აჭარა. პროექტის „სამოქალაქო საზოგადოების ინიციატივის“ ფარგლებში, მიმდინარე წლის მარტის თვეში გაიმართა მოსახლეობასთან შეხვედრები, ქედის მუნიციპალიტეტის სოფელ ხარაულასა და ქობულეთის მუნიციპალიტეტის სოფელ ლეღვაში.  სოფლის მაცხოვრებლებს შეზღუდული შესაძლებლობების მქონე ქალთა ალიანსის წარმომადგენელი, დეა ერემაშვილი შეხვდა. ადგილობრივებს მიეწოდათ ინფორმაცია ორგანიზაციის საქმიანობაზე და იმ სერვისებზე, რომელსაც შშმ ქალთა ალიანსი სთავაზობს ბენეფიციარებს. აჭარის რეგიონული ჰაბი ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში შეიქმნა. სრულად... წყარო: ორგანიზაციის გვერდი სოციალურ ქსელში

კახეთი. 29 მარტს, ადამიანის უფლებათა ცენტრის წარმომადგენლები თელავის მუნიციპალიტეტის საჯარო მოხელეებს შეხვდნენ. ორგანიზაციის აღმასრულებელმა დირექტორმა ალეკო ცქიტიშვილმა შეხვედრის მონაწილეებს გააცნო ადამიანის უფლებათა ცენტრის ანგარიში - „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“, რომელიც საქართველოში ბრიტანეთის საელჩოს ფინანსური მხარდაჭერით გამოქვეყნდა. სრულად... წყარო: www.humanrights.ge

თბილისი. გავრცელებული ცნობით, ირმა ბოლო 20 წელია თბილისის ერთ-ერთ უბანში, მცირე ზომის სარდაფში თავის მეგობარ ძაღლთან ერთად ცხოვრობს და ეზოში 10-მდე მიუსაფარ კატას უვლის.  2022 წლის 28 მარტს, სოციალურ ქსელში ხალხმა წუხილი გამოთქვა ირმას გაუჩინარების შესახებ. 2022 წლის 29 მარტს, სოციალურ ქსელში გავრცელდა ინფორმაცია, რომ ირმა ხონის ფსიქიკური ჯანმრთელობის ეროვნულ ცენტრში (ე.წ. ხონის ფსიქიატრიულში) გადაიყვანეს ქურდობის ბრალდებით. ამავე დღეს, ორგანიზაცია „პარტნიორობა ადამიანის უფლებებისთვის“ (PHR) საქმეში ჩაერთო. PHR-ის ადვოკატებს მიაჩნიათ, რომ ირმას ფსიქიატრიულ დაწესებულებაში მოთავსება უკანონოა და მისი იძულებითი მკურნალობის საფუძვლები არ არსებობს. შესაბამისად, PHR მოითხოვს ირმას დაუყვნებლივ გათავისუფლებას და ამ მიზნით განახორციელებს შესაბამის სამართლებრივ ქმედებებს. სრულად... წყარო: phr.ge

თბილისი. საქართველოს ახალგაზრდა იურისტთა ასოციაციამ (საია) გოირგი გოგოშიძისა და ინდიკო აბაშიძის სახელით საკონსტიტუციო სასამართლოს მიმართა. ორგანიზაცია აკადემიური თანამდებობისთვის დადგენილ საპენსიო ასაკს ასაჩივრებს.  სრულად... წყარო: gyla.ge

თბილისი. „კოალიცია თანასწორობისთვის“ აქვეყნებს ანგარიშს: სოციალური დაცვის სისტემის ძირითადი გამოწვევები სხვადასხვა დაუცველი ჯგუფებისათვის საქართველოში. „ეს ანგარიში ცენტრალური და ადგილობრივი ხელისუფლების მიერ ადმინისტრირებული სოციალური დაცვის პროგრამებისა და სოციალური დაცვის პოლიტიკის კრიტიკაა სხვადასხვა მოწყვლად ჯგუფებთან მიმართებით. სოციალური სამართლიანობის ცენტრმა, პარტნიორ ორგანიზაციებთან ერთად დააიდენტიფიცირა ის ძირითადი გამოწვევები, რაც შშმ პირთა სოციალური დაცვის მიმართულებით არსებობს და სახელმწიფო უწყებებისათვის შესაბამისი რეკომენდაციები მოამზადა“. სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველომ” შეაფასა 2020 წლის 21 მარტიდან, 2021 წლის 31 დეკემბრის ჩათვლით - პანდემიის მართვასთან დაკავშირებით პარლამენტის მიერ მთავრობის საქმიანობაზე განხორციელებული ზედამხედველობა და მისი შედეგები, იმ გადაწყვეტილების პირობებში, რომლის ფარგლებშიც საკანონმდებლო ორგანომ ადამიანის უფლებათა შეზღუდვის უფლებამოსილება მთავრობას გადასცა. ორგანიზაციის შეფასებით, „კოვიდპანდემიის პერიოდში საქართველოს პარლამენტმა მთავრობის საქმიანობის ეფექტური კონტროლი ვერ განახორციელა. ნათლად გამოიკვეთა ყველა ის პრობლემა, რაც ზოგადად, საქართველოში, საპარლამენტო ზედამხედველობას ახასიათებს. პანდემიასთან და მის თანმდევ პრობლემებთან დაკავშირებით, ქვეყნისთვის კრიზისულ ვითარებაში, პარლამენტმა ვერ შეძლო სრულფასოვნად განეხორციელებინა საპარლამენტო კონტროლი“. სრულად... წყარო: transparency.ge

თბილისი. სოციალური სამართლიანობის ცენტრი ეხმაურება პროპუტინისტური, ექსტრემისტული პოლიტიკური პარტია კონსერვატიული მოძრაობისა და ალტ-ინფოს მხარდამჭერების მიერ ქობულეთში უკრაინის სოლიდარობის აქციის მონაწილეების მიმართ გამოვლენილი ძალადობის, დევნის ფაქტებს. ორგანიზაცია მოუწოდებს შსს-ს უზრუნველყოს მომხდარის დროული გამოძიება, თავდამსხმელების იდენტიფიცირება და სისხლისსამართლებრივი პასუხისმგებლობის დაკისრება. სრულად... წყარო: socialjustice.org.ge ფოტო: ნეტგაზეთი

თბილისი. საფარის ინფორმაციით, ოთხი თვის წინ გაეროს ქალთა უფლებების კომიტეტმა ხანუმ ჯეირანოვას დაადგინა, რომ საქართველომ ვერ უზრუნველყო გამოძიება და სამართლებრივი დევნა ქალის მიმართ გენდერული ნიშნით და ღირსების სახელით ჩადენილ ძალადობასთან დაკავშირებით, რომელიც სასტიკად სცემეს ოჯახის წევრებმა მცირეწლოვანი შვილების თვალწინ, რამაც მისი სიკვდილი გამოიწვია. კომიტეტის გადაწყვეტილება სრულად, ქართულ ენაზე შეგიძლიათ იხილოთ თანდართულ დოკუმენტში. სრულად... წყარო: sapari.ge

თბილისი. დასრულდა ტრენინგების სერია თემაზე: „ქალთა უფლებები და გენდერული თანასწორობა“, რომელსაც „ქალთა ეკონომიკური გაძლიერების“ პროექტში ჩართული 200-ზე მეტი ქალი დაესწრო. ტრენინგები შეეხებოდა ისეთ საკითხებს, როგორიცაა: სქესი, გენდერი, გენდერული იდენტობა, გენდერული ნორმები და სოციალიზაცია, გენდერული სტერეოტიპები და სექსუალური შევიწროება. აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა გამოქვეყნა კვლევა: შეზღუდული შესაძლებლობის მქონე ქალებისა და გოგოების საჭიროებებისა და მათი უფლებების დაცვის მდგომარეობის შეფასება საქართველოში. „კვლევის შედეგები ცხადყოფს, რომ შშმ ქალებისა და გოგოების უფლებების დაცვა, პოლიტიკის დონეზე, არ არის პრიორიტეტული მიმართულება. გარკვეული პოზიტიური ცვლილებები, რაც შშმ პირთა უფლებების დაცვის სტანდარტების გაუმჯობესების მიმართულებით შესაბამისი რეგულაციებისა თუ პროგრამების შექმნაში გამოიხატება, შშმ ქალებისა და გოგოების უფლებების დასაცავად ეფექტიან გზად ვერ ჩაითვლება. ეს მიდგომები და პროგრამები ვერ ხედავენ შშმ ქალებისა და გოგოების საჭიროებებს, რომელიც უმეტესად, შესაძლოა, განსხვავდებოდეს შშმ კაცების საჭიროებებისგან“. ანგარიში მომზადდა ომბუდსმენის აპარატის მიერ, გაეროს ქალთა ორგანიზაციასთან თანამშრომლობით „კარგი მმართველობა გენდერული თანასწორობისთვის“ პროექტის ფარგლებში, რომელიც ნორვეგიის საგარეო საქმეთა სამინისტროს მხარდაჭერით ხორციელდება. სრულად... წყარო: ombudsman.ge

თბილისი. „სხვა კუთხის“ მორიგი ეპიზოდი ეხება საქართველოს აზერბაიჯანელებს, მათ კულტურას, უახლეს ისტორიას და მათი პოლიტიკური, ეკონომიკური და კულტურული პერიფერიალიზაციის საკითხს. „რა ვიცით საქართველოს აზერბაიჯანელების შესახებ და რა არის პრობლემური ჩვენს ამ ცოდნასა და წარმოდგენებში? რა არ ვიცით ამ თემის შესახებ და როგორ ცდილობენ ახალგაზრდა მკვლევრები და აქტივისტები ცოდნის ამ სიცარიელის გარღვევას, ამოვსებას თვითორგანიზებისა და ფიქრის უნიკალური პროცესებით? რა ისტორიულმა ფაქტორებმა, იმპერიულმა და ნაციონალისტურმა პოლიტიკამ განაპირობა ეთნიკური უმცირესობების არაღიარების ამ გარემოს შექმნა და რა შეგვიძლია და რა უნდა მოვითხოვოთ დღეს?! სწორედ ესაა ის მთავარი კითხვები, რომელზეც ინტერვიუში სოციალური სამართლიანობის ცენტრის თანასწორობის პოლიტიკის პროგრამის დირექტორი თამთა მიქელაძე კავკასიოლოგთან, კულტურის მკვლევართან ელნურ ალისოისთან ერთად საუბრობს“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია ეხმიანება რადიკალური და პრორუსული ჯგუფის მხრიდან მუქარისა და ძალადობის ბოლოდროინდელ შემთხვევებს. ორგანიზაცია მოუწოდებს საგამოძიებო ორგანოებს: დროული და ეფექტიანი რეაგირება მოახდინონ აგრესიული ჯგუფის მხრიდან მუქარისა და ძალადობის შემთხვევებზე; სათანადო ზომები გაატარონ მუქარისა და ძალადობის ადრესატი პირების უსაფრთხოების დასაცავად; გააკეთონ მკაფიო განცხადება, რომ ძალადობრივი ჯგუფების ქმედებები არ დარჩება დაუსჯელი. სრულად... წყარო: gyla.ge

შიდა ქართლი და გურია. შეზღუდული შესაძლებლობის მქონე პირთა სექსუალური და რეპროდუქციული უფლებების შესახებ ცნობიერების ამაღლებისა და სტერეოტიპული დამოკიდებულების აღმოფხვრის მიზნით, PHR-ის იურისტები გორსა და ოზურგეთში შშმ ქალების მშობლებს შეხვდნენ. „შშმ ქალები, ისევე როგორც მათი მშობლები განიცდიან ინფორმაციის ნაკლებობას, როგორც ზოგადად, ასევე სექსუალური საჭიროებებისა და სრჯ უფლებების შესახებ“. შეხვედრა შესაძლებელი გახდა პროექტ „Supporting women with disabilities in being, doing and becoming independent” ფარგლებში, რომელსაც ახორციელებს ორგანიზაცია „პარტნიორობა ადამიანის უფლებებისთვის - PHR”, RFSU-ს (Swedish Association for Sexuality Education) ფინანსური მხარდაჭერით. სრულად... წყარო: phr.ge

თბილისი. რასობრივი დისკრიმინაციის აღმოფხვრის საერთაშორისო დღესთან, 21 მარტთან დაკავშირებით, ტოლერანტობისა და მრავალფეროვნების ცენტრი (TDI)  კვლევას აქვეყნებს.  „რასობრივი გამორჩევა საქართველოში - საპოლიციო სისტემაში ეთნიკური უმცირესობებისა და მიგრანტების მიმართ არსებული პოლიტიკა და პრაქტიკა“ - ასე ეწოდება კვლევას. სრულად... „რასობრივი გამორჩევა (racial profiling) გულისხმობს სამართალდამცველების დისკრიმინაციულ და სტერეოტიპულ ქმედებებს, როდესაც პირის მიმართ ეჭვი უჩნდებათ მისი კულტურული, ეთნიკური, ეროვნული, რელიგიური კუთვნილების ან კანის ფერის გამო“. წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ცენტრი შეშფოთებულია ეთნიკური შეუწყნარებლობის მოტივით მოკლული უფლებადამცველის, ვიტალი საფაროვის ოჯახის წევრების მიმართ სოციალურ ქსელ ფეისბუკში გახშირებული თავდასხმის ფაქტების გამო. „ბოლო პერიოდში ვიტალი საფაროვის ოჯახის წევრების მისამართით სოციალურ ქსელ ფეისბუკში სხვადასხვა ყალბი ან რეალური პროფილის მფლობელი პირები ინტენსიურად პოსტავენ ფაშისტური და ქსენოფობიური შინაარსის, სიძულვილის ენის, მუქარის შემცველ ტექსტებს... სასიცოცხლოდ მნიშვნელოვანია, სამართალდამცავმა ორგანოებმა დაუყოვნებლივ, მიუკერძოებლად და ობიექტურად გამოიძიონ როგორც საფაროვის ოჯახის წევრების მიმართ განხორციელებული თავდასხმის ფაქტები, ისე ყველა სხვა მსგავსი შემთხვევა, რათა მოხდეს მსგავსი შემთხვევების პრევენცია სამომავლოდ. მნიშვნელოვანია, ხელისუფლებამ მსგავს კანონსაწინააღმდეგო და ძალადობრივ ქმედებებზე, გაამკაცროს სისხლის სამართლის პოლიტიკა და ჩამოაყალიბოს კატეგორიული მიდგომა ამ დანაშაულებისადმი, რადგან დღეს არსებულმა სუსტმა პოლიტიკამ თავისი წვლილი შეიტანა ქსენოფობიური, ფაშისტური ჯგუფების გააქტიურებაში და სიძულვილის გაღვივებაში, რაც ამ და მსგავსი დანაშაულების პრევენციულ აღკვეთას არ/ვერ უზრუნველყოფს“, ნათქვამია მიმართვაში. სრულად... წყარო: www.hrc.ge

თბილისი. ტოლერანტობისა და მრავალფეროვნების ცენტრის ინფორმაციით, სამოქალაქო აქტივისტ სამირა ბაირამოვას მიმართ მუქარას კვლავ არ მოჰყოლია სახელმწიფოს ადეკვატური რეაგირება.  „როგორც დღეს გახდა ცნობილი, ამ ჯგუფებმა, სავარაუდოდ, უკვე დაიწყეს საკუთარი მუქარის სისრულეში მოყვანა. კიდევ ერთხელ მივმართავთ საქართველოს ხელისუფლებას, იმოქმედოს დაუყოვნებლივ, დაიცვას სამირა ბაირამოვას სიცოცხლე და ჯანმრთელობა, დააკავოს ძალადობრივი ალტ-ინფოსა და მისი „კონსერვატიული მოძრაობის” ლიდერები და ყველა ის პირი, რომელიც მონაწილეობს სამირა ბაირამოვას მიმართ ძალადობრივ მუქარასა და ქმედებებში“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი სრულ მხარდაჭერას და სოლიდარობას უცხადებს სამირა ბაირამოვას, რომელიც უკვე რამდენიმე დღეა ექსტრემისტული პოლიტიკური პარტიის „კონსერვატიული მოძრაობა“ წევრების მხრიდან პირადი და საჯარო მუქარისა და შევიწროების ადრესატია. ორგანიზაცია ყოველდღიურად ცდილობს სამირა ბაირამოვას ინტერესების და უფლებების დაცვას და ცდილობს მის წინაშე მდგარი გამოწვევების საპასუხოდ დროული კომუნიკაცია ჰქონდეს სახელმწიფო უწყებებთან და საერთაშორისო აქტორებთან. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაციამ „პარტნიორობა ადამიანის უფლებებისთვის“ (PHR) პრეცედენტული სასამართლო დავა მოიგო. „პირველად საქართველოში, მოსამართლემ ქალი ათლეტების მიმართ, მწვრთნელი კაცის მხრიდან, სექსუალური შევიწროების ფაქტი დაადგინა. საქმის პრეცედენტულობა ასევე მდგომარეობს იმაში, რომ ეს იყო პირველი საქმე, როდესაც სასამართლომ ბავშვის მიმართ სექსუალური შევიწროების საქმე განიხილა“, ნათქვამია ორგანიზაციის განცხადებაში. სრულად... წყარო: phr.ge

თბილისი. კოალიცია „მედიის ადვოკატირებისთვის“ „ფორმულას“ გადამღებ ჯგუფზე თავდასხმის ფაქტს ეხმიანება. 2022 წლის 17 მარტს ცნობილი გახდა, რომ თბილისში, ვაკეში, ირაკლი აბაშიძის ქუჩაზე ერთ-ერთ კაფეში ინტერვიუს ჩაწერისას, ტელეკომპანია „ფორმულას” გადამღებ ჯგუფს თავს დაესხნენ. ნაცემია ფორმულას 2 ოპერატორი, ფიზიკური დაზიანებები აქვს ჟურნალისტ ნანო ჩაკვეტაძესაც. კოალიცია “მედიის ადვოკატირებისთვის” თვლის, რომ „„ფორმულას” გადამღებ ჯგუფზე თავდასხმა წარმოადგენს მედიის მიმართ გამოხატული აგრესიის შედეგს და წახალისებულია ჟურნალისტების წინააღმდეგ ჩადენილ არაერთ დანაშულზე არასათანადო რეაგირებით. კოალიცია მოუწოდებს სპეციალურ საგამოძიებო სამსახურს ჩაატაროს სწრაფი და ეფექტიანი გამოძიება თავდასხმის ფაქტთან დაკავშირებით“. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ ინფორმაციით, ორგანიზაციის დახმარებით, ტრეფიკინგის მსხვერპლმა ქალმა, ზიანის ანაზღაურების სახით, 11 ათასი დოლარი მიიღო. „საქმე ეხება 2008-2009 წლებში წარმოებულ სამოქალაქო დავას, რომლის ფარგლებშიც დაზარებული ქალის ინტერესებს სასამართლოში „უფლებები საქართველოს“ (იმხანად „კონსტიტუციის 42-ე მუხლის“) იურისტი, მერი ჯაფარიძე, იცავდა“. გაიგეთ, როგორ მოხდა განაჩენის აღსრულება 13 წლის შემდეგ... წყარო: rights.ge

თბილისი. სამოქალაქო აქტივისტი, სამირა ბაირამოვა მის მიერ გამოხატული მშვიდობიანი პროტესტის გამო ძალადობრივი, პრორუსული ჯგუფის მხრიდან მუქარის სამიზნე გახდა. მის უფლებებს საია იცავს. საია მოუწოდებს საგამოძიებო ორგანოს: - გაატაროს სათანადო ზომები სამირა ბაირამოვას უსაფრთხოების დასაცავად; - გააკეთოს მკაფიო განცხადება, რომ ძალადობრივი ჯგუფების ქმედებები არ დარჩება დაუსჯელი; - დროულად გამოიძიოს მუქარის შემცველი ყველა ეპიზოდი და გამოავლინოს პასუხისმგებელი პირები. სრულად... წყარო: gyla.ge

თბილისი. გავრცელებული ინფორმაციით, სამოქალაქო აქტივისტი სამირა ბაირამოვა პრორუსული, ძალადობრივი, კრიმინალური დაჯგუფების, ალტ-ინფოს მუქარის მსხვერპლია. სამირა ბაირამოვამ სამოქალაქო, მშვიდობიანი პროტესტი გამოხატა ამ დაჯგუფების მიერ ქალაქ მარნეულში ოფისის გახსნისა და მათი ღიად კრემლისტური, აგრესიული პოლიტიკის მიმართ. მან ალტ-ინფოს მარნეულის ოფისის გარე ფასადზე უკრაინისა და ევროკავშირის დროშები დახატა. ამ მშვიდობიანი პროტესტის შემდეგ, სამირა ძალადობრივი დაჯგუფების მძიმე მუქარის სამიზნე გახდა. ტოლერანტობისა და მრავალფეროვნების ინსტიტუტი (TDI) მოუწოდებს საქართველოს ხელისუფლებას: „დაუყოვნებლივ გამოიძიოს და აღკვეთოს სამირა ბაირამოვას და სხვა აქტივისტების მიმართ მუქარის თითოეული ფაქტი. აღკვეთოს კრიმინალური დაჯგუფება ალტ-ინფოს საქმიანობა და მისი ლიდერები მიეცენ სისხლის სამართლებრივ პასუხისგებაში“. ორგანიზაცია სრულ მხარდაჭერას და სოლიდარობას უცხადებს სამირა ბაირამოვას და პრორუსული კრიმინალური დაჯგუფების, ალტ-ინფოს ძალადობრივი ქმედებების ყველა მსხვერპლ მოქალაქეს, აქტივისტსა და ჟურნალისტს. სრულად... წყარო: tdi.ge