აჭარა. 5 ოქტომბერს, ბათუმის დემოკრატიული ჩართულობის ცენტრში, ჰაინრიჰ ბიოლის ფონდის სამხრეთ კავკასიის რეგიონალურმა ბიურომ, რეგიონალური სასტიპენდიო პროგრამის ფარგლებში გამოცხადებული კონკურსის შესახებ გამართა შეხვედრა. სასტიპენდიო პროგრამის მიზანია მხარი დაუჭიროს სამხრეთ კავკასიის ქვეყნებში აკადემიური კვლევების ჩატარებას. განაცხადის შეტანა შეუძლიათ 1977–1990 წლებში დაბადებულ ახალგაზრდა მკვლევარებს, რომლებსაც აქვთ სრული უმაღლესი განათლება და ამავე დროს, მუდმივად ცხოვრობენ სამხრეთ კავკასიის ქვეყნებში. სავალდებულოა ინგლისური ან/და რუსული ენების მაღალ დონეზე ფლობა. პრიორიტეტი მიენიჭება განაცხადებს, რომლებიც თემატურ სიახლეს, ზეპირი ისტორიის, სოციოლოგიური და თვისობრივი კვლევის ინოვაციური მეთოდებს შესთავაზებენ. სტიპენდიის ხანგრძლივობა განისაზღვრება თორმეტი თვით (01.01.13–31.12.13). სტიპენდიის მოცულობა ყოველთვიურად 250.00 ევპრს შეადგენს. პროგრამა ასევე მოიცავს ფონდის მიერ ორგანიზებულ თანმდევ სემინარებს, საზაფხულო სკოლას და პუბლიკაციებით მხარდაჭერას.