„ქართული ოცნების“ ერთ-ერთმა ლიდერმა, მამუკა მდინარაძემ 5 თებერვალს საზოგადოებას ამცნო, რომ პარტია ახალი საკანონმდებლო ცვლილებების მიღებას გეგმავს. რაც, მათ შორის, გაამკაცრებს მედიისა და სამოქალაქო საზოგადოების ორგანიზაციებისადმი სახელმწიფოს მიდგომას. მოსალოდნელი ცვლილებები სამოქალაქო საზოგადოების ჯგუფების მხრიდან უკვე ფასდება პარტიის მიერ გადადგმულ „რეპრესიული“ ნაბიჯად, რომლის მიზანიც ქვეყანაში სამოქალაქო საზოგადოების ორგანიზაციებისა და მედიის მუშაობის შეზღუდვაა. მამუკა მდინარაძის თანახმად: •კანონმდებლობიდან ამოღებული იქნება ნორმები, რომლებიც ითვალისწინებს საჯარო გადაწყვეტილებების მიღების პროცესში არასამთავრობო ორგანიზაციების სავალდებულო მონაწილეობას“;  •არსებული ე.წ. რუსული კანონის ნაცვლად, წარადგენენ კანონპროექტს, რომელიც „იქნება ამერიკული FARA-ს დღეს მოქმედი რედაქციის პირდაპირი ასლი და უზრუნველყოფენ მის სრულფასოვან ამოქმედებას“;  •შეიქმნება საბიუჯეტო ფონდი საზოგადოებრივი ორგანიზაციების ინიციატივების დასაფინანსებლად, რისთვისაც „გრანტების შესახებ“ კანონში ცვლილებები შევა; •შემუშავდება მედიის კანონიც, რომლითაც დადგინდება მედიის ობიექტურობისა და ჟურნალისტური ეთიკის სტანდარტები. აგრეთვე, შეიზღუდება მედია საშუალებების უცხოური წყაროებიდან დაფინანსება. „ქართული ოცნების“ სურვილი, კანონმდებლობიდან სამოქალაქო საზოგადოების ორგანიზაციების გადაწყვეტილების მიღების პროცესში ჩართულობის სავალდებულო ხასიათის ამოღების შესახებ, სახელმწიფოსა და სამოქალაქო საზოგადოებას შორის თანამშრომლობის ფორმალურ შესაძლებლობებსაც კი აქრობს. საგულისხმოა, რომ აღნიშნული გადაწყვეტილება კიდევ უფრო დამაზიანებელი იქნება ღია მართველობის პარტნიორობის ფორმატში (OGP) საქართველოს წევრობის საკითხისთვის. აღსანიშნავია, რომ ამჟამად ქვეყანას წევრის სტატუსი დროებით აქვს შეჩერებული, მის საბოლოო შეჩერებაზე კი OGP 2026 წლის დასაწყისში იმსჯელებს. მსგავსი ინიციატივა, განხორციელების შემთხვევაში, ასევე წინააღმდეგობაში მოდის ევროკავშირთან მოლაპარაკებების გახსნისთვის საჭირო მე-9 დათქმასთან, რომლის თანახმადაც, საქართველომ უნდა უზრუნველყოს სამოქალაქო საზოგადოების ჩართულობა კანონშემოქმედებით და პოლიტიკის შემუშავების პროცესში. არსებული კონტექსტის გათვალისწინებით, როდესაც ორგანიზაციათა უმრავლესობა არ დარეგისტრირდა უცხოური გავლენის მატარებელ ორგანიზაციათა რეესტრში, მოსალოდნელია, რომ ახალი კანონი, რომელმაც, მამუკა მდინარაძის განცხადების თანახმად, უნდა ჩაანაცვლოს უკვე არსებული „რუსული კანონი“, სამოქალაქო საზოგადოების ორგანიზაციების წინააღმდეგ იქნება უფრო მეტად რეპრესიული და სადამსჯელო ხასიათის. აღნიშნული ინიციატივა წარმოადგენს სამოქალაქო საზოგადოების ორგანიზაციების მუშაობის შეფერხებისათვის გადადგმულ კიდევ ერთ ნაბიჯს. მეორე მხრივ, საბიუჯეტო ფონდის შექმნა, რომელმაც შესაძლოა ითანამშრომლოს სამოქალაქო საზოგადოების ორგანიზაციებთან, მიზნად პარალელური სამოქალაქო სექტორის შექმნასა და მოჩვენებითი პარტნიორობის მიღწევას ისახავს. თავის მხრივ, მედია-საშუალებების უცხოური წყაროებით დაფინანსების შეზღუდვა გამოუსწორებელ ზიანს მიაყენებს საქართველოში არსებულ მედია გარემოს. აღნიშნული ინიციატივა საგანგაშო განსაკუთრებით ციფრული გამოცემებისთვისაა, რომლებიც ნაკლებად იღებენ შემოსავლებს კომერციული საქმიანობისგან. მედია-საშუალებების საარსებო გარემოს გაუარესება ნეგატიურად აისახება ქვეყანაში სიტყვის თავისუფლებისა და პრესის თავისუფლების მდგომარეობაზე. გამომდინარე აქედან, ცვლილებები, რომელთა განხორციელებასაც ქართული ოცნება გეგმავს, კიდევ უფრო აუარესებს სამოქალაქო საზოგადოების ორგანიზაციების საარსებო გარემოს, პრაქტიკულად აქრობს სივრცეს პოტენციური თანამშრომლობისთვის და ქმნის დამატებით შეზღუდვებს მედია საშუალებებისთვის.

საქართველო არის და იქნება ევროპა, #გაიზიარეპასუხისმგებლობა, რადგან #ესქვეყანაშენია

საქართველოს ხალხის სახელით, 1907 წელს ჰააგის საერთაშორისო კონფერენციას პეტიცია გაუგზავნეს. საერთაშორისო საზოგადოებისადმი წარდგენილ დოკუმენტში საქართველოს სხვადასხვა კუთხიდან – ქალები, კაცები, თავადაზნაურები, გლეხები, მასწავლებლები, მრეწველები, სასულიერო პირები –აპროტესტებდნენ რუსეთის მიერ საქართველოს ანექსიას, მოითხოვდნენ საქართველოდან რუსეთის ჯარების გაყვანას და საქართველოს სრულ პოლიტიკურ ავტონომიას.  პეტიცია ქართველმა ანარქისტმა ვარლამ ჩერქეზიშვილმა შეადგინა, ხელმოწერების პროცესიც ისე წარიმართა, რომ რუსეთის იმპერიის ჩინოვნიკების ყურამდე ამბავი არ მისულა.  117 წლის წინათ შედგენილი პეტიცია, რომელსაც 3 ათასი ადამიანი აწერს ხელს დეტალურად აღწერს რუსეთის სასტიკ ქმედებებს საქართველოში – გადასახლებას, დახვრეტას, სოფლებისა და ქალაქების აწიოკებას...  კონფერენციის ყველა მონაწილეს გადაეცა ქართველი ხალხის პეტიცია, საერთაშორისო საზოგადოებამ გაიგო რუსეთის მიერ 1783 წლის გეორგიევსკის ტრაქტატის დარღვევის, საქართველოს ანექსიისა და საქართველოში განხორციელებული აგრესიის შესახებ.  „ასი წლის შემდეგ პირველად იყო, რომ ქვეყნიერებამ საქართველოზე დაილაპარაკა“, აღნიშნავდა ვარლამ ჩერქეზიშვილი.  ქართველი ხალხის პეტიცია, 1907 წელი... #რუსეთიოკუპანტია გახსოვდეს #ესქვეყანაშენია

ზუსტად 222 წლის წინათ დაიწყო წინააღმდეგობა, რომელსაც ორ საუკუნეზე მეტი ხნის მანძილზე უამრავი აჯანყება, შეთქმულება და პროტესტი მოჰყვა. ანტირუსული გამოსვლების დასაწყისად ითვლება 1802 წლის 12 აპრილი – თბილისში, სიონის ტაძარში, რუსეთის იმპერატორის მანიფესტის გამოცხადებისას განვითარებული მოვლენები. რუსული ჯარით გარშემორტყმულ ტაძარში კახეთის თავადაზნაურობამ ქართლ–კახეთის სამეფოს გაუქმების მანიფესტს პროტესტით უპასუხა და იმპერატორის ერთგულების ფიცი არ მიიღო.  1802 წლის ივლისში ქიზიყში, ქელმენჩურის მიდამოებში, კახელი თავადაზნაურების ინიციატივით რამდენიმე ათასი ადამიანის შეკრება რუსეთის წინააღმდეგ პოლიტიკურ გამოსვლაში გადაიზარდა.  პოლიტიკური გამოსვლის მასშტაბურობის მიუხედავად, რუსეთის იმპერიამ მოახერხა მისი განეიტრალება, ჩახშობა. თუმცა ცხადი გახდა, რომ ქართველი ხალხი სახელმწიფოებრიობის დაკარგვას ვერ შეურიგდებოდა და თავისუფლებისთვის ბრძოლას არ შეწყვეტდა.  წყარო: რონდელის ფონდის პუბლიკაცია – „რუსეთის ექსპანსია კავკასიაში და საქართველო“ #გახსოვდესისტორია, რადგან #ესქვეყანაშენია

ახლა 2024 წელია და საქართველოს ტერიტორიის 20% ოკუპირებულია რუსეთის მიერ.  თუმცა რუსეთის ასეთი პოლიტიკა საუკუნეების მანძილზე გრძელდება და ოკუპანტი სახელმწიფო ყველა ბერკეტით ცდილობს საქართველოს დამორჩილებას.  რუსეთის დამპყრობლური პოლიტიკა ასეთია - წაგართვას ის, რაც ყველაზე მნიშვნელოვანია. თუკი ისტორიას გადავხედავთ, საუკუნეების მანძილზე, ქართველი ხალხი მუდმივად იცავდა სამშობლოს, ქართულ დამწერლობასა და რელიგიას - ქრისტიანობას.  მრავალწლიანი ტერორის და სამოქალაქო საზოგადოების გატეხვის მცდელობასთან ერთად, რუსეთი სწორედ იმას დაუპირისპირდა, რაც ქართველი ხალხისთვის ყველაზე ძვირფასია.  რამდენიმე მაგალითი:  მამული - რუსეთის ჯარებმა არაერთხელ დაიკავეს საქართველოს ტერიტორია, 1921 წელს კი მთელი ქვეყანა საბჭოთა იმპერიის ნაწილად აქციეს. ახლაც ჩვენი ტერიტორიის 20% აქვს ოკუპირებული.  ენა - 1881 წელს ქართულ სკოლებში ქართული ენა არასავალდებულოდ გამოაცხადა რუსეთის იმპერიამ.  1978 წელს, საბჭოთა კავშირის ხელისუფლებამ გადაწყვიტა მოკავშირე რესპუბლიკებში, მათ შორის საქართველოში, ადგილობრივი ენისთვის სახელმწიფო ენის სტატუსის ჩამორთმევა და სახელმწიფო ენად რუსულის გამოცხადება.  სარწმუნოება - 1811 წელს საქართველოს ეკლესიის ავტოკეფალია გააუქმა რუსეთის იმპერიამ. საქართველოს ეკლესიის ტრადიციების მოსპობის მიზნით შეიზღუდა ქართველი წმინდანების ხსენება.  მეოცე საუკუნის დასაწყისში რუსეთმა საქართველოში ასობით ეკლესია დაკეტა, ნაწილი დაანგრია, ნაწილი გადაღება.  მე-20 საუკუნის ბოლოს და 21-ე საუკუნის დასაწყისში რუსეთმა კვლავ გააგრძელა თავისი პოლიტიკა – საქართველოს ტერიტორიის 20% ოკუპირებულია, რასაც უამრავი მოქალაქე შეეწირა, მოსახლეობა საკუთარი სახლებიდან გამოდევნა, ისტორიულ-კულტურულ მემკვიდრეობას დიდი ზიანი მიაყენა, მათ შორის ეკლესიებსაც - ნაწილი განადგურდა, ან ახლა ნადგურდება.  რას გვასწავლის ისტორია?  უნდა დავიცვათ და გავუფრთხილდეთ ქვეყნის დამოუკიდებლობას, რადგან რუსული პოლიტიკა საუკუნეების მანძილზე არ იცვლება...  #გაიზიარეპასუხისმგებლობა რადგან #ესქვეყანაშენია

საიდან მოვდივართ და რატომ არის ჩვენი ადგილი ევროპაში? მოუსმინეთ და გაიგეთ მეტი ტორესა მოსის პოდკასტიდან.

მოუსმინეთ სულხან სალაძის პორდკასტს და გაიგეთ როგორ იყო ძველ ევროპულ რუკებში საქართველო ასახული. 

გაინტერესებთ როგორ აზიანებს “რუსული კანონი” დემოკრატიულ მმართველობას? მოუსმინეთ კახა გოგოლაშვილის პოდკასტს.

გახსოვდეს, ტოტალიტარული რეჟიმების ბრძოლის იარაღი მხოლოდ ომები, ძალადობა ან უმცირესობების ჩაგვრა არ არის. პროპაგანდა ის ფარული იარაღია, რომელიც დარტყმას კოლექტიურ ცნობიერებას აყენებს და საზოგადოებას ასუსტებს. #გაიზიარეპასუხისმგებლობა, არ დაუჯერო პროპაგანდას, რადგან #ესქვეყანაშენია

არასამთავრობო ორგანიზაციები მხარს უჭერენ საზოგადოების სხვადასხვა ჯგუფებს - მათი საქმიანობა ორიენტირებულია ადამიანებისთვის კეთილდღეობის შექმნაზე.  ქვემოთ მოყვანილი მაგალითები მცირე ჩამონათვალია იმ სერვისებისა და პროგრამებისა, რასაც არასამთავრობო ორგანიზაციები ყოველდღიურ რეჟიმში აწვდიან დახმარების საჭიროების მქონე ინდივიდებს.  #გაიზიარეპასუხისმგებლობა რადგან #ესქვეყანაშენია

ვირტუალური გმირები გვიყვებინა თუ რატომ არის ცვლილებები გარდაუვალი, რატომ უნდა ვიბრძოლოთ ერთად ცვლილებებისთვის, დემოკრატიის გზა რატომ არის გამარჯვებისკენ სწრაფვა, რატომ არ უნდა დავთმოთ თავისუფლება და რატომ უნდა წავიდეთ არჩევნებზე. ცვლილებები გარდაუვალია, თუ რატომ მოუსმინეთ ვირტუალურ პერსონაჟს.

იცი რა აქვთ საერთო ოლივერ კრომველს, ენდრიუ ჯონსონს, რეზერფორდ ჰეისს და ჩარლზ პირველს? მათი ბედი ზუსტად ერთმა ხმამ გადაწყვიტა. ერთ ხმას ბევრი რამის შეცვლა შეუძლია, ნახე ვიდეო და თავად დარწმუნდი.