რეგიონებში დეცენტრალიზაციის ეროვნული სტრატეგიის პროექტზე შეხვედრები დაიწყო
საქართველოს ადგილობრივ თვითმმართველობათა ეროვნულმა ასოციაციამ (NALAG) საქართველოს რეგიონებში დეცენტრალიზაციის ეროვნული სტრატეგიის პროექტზე საკონსულტაციო შეხვედრები დაიწყო. „ასოციაციისა და სამინისტროს წარმომადგენლებმა, პირველ ეტაპზე, ბათუმში და ოზურგეთში გამართეს შეხვედრები, რომლებსაც აჭარის ავტონომიური რესპუბლიკისა და გურიის მხარის მუნიციპალიტეტების წევრებთან ერთად, გაეროს განვითარების პროგრამის (UNDP) და არასამთავრობო სექტორის წარმომადგენლები ესწრებოდნენ. შეხვედრები საქართველოს ადგილობრივ თვითმმართველობათა ეროვნული ასოციაციის აღმასრულებელმა დირექტორმა გახსნა. დავით მელუამ პროექტის მნიშვნელობაზე ისაუბრა და განაცხადა, რომ აღნიშნული შეხვედრები ცენტრალურ და ადგილობრივ ხელისუფლებებს შორის დეცენტრალიზაციის საკითხებზე დიალოგის წარმართვასა და დეცენტრალიზაციის ახალ სტრატეგიაში ადგილობრივი ხელისუფლების ინტერესების გათვალისწინებას ისახავს მიზნად", ნათქვამია ორგანიზაციის ვებგვერდზე.
წყარო: nala.ge
