გადადგი ნაბიჯი ევროპისკენ!
თბილისი. გადადგი ნაბიჯი ევროპისკენ! - საზოგადოებისთვის ცნობილმა სახეებმა სასტუმრო სტამბაში ახალი სამოქალაქო მოძრაობის პრეზენტაცია გამართეს და მანიფესტი წარადგინეს.
„ქართველი ხალხი ცალსახად და მკაფიოდ ვირჩევთ ევროკავშირს. ეს ჩვენი წინაპრების, თავისუფლებისთვის, სახელმწიფოებრიობისა და განვითარებისთვის ბრძოლის ღირსეული გაგრძელებაა, რამაც თავისუფალი სამყაროს ნაწილად უნდა გვაქციოს, ხოლო ჩვენი მოქალაქეებისთვის უსაფრთხო, მშვიდობიანი და ღირსეული ცხოვრება უზრუნველყოს. მომავალი თაობები სწორედ იმით განგვსჯიან - თუ რა გავაკეთეთ - თუ რა გააკეთე შენ - როცა ქვეყნის ბედი წყდებოდა.
მხოლოდ იმ ხალხს დაუმკვიდრებია თავისუფალი და სამართლიანი ქვეყანა, რომელიც უამრავი განსხვავების და უთანხმოების მიუხედავად, ერთიანი ყოფილა იმაში, რომ სწორედ ასეთი ქვეყანა ეკუთვნის და ნაკლებს ვერ დასჯერდება“.
წყარო: transparency.ge
