სამეგრელო. 1 დეკემბერს, შიდსის მსოფლიო დღესთან დაკავშირებით, საზოგადოებრივმა ორგანიზაციამ „ქსენონმა" ზუგდიდის მუნიციპალიტეტის სხდომათა დარბაზში აივ/შიდსის პრობლემაზე მომუშავე საზოგადოებრივი ორგანიზაციების წარმომადგენლები მოიწვია. „ქსენონის" ხელმძღვანელის ნინო ჯანაშიას განმარტებით, ზუგდიდში, აივ/ შიდსის პრობლემაზე მომუშავე ორგანიზაციები უერთდებიან შიდსის მსოფლიო დღესთან დაკავშირებით მიმდინარე ეროვნულ კამპანიას - დავიყვანოთ ნულამდე გამოწვევები. კამპანია ნიშნავს, რომ 2015 წლისთვის, მსოფლიოს წინაშე დგას ახალი გამოწვევა, რომ დავიყვანოთ ნულამდე ახალი აივ-ინფიცირების შემთხვევები, დისკრიმინაცია და სიკვდილიანობა.