„ეთნოსთაშორის თანამშრომლობისა და კონსულტაციების ანალიტიკური ცენტრის" წევრი, გიორგი მარჯანიშვილი, მონაწილეობას იღებს საერთაშორისო ვორქშოფში ბელგრადში. ღონისძიება არასამთავრობო ორგანიზაციათა ქსელმა, „სამოქალაქო სოლიდარობის პლატფორმამ" მოაწყო. მისი მიზანია წევრი ქვეყნების ეთნიკურ უმცირესობებში სამოქალაქო ცნობიერების ამაღლება. სრულად... წყარო: ორგანიზაციის ვებ-გვერდი სოციალურ ქსელში

თბილისი. 27 ნოემბერს ორგანიზაციის „ოჯახები დისრკიმინაციის წინააღმდეგ-FAD" ინიციატივითა და ორგანიზებით თბილისის მერიაში შეხვედრა გაიმართა. შეხვედრის მიზანს წარმოადგენდა საჯარო სკოლებში მასწავლებლების სუპერვიზია ABA მეთოდით. FAD-ის წევრებმა ისაუბრეს იმ გამოწვევებზე, რომელიც დღეს აქვთ ინტელექტუალური შეზღუდული შესაძლებლობის მქონე მოსწავლეებს სკოლებში. „ანა ბარქაიამ ისაუბრა, თუ რამდენად ეფექტურია ამ მეთოდის გამოყენება სკოლებში, რომლის შედეგადაც მასწავლებლები შეისწავლიან მოსწავლეებთან მუშაობის ტექნიკას, რაც ხელს შეუწყობს ინკლუზიური განათლების განვითარებას. პირველ ეტაპზე მომზადდება პროექტის ბიუჯეტი და გადაეგზავნება მერიას განსახილველად", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ბლოგპოსტს აქვეყნებს: „კაპიტალიზმის „მიღწევები" პოსტსაბჭოურ საქართველოში". „კაპიტალისტური განვითარება, ზემოთ დასახელებულ ორივე შემთხვევაში, წინააღმდეგობრივია, თუმცა, სუსტად განვითარებულ კაპიტალისტურ ქვეყნებში პირდაპირი სოციალური ზიანი უფრო მეტია, რადგან საქმე გვაქვს მძიმე სამუშაო პირობებთან, მასობრივ უმუშევრობასთან, სიკვდილიანობის ზრდასთან, სოციალურ დაუცველობასთან, პაუპერიზიაციასთან და სხვა. განვითარებულ, მომწიფებულ კაპიტალიზმში ფულადი კაპიტალის მიგრაცია პროდუქტიული სექტორიდან გაედინება ფინანსურ სექტორში (მოგების მეტი შესაძლებლობის გამო), რომელშიც აკუმულირდება ვალების და ფიქტიური კაპიტალის სახით, რომელიც, ადრე თუ გვიან, კრიზისს იწვევს და ეს კრიზისი კვლავ ბრუნდება რეალურ სექტორში. თუმცა, ამის განხილვა ჩვენი წერილის მიზანი არაა", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ვაზისუბანში იეჰოვას მოწმეთა მიმართ მომხდარ ინციდენტს. „იეჰოვას მოწმეთა მიმართ გამოვლენილი ძალადობის ფაქტების ანალიზი აჩვენებს, რომ ისინი ცალკეული პირების, ხშირ შემთხვევაში კი დომინანტი რელიგიური ჯგუფის წარმომადგენლების მხრიდან, რელიგიური შეუწყნარებლობის გამო, რელიგიური საქმიანობაში ხელის შეშლის, მუქარის, იძულების, ცემის, დევნისა და სხვადასხვა ფორმით ფიზიკური და ფსიქოლოგიური ძალადობის მსხვერპლები ხდებიან. მათ შორის გავრცელებულ პრაქტიკას წარმოადგენს მათი საკულტო ნაგებობების დაზიანება. აღნიშნულ შემთხვევებზე სახელმწიფოს არაეფექტური რეაგირების შედეგად კი, ხშირად, ძალადობის ფაქტები ერთი და იმავე პირებისგან/პირთა ჯგუფიდან მომდინარეობს", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ლიბერალიზმის სასწავლო ცენტრის ორგანიზებით ლევან ბუთხუზის საჯარო ლექცია „მეცნიერება და პოლიტიკური ჭიდილი" ჩატარდა. ლიბცენტრი გაძლევთ საშუალებას ნახოთ ლექციის ვიდეო ჩანაწერი. წყარო: ორგანიზაციის ვებ-გვერდი სოციალურ ქსელში

5 დეკემბერი მოხალისეთა საერთაშორისო დღეა. ერთად ვიზეიმოთ ეს დღე! დაინტერესებულ ადამიანებს საშუალება ექნებათ ერთი დღე გაატარონ სხვადასხვა საჭიროებების მქონე ადამიანებთან და მოხალისეობრივ საქმიანობაში ჩაერთონ. გვჯერა, რომ მოხალისეობის სურვილი დიდი იქნება, ამიტომ ეს აქტივობა ორ დღეს 4-5 დეკემბერს მოიცავს. ყველა დაინტერესებულ პირს, სურვილის შემთხვევაში გთხოვთ გაიაროთ რეგისტრაცია 3 დეკემბრამდე. რეგისტრაციის შემდეგ დეტალურ ინფორმაცის ჩვენი მოხალისეთა კოორდინატორები მოგაწვდიან ელექტრონულ მისამართებზე. სრულად... წყარო: ჰელფინგ ჰენდი (Helping Hand)

თბილისი. „ლიბერალიზმის სასწავლო ცენტრის" სტუდენტებმა ჩაატარეს გამოკითხვა: რას ფიქრობენ თბილისის მოქალაქეები „ისლამური სახელმწიფოს" მებრძოლების მიერ გავრცელებულ ვიდეოზე და რამდენად მაღალია, მათი აზრით, ტერორიზმის საფრთხე საქართველოში?" სრულად... წყარო: libcenter.ge

თბილისი. ინფორმაციის თავისუფლების განვითარების ინსტიტუტის(IDFI) განცხადების საფუძველზე კომუნიკაციის ეროვნულმა კომისიამ საქართველოში ORT-ს მაუწყებლობა აკრძალა. „შპს „რ.ბ.ჯ"-ს დაეკისრა 2500 ლარის ოდენობით ჯარიმა, რადგან კომპანიას მაუწყებლობის დაწყებამდე სამაუწყებლო პროდუქციის მართლზომიერი ფლობის შესახებ შესაბამისი ნებართვები და ლიცენზიები არ წარმოუდგენია. კომპანია ასევე, წერილობით გაფრთხილდა კომისიაში რეგულირების საფასურის გაანგარიშებების წარმოუდგენლობის და საკუთარ ვებგვერდზე შესაბამისობის დეკლარაციის გამოუქვეყნებლობის გამო", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. 25 ნოემბერს, ევრაზიის თანამშრომლობის ფონდმა გამართა კვლევის შედეგების პრეზენტაცია „ევროკავშირის მიმართ დამოკიდებულებისა და ცოდნის შეფასება საქართველოში: ცვლილებები და ტენდენციები 2009 – 2015 წლებში". კვლევა ჩატარდა შვედეთის საერთაშორისო განვითარებისა და თანამშრომლობის სააგენტოსა და საქართველოში ნიდერლანდების გაერთიანებული სამეფოს საელჩოს მხარდაჭერით და CRRC-საქართველომ ევრაზიის თანამშრომლობის ფონდის დაკვეთით 2009, 2011, 2013 და 2015 წლებში ჩაატარა. ჩატარებული გამოკითხვების საფუძველზე CRRC-საქართველომ მოამზადა ანგარიში, სადაც შეფასებულია ევროკავშირის მიმართ საზოგადოების ცოდნა და დამოკიდებულება. კვლევა... წყარო: crrc.ge

სამცხე-ჯავახეთი. 24 ნოემბერს, ბორჯომში, გაიმართა კონფერენცია „ინკლუზიური მიდგომით კატასტროფის რისკის შემცირების" თემატიკასთან დაკავშირებით. შეიქმნა სამუშაო ჯგუფები, რომლებმაც გამოხატეს საკუთარი შეხედულებები შემდეგ საკითხებზე: რა არის შშმ პირების წინაშე მდგარი ძირითადი გამოწვევები კატასტროფის რისკის შემცირების მიმართულებით, რა საქმიანობები ხორციელდება ამჟამად საქართველოში კატასტროფის რისკის შემცირების პროცესში შშმ პირთა ჩართვის მიმართულებით, რა არის ყველაზე მწვავე და გადაუდებელი საჭიროება, რომლის შესრულების გარეშეც ვერ მოხდება შშმ პირთა ჩართვა კატასტროფის რისკის შემცირების დაგეგმვასა და განხორციელებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. არასამთავრობო ორგანიზაციები საქართველოს პარლამენტს მიმართვას უგზავნიან მთავარი პროკურორის კანდიდატურის დამტკიცებასთან დაკავშირებით. „...მოვუწოდებთ საქართველოს პარლამენტის წევრებს, საქართველოს მთავარი პროკურორის თანამდებობაზე კანდიდატურის განხილვისას მხედველობაში მიიღონ მთელი რიგი ხარვეზები, რაც თან ახლდა კანდიდატურის ნომინირებისა და შერჩევის პროცესს და რის გამოც არაერთმა ჯგუფმა უარი თქვა ამ პროცესში მონაწილეობაზე. პარლამენტმა უნდა გაიაზროს ის პოლიტიკური პასუხისმგებლობა, რაც მათ მიერ მისაღებ გადაწყვეტილებას უკავშირდება. აგრეთვე, მნიშნელოვანია, პარლამენტმა ამ ფაქტით მიღებული გამოცდილების საფუძველზე დაგეგმოს და უზრუნველყოს პროკურატურის სისტემის რეალური რეფორმის გატარება და პროკურატურის სისტემის დამოუკიდებლობის უზრუნველსაყოფად საჭირო ნაბიჯების გადადგმა. ნებისმიერი რეფორმის წარმატებით განხორციელებისთვის აუცილებელია რეფორმის მიმართ საზოგადოების ფართო მხარდაჭერა და ნდობა, რაც მოცემულ შემთხვევაში სახეზე არ არის. პროკურატურის რეფორმის პროცესმა, როგორც საკანონმდებლო დონეზე არაეფექტურმა რეფორმამ, ისე რეფორმის პრაქტიკაში იმპლემენტაციისას დაშვებულმა ხარვეზებმა, მნიშვნელოვანი ჩრდილი მიაყენა რეფორმის წარმატებას და ამ პროცესის მიმართ საზოგადოების ნდობის გაჩენას", ნათქვამია ერთობლივ განცხადებაში. სრულად... წყარო: idfi.ge

ორგანიზაცია „საერთაშორისო გამჭვირვალობა - საქართველო” 24-26 ნოემბერს ქუთაისში, ზუგდიდსა და ბათუმში რეგიონული მედიისა და სამოქალაქო სექტორის წარმომადგენლებს გააცნობს ორგანიზაციის მიერ მომზადებულ მედია კვლევას - „ვის ეკუთვნის ქართული მედია." სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი აქვეყნებს ინტერვიუს საქართველოს მუსლიმთა უმაღლესი სასულიერო სამმართველოს ხელმძღვანელთან მირტაგ ასადოვთან. „როგორ და რა მიზნებით შეიქმნა სრულიად საქართველოს მუსლიმთა სამმართველო? რა როლი შეასრულა სახელმწიფომ მის შექმნაში და რამდენად გაითვალისწინა ხელისუფლებამ თავად მუსლიმთა ინტერესები? რატომ გაჩნდა ალტერნატიული ორგანიზაციის დაარსების აუცილებლობა? რატომ ეწინააღმდეგება მუსლიმთა ნაწილი შიიტებისა და სუნიტების ხელოვნურ გაერთიანებას სახელმწიფოს მხრიდან? როგორ აფასებენ რელიგიის საკითხთა სახელმწიფო სააგენტოს საქმიანობას და სახელმწიფოს მცდელობას, სხვადასხვა მექანიზმის გამოყენებით დააწესოს კონტროლი მუსლიმ თემზე?", ინტერვიუში მიტრაგ ასადოვი ამ საკითხებზე საუბრობს. სრულად... წყარო: emc.org.ge

თბილისი. 26 ნოემბერს, ფონდი „ღია საზოგადოება – საქართველო" მართავს კონსულტაციებს პროგრამების მიხედვით. დაინტერესებულ პირებს პროგრამების მენეჯერები უპასუხებენ. განრიგი პროგრამების მიხედვით... წყარო: osgf.ge

თბილისი. ჰაინრიჰ ბიოლის ფონდის სამხრეთ კავკასიის რეგიონული ბიუროს ინიციატივით, 20 ნოემბერს გაიმართა დისკუსია: „საქართველო–სომხეთის თანამშრომლობა საპირისპირო პოლიტიკური პროექტების მიჯნაზე". ძირითადი მომხსენებლები იყვნენ საზოგადოებრივი პოლიტიკის ინსტიტუტის თანადირექტორი გიორგი თარნახ–მოურავი და ერევნის სახელმწიფო უნივერსიტეტის ცივილიზაციისა და კულტურის კვლევის ცენტრის დირექტორი. ფონდმა აღნიშნული დისკუსიის ვიდეოჩანაწერი განათავსა ვებგვერდზე და ნებისმიერ დაინტერესებულ პირს მისი ნახვის საშუალება აქვს. დისკუსია... წყარო: ფონდის ვებგვერდი

თბილისი. 24 ნოემბერს თბილისში, საქართველოს პარლამენტში, საქართველოს მრავალპარტიული საპარლამენტო არჩევნების 25 წლის იუბილესადმი მიძღვნილი ფოტო-გამოფენა - „საპარლამენტო დემოკრატია საქართველოში" გაიხსნა. სადაც წარმოდგენილია დემოკრატიასთან, დამოუკიდებლობასა და პარლამენტარიზმთან დაკავშირებული, საქართველოს მუზეუმებსა და არქივებში დაცული ისტორიული დოკუმენტებისა და ფოტოების 300-მდე ექსპონატი. ფოტო-გამოფენა პარლამენტში დამთვალიერებლებისთვის 25 ოქტომბრიდან 8 დეკემბრამდე იფუნქციონირებს და ის საქართველოს პარლამენტის ტრადიციული საექსკურსიო ტურის ნაწილი გახდება. ფოტო-გამოფენის თანაორგანიზატორები და თანაავტორები არიან: საქართველოს ეროვნული არქივი, საქართველოს პარლამენტის ეროვნული ბიბლიოთეკა, საქართველოს პარლამენტთან არსებული ჰერალდიკის საბჭო, ქალთა საინფორმაციო ცენტრი და ცენტრალური საარჩევნო ადმინისტრაცია (ცესკო). წყარო: ქალთა საინფორმაციო ცენტრი

აჭარა. 19-24 ნოემბერს, ახალგაზრდა მეცნიერთა კავშირი „ინტელექტის" ორგანიზებით ხელვაჩაურისა და ქობულეთის მუნიციპალიტეტებში შეირჩა სამ-სამი საპილოტე თემი, რომლებშიც ჩამოყალიბდა საინიციატივო ჯგუფები. თითოეულ თემში ჩატარდა დასახლების საერთო კრება, სადაც ადგილობრივმა მოსახლეობამ სოფლის პრობლემებზე ისაუბრა და მათი რანჟირება მოახდინა. აღნიშნული აქტივობები ხორციელდება პროექტის „თემები დემოკრატიული ცვლილებებისათვის" ფარგლებში, რომლის ფინანსური მხარდამჭერია NDI.

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს მის შუალედურ ანგარიშს „ციფრულ მაუწყებლობაზე გადასვლის მხარდაჭერა და მონიტორინგი საქართველოში" პროექტის განხორციელებასთან დაკავშირებით. აღნიშნულ პროექტს IDFI ახორციელებს ფონდი „ღია საზოგადოება საქართველოს" დაფინანსებით და მხარდაჭერით. ორგანიზაციის შუალედური ანგარიში მოიცავს შემდეგ მიმართულებებს: მომხმარებლის მხარეს არსებული მდგომარეობა - მიღწევები და გამოწვევები, სახელმწიფოს სუბსიდირებული და არასუბსიდირებული მომხმარებლებთან დაკავშირებული ინფორმაცია, საინფორმაციო კამპანიის და ციფრული საეთერო ქსელის მდგომარეობა, არაქართულენოვანი არხების და ქსელის მდგრადობის პრობლემები. სრულად... წყარო: idfi.ge

აჭარა. 20 ნოემბერს, ბავშვთა მიმართ ძალადობის წინააღმდეგ ბრძოლის საერთაშორისო დღესთან დაკავშირებით ბათუმის ახალგაზრდული ცენტრის ორგანიზებით გაიმართა ფილმის ჩვენება და დისკუსია ბულინგის თემაზე. დისკუსიას ესწრებოდნენ მოსწავლეები, აგრეთვე ბათუმის სახელმწიფო უნივერსიტეტისა და საზღვაო აკადემიის სტუდენტები. აქტივობა გაიმართა „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის" ფარგლებში, რომელსაც ახორციელებს საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს (USAID) ფინანსური მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

თბილისი. 18 ნოემბერს, გაეროს ბავშვთა ფონდში გაიმართა შეხვედრა, რომლზეც განხილულ იყო კანონპროექტი ადრეული და სკოლამდელი აღზრდისა და განათლების შესახებ. შეხვედრას ესწრებოდნენ PHR-ის წარმოამდგენლები. მათ ყურადღება გაამახვილეს ისეთ პრობლემებზე, როგორიცაა ბაღებში ბავშვების რაოდენობის განსაზღვრა, შეზღუდული შესაძლებლობის მქონე ბავშვებისთვის, საჭიროების შემთხვევაში, პირადი ასისტენტის დანიშვნა, იმ ბავშვების კვების უზრუნველყოფა, რომლებიც იმყოფებიან სპეციალურ კვებაზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ახალგაზრდა ადვოკატები მთავრობის სხდომაზე გაჟღერებულ ინფორმაციას ეხმაურებიან. ამ ინფორმაციის თანახმად, ყოფილი მმართველი პარტიის წევრები, ევროკავშირისგან მოითხოვენ, საქართველომ არ მიიღოს ევროკავშირის ქვეყნებში უვიზო-მიმოსვლის უფლება. „საქართველოს მთავრობის სხდომაზე გავრცელებული ინფორმაცია პარლამენტის ყოფილი თავმჯდომარის, საპარლამენტო უმცირესობის ლიდერ დავით ბაქრაძისა და „ერთიანი ნაციონალური მოძრაობის" წევრის, პარლამენტის ევროპასთან ინტეგრაციის კომიტეტის თავმჯდომარის მოადგილის, გიორგი კანდელაკის მოქმედებების შესახებ უაღრესად შემაშფოთებელია, რაც არ ემსახურება საქართველოს ეროვნულ ინტერესებს და წარმოადგენს ძირგამომთხრელ საქმიანობას", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის ეხმიანება იუსტიციის უმაღლესი საბჭოს მიერ თბილისის სააპელაციო სასამართლოში მოსამართლეთა დანიშვნას. „უარყოფითად ვაფასებთ საქართველოს იუსტიციის უმაღლესი საბჭოს მიერ 2015 წლის 16 ნოემბრის სხდომაზე მიღებულ გადაწყვეტილებას თბილისის სააპელაციო სასამართლოში შვიდი მოსამართლის კონკურსის გარეშე დანიშვნის შესახებ. მიგვაჩნია, რომ აღნიშნული პროცესი არა თუ არ ამაღლებს საზოგადოების ნდობას სასამართლო სისტემის მიმართ, პირიქით - კიდევ ერთხელ კითხვის ნიშნის ქვეშ აყენებს როგორც საბჭოს მოქმედების მიზნებსა და მოტივებს, ასევე ზოგადად სასამართლო სისტემაში მიმდინარე რეფორმების წარმატებას", ნათქვამია კოალიციის განცხადებაში. სრულად... წყარო: idfi.ge