აჭარა. 2 აპრილს, აუტიზმის შესახებ ინფორმაციის გავრცელების საერთაშორისო დღესთან დაკავშირებით, ბათუმის დემოკრატიული ჩართულობის ცენტრში საინფორმაციო შეხვედრა გაიმართა. შეხვედრას ორგანიზებას უწევდა არასამთავრობო ორგანიზაცია „ცვლილებები თანაბარი უფლებებისათვის". შეხვედრა ინფორმაციული ხასიათის იყო.

„გვინდა საზოგადოება აუტიზმთან დაკავშირებული სტიგმებისა და სტერეოტიპებისაგან გათავისუფლდეს. ასევე, სახელმწიფოს აკისრია დიდი როლი აუტისტური სპექტრის მქონე პირებისათვის შესაბამისი პროგრამების შექმნაზე, რაც მათ ცხოვრებას გაამარტივებდა", – განაცხადა ერთ-ერთმა მომხსენებელმა, თომა კაკაბაძემ. მისი ინფორმაციით, აჭარაში აუტიზმის მქონე მხოლოდ 25 პირი სარგებლობს ჯანდაცვის პროგრამებით, რაც ძალიან მცირე რიცხვია და არ ასახავს აჭარაში აუტიზმის მქონე პირთა საერთო რაოდენობას. შეხვედრაზე იმყოფებოდნენ ადამიანები, რომელთა ახლობლები აუტიზმის მქონენი არიან. ერთ-ერთი მომხსენებელი აუტისტური სპექტრის მქონე პირის მშობელი იყო, რომელმაც იმ პრობლემებზე ისაუბრა, რასაც საზოგადოებაში აწყდება და იმ საჭიროებებზე, რომლებიც აუტისტური სპექტრის მქონე ადამიანებსა და მათი ოჯახის წევრებს აქვთ. მოხსენებების შემდეგ აუტიზმის თემატიკაზე მომზადებული ვიდეორგოლები აჩვენეს.