სამცხე–ჯავახეთი. არ აწამო! არა წამებას! დაისაჯოს დამნაშავე! პატივი ეცით ადამიანის უფლებებს! - ამ ლოზუნგებით სამოქალაქო სექტორისა და მედიის წარმომადგენლებმა 19 სექტემბერს, ქალაქ ახალციხეში, რუსთაველის ძეგლის მიმდებარე ტერიტორიაზე, აქცია გამართეს. არასამთავრობო ორგანიზაციების ,,ტოლერანტის", „ახალციხის ახალგაზრდული ცენტრის", კავშირ ,,სამხრეთის კარიბჭის’’ წარმომადგენლებმა და მოქალაქეებმა 19 სექტემბრის ღამეს ტელევიზიებით გავრცელებული პატიმართა წამების ფაქტები გააპროტესტეს. აქციის მონაწილეებმა მომხდარი ადამიანის უფლებების უხეშ დარღვევად შეაფასეს და აღნიშნეს, რომ საზოგადოებამ დროულად უნდა ამოიღოს ხმა ადამიანის ღირსების შემლახავი მოპყრობის წინააღმდეგ.