თბილისი. ნუკრი ტაბიძე პოდკასტში შოთა პაპავასა და ნინო ბოლქვაძესთან ერთად განიხილავს პოპულარულ ქართულ სერიალს: ჩემო ცოლის დაქალები. „პრობლემები შოუში არასდროს არის სტრუქტურული, სოციალურ წყობაში ჩაშენებული. ისინი ყოველთვის ადამიანის არსშია გამოხატული. ეს კლასიკური ლიბერალიზმის პრომიტიული გაგებაა. ადამიანის ნება, როგორც ყველაფრის საწყისი", ამბობს შოთა პაპავა. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ჟურნალისტური ეთიკის ქარტის საბჭოს გადაწყვეტილებით, ტელეკომპანია „იმედის" ჟურნალისტებმა ლევან ჯავახიშვილმა, თეონა გეგელიამ და ანუკი გუმბერიძემ დაარღვიეს ქარტიის პირველი პრინციპი, რომელიც ჟურნალისტებს სიზუსტის დაცვას ავალდებულებს. „სადავო სიუჟეტი ეხებოდა არასამთავრობო ორგანიზაციების მიერ წინაარჩევნო პერიოდში გამოვლენილ სავარაუდო დარღვევებს, მათ შორის ყალბი პირადობის მოწმობების დამზადების ფაქტს", ნათქვამია ქარტიის ვებგვერდზე. სრულად... წყარო: qartia.ge

აჭარა. 19 დეკემბერს ბათუმის №1 საჯარო სკოლის მოსწავლეებს ჩაუტარდათ საგანმანათლებლო ტრენინგი თემაზე: „ყალბი ამბების გავრცელება". ტრენინგს „ბათუმელების" ჟურნალისტი ნანა კვაჭაძე უძღვებოდა. შეხვედრაზე ისაუბრეს ისეთ თემებზე, როგორებიცაა: რა მიზნით ავრცელებენ ყალბ ამბავს, როგორ უნდა დავიცვათ თავი მსგავსი ინფორმაციისგან. ასევე, მონაწილეებმა მიიღეს პრაქტიკული რჩევები თუ როგორ გამოიცნონ ყალბი ამბები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭომ, "რუსთავი 2-ის" ჟურნალისტებთან დაკავშიერბით, გადაწყვეტილება მიიღო. ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტებმა - თამარ ბაღაშვილმა და დიანა ჯოჯუამ ქარტიის 2 პრინციპი დაარღვიეს: პირველი, რომელიც ზუსტი ინფორმაციის გავრცელებას ავალდებულებს ჟურნალისტს და მეთერთმეტე, რომლის თანახმადაც, უმძიმეს პროფესიულ დანაშაულად მიიჩნევა ფაქტის განზრახ დამახინჯება. სრულად  წყარო: ორგანიზაციის ვებგვერდი

თბილისი. საერთაშორისო გამჭვირვალობა-საქართველო აქვეყნებს კვლევას 2017 წლის სარეკლამო ბაზრის გამოწვევებისა და პრობლემების შესახებ. იგი მიმოიხილავს ტელევიზიისა და რადიოს 2018 წლის 3 კვარტლის მონაცემებსაც. ანგარიში შეისწავლის ონლაინ გამოცემების და გარე სარეკლამო ბაზარზე არსებულ მდგომარეობას და 2017 წლის თვითმმართველობის არჩევნების დროს წინასაარჩევნოდ პოლიტიკური რეკლამის ტელევიზიების მიხედვით გადანაწილების საკითხს. სრულად... წყარო: www.transparency.ge

თბილისი. კავკასიის კვლევითი რესურსების ცენტრმა (CRRC) და აღმოსავლეთ-დასავლეთის მართვის ინსტიტუტმა ACCESS-ის პროექტის ფარგლებში ჩაატარა კვლევა: ანტიდასავლური დისკურსი ქართულენოვან სოციალურ მედიაში. „კვლევის ფარგლებში CRRC-მ გააანალიზა 70-მდე Facebook გვერდისა და ჯგუფის პოსტები, კომენტარები, რეაქციები და გაზიარებული ინფორმაცია. შედეგები გვიჩვენებს, თუ რამდენად იზრდება ანტიდასავლური ჯგუფების რაოდენობა სოციალურ მედიაში, რა წყაროებს იყენებენ ისინი, როგორი ტონით საუბრობენ დასავლეთისა და რუსეთის შესახებ,” ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 12-16 ნოემბერს, გაეროს ასოციაციამ, USAID-ის #PITA-ას პროგრამის ფარგლებში 4-დღიანი „მულტიმედიის თემატური სკოლა" ჩაატარა. თემატურ სკოლაში, #PITA-ას პროგრამის ახალგაზრდული ცენტრების წევრებს (13 ქალაქიდან) შესაძლებლობა ჰქონდათ მიეღოთ ცოდნა და განევითარებინათ უნარები შემდეგი მიმართულებებით: ფოტოგრაფია, ვიდეოგრაფიკა, მონაცემთა ვიზუალიზაცია, სოციალური მედია, ამბის მოყოლა (story-telling), მედია წიგნიერება, ფაქტების გადამოწმება. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს კომუნიკაციების ეროვნულმა კომისიამ (GNCC) საპრეზიდენტო არჩევნების წინასაარჩევნო პერიოდის მედია მონიტორინგის მეორე შუალედური ანგარიში გამოაქვეყნა, რომელიც 2018 წლის 29 სექტემბრიდან 29 ოქტომბრამდე პერიოდს მოიცავს. საანგარიშო პერიოდში მონიტორინგი 41 სამაუწყებლო არხს, 37 ცენტრალური და ადგილობრივი ბიუჯეტიდან დაფინანსებულ გაზეთსა და საერთო ლიცენზიის მქონე რადიომაუწყებლებს ჩაუტარდა. მედია მონიტორინგის პროცესში კომისია წინასაარჩევნო რეკლამას, დებატებს, ახალ ამბებსა და საზოგადოებრივ პოლიტიკურ გადაცემებს, წინასაარჩევნო აგიტაციასა და საზოგადოებრივი აზრის კვლევებს 24 საათის განმავლობაში აკვირდებოდა. ანგარიშში დეტალურად არის მოცემული მაუწყებლების მიერ საარჩევნო სუბიექტებისთვის დათმობილი დრო, როგორც პრაიმ ტაიმში, ასევე პრაიმ ტაიმს მიღმა. სრულად  წყარო: ორგანიზაციის ვებგვერდი

თბილისი. ჟურნალისტური ეთიკის ქარტია და გაეროს ბავშვთა ფონდი (UNICEF), 17-18 ნოემბერს, მართავენ სემინარს უფროსკლასელებისათვის - „მედიაწიგნიერება და კრიტიკული აზროვნება". ორდღიანი სემინარი იმართება თბილისში, განათლების მულტიმედია ცენტრში. (ალექსანდრე ჭავჭავაძის #10). პრაქტიკულ ტრენინგებში მონაწილეობას მიიღებენ XI და XII კლასების მოსწავლეები თბილისისა და რეგიონების სკოლებიდან. ორგანიზატორების განცხადებით, სემინარი დაეხმარება ახალგაზრდებს, აიმაღლონ ცოდნა მასობრივი კომუნიკაციისა და ახალი ტექნოლოგიების შესახებ, გააძლიერებს მათ უნარს, კრიტიკულად გაანალიზონ, რა კავშირი არსებობს მედიას, აუდიტორიასა და ინფორმაციას შორის. სრულად  წყარო: http://qartia.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს ბლოგპოსტს: დისკრედიტაციული Facebook გვერდები - გაკვეთილი ავსტრიის საპარლამენტო არჩევნებიდან. ორგანიზაციამ სოციალური მედიის მონიტორინგის განხორციელებისას არჩევნების პირველი ტურის პერიოდში 54 Facebook გვერდი აღმოაჩინა, რომელთა მიზანს ცალკეული კანდიდატების დისკრედიტაცია წარმოადგენს. სრულად... წყარო: www.isfed.ge

თბილისი. ნიკა გვარამიასა და გიორგი გვიმრაძის თაობაზე შესულ განცხადებებზე საქართველოს ჟურნალისტური ეთიკის ქარტიის საბჭომ გადაწყვეტილებები მიიღო. ქარტიის საბჭოს გადაწყვეტილებით, ტელეკომპანია "რუსთავი 2-ის" გადაცემა "კვირის აქცენტების" წამყვანმა ნიკა გვარამიამ ქარტიის პირველი პრინციპი დაარღვია, რომელიც ჟურნალისტს ზუსტი ინფორმაციის გავრცელებას ავალდებულებს. მის წინააღმდეგ ქარტიას დაჩი ცაგურიამ მიმართა; საბჭოსვე გადაწყვეტილებით, საზოგადოებრივი მაუწყებლის პირველი არხის წამყვანმა გიორგი გვიმრაძემ ქარტიის პირველი (სიზუსტე) და მეხუთე (შესწორება) პრინციპები დაარღვია. მის წინააღმდეგ ქარტიას "რუსთავი 2-ის" გენერალურმა დირექტორმა ნიკა გვარამიამ მიმართა. ის სადავოდ ხდიდა საპრეზიდენტო კანდიდატებს შორის პირველ არხზე გამართული დებატებისას წამყვანის, გიორგი გვიმრაძის იმ ფრაზას, რომელიც მას შეეხებოდა. სრულად  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „საჯარო სამსახურის ბიურომ უნდა შეისწავლოს თანამდებობის პირების ქონების შესახებ გავრცელებული ინფორმაცია". „შაბათს, 13 ოქტომბერს, ტელეკომპანია „რუსთავი 2-ის" ეთერში გავიდა სიუჟეტი ზოგიერთი მაღალი თანამდებობის პირის ძვირადღირებული უძრავი ქონების შესახებ. სიუჟეტში მოცემული ინფორმაცია ლეგიტიმურ კითხვებს ბადებს იმასთან დაკავშირებით, თუ რამდენად სრულად აქვთ თანამდებობის პირებს დეკლარირებული ქონება და შემოსავლები, ასევე იმის შესახებ, ხომ არ იღებენ ისინი შემოსავალს კანონის გვერდის ავლით". ორგანიზაცია მოუწოდებს ხელისუფლებას შეისწავლოს კორუფციის შესაძლო შემთხვევები. სრულად... წყარო: www.transparency.ge

თბილისი. IFES-ის მხარდაჭერით, ცენტრალური მედიის წარმომადგენლებისთვის, საარჩევნო საკითხების ირგვლივ, სამუშაო შეხვედრა გაიმართა. არჩევნების პროცესთან და მის გაშუქებასთან დაკავშირებული მნიშვნელოვანი თემების შესახებ ჟურნალისტებმა ცესკოს, სწავლების ცენტრის, საარჩევნო სისტემების საერთაშორისო ფონდისა (IFES) და შინაგან საქმეთა სამინისტროს აკადემიის წარმომადგენლებთან ისაუბრეს. სრულად  წყარო: https://www.facebook.com/IFES.Geo/posts

თბილისი. ტელეკომპანია „იბერიას" საინფორმაციო სამსახურის მუშაობის შეწყვეტასთან დაკავშირებით, „კოალიცია მედიის ადვოკატირებისთვის" განცხადებას ავრცელებს. „არჩევნებამდე რამდენიმე დღით ადრე, ეროვნული მაუწყებლის ტელეკომპანია ,,იბერიას" საინფორმაციო სამსახურის მუშაობის შეჩერება გამოხატავს ქვეყანაში მედიაგარემოს გაუარესების ტენდენციას, რაც პირველ რიგში აზიანებს საზოგადოებას, მისი ინფორმირებული არჩევანის უზრუნველყოფას", - ნათქვამია განცხადებაში, - „კოალიცია მედიის ადვოკატირებისთვის" წევრი ორგანიზაციები ამ დრომდეც მოვუწოდებდით მთავრობას და დამფუძნებლებს, რომ მათ შორის წარმოქმნილ დავაში არ მომხდარიყო ჟურნალისტთა გამოყენება". სრულად  წყარო: https://gyla.ge

თბილისი. „ახალგაზრდა ადვოკატები" ტელეკომპანია „იბერიის" მხრიდან მაუწყებლობის შეწყვეტის ფაქტთან დაკავშირებით განცხადებას ავრცელებს. ორგანიზაცია აღნიშნავს, რომ მნიშვნელოვანია დაცული და გამიჯნული აღმოჩნდეს ბალანსი, კრიტიკული მედიის არსებობასა და სახელმწიფოს წინაშე არხის მესაკუთრეთა ფინანსური დავალიანების მოგვარებას შორის, რაც მძიმედ აისახება ქვეყანაში სიტყვისა და გამოხატვის თავისუფლების ხარისხზე. სრულად... წყარო: www.barristers.ge

თბილისი. საქართველოს ჟურნალისტური ეთიკის ქარტიამ გამოსცა ეთიკურად გაშუქების სახელმძღვანელო წესების კრებულის მეორე ნაწილი, სადაც შესულია ქარტიის მიერ 2017-2018 წლებში მომზადებული რეკომენდაციები. კრებული მოიცავს პრაქტიკულ რჩევებს ისეთი საკითხების გაშუქებისთვის, როგორიცაა: პირადი ცხოვრება; ფსიქიკური ჯანმრთელობა; სასამართლო პროცესები; არჩევნები; გენდერული საკითხები; ბუნებრივი კატაკლიზმები; ბავშვებთან დაკავშირებული საკითხები; შესწორების სტანდარტი მედიაში; სრულად... წყარო: www.mediachecker.ge

თბილისი. საქართველოს ჟურნალისტური ეთიკის ქარტია "რუსთავი 2-ის” ჟურნალისტებზე თავდასხმის საქმის სწრაფ გამოძიებას ითხოვს. „საქართველოს ჟურნალისტური ეთიკის ქარტია შინაგან საქმეთა სამინისტროსგან და მთავარი პროკურატურისგან ითხოვს, დაუყოვნებლივ გამოიძიონ 2018 წლის 10 ოქტომბერს ხაშურის მუნიციპალიტეტში ტელეკომპანია "რუსთავი 2"-ის ჟურნალისტებზე თავდასხმის, ძალადობისა და პროფესიულ საქმიანობაში უკანონოდ ხელის შეშლის ფაქტი”, - ნათქვამია ორგანიზაციის მიერ გავრცელებულ განცხადებაში, - „შინაგან საქმეთა სამინისტრომ მომხდარზე გამოძიება სისხლის სამართლის კოდექსის 154-ე მუხლით დაიწყო, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს. ჟურნალისტური ეთიკის ქარტია საგამოძიებო ორგანოებს და ხელისუფლებას მოუწოდებს, დანაშაულის სწრაფი და ეფექტიანი გამოძიებით გაემიჯნოს მედიაზე ძალადობას და უზრუნველყოს საქართველოში ჟურნალისტების უსაფრთხოდ მუშაობა". სრულად  წყარო: ორგანიზაციის ვებგვერდი

თბილისი. კოალიცია მედიის ადვოკატირებისთვის „კურიერის" გადამღები ჯგუფისთვის ჟურნალისტურ საქმიანობაში ხელშეშლის ფაქტს განცხადებით ეხმაურება. „როგორც მედიაში გასული სიუჟეტიდან ირკვევა, მედიის წარმომადგენლები რეპორტაჟს რკინიგზის ახალი მაგისტრალის მშენებლობის დროს გამოვლენილ დარღვევებზე ამზადებდნენ. ვიდეომასალის გადაღების დროს კი, ჩინეთის რკინიგზის 23-ე ბიუროს საქართველოს ოფისის წარმომადგენლებმა „კურიერის" ჟურნალისტს კამერა წაართვეს და მოპოვებული ვიდეომასალის წაშლა სცადეს, რამდენიმე საათის განმავლობაში ტელევიზიის კუთვნილი ტექნიკა კომპანიის წარმომადგენლებს ჰქონდათ”, - ვკითხულობთ განცხადებაში, - „მოვუწოდებთ შესაბამის საგამოძიებო ორგანოებს, კანონით გათვალისწინებული, დროული და ეფექტური რეაგირება მოახდინონ აღნიშნულ ფაქტზე, რათა მომავალში თავიდან იქნეს აცილებული ჟურნალისტებისათვის საქმიანობაში ხელის შეშლის შემთხვევები". სრულად  წყარო: https://gyla.ge

თბილისი. მედიის ინსტიტუტი და ადამიანის უფლებათა ცენტრი ეხმაურებიან „რუსთავი 2"-ის გადაცემა „კურიერის" ჟურნალისტისა და ოპერატორის ცემისა და ჟურნალისტურ საქმიანობაში ხელის შეშლის ფაქტს. „მედიის ინსტიტუტი და ადამიანის უფლებათა ცენტრი გმობენ ტელევიზიის ჟურნალისტსა და ოპერატორზე თავდასხმას. ორგანიზაციები მოუწოდებენ საგამოძიებო ორგანოებს, დროულად შეისწავლონ ჟურნალისტურ საქმიანობაში ხელის შეშლისა და ძალადობის სავარაუდო ფაქტი”, ნათქვამია განცხადებაში. სრულად... წყარო: „ადამიანის უფლებათა ცენტრის" ვებგვერდი სოციალურ ქსელში

თბილისი. ვეხმაურებით „რუსთავი 2”-ის მიერ გავრცელებულ ინფორმაციას ჟურნალისტ ეკა გაგუას და ოპერატორ ლევან კალანდიას ფიზიკური შეურაცხყოფისა და პროფესიული საქმიანობის შესაძლო ხელშეშლასთან დაკავშირებით. „ტელეკომპანია „რუსთავი 2”-სა და მისი ჟურნალისტების მიმართ ხშირია აგრესიული გამონათქვამები (https://bit.ly/2NzzXwu). ამ მხრივ განსაკუთრებით ხელისუფლების მაღალჩინოსნები და დეპუტატები გამოირჩევიან და ხშირად ეს გამონათქვამები სცილდება ეთიკის ჩარჩოებს. მიუხედავად იმისა, რომ ნებისმიერ პირს აქვს უფლება გააკრიტიკოს ან არ მოეწონოს არხის სარედაქციო პოლიტიკა, ხელისუფლების პირდაპირ ვალდებულებას წარმოადგენს ქვეყანაში ჟურნალისტებისათვის საქმიანობის უსაფრთხო გარემოს შექმნა. შესაბამისად, მოვუწოდებთ ხელისუფლების წარმომადგენლებს შეასრულონ კანონით ნაკისრი ვალდებულები და ასევე, თავი შეიკავონ კრიტიკული მედიისა და ჟურნალისტების წინააღმდეგ ვერბალური თავდასხმისაგან, რადგან მსგავსი განცხადებები და დამოკიდებულება ჟურნალისტების მიმართ ძალადობის წახალისებას ახდენს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. 13 ოქტომბერს ფრონტლაინ ჯორჯიაში ექსპერტები ჟურნალისტებისთვის გამართავენ ღია მასტერკლასს მონაცემთა უსაფრთხოებისა შესახებ. გარდა ამისა მონაწილეები გაეცნობიან აღმოსავლეთ ევროპის საგამოძიებო ჟურნალისტური ერთ–ერთი ქსელის გამოცდილებას. სრულად... წყარო: ლიბერალი

თბილისი. საზოგადოება და ბანკების ეკონომიკური მედია სკოლის მსმენელებს ეროვნული ბანკის პრეზიდენტმა კობა გვენეტაძემ სერტიფიკატები გადასცა. „კობა გვენეტაძემ ჟურნალისტებთან ერთად მაკროეკონომიკური თემები მიმოიხილა. მან ჟურნალისტების შეკითხვებსაც უპასუხა. მედია სკოლის მსმენელებმა საკასო ცენტრი დაათვალიერეს და მის სამუშაო პროცესს გაეცნენ. ეკონომიკური მედია სკოლის ტრენინგი რეგიონში მომუშავე ჟურნალისტებისთვის ჩატარდა და მას ილიას სახელმწიფო უნივერსიტეტის ასოცირებული პროფესორი გიორგი პაპავა უძღვებოდა. სკოლას სხვა მოწვეული სტუმრებიც ჰყავდა. მედია სკოლის მიზანია ჟურნალისტების ფინანსური განათლების ამაღლება. მსმენელები ეკონომიკის საფუძვლებს სპეციალური კურსის მიხედვით სწავლობენ. სასწავლო კურსი 4 დღის განმავლობაში გრძელდებოდა და მასში საქართველოს თითქმის ყველა რეგიონის სხვადასხვა მედიასაშუალებიდან კონკურსის წესით შერჩეული 20 ჟურნალისტი მონაწილეობდა”, ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში