GDI: „აიისას“ საქმეზე გადაწყვეტილება თავისუფლების ფუნდამენტურ უფლებას არღვევს
თბილისი. საქართველოს დემოკრატიული ინიციატივის განცხადებით, 4 მაისს, თბილისის საქალაქო სასამართლოს მოსამართლე, ლაშა თავართქილაძემ, საქმეზე თბილისის მერია „აიისას" წინააღმდეგ, მიღებული გადაწყვეტილებით „აიისას" მფლობელის გამოხატვის თავისუფლება უხეშად შეზღუდა.
„სასამართლომ „აიისას" მფლობელი რეკლამის გავრცელების კანონით დადგენილი წესის დარღვევაში სამართალდამრღვევად სცნო. სასამართლომ მეწარმე ანი გაჩეჩილაძე 500 ლარით დააჯარიმა, ამასთანავე, კონკრეტული რეკლამის გავრცელება და ამ რეკლამით უკვე გავრცელებული პროდუქტის საბაზრო მიმოქცევიდან ამოღება დაავალა.
მიგვაჩნია, რომ სასამართლოს მიერ რელიგიური გრძნობებისა და ეროვნული ღირსების დაცვის მოტივით სიტყვის თავისუფლების შემზღუდავი გადაწყვეტილება ცენზურის სახიფათო პრეცედენტია", ნათქვამია ორგანიზაციის ვებგვერდზე.
წყარო: gdi.ge
