სამეგრელო. ომბუდსმენმა ზუგდიდის მუნიციპალიტეტის მოსწავლე-ახალგაზრდობის სასახლეს შრომითსამართლებრივ ურთიერთობაში პოლიტიკური შეხედულების ნიშნით დისკრიმინაციის აღმოფხვრის შესახებ რეკომენდაციით მიმართა. „მოსწავლე-ახალგაზრდობის სასახლის ადმინისტრატორ-კოორდინატორი თანამდებობიდან ეპიდემიოლოგიური ვითარების გაუარესების გამო გაათავისუფლეს; მოპასუხე მხარის განმარტებით, მუშაობის დისტანციურ რეჟიმზე გადასვლა შეუძლებელს ხდიდა, რომ განმცხადებელს მასზე დაკისრებული ვალდებულებები შეესრულებინა. განმცხადებელი კი მიუთითებდა, რომ შრომითი ხელშეკრულების ვადაზე ადრე შეწყვეტა განპირობებული იყო მისი პოლიტიკური აქტივობით პარტიაში „საქართველოსთვის“ და რომ დამსაქმებელმა ვადაზე ადრე ხელშეკრულება მხოლოდ მასთან შეწყვიტა“. სრულად... წყარო: ombudsman.ge

თბილისი. სახალხო დამცველმა პოლიტიკური ნიშნით სავარაუდო დისკრიმინაციასთან დაკავშირებულ საქმეზე თბილისის საქალაქო სასამართლოს სასამართლო მეგობრის მოსაზრება წარუდგინა.  სრულად... წყარო: ombudsman.ge

თბილისი. ფონდი „ტასო“ გთავაზობთ, მონაწილეობა მიიღოთ ქალთა დღისადმი მიძღვნილ გლობალურ კამპანიაში - #დაამსხვრიესტერეოტიპები. „დააკოპირე ეს პოსტი და სოლიდარობის ნიშნად, ატვირთე შენი ფოტო გადაჯვარედინებული ხელებით, ან გააზიარე სპეციალურად კამპანიისთვის შექმნილი პოსტერი. მონიშნე ხუთი მეგობარი და გამოიწვიე, რომ ჩაერთოს კამპანიაში“. სრულად... წყარო: ორგანიზაციის გვერდი სოციალურ ქსელში

შიდა ქართლი. ასოციაცია „ანიკამ” პროექტის „შეზღუდული შესაძლებლობის მქონე პირთა თანამშრომლობა კანონის საშუალებით უფლებების დასაცავად“ ადვოკატირების კამპანიის ფარგლებში, შიდა ქართლში ადგილობრივ მოსახლეობასა და მუნიციპალიტეტების წარმომადგენლებთან შეხვედრები გამართა. „შეხვედრების მიზანი იყო პროექტის ფარგლებში, კვლევის შედეგად გამოკვეთილი საჭიროებების პრეზენტაცია, სახელმძღვანელოს გაცნობა, ფოკუს ჯგუფებთან კონსულტაციები და საჭიროებების შესაბამისად მუნიციპალიტეტებთან სამომავლო გეგმების განხილვა“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ინფორმაციით, ევროპულმა სასამართლომ 2008 წლის ომთან დაკავშირებით რუსეთის წინააღმდეგ ინდივიდუალური საჩივრების განხილვა დაიწყო. „როგორც საზოგადოებისთვის ცნობილია, საქართველოს ახალგაზრდა იურისტთა ასოციაცია ადამიანის უფლებათა ევროპული სასამართლოს წინაშე იცავს 2008 წლის აგვისტოს ომის დროს 350-ზე მეტ დაზარალებულ ადამიანს. საიას ჯამში 53 საჩივარი აქვს წარდგენილი, რომელიც ომის დროს რუსეთის ფედერაციის მხრიდან ევროპული კონვენციით გათვალისწინებული სხვადასხვა უფლების დარღვევას შეეხება“. სრულად... წყარო: gyla.ge

თბილისი. სახალხო დამცველმა „აიბი მთიების“ დირექტორს შრომით ურთიერთობებში ორსულობის ნიშნით დისკრიმინაციის დადგენის შესახებ რეკომენდაციით მიმართა. „კერძო სკოლის, „აიბი მთიების“ ისტორიის მასწავლებელს, მას შემდეგ, რაც მან თავისი ორსულობის შესახებ დამსაქმებელს შეატყობინა და ორსულობის, მშობიარობისა და ბავშვის მოვლის გამო შვებულებით დროებით სარგებლობა ითხოვა, რამდენიმე დღეში აცნობეს, რომ სამსახურში აღარ გამოცხადებულიყო. აღნიშნული გადაწყვეტილების მიზეზად განმცხადებელს მისი სწავლების მეთოდებთან დაკავშირებით მოსწავლეთა მშობლების უკმაყოფილება დაუსახელეს“. ომბუდსმენმა აღნიშნა, რომ „აიბი მთიების“ მიერ, შრომითი ურთიერთობის გაგრძელებაზე უარი განმცხადებლის ორსულობით იყო განპირობებული და მოპასუხეს მოუწოდა, მომავალში თავი შეიკავოს შრომით ურთიერთობებში ორსულობის თუ სხვა ნიშნით დისკრიმინაციული მოპყრობისგან და საქმიანობის განხორციელებისას იხელმძღვანელოს თანასწორობის პრინციპების უპირატესი დაცვით.  სრულად... წყარო: ombudsman.ge

თბილისი. სოციალური სამართლიანობის ცენტრი აქვეყნებს გიორგი ჯოჯიშვილის ვიდეოს. გიორგი იმ ვიდეოჩანაწერის ავტორია, რომელშიც პოლიციელის მიერ არასრულწლოვან შშმ პირზე ძალადობის ფაქტია ასახული. „გიორგი ამბობს, რომ ვიდეოს გავრცელებით მეგობრის დაცვა და, მეორე მხრივ, საზოგადოებისთვის სიმართლის თქმა უნდოდა. ნახეთ ვიდეო, სადაც გაიცნობთ გიორგი ჯაჯოშვილს და მოისმენთ მის პირად ისტორიასა და გამოცდილებებს“. სრულად... წყარო: ორგანიზაციის გვერდი სოციალურ ქსელში

ქვემო ქართლი. სოციალური სამართლიანო ის ცენტრის ინფორმაციით, 2 თებერვალს ქვემო ქართლში მომუშავე აზერბაიჯანულენოვანმა რეგიონალურმა მედია ორგანიზაციამ, interpress.ge-მ გაავრცელა ინფორმაცია, სადაც მარნეულის მკვიდრი, მალიქ აღაევი აცხადებს, რომ მარნეულის იუსტიციის სახლის ეთნიკურად აზერბაიჯანელი თანამშრომლები ადგილობრივ მოსახლეობას მათთვის გასაგებ ენაზე არ ესაუბრებიან. ორგანიზაცია მოუწოდებს საქართველოს იუსტიციის სამინისტროს სერვისების განვითარების სააგენტოს, ცენტრალური ხელისუფლების სხვა რეგიონულ სამსახურებს და მუნიციპალურ ორგანოებს, შექმნას თარგმნის რესურსები არადომინანტური ეთნიკური ჯგუფების წარმომადგენელი მოქალაქეებისთვის, რათა მათთვის სერვისების მიწოდების პროცესში, არ მოხდეს მათი სპეციალური საჭიროებების და კონტექსტის უგულებელყოფა და არ დაუშვან ამ ადამიანების არათანაბარ მდგომარეობაში ჩაყენება და მათი უფლებების დარღვევა. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) საკონსტიტუციო სასამართლოს მოუწოდებს, 2022 წლის პირველ მარტამდე, სახელმწიფო ინსპექტორის უფლებამოსილების შეწყვეტამდე განიხილოს ლონდა თოლორაიას სარჩელი და მასში არსებული შუამდგომლობა სადავო ნორმების მოქმედების შეჩერების შესახებ. სრულად... წყარო: gyla.ge

შიდა ქართლი. გაეროს ქალთა ორგანიზაციის წარმომადგენელი საქართველოში კაორი იშიკავა გორის კრიზისული ცენტრის საქმიანობას გაეცნო და მის მდგრადობასთან დაკავშირებული გეგმები და შესაძლებლობებიც განიხილა. „ცენტრი ძალადობის მსხვერპლებსა და ძალადობაგამოვლილ პირებს ფსიქოლოგიურ, სოციალურ და ეკონომიკურ დახმარებას, სარეაბილიტაციო, სამედიცინო, იურიდიულ და რეფერალურ მომსახურებებს სთავაზობს“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველის აპარატმა მოამზადა კვლევა, სადაც შეფასებულია ახალი კორონა ვირუსის პანდემიის გავლენა ჯანდაცვის სექტორში დასაქმებულ ქალთა უფლებრივ მდგომარეობაზე, როგორც დასაქმების ადგილზე ისე სოციალურ ცხოვრებაში... აღნიშნული საჭიროებების შესასწავლად ჩატარდა მცირემასშტაბიანი კვლევა, რომლის ფარგლებშიც, სატელეფონო წესით, ჯანდაცვის სექტორში დასაქმებული 90 ქალი გამოიკითხა. რესპონდენტებს შორის იყვნენ როგორც ექთნები, ისე ექიმები. სრულად... წყარო: ორგანიზაციის ვებგვერდი

თბილისი. პარტნიორობა ადამიანის უფლებების (PHR) და მშობლის მიმართვით, შინაგან საქმეთა სამინისტროში გამოძიება დაიწყო სურსათის მაღაზიაში არასრულწლოვნების მიმართ განხორციელებულ იძულების ფაქტზე. ორგანიზაციის მიერ გავრცელებული ინფორმაციით, მაღაზიაში ტკბილეულის საყიდლად შესულ ბავშვებს თანამშრომლებმა ტკბილეულის მოპარვა დააბრალეს.  „მაღაზიის თანამშრომლებმა ბავშვებს უთხრეს რომ უსაფრთხოების თანამშრომლის მოსვლამდე არსად გასულიყვნენ. ბავშვები ეკითხებოდნენ მაღაზიის თანამშრომლებს, როდის გაუშვებდნენ, თუმცა მაღაზიის თანამშრომლები არ პასუხობდნენ. თანამშრომლების მხრიდან იგნორირების გამო ერთ-ერთმა ბავშვმა თავში ხელების დარტყმა და ყვირილი დაიწყო“. სრულად... წყარო: phr.ge

თბილისი. ორგანიზაციის პარტნიორობა ადამიანის უფლებებისთვის (PHR) მოთხოვნის საფუძველზე განისაზღვრა, რომ ყრუ და სმენადაქვეითებული პირებისთვის საგანმანათლებლო და სამედიცინო მომსახურების მიწოდების პროცესში, კომუნიკაციის მიზნით, გამოყენებულ უნდა იქნეს გამჭვირვალე პირბადე ან/და სახის ფარი (თუ შესაძლებელია უსაფრთხო დისტანციის დაცვა). სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ინფორმაცით, ორგანიზაცია იცავს იმ პირის ინტერესებს, რომელთან დაკავშირებითაც სავარაუდოდ უკანონოდ არის მოპოვებული კერძო კომუნიკაციის ამსახველი ჩანაწერები. „საიამ აღნიშნული პირის დაზარალებულად ცნობის მოთხოვნით მიმართა საგამოძიებო უწყებას, რაც მიუხედავად პროცესუალური წინაპირობების არსებობისა, 2022 წლის 28 იანვარს არ დაკმაყოფილდა. ორგანიზაცია პირის დაზარალებულად ცნობაზე უარის თქმის დადგენილებას უახლოეს დღეებში სასამართლოში გაასაჩივრებს“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, ჟურნალისტური ეთიკის ქარტიამ ორგანიზაციის საჩივარი დააკმაყოფილა და დაადგინა, რომ ტელეკომპანია „იმედის" ჟურნალისტებმა ნათია სონღულაშვილმა, ლევან კვატაშიძემ, ლევან ჯავახიშვილმა, ხატია ქვათაძემ და ნინო თოლორდავამ დაარღვიეს ქარტიის 1-ლი და მე-11 პრინციპი. სრულად... წყარო: www.qartia.ge

შიდა ქართლი. საქართველოს ახალგაზრდა იურისტთა ასოციაციის გორის ოფისის იურისტების დახმარებით მოქალაქემ სასამართლო დავა მოიგო. „დასაქმებული სამოქალაქო რეესტრის სააგენტოს ახალციხის სამსახურში 2006 წლიდან მუშაობდა. 2020 წელს რეორგანიზაციის გამო ისე გაათავისუფლეს, რომ არც საშტატო ნუსხა და არც შრომის კოდექსით გათვალისწინებული წერილობითი დასაბუთება სამსახურიდან გათავისუფლების თაობაზე არ გადასცემია. მოსარჩელე ითხოვდა გათავისუფლების ბრძანების ბათილად ცნობას, სამსახურში აღდგენას და იძულებითი განაცდურის ანაზღაურებას. სამივე ინსტანციის სასამართლომ მიიჩნია, რომ სამსახურიდან გათავისუფლება არ შეესაბამებოდა კანონის მოთხოვნებს, შესაბამისად, სარჩელი სრულად დაკმაყოფილდა“. სრულად... წყარო: gyla.ge

თბილისი. 30 იანვარს, ღამით მინდელის შახტაში მომხდარი აფეთქების შედეგად ერთი დასაქმებული გარდაიცვალა, ხოლო ცხრა კი დაშავდა. ომბუდსმენი ღრმა მწუხარებას გამოთქვამს მომხდარის გამო, უსამძიმრებს დაღუპულის ოჯახს და დაშავებულებს მალე გამოჯანმრთელებას უსურვებს. „სახალხო დამცველი მოუწოდებს საქართველოს შინაგან საქმეთა სამინიტროს და შრომის ინსპექციას, განხორციელდეს დროული და ეფექტიანი რეაგირება მომხდარზე, მათ შორის დადგინდეს ტრაგედიის მიზეზები, რათა მომავალში მსგავსი შემთხვევების თავიდან არიდება შევძლოთ. ასევე მიმართავს შრომის ინსპექციას - მიმდინარე ინსპექტირების ფარგლებში მოხდეს ყველა დარღვევის და რისკის იდენტიფიცირება და მათი გამოსწორების მიზნით ყველა კანონმდებლობით მინიჭებული ბერკეტის გამოყენება“. სრულად... წყარო: ombudsman.ge

სამეგრელო. სამართლიანი არჩევნების (ISFED) ინფორმაციით, ორგანიზაცია ზუგდიდის მოსწავლე-ახალგაზრდობის სასახლიდან პოლიტიკური ნიშნით გათავისუფლებული თანამშრომლის უფლებებს დაიცავს. „ზუგდიდის მუნიციპალიტეტის „მოსწავლე-ახალგაზრდობის სასახლის“ მატერიალურ-ტექნიკურ საკითხთა განყოფილების უფროსი, თამარ ქომეთიანი აცხადებს, რომ სამსახურიდან გათავისუფლების მიზნით, მიზანმიმართულად დევნიდნენ და ხელოვნურად შეუქმნეს გათავისუფლების საფუძველი. ქომეთიანის პოლიტიკური დევნა მას შემდეგ დაიწყო, რაც პარტია „საქართველოსთვის“ მხარდაჭერა გამოუცხადა და თავისი პოლიტიკური შეხედულებები გაასაჯაროა“. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაციის ინფორმაციით, პაციენტმა, რომლის ინტერესებსაც სასამართლოში ორგანიზაციის გორის ოფისი იცავდა, გიორგი აბრამაშვილის სახელობის სამხედრო ჰოსპიტალს სასამართლო დავა მოუგო. „სასამართლომ სამედიცინო დაწესებულებას პაციენტის სასარგებლოდ სამედიცინო მომსახურების ხარჯების და მორალური ზიანის ანაზღაურება დააკისრა“. სრულად... წყარო: gyla.ge

თბილისი. სახალხო დამცველმა შრომით ურთიერთობაში სექსუალური შევიწროების ფაქტი დაადგინა და შემავიწროებელს და ასევე დამსაქმებელ შპს „ევოლუშენ ჯორჯიას“ რეკომენდაციით მიმართა.  „ომბუდსმენმა შეისწავლა საქმეში არსებული მასალები, მათ შორის, განმცხადებლის გამოკითხვის ოქმი, მხარეთა შორის არსებული მიმოწერა, ასევე მესამე პირისგან მიღებული ინფორმაცია და მივიდა დასკვნამდე, რომ კოლეგის მხრიდან ადგილი ჰქონდა განმცხადებლის მიმართ არასასურველ, სექსუალური ხასიათის ვერბალურ ქცევას, რომელმაც დაამცირა და შეურაცხყოფა მიაყენა დასაქმებულს“.  სრულად... წყარო: ombudsman.ge

თბილისი. ღირსეული შრომის პლატფორმის წევრი ორგანიზაციები მწუხარებას გამოთქვამენ მეშახტის გარდაცვალების გამო და სახელმწიფოს მოუწოდებენ დაუყოვნებლივ გამოიკვლიოს მომხდარი ინციდენტის გამომწვევი მიზეზები და დააყენოს კომპანიის შესაბამისი მაღალი თანამდებობის პირთა პასუხისმგებლობის საკითხი. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი, სამართლიანი არჩევნებისა და დემოკრატიის საერთაშორისო საზოგადოება (ISFED) და საქართველოს ახალგაზრდა იურისტთა ასოციაცია (Gyla) კულტურის მინისტრის მიერ გათავისუფლებული თანამშრომლების ინტერესებს დაიცავენ. „კულტურული მემკვიდრეობის დაცვის ეროვნული სააგენტოსა და საქართველოს ეროვნული მუზეუმიდან, ამ ეტაპზე, ჯამში 70-მდე თანამშრომელი გათავისუფლდა. ხოლო ათობით გამორჩეული თანამშრომელი გათავისუფლების შიშის ქვეშ აგრძელებს მუშაობას სხვადასხვა პოზიციებზე ამავე სისტემაში. მინისტრ წულუკიანს მოვუწოდებთ შეწყვიტოს კულტურის სფეროს მაღალპროფესიონალი კადრების დევნა მათი პროფესიული და განსხვავებული მოსაზრებების გამო და გაითვალისწინოს გათავისუფლებული თანამშრომლების ორგანიზებული წინააღმდეგობის მოთხოვნა, შესაბამისი კომპეტენციისა და გამოცდილების ადამიანებს მიეცეს საშუალება, გააგრძელონ მუშაობა საქართველოს კულტურული მემკვიდრეობის ძეგლების, სამუზეუმო ექსპონატებისა და ეროვნული საგანძურის დასაცავად“, ნათქვამია განცხადებაში. განცხადება იხ. ბმულზე... წყარო: socialjustice.org.ge