სამეგრელო. საერთაშორისო გამჭვირვალობა - საქართველოს ცნობით, ზუგდიდელები უკრაინის ქალაქ პოკროვსკის დასახმარებლად ერთიანდებიან. პოკროვსკი ზუგდიდთან დამეგობრებული ქალაქია, იგი დონეცკის ოლქში მდებარეობს და ომის დაწყებიდან დღემდე არაერთხელ გახდა რუსული აგრესიის მსხვერპლი. ქალაქისთვის მიყენებული ზარალი მნიშვნელოვნად დიდია, ზუგდიდელების მიზანი კი დაძმობილებული ქალაქისთვის დახმარების ხელის გაწვდენაა. ამ მიზნით, სამოქალაქო საზოგადოების წარმომადგენლებმა უკვე ჩამოაყალიბეს სამოქალაქო სოლიდარობის ფონდი და ჰქონდათ კომუნიკაცია უკრაინულ მხარესთან - ქალაქ პოკროვსკის ადმინისტრაციასთან. დღეიდან დაიწყო თანხის შეგროვებას, რომელიც საბოლოოდ ქალაქ პოკროვსკის შესაბამის ფონდს გადაეცემა. დახმარების მსურველებმა შეგიძლიათ თანხა გადმორიცხოთ მითითებულ ანგარიშზე: თიბისი ბანკი:  GEL GE39TB7290236080100014 USD GE89TB7290236180100003 EU GE62TB7290236180100004 სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „საფარის“ ინფორმაციით, მცხეთის რაიონულმა სასამართლომ ე.წ. ავტოსტოპის საქმეზე გამამტყუნებელი განაჩენი გამოიტანა და ტრაილერის მძღოლს 5 000-ლარიანი ჯარიმა დააკისრა. დაზარალებული ქალის ინტერესებს „საფარის” იურისტი, თამარ ლუკავა იცავს. ავტოსტოპით გურიიდან თბილისისკენ მიმავალ ქალს ტრაილერის მძღოლმა გაუჩერა და მგზავრობა შესთავაზა. გარკვეული ხნის შემდეგ, მძღოლმა ქალთან სექსუალური ხასიათის, შეურაცხმყოფელი საუბრები დაიწყო. ქალი ცდილობდა, თავის დასაღწევად მოძრავი ტრაილერის კარიც კი გაეღო, თუმცა მძღოლმა კარიც ჩაკეტა. საბოლოოდ, ქალმა მეგობრის დახმარებით პოლიცია გამოიძახა, ეკიპაჟმა კი დასაკითხად გადაიყვანა. „სამი საათის განმავლობაში ვიყავით მოსაცდელში და ველოდებოდი პროკურორს ისე, რომ არავინ ყურადღებას არ მაქცევდა. გარდა ამისა, მოდიოდნენ და მეუბნებოდნენ, რომ მომეჩვენა და ბიჭს ციხისთვის ტყუილად ვიმეტებდი. შეურაცხმყოფელად, დამამცირებლად, ძაან ცუდად მელაპარაკებოდნენ. როგორც კი ჩემმა მეგობარმა ახსენა „საფარი“, იმ წამსვე შემიყვანე თბილ ოთახში, დამსვეს, მომიტანეს წყალი, მაშინვე შეცვალეს დამოკიდებულება. „საფარის“ იურისტის სახელის ხსენების შემდეგ ისე მექცეოდნენ, როგორც მართლა უნდა მოექცე მსხვერპლს“, აღნიშნავს დაზარალებული ქალი. სრულად... წყარო: sapari.ge

თბილისი. 6 თებერვალს, ევროკავშირის მხარდაჭერით, გაეროს ბავშვთა ფონდისა და ორგანიზაცია პრევენცია პროგრესისთვის/Prevention For Progress პარტნიორობით გაიმართა მულტიდისციპლინური შეხვედრა სისხლის სამართლის პასუხისმგებლობის ასაკს მიუღწეველ (14 წლამდე) და „რთული ქცევის“ ბავშვებთან დაკავშირებულ საკითხებზე. შეხვედრაზე განიხილეს უწყებათაშორისი მუშაობის სპეციფიკა, პრაქტიკა და გამოწვევები. სრულად... წყარო: ორგანიზაციის გვერდი სოციალურ ქსელში

კახეთი. „უფლებები საქართველოსა“ და „ლელიანის ზრდასრულთა განათლების ცენტრის“ ორგანიზებით, ლაგოდეხის მუნიციპალიტეტში მცხოვრებმა ახალგაზრდებმა აზერბაიჯანულენოვან სოფელ კაბალის ბაზარში საინფორმაციო შეხვედრა გამართეს.  შეხვედრა მიზნად ისახავდა ადგილობრივი მოსახლეობის ინფორმირებას თვითმმართველობის განხორციელებაში მოქალაქეთა ჩართულობის შესახებ. გასვლითი შეხვედრის ფარგლებში, „უფლებები საქართველოს“ წარმომადგენლებმა ადგილობრივებს უფასო სამართლებრივი დახმარებით სარგებლობის პირობები გააცნეს და მსურველებს ადგილზე შესთავაზეს სხვადასხვა საკითხზე სამართლებრივი კონსულტაცია. გასვლითი ვიზიტი ჩატარდა ომისა და მშვიდობის გაშუქების ინსტიტუტის (IWPR) პროექტის ფარგლებში, რომელიც გაერთიანებული სამეფოს მთავრობის მხარდაჭერით ხორციელდება. სრულად... წყარო: ორგანიზაციის გვერდი სოციალურ ქსელში

თბილისი. ევროკავშირი და გაეროს განვითარების პროგრამა საქართველოს პარლამენტის ინსტიტუციურ მხარდაჭერას განაგრძობენ.  „4 თებერვალს გამართულ სამუშაო შეხვედრაზე, პარლამენტის აპარატის თანამშრომლებმა ინსტიტუციური პოლიტიკის დაგეგმვის, მონიტორინგისა და ანგარიშგების ერთიანი მეთოდოლოგია განიხილეს. თეორიული და პრაქტიკული სწავლების შედეგად, პარლამენტის თანამშრომლები უკეთ შეძლებენ ინსტიტუციური პოლიტიკის სრული ციკლის მართვას: კონკრეტული სექტორის ანალიზს, პოლიტიკის სტრატეგიული მიმართულებების განსაზღვრას, სამოქმედო გეგმის  დასახვას, მისი განხორციელების პროცესში დაინტერესებული მხარეების ჩართვას და, საბოლოოდ, მიღწეული შედეგების ეფექტიან კომუნიკაციას საზოგადოებასთან“. სრულად... წყარო: ორგანიზაციის გვერდი სოციალურ ქსელში ფოტო: ვლადიმირ ვალიშვილი

თბილისი. კოალიციამ დამოუკიდებელი და გამჭვირვალე მართლმსაჯულებისთვის მოამზადა ბროშურა, რომლის მიზანია მოკლედ პასუხი გასცეს საზოგადოებისთვის მნიშვნელოვან კითხვებს. რატომ არის სასამართლო მნიშვნელოვანი ჩვენთვის? როგორ იცავს ის ჩვენს უფლებებს და კანონის უზენაესობას? როგორი უნდა იყოს სასამართლო და მოსამართლე, რომელიც ჩვენს უფლებებს ეფექტურად დაიცავს? სრულად... წყარო: კოალიციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ცნობით, არსებობს მცდარი წინასწარი განწყობა და სტერეოტიპული შეხედულებები იმის შესახებ, რომ შშმ პირებზე განხორციელებული ძალადობა მათი ფანტაზიის ნაყოფია, რომ მათ არ შეუძლიათ ფაქტების სწორად აღქმა, ინფორმაციის დამახსოვრება-გადმოცემა... ამ სტერეოტიპებს სტატისტიკა და მეცნიერება არ ადასტურებს. „მიუხედავად იმისა, რომ სახელმწიფოს კანონმდებლობით ევალება ამ მცდარი სტერეოტიპების აღმოფხვრა და შშმ პირთათვის მართლმსაჯულების უფლებით დაუბრკოლებლად სარგებლობის უზრუნველყოფა, სისხლის სამართლის საპროცესო კოდექსში თავად გვთავაზობს დისკრიმინაციულ კანონის ნორმას. საქართველოს სისხლის სამართლის საპროცესო კოდექსის 50-ე მუხლის თანახმად: „არ შეიძლება გამოიკითხოს ან მოწმედ დაიკითხოს შეზღუდული შესაძლებლობის მქონე ის პირი, რომელსაც შესაძლებლობის შეზღუდვის გამო არ შეუძლია სწორად აღიქვას, დაიმახსოვროს და აღიდგინოს საქმისათვის მნიშვნელობის მქონე გარემოებები და მიაწოდოს ინფორმაცია ან მისცეს ჩვენება““. ორგანიზაცია იცავს შეზღუდული შესაძლებლობის მქონე დებს, ეკას და მაკას (სახელები შეცვლილია), რომლებიც ნათესავის მხრიდან სექსუალური ძალადობის მსხვერპლნი გახდნენ. წაიკითხეთ დების გამოცდილების შესახებ, რომლებსაც ფსიქოლოგიურ-ფსიქიატრიული ექსპერტიზა ჩაუტარდათ და სამწუხაროდ, დასკვნის თანახმად, ვერ გაირკვა გოგონებმა სექსუალური ძალადობის შედეგად განიცადეს თუ არა ტკივილი, აღიქვეს და გადმოსცეს თუ არა ფაქტები სწორად... წყარო: phr.ge

თბილისი. ინფორმაციის თავისუფლების განვითარების ინსტიტუტის (IDFI) ცნობით, 1-3 თებერვალს, სახელმწიფო ბიუჯეტის გენდერული ინდექსის შესამუშავებლად, ჯანდაცვის და ფინანსთა სამინისტროებთან, გენდერული თანასწორობის მუდმივმოქმედი საპარლამენტო საბჭოსთან, სახალხო დამცველის აპარატთან და პარლამენტის საბიუჯეტო ოფისთან ერთად სამუშაო შეხვედრების სერია ჩატარდა. ინდექსი ყოველწლიურად შეაფასებს რამდენად ხდება საბიუჯეტო პოლიტიკის დაგეგმვის დროს ქალებისა და კაცების საჭიროებების გათვალისწინება. სრულად... წყარო: idfi.ge

კახეთი. გრძელდება კონკურსის „ეს ქვეყანა შენიას“ გამარჯვებულთა დაჯილდოება.   დღეს, თელავში, კონკურსში გამარჯვებული, სოფელ რუისპირის საინიციატივო ჯგუფის წევრები - ნაზი ღარიბაშვილი, მარიამ ღარიბაშვილი, მერი მოსახლიშვილი დააჯილდოვეს. ასევე, სპეციალური პრიზი გადაეცა აქტივისტს თამთა მელაშვილს. კონკურსი გაიმართა სამოქალაქო საზოგადოების ინსტიტუტის მიერ, პროექტის „სამოქალაქო საზოგადოების ინიციატივის“ ფარგლებში, რომლის მხარდამჭერია ევროკავშირი და კონრად ადენაუერის ფონდი.

რეგიონები. საქართველოს სტრატეგიული კვლევებისა და განვითარების ცენტრის (CSRDG) ინიციატივით, რეგიონალურ უნივერსიტეტებში სოციალურ მეწარმეობაზე სასწავლო კურსები ინერგება.  შოთა მესხიას ზუგდიდის სახელმწიფო სასწავლო უნივერსიტეტი პირველი რეგიონალური უნივერსიტეტია, სადაც სტუდენტებს ექნებათ შესაძლებლობა, 2023 წლიდან აირჩიონ კურსი „სოციალური მეწარმეობა: თეორია და პრაქტიკა“. სრულად... წყარო: www.segeorgia.org

სოციალური სამართლიანობის ცენტრი გთავაზობთ სტატიის თარგმანს, რომელიც შეისწავლის თურქი-კვიპროსელების დამოკიდებულებას იმ სახლების, მიწისა და ნივთების მიმართ, რომელიც მათ, 1974 წელს, ბერძენ-კვიპროსელებთან ომის და კვიპროსის დაყოფის შემდეგ დაისაკუთრეს. სრულად... წყარო: socialjustice.org.ge

თბილისი. გაეცანით საქართველოს ახალგაზრდა იურისტთა ასოციაციის ანალიტიკოსის გიორგი ალავერდაშვილის ბლოგპოსტს.  გიორგი ყვება, როგორ აკონტროლებს უსაფრთხოების სექტორს ამერიკის კონგრესი. სრულად... წყარო: gyla.ge

6 თებერვალს, 17:00 საათზე, წიგნის სახლში „ლიგამუსი“ ალუმნი საუბრების ფარგლებში, სტუმარი იქნება ილიას სახელმწიფო უნივერსიტეტის ასოცირებული პროფესორი ნინო მახაშვილი. მომხსენებელი გაგვიზიარებს დოქტორანტურაში სწავლის გამოცდილებას, ისაუბრებს კვლევაზე მრავალწლიანი მუშაობისას დოქტორანტთა წარმატების გზებისა თუ გამოწვევების შესახებ. სრულად...

მცხეთა-მთიანეთი. ამერიკის შეერთებული შტატების ელჩმა საქართველოში, ქ-ნ კელი დეგნანმა, სოფელ ოძისში ამერიკული სივრცე გახსნა. „ოძისის ამერიკული სივრცე ნებისმიერ მსურველს უფასოდ სთავაზობს უამრავ რესურსსა და ღონისძიებებში ჩართვის შესაძლებლობას. ინგლისური წიგნები, სხვადასხვა თემატიკის კლუბები, განვითარების შესაძლებლობები, მოწვეული სტუმრები, დისკუსიები საინტერესო თემებზე, თანამედროვე ტექნოლოგიები და სხვა ბევრი რამ გელით ოძისის საჯარო სკოლის ტერიტორიაზე“, ნათქვამია საელჩოს გვერდზე სოციალურ ქსელში. სრულად... წყარო: საელჩოს გვერდი სოციალურ ქსელში

თბილისი. ევროკავშირმა კონკურსის „ევროკავშირის პრიზი ჟურნალისტიკაში“ 2022, გამარჯვებულები გამოავლინა და დააჯილდოვა. გაიცანით გამარჯვებულები და წაიკითხეთ მათი ნაშრომები: ნინო ნარიმანიშვილი, ჯემნიუსი, საუკეთესო სტატია ბეჭდურ ან ელექტრონულ მედიაში ანი არველაძე, გადაცემა დროება, ტელეკომპანია ფორმულა, საუკეთესო სიუჟეტი სამაუწყებლო ან ელექტრონულ მედიაში ნინო რამიშვილი - სტუდია მონიტორი, საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში ბესიკ პაპასქუა, ინდიგო, საუკეთესო ბლოგი, საავტორო სტატია, სვეტი ბეჭდურ ან ელექტრონულ მედიაში ქრისტინე გოგალაძე, ინდიგო, კატეგორიაში საუკეთესო სტუდენტური ნაშრომი ბეჭდურ, სამაუწყებლო ან ონლაინ მედიაში ლელა კუნჭულია, რადიო თავისუფლება, ევროკავშირის სადამკვირვებლო მისიის სპეციალური პრიზი მშვიდობის ჟურნალისტიკაში თორნიკე მეტრეველი, ინდიგო, საუკეთესო ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში დინა ოგანოვა, პროექტი 64, ევროკავშირის ფასეულობების ამსახველი, საუკეთესო დოკუმენტური ფოტო სრულად... წყარო: eu4georgia.eu

ქვემო ქართლი. „მშობლები განათლებისთვის“ ინფორმაციით, ბოლნისის ბაღებში 1300 ბავშვი ფერადი წიგნებისა და სათამაშოების გარეშეა.  „ნეკერი ქვემო ქართლის სათემო ორგანიზაცია“ ცდილობს, თავისი ძალებით შეეჭიდოს ამ პრობლემის მოგვარებას.  ახალგაზრდა დედები სათავეში ჩაუდგნენ სახალხო დაფინანსების კამპანიას „მეტი სათამაშო და წიგნი ბავშვებს“ - თვითონ  უფასოდ, მოხალისეობრივად მუშაობენ და ბავშვებისთვის თანხას აგროვებენ. „რიგითი ადამიანების და ორგანიზაციების დახმარებით, მათ უკვე 6700 ლარს და 1000 ლარის ღირებულების წიგნს „მამაცი მეივა“ მოუყარეს თავი.  თუმცა თანამედროვე წიგნები და სათამაშოები რომ ყველა ბაღში შევიდეს, ამისთვის ჯერ კიდევ შრომობენ. თქვენ, რომელიც ამ სტატუსს კითხულობთ, შეგიძლიათ მიიღოთ მონაწილეობა კეთილ საქმეში. მინიმალური, თუმცა უძვირფასესი შენატანია 1 ლარი, მაქსიმალური კი - რამდენსაც ისურვებთ.  ანგ. ნომერი: GE79BG0000000538207380  დანიშნულება: ბოლნისის ბაგა-ბაღებისთვის კამპანია თებერვლის ბოლომდე გრძელდება. მარტში კი მშობლები ბაღებში წიგნებთან და სათამაშოებთან ერთად სიხარულს, ბედნიერებას და განვითარების შესაძლებლობას შეიტანენ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

ქვემო ქართლი. რუსთავის მე-16 საჯარო სკოლის მოსწავლეები: ბარბარე ლაზარიაშვილი, თემურ კვიჟინაძე, ლელა მამულაძე, ნინო სადაღაშვილი და ქრისტინე დვალიშვილი კამპანია „ეს ქვეყანა შენიას“ ფარგლებში ჩატარებული კონკურსის გამარჯვებულები გახდნენ. გუნდის კურატორი-მასწავლებელი ამირან ჯანჯღავაა.  სამოქალაქო საზოგადოების ინსტიტუტის (CSI) და კონრად ადენაუერის ფონდის წარმომადგენლებმა გამარჯვებულებს გადასცეს პრიზები: ლეპტოპები და სხვა საჩუქრები. გამარჯვებულთა დაჯილდოების პარალელურად, გაიმართა საინტერესო საუბარი სამოქალაქო ღირებულებების და გაზიარებული პასუხისმგებლობის შესახებ - ეს ის საკითხებია, რომლებსაც კამპანია „ეს ქვეყანა შენია” უპირატესად მიიჩნევს.

სამეგრელო. გაეროს ბავშვთა ფონდი ბავშვზე მორგებული ქალაქების ინიციატივის ფარგლებში, მხარს უჭერს ქალაქ ფოთის მერიას, რათა ფოთი ბავშვზე მორგებული ქალაქი გახდეს. 2 თებერვალს გაეროს ბავშვთა ფონდის წარმომადგენელი, ღასან ხალილი ქალაქ ფოთს ეწვია და გამართა შეხვედრები ქალაქის მერიის, მუნიციპალიტეტისა და საგანმანათლებლო დაწესებულებების თანამშრომლებთან, ბავშვებთან და სამოქალაქო საზოგადოების წარმომადგენლებთან. შეხვედრებზე განიხილეს ბავშვთა უფლებები, ასევე ის ნაბიჯები, რომელთა გადადგმის შემდეგაც ფოთი შეძლებს გახდეს ბავშვზე მეტად მორგებული ქალაქი. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობის“ მიერ გამოქვეყნებული 2022 წლის „კორუფციის აღქმის ინდექსის“ (CPI) მიხედვით, საქართველოს 56 ქულა აქვს, რაც წინა წელთან შედარებით ერთი ქულით მეტია. წარსულში 56 ქულა ქვეყანას 3-ჯერ: 2017, 2019 და 2020 წლებში  ჰქონდა. რეიტინგში შემავალ 180 ქვეყანას შორის საქართველო 41-ე ადგილს იკავებს. ორგანიზაციის განმარტებით, „კორუფციის აღქმის ინდექსში“ ქვეყნის შედეგის ერთი ქულით ცვლილება სტატისტიკურად უმნიშვნელოდ ითვლება. საქართველოს შემთხვევაში ქულა 2012 წლის შემდეგ მნიშვნელოვნად არ გაუმჯობესებულა (იხ. გრაფიკი),[1] რაც იმას ნიშნავს, რომ ბოლო 10 წლის განმავლობაში ქვეყანას კორუფციის წინააღმდეგ ქმედითი ნაბიჯები არ გადაუდგამს. რეიტინგში საქართველოს შედეგი, ძირითადად, განპირობებულია წვრილმანი მექრთამეობის დაბალი დონით, თუმცა ამავდროულად კვლავაც გამოწვევად რჩება ელიტური კორუფცია და მის წინააღმდეგ ბრძოლის პოლიტიკური ნების არარსებობა. სრულად... წყარო: transparency.ge

თბილისი. ევროკომისიამ გამოაქვეყნა ანალიტიკური ანგარიშები უკრაინის, მოლდოვისა და საქართველოს ევროკავშირის კანონთა კრებულთან (EU acquis) შესაბამისობის შესახებ. ანგარიშები ავსებს 2022 წლის ივნისში ევროკავშირში გაწევრიანების შესახებ სამი ქვეყნის განაცხადების თაობაზე ევროკომისიის მიერ მიღებულ მოსაზრებებს, აფასებს არსებულ მდგომარეობას და გვთავაზობს ღირებულ მითითებებს შესასრულებელი სამუშაოს შესახებ. დამატებითი ინფორმაცია... წყარო: www.eeas.europa.eu

3 თებერვალს, 13:00 საათზე, „შემოქმედებითი ევროპა საქართველო“ გიწვევთ საინფორმაციო შეხვედრაზე. „თუ აპირებთ მონაწილეობის მიღებას კონკურსში ამ ეტაპზე ან მომავალში, თქვენთვის სპეციალურად ჩავატარებთ ტრენინგს აპლიკაციის შევსების თაობაზე. დეტალურად გავივლით კონკურსში მონაწილეობის ყველა ტექნიკურ ეტაპს (პორტალზე რეგისტრაცია, ბიუჯეტის შევსების სპეციფიკა და ა.შ.)“. ტრენინგში მონაწილეობის მსურველებმა გთხოვთ, გაიაროთ რეგისტრაცია... სრულად...

თბილისი. სოციალური სამართლიანობის ცენტრი აგრძელებს ინტერვიუების ციკლს „ისტორია, მეხსიერება, პოლიტიკა“ და მშვიდობის მშენებლებთან ერთად საუბრობს ქართულ-აფხაზური, ქართულ-ოსური ურთიერთობებისა და ეთნოპოლიტიკური კონფლიქტების შესახებ. რა არის ის ძირითადი კონცეფციები, რასაც დღეს მშვიდობის მშენებლობა ეფუძნება, როგორია დღევანდელი სამშვიდობო პოლიტიკა და როგორ იცვლებოდა კონფლიქტებთან მიმართებით ქართული, აფხაზური და ოსური მხარის პერსპექტივები - დღევანდელი ინტერვიუს სტუმარია ნაციონალიზმისა და კონფლიქტების კვლევის ინსტიტუტის თავმჯდომარე, ნინო კალანდარიშვილი.  სრულად... წყარო: ორგანიზაციის გვერდი სოციალურ ქსელში