2021 წლის 11 ნოემბერს, სოციალური მეწარმეობის საერთაშორისო დღეს, ონლაინ ფორმატში გაიმართა მულტიაქტორული შეხვედრა „სოციალური მეწარმეობის საარსებო გარემო საქართველოში - არსებული მდგომარეობა და პერსპექტივები“...  შეხვედრა ორგანიზებული იყო სამოქალაქო საზოგადოების ინსტიტუტის (CSI) მიერ, პარტნიორ ორგანიზაციებთან და საქართველოს პარლამენტის საგარეო ურთიერთობათა კომიტეტის თავმჯდომარის მოადგილე, მარიამ ლაშხთან თანამშრომლობით. ღონისძიების ძირითადი მიზანი იყო სოციალური მეწარმეობის ხელსაყრელი საარსებო გარემოს ხელშეწყობისთვის, სფეროს აქტორებს შორის თანამშრომლობის პლატფორმის ჩამოყალიბება. ამ საკითხებზე მსჯელობისთვის შეხვედრაზე საჯარო, სამოქალაქო და კერძო სექტორების 50-მდე წარმომადგენელი იყო მიწვეული. სრულად... პროექტს „სოციალური მეწარმეობის განვითარება მდგრადი და ინკლუზიური საზოგადოებისთვის“ ახორციელებს საქართველოს სტრატეგიული კვლევებისა და განვითარების ცენტრი (CSRDG) ევროკავშირისა და „პური მსოფლიოსთვის“ მხარდაჭერით. პროექტის პარტნიორები არიან: სოციალურ საწარმოთა ალიანსი (SEA), სამოქალაქო საზოგადოების ინსტიტუტი (CSI), საქართველოს სამოქალაქო განვითარების ასოციაცია (GCDA), საქართველოს დემოკრატიული განვითარების კავშირი (DDUG), ევროპული ვენჩურული ფილანტროპიის ასოციაცია (EVPA) და სსიპ ახალგაზრდობის სააგენტო.

თბილისი. ორგანიზაციია „საფარი“ ინფორმაციით, ხანუმ ჯეირანოვას საქმის შესახებ გაეროს ქალთა კომიტეტმა გადაწყვეტილება გამოაქვეყნა. ჯეირანოვას ნათესავები ქმრის ღალატში ადანაშაულებდნენ. 2014 წლის 16 სექტემბერს მას თავს დაესხა ქმრის სამი ნათესავი, რომლებმაც იგი მთელ სოფელში ათრიეს და სასტიკად სცემეს. ქალს ოჯახის წევრებიც აიძულებდნენ ვირთხის საწამლავით მოეკლა თავი. დედამ ჯეირანოვა მეორე დღეს, ფარდულში გარდაცვლილი იპოვა: ცხედარი თოკზე ეკიდა. მოლებმა, რომლებმაც ქალის ცხედარი მოამზადეს აღნიშნეს, რომ ტანისამოსი სისხლით იყო გაჟღენთილი, მოწმის ჩვენებით, ის „სიკვდილამდე ნაცემი“ იყო. „გაეროს ქალთა უფლებების კომიტეტმა დაადგინა, რომ საქართველომ ვერ უზრუნველყო გამოძიება და სამართლებრივი დევნა ქალის მიმართ გენდერული ნიშნით და ღირსების სახელით ჩადენილ ძალადობასთან დაკავშირებით, რომელიც სასტიკად სცემეს ოჯახის წევრებმა მცირეწლოვანი შვილების თვალწინ, რამაც მისი სიკვდილი გამოიწვია. კანონდარღვევის შესახებ დღეს გამოქვეყნებულ მოსაზრებებში, ქალთა დისკრიმინაციის აღმოფხვრის კომიტეტი (CEDAW) გამოხატავს წუხილს იმ ფაქტის გამო, რომ საქართველოს ხელისუფლებამ ვერ უზრუნველყო მსხვერპლი ხანუმ ჯეირანოვას ოჯახის წევრების დაკავება და პასუხისგებაში მიცემა, რომლებმაც იგი უგონო მდგომარეობამდე სცემეს და ასევე მისი ნათესავებთან დაბრუნების გადაწყვეტილების გამო, რის შემდეგაც ქალი გარდაცვლილი იპოვეს“. კომიტეტმა სახელმწიფოს დამოუკიდებელი გამოძიების დაწყება და დამნაშავეთა დასჯა დაავალა. სრულად... წყარო: sapari.ge

თბილისი. მაკ ჯორჯია გირჩევთ თვალი ადევნოთ ბავშვთა განვითარების სტანდარტს, რათა დარწმუნდეთ, რომ თქვენი ბავშვი ასაკის შესაბამისად ვითარდება. „ყველა ბავშვს განვითარების ინდივიდუალური ტემპი აქვს, თუკი ბავშვის განვითარება ზუსტად არ მიყვება დადგენილ სტანდარტს არ ნიშნავს რომ მას განვითარების დარღვევა აქვს. დაელოდეთ, ხელი შეუწყვეთ განვითარებაში და საჭიროების შემთხვევაში მიმართეთ სპეციალისტს“. სრულად... წყარო: ორგანიზაციის გვერდი სოციალურ ქსელში

თბილისი. ამერიკის შეერთებული შტატების საერთაშორისო განვითარების სააგენტო და გაეროს ბავშვთა ფონდი აახლებენ პარტნიორობას, რომელიც მიმართულია COVID-19-ის პანდემიის საპასუხო ქმედებებში საქართველოს მთავრობის დასახმარებლად. „ახალი ერთწლიანი პროგრამა არის გაგრძელება ამ ორი ორგანიზაციის ნაყოფიერი პარტნიორობისა, რომლის ფარგლებშიც 2020 წლის განმავლობაში 1.9 მილიონზე მეტ ადამიანს მივწვდით“. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ აქვეყნებს საერთაშორისო სამართლის ექსპერტის, ნანა მჭედლიძის ბლოგპოსტს იმის შესახებ თუ რას ამბობს ევროსასამართლო სააკაშვილის საქმეზე 10 ნოემბერს გამოტანილი დროებითი ღონისძიების განჩინებაში. „ამ ეტაპზე, საქართველოს ხელისუფლებას მოეთხოვა, რომ მიაწოდოს ევროპულ სასამართლოს ინფორმაცია „განმცხადებლის ამჟამინდელ ჯანმრთელობის მდგომარეობაზე (აგრეთვე ციხის საავადმყოფოში გაწეული სამედიცინო მკურნალობის შესახებ)“. აგრეთვე, სახელმწიფოს მოეთხოვა, რომ უზრუნველყოს ზოგადად განმცხადებლის უსაფრთხოება და მისთვის შიმშილობის შემდგომი შესატყვისი სამედიცინო მკურნალობა“. სრულად... წყარო: rights.ge

12 ნოემბერს, 17:00 საათზე, ადვოკატები ანა არაგანაშვილი და ანა აბაშიძე ისაუბრებენ თემაზე: შშმ პირთა რეპროდუქციული ჯანმრთელობა და რეპროდუქციული უფლებები. სრულად...

12 ნოემბერს, 16:00 საათზე, საქართველოს სტრატეგიის და განვითარების ცენტრი - GCSD გთავაზობთ საქართველოს კიბერუსაფრთხოების ახალი სტრატეგიის განხილვას. სრულად...

12 ნოემბერს, 10:00 საათზე, საქართველოში ევროკავშირის ელჩი კარლ ჰარცელი კახეთში, სოფელ იყალთოში, ენერგოეფექტურ საბავშვო ბაღს გახსნის და მედიისთვის განცხადებას გააკეთებს. მისამართი: სოფელი იყალთო, თელავის მუნიციპალიტეტი

თბილისი. სამოქალაქო საზოგადოების ორგანიზაციების ნაწილი ეხმაურება მიმდინარე წლის 10 ნოემბერს თბილისში გამართული აქციების მონაწილეების დაკავების ფაქტებს და მიიჩნევს, რომ სამართალდამცავი ორგანოების მიერ გამოყენებული მასობრივი დაკავების პრაქტიკა არღვევს მშვიდობიანი შეკრებისა და გამოხატვის უფლებებს. აგრეთვე, პრობლემურია დაკავებული პირების ხანგრძლივი ვადით დაყოვნება პოლიციის ავტომობილებში, მათი დაკავების იზოლატორებში დაგვიანებით გადაყვანა და ამ პროცესში დაკავებულების ადვოკატთან წვდომის შეზღუდვა. სრულად... წყარო: gyla.ge

თბილისი. 10 ნოემბერს, ინფორმაციის თავისუფლების განვითარების ინსტიტუტმა (IDFI) და საქართველოს ახალგაზრდა იურისტთა ასოციაციამ (GYLA), ევროკავშირის მხარდაჭერით, კვლევის „საჯარო მმართველობის საუკეთესო ევროპული პრაქტიკა და საქართველო“ პრეზენტაცია გამართა. „კვლევა ფარავს პოლიტიკის დაგეგმვისა და კოორდინაციის, ანგარიშვალდებულების, სახელმწიფო სერვისების მიწოდებისა და საჯარო ფინანსების მართვის მიმართულებებს. კვლევის მიზანი იყო აღნიშნული მიმართულებებით წარმატებული ევროპული ქვეყნების მოდელების შესწავლა და მათი საჯარო მმართველობის სისტემების ანალიზის საფუძველზე რეკომენდაციების შემუშავება საქართველოს საჯარო მმართველობის რეფორმის ეფექტიანად განხორციელების ხელშეწყობის მიზნით“. სრულად... წყარო: idfi.ge

თბილისი. 9 ნოემბერს, „საქართველოს ახალგაზრდა იურისტთა ასოციაციამ“ ონლაინ პანელური დისკუსია გამართა: „2021 წლის ადგილობრივი თვითმმართველობის არჩევნების გავლენა საქართველო-ევროკავშირის ურთიერთობაზე“. სრულად... წყარო: gyla.ge

თბილისი. სოციალური სამართლიანობის ცენტრი წარმოგიდგენთ სტატიას, რომლის მიზანია, მიმოიხილოს ჩრდილოვანი ეკონომიკის ფორმალიზების პროცესი და მასთან დაკავშირებული შეზღუდვები, ჩრდილოვანი ეკონომიკის მიდგომები და აგრეთვე ის გამოწვევები, რომელთა წინაშეც ჩრდილოვანი ეკონომიკის მაღალი მაჩვენებლების მქონე განვითარებადი ქვეყნები დგანან. სრულად... წყარო: socialjustice.org.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

თბილისი. მაკ ჯორჯია გაცნობებთ, რომ პროექტი „მესტუმრე“ ოფიციალურად დაიწყო. „„მესტუმრე” მიზნად ისახავს მოხუცთა თავშესაფარში მცხოვრები მოხუცებულებისა და მოხალისეების დაკავშირებას. 6 თვის განმავლობაში კვირაში ერთი დღე, ჩვენი მოხალისეები ესტუმრებიან მოხუცებულებს“. სრულად... წყარო: ორგანიზაციის გვერდი სოციალურ ქსელში

თბილისი. ომბუდსმენმა 10 ნოემბერს დაკავებული 46 პირიდან 23 მათგანი მოინახულა. „დაკავებულები მიუთითებენ დაკავების უსაფუძვლობაზე, თუმცა არაფერი უთქვამთ პოლიციის მხრიდან ფიზიკური ძალადობის/ძალის გადამეტების ფაქტებზე. დაკავებულთაგან მხოლოდ ერთ პირს ჰქონდა გარკვეული დაზიანებები, რის შესახებაც უკვე ინფორმირებულია სახელმწიფო ინსპექტორის სამსახური. ომბუდსმენი მოუწოდებს შინაგან საქმეთა სამინისტროს, დაუყოვნებლივ მიაწოდოს ინფორმაცია თითოეული პირის ოჯახის წევრსა თუ ადვოკატს დაკავებულების ადგილსამყოფელის შესახებ და მისცეს ადვოკატებს დაცვის ქვეშ მყოფ პირებთან შეუფერხებელი შეხვედრის შესაძლებლობა“. სრულად... წყარო: ომბუდსმენის გვერდი სოციალურ ქსელში

11 ნოემბერს, 18:00 საათზე - მშობლებისთვის მოწვეულ სპეციალისტთან შეხვედრა გაიმართება თემაზე: „ბაზისური აკადემიური უნარების განვითარების ხელშეწყობა ბუნებრივ პირობებში“. სრულად...

11-12 ნოემბერს, სოციალური სამართლიანობის ცენტრი მართავს რიგით მესამე ქვიარ ფორუმს. წელს ქვიარ ფორუმის მთავარი თემაა - „კრიზისი, პოსტ-კრიზისი და ქვიარ ემანსიპაციის პერსპექტივები საქართველოში“. სრულად...

11 ნოემბერს, 12:30 საათზე, ევროკავშირის ელჩი საქართველოში კარლ ჰარცელი ყვარლის ევროკლუბში, კლუბის დაარსებიდან ორი წლის აღსანიშნავ ღონისძიებას დაესწრება და მედიისთვის განცხადებას გააკეთებს. მისამართი: ყვარელი, ილია ჭავჭავაძის #49

11 ნოემბერს, 11:00 საათზე, სოციალური მეწარმეობის საერთაშორისო დღეს, სამოქალაქო საზოგადოების ინსტიტუტის (CSI) ორგანიზებით გაიმართება მულტიაქტორული შეხვედრა „სოციალური მეწარმეობის საარსებო გარემო საქართველოში - არსებული მდგომარეობა და პერსპექტივები“. ღონისძიება იმართება პროექტის - „სოციალური მეწარმეობის განვითარება მდგრადი და ინკლუზიური საზოგადოებისთვის“ ფარგლებში, რომელსაც ახორციელებს საქართველოს სტრატეგიული კვლევებისა და განვითარების ცენტრი (CSRDG) ევროკავშირისა და „პური მსოფლიოსთვის“ მხარდაჭერით. პროექტის პარტნიორები არიან: სოციალურ საწარმოთა ალიანსი • Social Enterprise Alliance Georgia, სამოქალაქო საზოგადოების ინსტიტუტი (CSI), საქართველოს სამოქალაქო განვითარების ასოციაცია (GCDA), სამოქალაქო დემოკრატიული განვითარების კავშირი (DDUG), ევროპული ვენჩურული ფილანტროპიის ასოციაცია (EVPA) და სსიპ ახალგაზრდობის სააგენტო.

თბილისი. საერთაშორისო გამჭვირვალობა - საქართველო და სამართლიანი არჩევნები მოუწოდებს პროკურატურას, გამოიძიონ სხვადასხვა მედია საშუალებების მიერ მომზადებული, მტკიცებულებებით გამყარებული რეპორტაჟები, რომლებიც ამხელენ პოლიტიკური და საარჩევნო კორუფციის ყოვლისმომცველ სისტემას. „რეპორტაჟებში მოთხრობილია საჯარო სკოლების დირექტორების პოლიტიკური ნიშნით შრომითი ურთიერთობების დასრულების ან გაგრძელების, ასევე, საარჩევნოდ ხმების სანაცვლოდ კონკრეტული პირებისთვის პირობითი მსჯავრის მოხსნის, საგადასახადო დავალიანების ჩამოწერისა და სხვა სარგებლის მიცემის სავარაუდო ფაქტების შესახებ”. ორგანიზაცია სთხოვს ყველა მედიასაშუალებას, მიაწოდონ აღნიშნული მასალები, რომ სრულყოფილად გაანალიზდეს რეპორტაჟებში აღწერილი სავარაუდო დანაშაულებები. სრულად... წყარო: transparency.ge

თბილისი. პარტნიორობა ადამიანის უფლებებისთვის (PHR) ინფორმაციით, პროკურატურა სასამართლოს გადაწყვეტილებას არ ასრულებს. საქმე ეხება 12 წლის ბავშვის ისტორიას, რომელმაც 2021 წლის მაისში ხილი უნებართვოდ დაკრიფა, ხილის მეპატრონეებმა კი ბავშვი დაამცირეს და მასზე იძალადეს. „2021 წლის 15 ოქტომბერს გორის რაიონულმა სასამართლომ პროკურატურას დარღვევა დაუდგინა და 12 წლის ბავშვის დაზარალებულად ცნობა დაავალა: ერთი პირის მხრიდან დამამცირებელი მოპყრობის, ხოლო მეორე პირის მხრიდან ძალადობის მუხლით. მიუხედავად იმისა, რომ აღნიშნული გადაწყვეტილების დაუყოვნებელი აღსრულების მოთხოვნით PHR-მა უკვე სამჯერ მიმართა გორის რაიონულ პროკურატურას, ხოლო 2021 წლის 27 ოქტომბერს გადაწყვეტილების შესრულების მოთხოვნით პროკურატურას დამატებით სასამართლომაც მიმართა, გორის რაიონული პროკურატურა დღემდე არ უზრუნველყოფს სასამართლოს გადაწყვეტილების შესრულებას, რითაც არღვევს ეროვნულ და საერთაშორისო კანონმდებლობას და ზიანს აყენებს ბავშვის ინტერესებს“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. ორგანიზაცია „საფარის“ ინფორმაციით, გამომცემლობები: „დიოგენე“, „სულაკაურის გამომცემლობა“, „კლიო“, „სედი“, „წყაროსთვალი“, „ინტელექტი“, „სწავლანი“ და მაღაზია „ინგლისური წიგნი საქართველოში“ გაერთიანდნენ საქართველოს საპატრიარქოს ჯავახეთის ქ. ნინოწმინდის წმიდა ნინოს ობოლ, უპატრონო და მზრუნველობამოკლებულ ბავშვთა სახლის დასახმარებლად და პანსიონატის ბენეფიციარებს უსასყიდლოდ გადასცეს მათთვის საჭირო სასკოლო წიგნები.  „მარტვილის პანსიონში არსებულ სკოლაში ოთხი მოსწავლეა, რომელთაც არ ჰქონდათ სახელმძღვანელოები სასწავლო პროცესში სრულყოფილად ჩასართავად. ვინაიდან, პანსიონი არ შედის განათლების სამინისტროს საჯარო სკოლების შემადგენლობაში, პანსიონში არსებული სკოლა მოსწავლეებს ვერ უზრუნველყოფს შესაბამისი სასკოლო სახელმძღვანელოებით, ხოლო ოჯახებს არ აქვთ საკმარისი სახსრები მათ შესაძენად“. სრულად... წყარო: sapari.ge