11 ოქტომბერს გოგონათა საერთაშორისო დღეა. ეს თარიღი გაერთიანებული ერების ორგანიზაციის ინიციატივით აღინიშნება და წელს მისი მთავარი თემა „მოზარდ გოგონათა ძალა-ხედვა 2030" იქნება. ამ დღის აღნიშვნა მიზნად ისახავს გოგონათა უფლებების აღიარებასა და დაცვას, განათლების ხელშეწყობას, მათი შესაძლებლობების გაზრდას; ასევე, საზოგადოებრივი ცნობიერების ამაღლებას სხვადასხვა ტიპის ჩაგვრასა და დისკრიმინაციაზე, რასაც გოგონები ყოველდღიურად აწყდებიან მსოფლიოს სხვადასხვა ქვეყანაში, მათ შორის საქართველოშიც. სახალხო დამცველის ცნობით, საქართველოში კვლავ დაბალია გოგონების სათანადო განათლებაზე, ჯანდაცვაზე და სხვა რესურსებზე ხელმისაწვდომობა. ასევე, არასრულწლოვანთა მნიშვნელოვანი ნაწილი ცხოვრობს სიღარიბესა და არასათანადო სოციალურ პირობებში. აღსანიშნავია, რომ ყოველწლიურად მილიონობით გოგონა წყვეტს განათლების მიღებას ადრეულ ასაკში ქორწინების გამო, რაც ხელს უშლის მათ განვითარებას.

ასოციაცია ჰერა XXI იწვევს ახალგაზრდა აქტივისტებს გოგონათა საერთაშორისო დღის კამპანიის დასაგეგმავ კონკურსში მონაწილეობის მისაღებად.