პროექტი - „მეგობრული გზები“ – ბათუმში
აჭარა. 19 ნოემბერს, ბათუმის დემოკრატიული ჩართულობის ცენტრში, საგზაო უსაფრთხოების ახალი პროექტის – „მეგობრული გზების" – პრეზენტაცია გაიმართა. პროექტი საგზაო უსაფრთხოების გაზრდას, შუქნიშნების და საგზაო ნიშნების კონტროლსა და მოსახლეობის მეტ ჩართულობას ითვალისწინებს. ელექტრონულ რუკაზე, რომელიც ორგანიზაციის საიტზეა განთავსებული, ნებისმიერ პირს შეეძლება პრობლემური ადგილის ან საგზაო შემთხვევის ამსასხველი ფოტო ან ვიდეომასალის ატვირთვა. მოცემულ უბანზე შემთხვევის ერთჯერადად დაფიქსირებისას რუკაზე შავი წერტილი ჩნდება, განმეორების შემთხვევაში კი პრობლემა აქტიურ ფაზაში გადადის და ლაქა წითლდება. 6 თვის მონაცემების საფუძველზე ორგანიზაცია მუნიციპალიტეტებთან ერთად პრობლემების მოსაგვარებლად მუშაობას დაიწყებს. პროექტის პრეზენტაციას ახალგაზრდები და არასამთავრობო სექტორის წარმოამდგენლები დაესწრნენ.
