თბილისი. საერთაშორისო გამჭვირვალობა – საქართველოს განცხადებით „მარეგულირებელი კომისიების ხელმძღვანელთა დანიშვნისას ხელისუფლებამ ინტერესთა კონფლიქტის საფრთხე უნდა გაითვალისწინოს". ორგანიზაციის ვებ–გვერდზე ნათქვამია, რომ მედიის ცნობით საქართველოს ხელისუფლება ამჟამად ენერგეტიკისა და წყალმომარაგების მარეგულირებელი ეროვნული კომისიის თავმჯდომარის პოსტზე რამდენიმე კანდიდატურას განიხილავს. „საქართველოს ხელისუფლებამ მარეგულირებელი კომისიის ხელმძღვანელის დანიშვნის თაობაზე საბოლოო გადაწყვეტილების მიღებამდე უნდა აწონ-დაწონოს ინტერესთა კონფლიქტიდან მომდინარე ყველა შესაძლო საფრთხე. გარდა ამისა, საქართველოს მთავრობამ და პარლამენტმა უნდა იზრუნონ სხვადასხვა კანონში არსებული იმ ნორმების დახვეწაზე, რომელთა მიზანი საჯარო და კერძო ინტერესების გამიჯვნა და საჯარო ინსტიტუტებში ინტერესთა კონფლიქტის პრევენციაა", ნათქვამია გავრცელებულ განცხადებაში.

წყარო: transparency.ge