თბილისი. ამ წუთებში, სასტუმრო „რედისონში" საკონსტიტუციო სასამართლოს რეფორმირების შესახებ ფონდ „ღია საზოგადოება-საქართველოს" ორგანიზებული კონფერენცია მიმდინარეობს. „შეხვედრას ესწრებიან ხელისუფლების, საერთაშორისო ორგანიზაციების, არასამთავრობო ორგანიზაციების და აკადემიური სფეროს წარმომადგენლები. მათი მონაწილეობით განიხილება საქართველოს პარლამენტის მიერ მიღებული ბოლოდროინდელი საკანონმდებლო ცვლილებები, ასევე საქართველოს პრეზიდენტის შენიშვნები საკონსტიტუციო სასამართლოს რეფორმირების შესახებ და ვენეციის კომისიის პირველადი მოსაზრება რეფორმასთან დაკავშირებით", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს გიორგი ღვინჯილიას ბლოგპოსტს: „პოზიტიური ძალაუფლება, ნეოლიბერალური სუბიექტურობა და პროგრესის იდეა". „ჩემთვის საბოლოო პროვოკაციული კითხვა ასე დაისმის -პოსტსაბჭოთა საქართველოში, რომელიც არის სპეციფიკური და უნიკალური კონტექსტი და მე ვეცადე ეს მეჩვენებინა, საერთოდ საკმარისია თუ არა ნეოლიბერალიზმის კრიტიკა იმისთვის, რომ არ იყო ნეოლიბერალი? არ იყო განსაზღვრული მისი შინაგანი ლოგიკით, იმ შინაგანი წინააღმდეგობებით, რომლებსაც ის წარმოშობს და იყო ჩაკეტილი ამ მანკიერი წრის შიგნით, რომელსაც ჟიჟეკი აღწერს. სუბკულტურული მემარცხენეობა ყველგან და ყოველთვის ასეთ შიდა წინააღმდეგობას წარმოადგენს," ნათქვამია პუბლიკაციაში. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: „სახელმწიფოს მიერ სრულად დაფინანსებული ფაკულტეტების ეფექტიანობა". „სამი უნივერსიტეტის მაგალითზე შეგვიძლია ვთქვათ, რომ ე.წ. „უფასო ფაკულტეტების" პროგრამის შედეგები მოზიდული სტუდენტების უნარების კუთხით წინააღმდეგობრივია. პროგრამამ შედეგად გამოიღო პროგრამაში მოხვედრილი სტუდენტების მუდმივი ზრდა, ასევე უნივერსიტეტების (განსაკუთრებით, ტექნიკური უნივერსიტეტის მხრიდან) მხრიდან პროგრამაში მოხვედრილი მიმართულებების დამატება, ასევე სტუდენტთა რიცხოვნობის გაზრდა. იმ პროგრამებზე სადაც პროგრამის დაწყებამდე ადგილების შევსების პრობლემა იყო არ შეინიშნება უფრო უანარიანი სტუდენტების მოზიდვის ტენდენცია, ზოგიერთ პროგრამაზე (მაგ. ქართული ფილოლოგია, მშენებლობა, ენერგეტიკა და ა.შ.) მართლაც აღინიშნება სტატისტიკურად მნიშვნელოვანი გაუმჯობესება, თუმცა იმ ფონზე როდესაც ამავე უნივერსიტეტებში საკონტროლო პროგრამებზეც იყო მოზიდული კონტიგენტის საშუალო უნარიანობის ზრდა," ნათქვამია ორგანიზაციის ვებ-გვერდზე. სრულად... წყარო: idfi.ge

აჭარა. 29 მაისს, ბათუმის სახელმწიფო უნივერსიტეტში, გაიმართა დისკუსია თემაზე: „სეკულარულობა და მისი კრიზისი თანამედროვე საქართველოში". დისკუსიის თემაზე მოხსენება წაიკითხა ფილოსოფოსმა, ილიას სახელმწიფო უნივერსიტეტის პროფესორმა გიორგი მაისურაძემ. წყარო: presscafe.ge

აზიის განვითარების ბანკის ყოველწლიური შეხვედრები მნიშვნელოვან პლატფორმად ჩამოყალიბდა აზიისა და წყნარი ოკეანის რეგიონებთან დაკავშირებული ეკონომიკური და სოციალური განვითარების საკითხების განსახილველად. „საქართველოდან შეხვედრაში მონაწილეობა მიიღო IDFI-ის დირექტორმა გიორგი კლდიაშვილმა. იგი მონაწილეობდა პანელში - „სამოქალაქო საზოგადოების ჩართულობის ადგილი მდგრადი განვითარების მიზნების განხორციელებაში: შემცირება თუ გაფართოება?," ნათქვამია ორგანიზაციის ვებ-გვერდზე. სრულად... წყარო: idfi.ge

სამეგრელო. 31 მაისს, ასოციაცია „ათინათის" ახალგაზრდული ცენტრის ორგანიზებით ჩხორიის დედათა მონასტერში მოეწყო სათემო და მოხალისეობრივი აქტივობა. „ღონისძიების ფარგლებში ახალგაზრდებმა მოხალისეობრივად დაასუფთავეს თხილნარი, მოთიბეს ეზო და დაეხმარნენ დედებს სხვადასხვა საქმეში," ნათქვამი ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 19-24 მაისს, ვაშინგტონში, 2016 წლის პარტნიორთა გლობალური ფორუმი გაიმართა. მონაწილეებს შორის იყვნენ სხვადასხვა ადგილობრივი და საერთაშორისო არასამთავრობო ორგანიზაციები, მთავრობები, კერძო სექტორი და აკადემიური სფეროს წარმომადგენლები. მთლიანობაში ფორუმმა 75 ქვეყანა მოიცვა. ღონისძიება მიეძღვნა თემას - „სოციალური ანგარიშვალდებულება განვითარებისთვის". ძირითადი აქცენტი გაკეთდა შემდეგ მიმართულებებზე: ინკლუზიური, გამჭვირვალე და ანგარიშვალდებული ინსტიტუტები; სახელმწიფოსა და საზოგადოებას შორის თანამშრომლობა სოციალური ანგარიშვალდებულების მიზნით: მოქალაქეთა ჩართულობიდან საჯარო მომსახურების თანაწარმოებამდე; ადაპტური მართვა. ინფორმაციის თავისუფლების განვითარების ინსტიტუტს (IDFI) ფორუმზე წარმოადგენდა საბა ბუაძე, ღია მმართველობის პარტნიორობის (OGP) პროგრამის ფარგლებში", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. არასამთავრობო ორგანიზაციები ერთობლივ განცხადებას ავრცელებენ კორცხელის ინციდენტის გამოძიების შესახებ. „განცხადებაზე ხელმომწერი ორგანიზაციები არაეფექტურად ვაფასებთ კორცხელის ინცინდენტის გამოძიებას და მოვუწოდებთ საქართველოს შინაგან საქმეთა სამინისტროს და საქართველოს მთავარ პროკურატურას, მიიღონ ადეკვატური და დროული ზომები იმისთვის, რომ დადგეს ინცინდენტში მონაწილე ყველა პირის, ძალადობრივი აქტის ორგანიზატორებისა და განმახორციელებლების პასუხისმგებლობის საკითხი...", ნათქვამია განცხადებაში. სრულად... წყარო: osgf.ge

თბილისი. საქართველოს ახალგაზრდა იურისტთა ასოციაცია ეხმიანება ვეგანურ კაფე „კივიში" 29 მაისს მომხდარ ინციდენტს. „...მიგვაჩნია, რომ მზარდი ექსტრემიზმისა და დისკრიმინაციის ფაქტების ფონზე, სიძულვილით მოტივირებულ დანაშაულებზე სახელმწიფოს მხრიდან ეფექტური რეაგირება და სისხლისსამართლებრივი სანქციების გამოყენება ფუნდამენტური მნიშვნელობისაა. ...დისკრიმინაციულ და სიძულვილით მოტივირებულ დანაშაულებზე არასათანადო რეაგირება და დაუსჯელობა სტიმულს აძლევს ექსტრემისტული ჯგუფების გაძლიერებას და ადამიანის, განსაკუთრებით უმცირესობათა ჯგუფების, ფუნდამენტური უფლებების შელახვას", ნათქვამია საიას მიერ გავრცელებულ განცხადებაში. სრულად... წყარო: gyla.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის სასამართლო რეფორმის „მესამე ტალღის" გაჭიანურებას ეხმაურება. „კოალიციის შეფასებით, „მესამე ტალღის" კანონპროექტების შინაარსი საწყისი ეტაპიდან ბოლო რედაქციამდე არაერთ ნაწილში არსებითად არის გადასინჯული. მიუხედავად იმისა, რომ ამ პროცესში შეიცვალა ან შესუსტდა გარკვეული პოზიტიური და პროგრესული ინციატივები, კოალიცია მნიშვნელოვნად მიიჩნევს დროულად დასრულდეს რეფორმის საკანონმდებლო პროცესი და ძალაში შევიდეს ის გაუმჯობესებები მაინც, რასაც კანონპროექტები ითვალისწინებს, აღნიშნული კრიტიკულად მნიშვნელოვანია სასამართლო სისტემისთვის," ნათქვამია ერთობლივ განცხადებაში. სრულად... წყარო: idfi.ge

თბილისი. 31 მაისს, საქართველოს ახალგაზრდა იურისტთა ასოციაციამ გამართა კონფერენცია: „სახელმწიფოს წილობრივი მონაწილეობით შექმნილი საწარმოები - საქართველოში არსებული პრაქტიკა და საერთაშორისო გამოცდილება". კონფერენცია ნიდერლანდების საელჩოს ფინანსური მხარდაჭერით ჩატარდა. სრულად... წყარო: ორგანიზაციის ვებ-გვერდი სოციალურ ქსელში

თბილისი. 31 მაისს, ომბუდსმენმა საქართველოში მოქმედ ფსიქიატრიულ დაწესებულებებში ადამიანის უფლებათა დაცვის კუთხით არსებული მდგომარეობის შესახებ სპეციალური ანგარიში წარადგინა. „ანგარიშში ხაზგასმულია, რომ არასაკმარისი დაფინანსება საბოლოო ჯამში იწვევს ფსიქიატრიულ დაწესებულებებში კვალიფიციური პერსონალის სიმცირეს, სათანადო, თერაპიული გარემოს არარსებობას, მკურნალობის, მოვლის, ფსიქო-სოციალური რეაბილიტაციის დაბალ ხარისხს, ხანგრძლივ ჰოსპიტალიზაციას და თემზე დაფუძნებული სერვისების ხელმიუწვდომლობას," ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „რაჭა-ლეჩხუმ, ქვემო სვანეთის მუნიციპალიტეტების თანამდებობის პირთა და მათი ოჯახის წევრების მონაწილეობა კომერციულ საქმიანობაში." „ჩვენ მიერ ჩატარებული კვლევის შედეგად დადგინდა, რომ ცალკეულ თანამდებობის პირთა მიერ წარდგენილ წლიურ ქონებრივ დეკლარაციებში მათი ქონება და ბიზნესსაქმიანობა არასრულად არის ასახული," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) ლგბტ აქტივსტების დაკავების საქმეში პოლიციელების მხრიდან არასათანადო მოქცევის ფაქტებზე გენინსპექციას მიმართავს. „კერძოდ, განცხადებაში, დაკავებული პირებისგან აღებული ახსნა-განმარტებების საფუძველზე, EMC უთითებს დაკავების არამართლზომიერი გამოყენებისა და პოლიციის თანამშრომლების მხრიდან ჰომოფობიური ენისა და რელიგიური ნეიტრალიტეტის დარღვევის ფაქტებზე და შსს-ს გენერალურ ინსპექციას საქმის შესწავლასა და კონკრეტული პოლიციელების მიმართ დისციპლინური პასუხისმგებლობის დაკისრებას სთხოვს," ნათქვამია ორგანიზაციის ვებ-გვერდზე. სრულად... წყარო: emc.org.ge

სამეგრელო. 30 მაისს, რუხის საჯარო სკოლაში ჩატარდა პროგრამის პრეზენტაცია და ტრენინგი თემაზე „ტოლერანტობა". „ასევე მოეწყო მოკლემეტრაჟიანი ანიმაციის ჩვენება და განხილვა. ახალგაზრდებს მიეცათ შესაძლებლობა ენახათ და განეხილათ 2011 წლის მულტიმედიური ფილმი „Zero”, რომელიც თვალსაჩინოდ წარმოაჩენს ადამიანებში განსხვავებულობის აღიარებისკენ მზაობისა და შემწყნარებლობის დაბალ დონეს. დისკუსიის პროცესში ახალგაზრდებმა აქტიურად გამოხატეს საკუთარი აზრი ფილმთან და შეხვედრის თემასთან დაკავშირებით," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. „საერთაშორისო გამჭვირვალობა - საქართველო" მუნიციპალიტეტების არასამეწარმეო (არაკომერციულ) იურიდიულ პირებში მიმდინარე პროცესების შესახებ კვლევას აგრძელებს. ორგანიზაცია ამჯერად ქვემო ქართლის მუნიციპალიტეტების მიერ დაფუძნებულ იურიდულ პირებში არსებულ მდგომარეობას მიმოიხილავს. „ქვემო ქართლის მუნიციპალიტეტებიდან გამოთხოვილი საჯარო ინფორმაცია იურიდიულ პირებში 2014 წლის 1 მაისის და 2016 წლის 29 თებერვლის მდგომარეობით დასაქმებულთა რაოდენობასა და თვის მანძილზე გასაცემი ხელფასის ოდენობებს ეხება", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ინფომრაციის თავისუფლების განვითარების ინსტიტუტი (IDFI) აქვეყნებს მოკვლევას კონკრეტულ სახელმწიფო შესყიდვაზე. „2015 წლის 9 ივლისს მასწავლებელთა პროფესიული განვითარების ეროვნულმა ცენტრმა გამოაცხადა ელექტრონული ტენდერი (SPA150019160) ეკონომ კლასის 11 ცალი ცალმხრივი ავიაბილეთის შესაძენად. ტენდერის ღირებულება ჯამში 62 000 ლარს შეადგენდა. ელექტრონულ ტენდერში მონაწილეობა მხოლოდ ერთმა კომპანიამ მიიღო - შპს „დისკავერი". ელექტრონულ ტენდერში წინადადებების მიღება 2015 წლის 25 ივლისს დაიწყო და 30 ივლისს დასრულდა. აღნიშნულ ტენდერთან დაკავშირებით პირველ კითხვის ნიშანს მითითებული შესყიდვის კატეგორია წარმოშობს," ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. 27 მაისს, საქართველოს ახალგაზრდა იურისტთა ასოციაციამ კვლევის პრეზენტაცია გამართა. „კვლევა პროექტის „მოქალაქეთა უფლება მონაწილეობა მიიღონ ადგილობრივ დონეზე საჯარო ფინანსებთან დაკავშირებული გადაწყვეტილების მიღების პროცესში" ფარგლებში გამოიცა. პროექტის მიზანს მოქალაქეთა ჩართულობის გაზრდის გზით, საჭიროებებზე დაფუძნებული საბიუჯეტო პროცესის ხელშეწყობა წარმოადგენდა," ნათქვამია ორგანიზაციის ვებ-გვერდზე. სრულად... წყარო: gyla.ge

აჭარა. 28 მაისს, ბათუმის დემოკრატიული ჩართულობის ცენტრში, შშმ პირთა ახალგაზრდულმა ორგანიზაციამ - ცვლილებები თანაბარი უფლებებისათვის მორიგი სემინარი გამართა. ამჯერად, სამიზნე ჯგუფი რუსთაველისა და ძველი ბათუმის საზოგადოებრივი დარბაზის წევრები იყვნენ. დამსწრე აუდიტორიასთან ერთად ორგანიზაციის წარმომადგენლებმა განიხილეს მართებული ტერმინების მნიშვნელობა და შშმ პირთა მიმართ ქცევის წესები, აქცენტი გაკეთდა გაეროს 2006 წლის შშმ პირთა უფლებების შესახებ არსებულ კონვენციაზე. ორგანიზატორების მიზანია საზოგადოების ცნობიერების ამაღლება შეზღუდული შესაძლებლობის საკითხებთან მიმართებით და მათი გააქტიურება აღნიშნული თემის უფლებების დასაცავად.

აჭარა. 27 მაისს, „დემოკრატიის ინსტიტუტის" ოფისში, არასამთავრობო ორგანიზაციების წარმომადგენლები და ჟურნალისტები ახალ პროექტს - „პეტიცია - ხალხის ხმა თვითმმართველობაში" გაეცნენ. პრეზენტაციას „დემოკრატიის ინსტიტუტის" აღმასრულებელი დირექტორი, პროექტის კოორდინატორი არჩილ ხახუტაიშვილი უძღვებოდა. სამუშაო შეხვედრაზე მუნიციპალიტეტსა და დასახლებაში არსებულ პრობლემებზე მედიისა და არასამთავრობო სექტორის წარმომადგენლებმა ისაუბრეს. დაიგეგმა ასევე სამომავლო თანამშრომლობა. პროექტი ეხმარება მოქალაქეებს უშუალო მონაწილეობა მიიღონ თავიანთ მუნიციპალიტეტებსა და დასახლებაში არსებული პრობლემების გადაჭრის პროცესში. მოსახლეობასთან შეხვედრების შედეგად თითო მუნიციპალიტეტში ის სამი ძირითადი პრობლემა გამოვლინდება, რომელთა გადაჭრაც საკრებულოს კომპეტენციას მიეკუთვნება. შეხვედრებზე შეირჩევიან აქტიური მოქალაქეები, რომლებიც კონკრეტული პრობლემის მოგვარების მიზნით ხელმოწერებს შეაგროვებენ, შემდეგ კი თავად წარადგენენ პეტიციას საკრებულოში. პროექტის დახმარებით მოსახლეობა მიიღებს ცოდნას და გამოცდილებას იმის შესახებ, თუ როგორ შეუძლიათ მოაგვარონ ადგილობრივი პრობლემა პეტიციის მეთოდის გამოყენებით. პროექტის დასრულების შემდეგ კი უკვე დამოუკიდებლად შეძლებენ სხვადასხვა პრობლემის მოგვარების მიზნით პეტიციების წარდგენას და ადვოკატირებას. პროექტს „დემოკრატიის ინსტიტუტი" პარტნიორ ორგანიზაციებთან ერთად დასავლეთ საქართველოს 20 მუნიციპალიტეტში, აჭარაში, გურიასა და სამეგრელო-ზემო სვანეთში ახორციელებს. პროექტს ამერიკის შეერთებული შტატების საერთაშორისო განვითარების სააგენტო (USAID) აფინანსებს.

30 მაისს, 13:00 საათზე, ქუთაისის დემოკრატიული ჩართულობის ცენტრში სამოქალაქო საზოგადოების ინსტიტუტი (CSI) წარადგენს პროგრამის ფარგლებში შექმნილ წიგნს „სოციალური ცვლილების მართვა". წიგნი განკუთვნილია სამოქალაქო საზოგადოების განვითარებაში ჩართული აქტორებისთვის, მათთვის ვისაც სურს მდგრადი სოციალური ცვლილების განხორციელება. ღონისძიებაზე სამოქალაქო საზოგადოების ინსტიტუტი სტუმრებს დისტანციური სწავლების ახალ კურსებსაც გააცნობს. სრულად... წყარო: ორგანიზაციის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ამერიკის შეერთებული შტატების საარქივო ფონდებში დაცულ საიდუმლო დოკუმენტს. „დოკუმენტი წარმოადგენს საქართველოს დამოუკიდებლობის საწყის ეტაპზე შეერთებული შტატების შესაბამისი სამსახურების მიერ მომზადებულ ანალიტიკურ ცნობებს საქართველოში განვითარებულ მოვლენებზე. დოკუმენტის აღწერილობაში აღნიშნულია, რომ 1989 წლის 9 აპრილის სასტიკი დარბევის შემდეგ საქართველოში 1921 წელს დაკარგული დამოუკიდებლობის აღდგენის სურვილი ძლიერდება. დამოუკიდებლობის მსურველები ორ ნაწილად არიან გაყოფილნი - ისინი, ვინც მოსკოვთან მკაცრ და უხეშ მიდგომას ანიჭებენ უპირატესობას და სურთ დამოუკიდებლობის დაუყოვნებლივ მიღება, მეორე ნაწილი კი თანდათანობით, რაციონალურად მიზნის მიღწევის მომხრენი არიან," ნათქვამია ორგანიზიციის ვებ-გვერდზე. სრულად... წყარო: idfi.ge