თბილისი. ადამიანის უფლებების სწავლებისა და მონიტორინგის ცენტრი (EMC) ტყიბულის მეშახტეების პროტესტს ეხმიანება. „მიგვაჩნია, რომ ტყიბულში შექმნილი მძიმე ვითარება სახელმწიფოს პასუხისმგებლობაა და იგი სრულად გამოხატავს წლების განმავლობაში ქალაქის წინაშე არსებული უმძიმესი გამოწვევების სრული უგულებელყოფის შედეგად შექმნილ მდგომარეობას, რომელიც არამხოლოდ შახტებში დასაქმებული პირების, არამედ სრულად რეგიონის მომავალს აყენებს ეჭვქვეშ. მიუხედავად არაერთი მოთხოვნისა, სახელმწიფოს ამ დრომდე არ აქვს ტყიბულისა და სხვა ინდუსტრიული ქალაქების განვითარების გეგმა, რაც სრულ გაურკვევლობასა და ბუნდოვანებაში ამყოფებს კომპანიაში დასაქმებულებსა და რეგიონის მოსახლეობას“, ნათქვამია ორგანიზაციის ვებგვერდზე.  სრულად...  წყარო: emc.org.ge

თბილისი. პარტნიორობა ადამიანის უფლებებისთვის (PHR) ინფორმაციით, 9 წლის აუტიზმის სპექტრის მქონე ნაცემი ბავშვი პროკურატურამ და სასამართლომ დაზარალებულად არ მიიჩნია. „მამა კრძალავდა პეტრეს ჩართვას თერაპიულ კურსებში და ბავშვის დიაგნოზის გამო დედას ადანაშაულებდა. იგი ბავშვს აუტიზმის დიაგნოზის გამო სასტიკად სჯიდა. გამოძიებამ, რომელიც ოჯახში ძალადობის ფაქტზე 2018 წლის სექტემბერში დაიწყო, გამოავლინა რომ ფიზიკური და ემოციური ძალადობის მსხვერპლი იყო დედაც და პეტრეს დებიც, რომელთა თანდასწრებითაც მამა ცემით და საგნების სროლით უსწორდებოდა მეუღლეს და შეზღუდული შესაძლებლობის მქონე შვილს. პროკურატურამ ძალადობის მსხვერპლად ცნო დედა და ორი შვილი, მაგრამ უარი თქვა პეტრესთვის დაზარალებულის სტატუსის მინიჭებაზე“, ნათქვამია ორგანიზაციის ვებგვერდზე.  სრულად... წყარო: phrgeorgia.wordpress.com

თბილისი. საქართველოს დემოკრატიული ინიციატივა (TDI) აქვეყნებს ეროვნული უმცირესობების დაცვის შესახებ ევროპული ჩარჩო კონვენციის (FCNM) საკონსულტაციო კომიტეტის მესამე ანგარიშს საქართველოზე.  „საკონსულტაციო კომიტეტი აღნიშნავს, რომ ევროპის ქვეყნების მსგავსად, მზარდი შეუწყნარებლობა საქართველოშიც ვლინდება. ამავე დროს, საქართველომ მნიშვნელოვნად გააუმჯობესა საკუთარი შესაძლებლობები სიძულვილით მოტივირებულ დანაშაულთან საბრძოლველად, განსაკუთრებით, შინაგან საქმეთა სამინისტროს ადამიანის უფლებათა დეპარტამენტის ჩამოყალიბებით, რომელსაც ევალება სპეციფიკური დანაშაულების, მათ შორის, სიძულვილით მოტივირებული დანაშაულების მონიტორინგი“, ნათქვამია ორგანიზაციის ვებგვერდზე.  სრულად... წყარო: ორგანიზაციის გვერდი სოციალურ ქსელში

სამეგრელო. USAID/PROLoG-ის მხარდაჭერით, სექსუალური შევიწროებისა და დისკრიმინაციის საკითხების შესახებ დემოკრატიული ჩართულობის ცენტრების ქსელის ზუგდიდის ოფისსა და შოთა მესხიას სახელობის ზუგდიდის სახელმწიფო სასწავლო უნივერსიტეტში საინფორმაციო შეხვედრები გაიმართა. სრულად... წყარო: ორგანიზაციის გვერდი სოციალურ ქსელში

საქართველოს სახალხო დამცველმა, 2019 წლის 23 სექტემბერს, ადამიანის უფლებათა დაცვის განზომილებაში ეუთოს მონაწილე ქვეყნების ვალდებულებათა შესრულების შემფასებელი შეხვედრის (HDIM) კანონის უზენაესობის სესია გახსნა. ნინო ლომჯარიამ სესიის მონაწილეებს მიმართა და, თავის გამოსვლაში, საქართველოსა და რეგიონში არსებული ადამიანის უფლებების გამოწვევების შესახებ ისაუბრა. ადამიანის უფლებათა ეროვნული ინსტიტუტის ხელმძღვანელთაგან ის ერთადერთი იყო, რომელსაც წელს ამგვარი პატივი ხვდა. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „ეროვნული უმცირესობების დაცვის შესახებ ევროპული ჩარჩო კონვენციის მრჩეველთა კომიტეტის ანგარიში საქართველოზე“. „მრჩეველთა კომიტეტის შეფასებით, ჩარჩო კონვენციის დანერგვის პროცესი წინა მონიტორინგის შემდეგ არსებითად უცვლელია. კომიტეტი მიესალმება თანასწორობის და ინტეგრაციის მხარდაჭერის მიზნით ანტიდისკრიმინაციული კანონმდებლობის, ინტეგრაციის სფეროში სპეციალური სტრატეგიის, სამოქმედო გეგმებისა და პროგრამების ამუშავებას, თუმცა, არსებით გამოწვევებს ხედავს ჩარჩო კონვენციის იმპლემენტაციის და თანასწორობის რეალობაში უზრუნველყოფის კუთხით“, ნათქვამია ორგანიზაციის ვებგვერდზე.  სრულად...  წყარო: emc.org.ge

თბილისი. ადამიანის უფლებათა ცენტრი ავრცელებს განცხადებას და თვლის რომ „ექსტრადიციის საკითხის განხილვისას უხეშად არის უგულვებელყოფილი წამებისა და არაადამიანური მოპყრობის რისკები“. „ადამიანის უფლებათა ცენტრის შეფასებით, საქართველოს ხელისუფლების მიერ გადადგმული ნაბიჯი უნდა შეფასდეს ადამიანის საყოველთაოდ აღიარებული უფლებებისა და თავისუფლებების შემლახავ ქმედებად. ორგანიზაცია მიიჩნევს, რომ რამზან ახიადოვის ექსტრადაციისას საქართველოს ხელისუფლებამ არასწორად შეაფასა და უგულებელყო მის მიმართ წამებისა და არასათანადო მოპყრობის შესაძლო რისკები, რითიც უხეშად დაარღვია საქართველოს კანონმდებლობა და საერთაშორისო შეთანხმებებით ნაკისრი ვალდებულებები, რაც მსგავს პირობებში ექსტრადაციის დაუშვებლობას იმპერატიულად ადგენს“, ნათქვამია ორგანიზაციის გვერდზე სოციალურ ქსელში.  სრულად...  წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) აქვეყნებს ანა თავხელიძის ბლოგპოსტს: შემთხვევით გადარჩენილები.  „ქორწინება, როგორც წესი, ბედნიერებასთან ასოცირდება, მაგრამ არა ყოველთვის. გასაკუთრებით მაშინ, როდესაც ბავშვი (ძირთადად გოგონები) „ქორწინდებიან“. ქორწინება ბრჭყალებში, რადგან – არა! ქორწინება არ არის სწორი ტერმინი და ბავშვებთან მიმართებით არც უნდა ვიყენებდეთ. ბავშვი არ ქორწინდება, ბავშვზე ძალადობენ და ამ დროს ის ბედნიერი არ არის“, ნათქვამია ორგანიზაციის ვებგვერდზე.  სრულად... წყარო: phrgeorgia.wordpress.com

19 სექტემბერს ჭიათურის მუნიციპალიტეტში, სოფელ შუქრუთის მცხოვრებლებმა პროტესტის ნიშნად შპს „ჯორჯიან მანგანეზის” მფლობელობაში არსებულ, სოფელ შუქრუთში მდებარე მაღაროებთან აქცია გამართეს.  EMC-ის წარმომადგენელი სოფელ შუქრუთში 2019 წლის აგვისტოში იმყოფებოდა და ადგილზე გაეცნო სოფლის მცხოვრებთა ჩივილებს. მოსახლეობას ეკოლოგიური (დაბინძურებული წყალი) და ინფრასტრუქტურული პრობლემების აწუხებს (გაუმართავი გზები, აფეთქებების შედეგად დეფორმირებული საცხოვრებლები). ორგანიზაცია მოუწოდებს „ჯორჯიან მანგანეზს”: „უზრუნველყოს მაღაროებში სამუშაო პროცესის განხორციელება კანონის მოთხოვნათა დაცვით, სოფელ შუქრუთის მოსახლეობის საკუთრების, გარემოს და ინფრასტრუქტურისათვის ზიანის მიუყენებლად”.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება შრომის კანონმდებლობაში დაგეგმილი ცვლილებების შესახებ გავრცელებულ მცდარ ინფორმაციას.  „მედიაში გავრცელდა არაზუსტი ინფორმაცია, რომ 1. იკრძალება ორ ან მეტ სამუშაო ადგილას ერთდროულად დასაქმება და 2. თუ აქამდე დეკრეტული შვებულება ერთჯერადი თანხით, მაქსიმუმ 1000 ლარით, ანაზღაურდებოდა სახელმწიფოს მიერ, ახალი კანონპროექტით განისაზღვრება ერთჯერადი გადახდა ხელფასის 80%-ის ოდენობით. ორივე შეფასება არ შეესაბამება სინამდვილეს და არასწორად წარმოადგენს რეგულირების შინაარსს, ფარგლებსა და მიზანს“, ნათქვამია ორგანიზაციის ვებგვერდზე.  სრულად...  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) რამზან ახიადოვის რუსეთის ფედერაციაში ექსტრადირებას ეხმაურება.  „EMC მიიჩნევს, რომ ახიადოვის მიმართ მიღებულ სასამართლო აქტებში და იუსტიციის სამინისტროს გადაწყვეტილებაში სათანადოდ არ არის დასაბუთებული რამზან ახიადოვის მიმართ წამებისა და არაადამიანური მოპყრობის მაღალი რისკის არ არსებობა. სასამართლო და იუსტიციის სამინისტრო ეყრდნობიან მხოლოდ ფორმალურ მითითებებს, რომ რუსეთის ფედერაციას აღებული აქვს ადამიანის უფლებათა დაცვის სფეროში საერთაშორისო ვალდებულები და წარმოადგინეს უფლების დაცვის შესახებ გარანტია“, ნათქვამია ორგანიზაციის განცხადებაში.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრმა (EMC) იპოთეკით დაზარალებულებთან შეხვედრა გამართა. „მონაწილეებმა იმსჯელეს იმ უმნიშვნელოვანეს გამოწვევებზე, რომლის წინაშეც მოქალაქეები დგანან. შეხვედრის ფარგლებში, ასევე, განიხილეს სათანადო საცხოვრებლის უფლების გარანტიები, გამოსახლებისა და უსახლკარობის პრევენციისა და აღმოფხვრის საკითხებზე შესაბამისი სახელმწიფო უწყებების ვალდებულებები“, ნათქვამია ორგანიზაციის ვებგვერდზე.  სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი” ეხმიანება საქართველოს პრეზიდენტის დღევანდელ ბრიფინგს, რომლითაც მან პრეზიდენტისთვის მინიჭებული შეწყალების ექსკლუზიური უფლებამოსილების გამოყენებაზე მორატორიუმი გამოაცხადა.  „პრეზიდენტის მიერ შეწყალების დისკრეციული უფლებამოსილების ყოველგვარი დასაბუთების გარეშე გამოყენების შემდგომ, საზოგადოებაში გაჩენილი კრიტიკის პასუხად, შეწყალების უფლებამოსილებაზე გაურკვეველი ვადით მორატორიუმის გამოცხადებით, ზიანი ადგება პენიტენციურ დაწესებულებაში მყოფ იმ მსჯავრდებულებს, რომელთათვის, ხშირად, შეწყალების მექანიზმი სამართლიანობის მიღწევის უკანასკნელი შესაძლებლობაა“, ნათქვამია ორგანიზაციის ვებგვერდზე.  სრულად...  წყარო: emc.org.ge

თბილისი. ადამიანის უფლებათა ცენტრი ავრცელებს განცხადებას საქართველოს პრეზიდენტის მიერ შეწყალებაზე მორატორიუმის გამოცხადებასთან დაკავშირებით. ორგანიზაციას მიაჩნია, რომ „პრეზიდენტის მიერ შეწყალებაზე გამოცხადებული მორატორიუმი არ და ვერ შეძლებს პრობლემის მოგვარებას და საფრთხეს შეუქმნის შეწყალების კონსტიტუციურ-სამართლებრივი დანიშნულების პრაქტიკულ იმპლემენტაციას. კრიტიკულად მნიშვნელოვანია, პრეზიდენტმა აღადგინოს შეწყალების საკითხთა კომისია და დააკომპლექტოს საზოგადოების მაღალი ნდობით აღჭურვილი, კომპეტენტური პირებით“, ნათქვამია განცხადებაში.  სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, თბილისის სააპელაციო სასამართლომ ფსიქიატრიულ დაწესებულებაში პირის არანებაყოფლობით მოთავსება უკანონოდ ცნო.  „სასამართლომ 2019 წლის 13 სექტემბერს, გააუქმა თბილისის საქალაქო სასამართლოს 2019 წლის 31 აგვისტოს ბრძანება პირის არანებაყოფლობით ფსიქიატრიულ დაწესებულებაში მოთავსების შესახებ“. სრულად...  წყარო: phrgeorgia.wordpress.com

თბილისი. პლატფორმაში “არა-ფობიას!” შემავალი ორგანიზაციები, ბათუმის მეჩეთთან დაკავშირებით გაკეთებული გამონათქვამების გამო, განცხადებას ავრცელებენ.  კერძოდ, ორგანიზაციები ეხმაურებიან სამოქალაქო მოძრაობა “ლელოს” დამფუძნებელმა მამუკა ხაზარაძის მიერ აჭარის საზოგადოებრივი მაუწყებლის ეთერში გაკეთებულ და პარლამენტის ვიცე-სპიკერ გიორგი ვოლსკის მიერ ჟურნალისტენებისთვის მიცემულ კომენტარებს. „ხელისუფლების წარმომადგენლებსა და საჯარო პირებს მოვუწოდებთ, თავი შეიკავონ ქსენოფობიური და დისკრიმინაციული შინაარსის განცხადებების გაკეთებისგან და იხელმძღვანელონ კონსტიტუციით გარანტირებული რელიგიის თავისუფლების, კანონის უზენაესობისა და თანასწორუფლებიანობის პრინციპებით“, - ნათქვამია “არა-ფობიას!” წევრი ორგანიზაციების მიერ გავრცელებულ განცხადებაში.  სრულად...  წყარო: http://www.humanrights.ge

თბილისი. საქართველოს სახალხო დამცველი უერთდება საქართველოს პრეზიდენტის მიერ კონკრეტულ პირთა შეწყალებასთან დაკავშირებით საზოგადოებაში გაჩენილ კრიტიკას და მოუწოდებს საქართველოს პრეზიდენტს, შეწყალების უფლებამოსილების გამოყენების პროცესში უზრუნველყოს მაქსიმალური გამჭვირვალობა და საზოგადოებრივი ჩართულობა. „საქართველოს სახალხო დამცველი განმარტავს, რომ შეწყალების დისკრეციული ბუნება არ გულისხმობს ყოველგვარი დასაბუთების გარეშე მისი გამოყენების უფლებას. შეწყალება მიზნად უნდა ისახავდეს კონკრეტული ამოცანის მიღწევას - იქნება ეს სახელმწიფო, პოლიტიკური, მართლმსაჯულების ინტერესიდან თუ განსაკუთრებული ინდივიდუალური გარემოებებიდან გამომდინარე.1 თითოეულ შემთხვევაში, მსგავსი საგამონაკლისო საშუალების გამოყენება საზოგადოებისთვის მაქსიმალურად აღქმადი და გასაგები უნდა იყოს“, - აღნიშნულია სახალხო დამცველის განცხადებაში. სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო მიიჩნევს, რომ 20 ივნისის შემდგომ მიმდინარე აქციების პროცესში საქართველოს პარლამენტის შენობაში შესვლის უფლება არაერთხელ შეეზღუდათ საქართველოს მოქალაქეებს, მათ შორის საქართველოს პარლამენტის წევრებს, ჟურნალისტებს და არასაპარლამენტო ოპოზიცის წარმომადგენლებს.  „პარლამენტის ღიაობა და გამჭვირვალობა აუცილებელია ქვეყნის დემოკრატიული განვითარებისათვის. მნიშვნელოვანია საქართველოს პარლამენტმა შეინარჩუნოს ღიაობისა და გამჭვირვალობის ის მიღწევები, რომელიც მაღალი სტანდარტის მაჩვენებელია და საერთაშორისო აღიარება აქვს მოპოვებული“, - აღნიშნულია ორგანიზაციის მიერ გავრცელებულ განცხადებაში, - „მივმართავთ ღია მმართველობის მუდმივმოქმედ საპარლამენტო საბჭოს საპარლამენტო ღიაობისა და პარლამენტში გამჭვირვალე მმართველობის მონიტორინგის ფარგლებში შეისწავლოს და შეაფასოს 20 ივნისის შემდგომ პერიოდში პარლამენტის შენობაში მოქალაქეთა და პარლამენტის წევრთა შესვლის აკრძალვის ფაქტები“.  სრულად   წყარო: ორგანიზაციის ვებგვერდი

თბილისი. საქართველოს სახალხო დამცველმა სადაზღვევო კომპანია „არდის“ წინააღმდეგ ასაკის ნიშნით დისკრიმინაცია დაადგინა, ვინაიდან კომპანიამ 1943 წელს დაბადებულ ს. ხ.-ს და 1937 წელს დაბადებულ ა. გ.-ს სამოგზაურო დაზღვევაზე უარი უთხრა.  რეკომენდაციაში სახალხო დამცველმა აღნიშნა, რომ სადაზღვევო კომპანია „არდის" მიერ განმცხადებლებისთვის წერილობით მიწოდებული განმარტება სამოგზაურო დაზღვევის გაწევაზე უარის თქმის შესახებ, ასაკოვანი ადამიანების მიმართ არსებულ სტერეოტიპებს ეფუძნება. ამასთან, სადაზღვევო კომპანიების მსგავსმა ბლანკეტურმა მიდგომამ, შესაძლოა, მიუწვდომელი გახადოს ხანდაზმული ადამიანებისთვის სამოგზაურო დაზღვევა, რაც, თავის მხრივ, მიმოსვლის თავისუფლების უფლებაში ჩარევასაც გულისხმობს.  სრულად  წყარო: ორგანიზაციის ვებგვერდი

თბილისი. ადამიანის უფლებათა ცენტრი მოუწოდებს საქალაქო სასამართლოს, არ შეუზღუდოს ზაზა სარალიძის ადვოკატს სასამართლო პროცესებზე დასწრება. „12 სექტემბერს გამართულ სასამართლო სხდომაზე, სადაც ზაზა სარალიძე დაკითხვაზე იმყოფებოდა მოწმის სტატუსით, სასამართლომ არ გაითვალისწინა დაზარალებულის თხოვნა და სხდომაზე არ დაუშვა მისი ადვოკატი. შესაბამისად, ადამიანის უფლებათა ცენტრის იურისტს არ მიეცა შესაძლებლობა დასწრებოდა მისი დაცვის ქვეშ მყოფი დაზარალებულის - ზაზა სარალიძის დაკითხვას, რომელიც აღნიშნული სისხლის სამართლის საქმის სამართალწარმოების ყველა ეტაპზე წარმოადგენს მას როგორც სხვადასხვა სახელმწიფო უწყებაში, ასევე სასამართლოში,“ - ვკითხულობთ ორგანიზაციის მიერ გავრცელებულ განცხადებაში, - „ადამიანის უფლებათა ცენტრი მოუწოდებს ქალაქ თბილისის საქალაქო სასამართლოს, უზრუნველყოს დაზარალებულის უფლებების დაცვა, საქართველოს მოქმედი კანონმდებლობისა და საერთაშორისო სტანდარტების შესაბამისად და არ შეუზღუდოს დაზარალებულის ადვოკატს მომდევნო პროცესებზე დასწრების შესაძლებლობა“. სრულად  წყარო: გვერდი სოციალურ ქსელში

გურია. საქართველოს ახალგაზრდა იურისტთა ასოციაციის ინფორმაციით, ოზურგეთის რაიონულმა სასამართლომ ,,გააღვიძე ოლიგარქის“ აქციის მონაწილეები ხმაურის გამო სამართალდამრღვევებად მიიჩნია და სიტყვიერი გაფრთხილება გამოუცხადა, რაც გამოხატვის თავისუფლების საშიშ შეზღუდვას წარმოადგენს.  „ამ გადაწყვეტილებით იქმნება გამოხატვის თავისუფლების შინაარსობრივი შეზღუდვის საშიში პრეცედენტი. ოზურგეთის რაიონული სასამართლო განსაზღვრავს საკითხებს, რომელზე პროტესტის გამოთქმა არ არის შეკრებისა და გამოხატვის თავისუფლებით დაცული. ამით სახელმწიფო ფაქტობრივად ეუბნება მოქალაქეს, თუ რა საკითხებზე ილაპარაკოს და რა იდეებისა და მოსაზრების გამოხატვისაგან შეიკავოს თავი იმისათვის, რათა არ დაეკისროს სამართლებრივი პასუხისმგებლობა, რაც გამოხატვის თავისუფლების შინაარსობრივ რეგულირებას წარმოადგენს“, - ნათქვამია საია-ს მიერ გავრცელებულ განცხადებაში.  სრულად  წყარო: ორგანიზაციის ვებგვერდი

თბილისი. სახალხო დამცველმა „საქართველოს უნივერსიტეტში“ სტუდენტების ჯგუფებში გადანაწილების პრაქტიკა აკადემიური მოსწრების ნიშნით დისკრიმინაციულად მიიჩნია.  „საქართველოს უნივერსიტეტში“ არსებული პრაქტიკის თანახმად, 2-ზე დაბალი GPA-ს მქონე სტუდენტებს საგნების არჩევა-რეგისტრაციის პერიოდში არ ეძლევათ შესაძლებლობა, აირჩიონ ყველა შემოთავაზებული სალექციო ჯგუფი და დრო, ხოლო, 2-ზე მაღალი GPA-ს მქონე სტუდენტებს, მსგავსი შეზღუდვა არ აქვთ. პირველი სემესტრის სტუდენტების შემთხვევაში ამგვარი დაყოფა ერთიანი ეროვნული გამოცდების შედეგების მიხედვით ხდება. მოპასუხის პოზიციის თანახმად, ამგვარი დაყოფის მიზანი სწავლის ხარისხის გაუმჯობესებაა“, - აღნიშნავს სახალხო დამცველი, - „სახალხო დამცველმა „საქართველოს უნივერსიტეტს“ მიმართა, სწავლების ყველა საფეხურსა და ყველა ფაკულტეტზე გაუქმდეს დიფერენცირებული სალექციო ჯგუფები, რაც ითვალისწინებს 2-ზე ნაკლები და 2-ზე მეტი GPA-ს მქონე სტუდენტებისთვის (პირველი სემესტრის სტუდენტების შემთხვევაში ერთიანი ეროვნული გამოცდების შედეგების მიხედვით) სალექციო კურსების არჩევასთან დაკავშირებულ შეზღუდვებს“. სრულად  წყარო: ორგანიზაციის ვებგვერდი