობლემები ექმნებათ მედიასაშუალებებსა და ჟურნალისტებს, რაც უარყოფითად აისახება მათ სამუშაო პირობებსა და ,ზოგადად, მედიაგარემოზე საქართველოში. სოლიდარობას ვუცხადებთ ტელეკომპანია „იბერიის" ჟურნალისტებს და მზად ვართ მათი უფლებების დაცვისთვის. რაც შეეხება გამოქვეყნებულ ჩანაწერებს, თუ მოცემული ინფორმაცია ნამდვილია, ის მიუთითებს მასშტაბური კორუფციის ფაქტზე, რაც აუცილებლად საჭიროებს რეაგირებას საგამოძიებო ორგანოების მხრიდან", - აცხადებს TI. სრულად  წყარო: ორგანიზაციის ვებგვერდი

თბილისი. ტელეკომპანია „იბერიას" ირგვლივ განვითარებულ მოვლენებს საქართველოს ჟურნალისტური ეთიკის ქარტია განცხადებით ეხმაურება. „ტელეკომპანიის ჟურნალისტები აცხადებენ, რომ მათ არხზე ხორციელდება ხელისუფლების ზეწოლა დამფინანსებელი კომპანიისთვის პრობლემების შემქმნით. გამოქვეყნდა აუდიოჩანაწერები, რომელიც შესაძლოა შეიცავდეს დანაშაულის ნიშნებს, ამიტომ ქარტია მნიშვნელოვანად მიიჩნევს, გავრცელებული ჩანაწერების შესწავლის მიზნით, დაიწყოს გამოძიება, რათა დადგინდეს, აქვს თუ არა კავშირი ხელისუფლებას ამ საუბრების შინაარსთან და მასში მონაწილე პირებთან. სახელმწიფო უწყებებმა ტელეკომპანიასთან და მის მთავარ დამფინანსებელთან დაკავშირებით მოლაპარაკებები და სხვა ქმედებები წარმართონ გამჭვირვალედ და საზოგადოებას მიაწოდონ სრული ინფორმაცია", - ვკითხულობთ განცხადებაში. სრულად  წყარო: ორგანიზაციის ვებგვერდი

საქართველო. „საერთაშორიშოსო გამჭვირვალობა - საქართველოს" ორგანიზებით, ქუთაისში, ზუგდიდსა და ბათუმში საზოგადოებრივი და მედიაორგანიზაციებისთვის ტრენინგი გაიმართა. ტრენინგი ეხებოდა წინასაარჩენო პერიოდში ადმინისტრაციული რესურსის გამოყენების საფრთხეებსა და ამ მიმართულებით არსებული კანონმდებლობისა და პრაქტიკის მიმოხილვას. ტრენინგში მონაწილეობა მიიღო სამ რეგიონში მოქმედი 25 არასამთავრობო და მედია ორგანიზაციის 35-მა წარმომადგენელმა. შეხვედრები შვედეთის საერთაშორისო განვითარების სააგენტოს მხარდაჭერით გაიმართა. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (GYLA) და „ადამიანის უფლებების სწავლებისა და მონიტორინგის ცენტრი" (EMC) საზოგადოებრივი მაუწყებლის თანამშრომელთათვის შეთავაზებულ ახალ ხელშეკრულებებსა და ამასთან დაკავშირებით განვითარებულ პროცესებს აფასებენ. „განჭვრეტადი შრომის პოლიტიკისა და თანამშრომელთა შეფასების სისტემის არარსებობის პირობებში, სრულიად ბუნდოვანია თუ რა კრიტერიუმების საფუძველზე მოხდა იმ თანამშრომელთა შერჩევა, რომელთაც მენეჯმენტისაგან მიიღეს შეთავაზება შრომითი პირობების მნიშვნელოვანი გაუარესების თაობაზე. ამასთან, მაუწყებელში მიმდინარე მოვლენები აჩვენებს, რომ თანამშრომელთა შრომითი პირობების არსებითი გაუარესების პროცესები მხოლოდ 70-მდე თანამშრომელს არ უკავშირდება და მაუწყებლის მენეჯმენტმა ანალოგიური მიზნის მქონე სხვადასხვა პროცესი საზოგადოებრივი რადიოსა და მაუწყებლის პროექტების "საზოგადოებრივ-პოლიტიკური გადაცემების კვლევა" და „მედიის მონიტორინგი და ანალიზი" თანამშრომლების მიმართ სექტემბრამდე დაიწყო”, - აღნიშნულია ორგანიზაციების მიერ გავრცელებულ განცხადებაში. სრულად  წყარო: https://emc.org.ge

თბილისი. „საერთაშორისო გამჭვირვალობა - საქართველო" (TI) მიიჩნევს, რომ კომუნიკაციების ეროვნული კომისიის (GNCC) წინასაარჩევნო მოთხოვნა მაუწყებლებისადმი, გადაამოწმონ მათი დაკვეთით ჩატარებული საზოგადოებრივი აზრის კვლევის სანდოობა, წინააღმდეგ შემთხვევაში კი, საჯარიმო სანქციების შესახებ აფრთხილებს, თვითცენზურის დამკვიდრების საფრთხის შემცველია. „საერთაშორისო გამჭვირვალობა-საქართველო” მოუწოდებს კომუნიკაციების ეროვნულ კომისიას გაიზიაროს ევროპული გამოცდილება და არ გამოიყენოს არაპროპორციული მოთხოვნები მედიის მიმართ, რამაც, შეიძლება, საფრთხე შეუქმნას წინასაარჩევნო პერიოდში საზოგადოებრივი აზრის კვლევების გამოქვეყნებასა და შეუზღუდოს მოსახლეობას მაღალი საზოგადოებრივი ინტერესის საკითხების გაცნობის შესაძლებლობა. სრულად  წყარო: ორგანიზაციის ვებგვერდი

თბილისი. მედიის განვითარების ფონდი რეგიონული აქტივისტებისთვის მედიაწიგნიერების ახალ ორწლიან პროექტს იწყებს. UN Association of Georgia - UNAG-ის ახალგაზრდულ ცენტრებთან და სხვა რეგიონულ ორგანიზაციებთან პარტნიორობით, საქართველოს 17 ქალაქში სხვადასხვა ღონისძიება და კვლევა ჩატარდება. რეგიონულ აქტივისტებს MDF-ის ექსპერტებთან ერთად გამოცდილებას უცხოელი პარტნიორებიც გაუზიარებენ. სრულად  წყარო: ორგანიზაციის გვერდი სოციალურ ქსელში

თბილისი. საზოგადოებრივ მაუწყებელში მიმდინარე პროცესებთან დაკავშირებით, ადამიანის უფლებების ცენტრი მიმართვას ავრცელებს. „ადამიანის უფლებათა ცენტრი სწავლობს საზოგადოებრივ მაუწყებელში დასაქმებულთა შრომითი უფლებების სავარაუდო დარღვევის ფაქტებს", - ნათქვამია დოკუმენტში, - „ადამიანის უფლებათა ცენტრის შეფასებით, საზოგადოებრივმა მაუწყებელმა დასაქმებულებს შესთავაზა შრომითი ხელშეკრულება, რომელშიც წარმოდგენილია მხოლოდ დამსაქმებლის ინტერესები, ხოლო დასაქმებულთა უფლებები ვერ ესადაგება საქართველოს კანონმდებლობასა და საერთაშორისო სტანდარტებს". სრულად  წყარო: ორგანიზაციის ვებგვერდი

თბილისი. თბილისში მიმდინარე რუსული მედიაფორუმის თაობაზე, „კოალიცია ევრო-ატლანტიკური საქართველოსთვის" განცხადებას ავრცელებს. „რუსული მედიაფორუმი საქართველოში რუსეთის ჰიბრიდული ომის კიდევ ერთი დემონსტრირებაა", - ვკითხულობთ განცხადებაში, - „საქართველო არაერთხელ გამხდარა რუსეთის აგრესიული ნაბიჯების სამიზნე, რომელთა შედეგად რუსეთის მიერ ოკუპირებულია ქვეყნის ტერიტორიის ერთი მეხუთედი. ამასთან ერთად, რუსეთის ფედერაცია საქართველოში საკუთარი სტრატეგიული ამოცანების მისაღწევად აქტიურად იყენებს "რბილ ძალას”, რაც აგრესიულ მედია პროპაგანდაში, არასამთავრობო ორგანიზაციებისა და ფონდების დაფუძნებასა და სხვადასხვა სახის ფორუმების ორგანიზებაში გამოიხატება. ამ აქტივობების ერთ-ერთი მთავარი მიზანი საზოგადოებაში ანტიდასავლური განწყობების გაძლიერება და საქართველოს მოსახლეობის კიდევ უფრო მეტად პოლარიზებაა". სრულად  წყარო: http://www.isfed.ge

თბილისი. საქართველოს ჟურნალისტური ეთიკის ქარტია ბუნებრივი კატაკლიზმების გაშუქების სახელმძღვანელო წესებს აქვეყნებს. „მიწისძვრა, ხანძარი, წყალდიდობა, ქარიშხალი - ამგვარი ბუნებრივი კატაკლიზმების გაშუქება მედიას ხშირად უწევს. ინფორმირებულობის მნიშვნელობა ასეთ დროს იზრდება, მოქალაქეები განახლებულ ცნობებს ელიან. მედიის მიერ გავრცელებულ ზუსტ ცნობებზე ბევრი რამ არის დამოკიდებული, განსაკუთრებით მოვლენის პირველ ეტაპზე. ამ თემებზე მუშაობისას, ჟურნალისტს, ინფორმაციის გადაცემასთან ერთად, საკუთარი უსაფრთხოებაზე ზრუნვაც უწევს. რედაქცია დარწმუნებული უნდა იყოს, რომ, პროფესიონალიზმთან ერთად, ჟურნალისტს აქვს ფიზიკური და ფსიქოლოგიური მზაობა გააშუქოს ბუნებრივი კატაკლიზმები", - აღნიშნულია დოკუმენტის შესავალ ნაწილში. სრულად  წყარო: ორგანიზაციის ვებგვერდი

თბილისი. საზოგადოებრივი მაუწყებლის ირგვლივ განვითარებულ მოვლენებში გარკვევის მოწოდებით, „კოალიცია მედიის ადვოკატირებისთვის" საზოგადოებრივი მაუწყებლის დირექტორს, სამეურვეო საბჭოსა და საქართველოს პარლამენტს მიმართავს. „მედიაში გავრცელებული ინფორმაციის თანახმად, საზოგადოებრივი მაუწყებლის ათეულობით თანამშრომელს მიუვიდა შეთავაზება, რომლის თანახმადაც ან უნდა მოხდეს შრომითი ხელშეკრულების არსებითი პირობების შეცვლა ან შეწყდეს შრომითი ურთიერთობა მათთან. მიგვაჩნია, რომ აღნიშნული შეთავაზება არის დაუსაბუთებელი და, შესაძლოა, მიზნად ისახავდეს ათეულობით ადამიანის სამსახურიდან გათავისუფლებას. საზოგადოებრივი მაუწყებლის გარშემო განვითარებული მოვლენები არაერთ კითხვას აჩენს, რომელსაც პასუხი არც გავრცელებული განცხადებით გაეცა", - აღნიშნულია კალიციის მიერ გავრცელებულ განცხადებაში. სრულად  წყარო: https://gyla.ge

თბილისი. „საერთაშორისო გამჭვირვალობა - საქართველო” აქვეყნებს გადაცემის „ვილიკლიკოთ ევროპაზე - დათო ლიკლიკაძესთან ერთად” აგვისტოს ჩანაწერს. გადაცემის სტუმრებმა, პოლიტიკურ მეცნიერებათა მაგისტრმა, ირინა ქართველიშვილმა და ფოტოხელოვანმა, არჩილ გეგენავამ რუსეთიდან მომავალ საფრთხეებზე ისაუბრეს. სრულად... წყარო: www.transparency.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია „იმედის” წამყვანმა, ირაკლი ჩიხლაძემ და ჟურნალისტმა, ქეთი ბრაჭულმა ქარტიის პირველი (სიზუსტე) და მეხუთე (შესწორება) პრინციპები დაარღვიეს. სადავო გახდა გადაცემა „იმედის კვირაში” გასული სიუჟეტები „მარიხუანა სამედიცინო მიზნებისთვის - ჯანდაცვის მსოფლიო ორგანიზაციის დასკვნა”, „კანაფი და ქართული ტრადიცია, რისთვის იყენებდნენ მცენარეს სვანეთში საუკუნეების განმავლობაში". მათ წინააღმდეგ განცხადება გიორგი ყიფიანმა შემოიტანა. საბჭომ მიიჩნია, რომ ქეთი ბრაჭულმა დაარღვია პირველი პრინციპი, მეხუთე პრინცპი კი არ დაურღვევია. ირაკლი ჩიხლაძეს კი ამ პრინციპების დარღვევა არ დაუდგინდა. სრულად... წყარო: qartia.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება (ISFED)" აქვეყნებს ნაშრომს „კრიტიკით შეწუხებული იუსტიციის უმაღლესი საბჭო", რომელშიც იუსტიციის უმაღლესი საბჭოს მიერ, მის მიმართ გამოთქმულ კრიტიკულ შენიშვნებზე რეაგირების ფაქტებია განხილული. მასალის ავტორი საკითხს, სასამართლო ხელისუფლების სამოქალაქო კონტროლის კანონიერი უფლების, გამოხატვის თავისუფლებისა და ამ თავისუფლების შეზღუდვის მცდელობის კუთხით განვითარებული მოვლენების კონტექსტში განიხილავს. სრულად  წყარო: ორგანიზაციის ვებგვერდი