იმერეთი. საერთაშორისო გამჭვირვალობა - საქართველოს უფასო იურიდიული დახმარებით, ზესტაფონის მერიას დაევალა ლელა გორგოძის, როგორც საჯარო მოხელის ხელახლა შეფასება. ორგანიზაციის ინფორმაციით, მერიამ საჯარო მოხელის შეფასება მიკერძოებით და კანონდარღვევით განახორციელა, რაც სასამართლომ ბათილად ცნო. TI საქართველომ უფასო იურიდიული დახმარების პროგრამის ფარგლებში 2020 წელს 29 საქმე მოიგო. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ თარგმანს კრებულიდან - „სოციალური კვლავწარმოება, ქალთა შრომა და შინშრომა“. „პირველი კითხვა, რომელსაც აღნიშნული თეორიული რევოლუცია სვამს, ამ მოვლენათა ფონზე ძველ კონცეფციათა სტატუსებს ეხება: როგორ შეცვალა არასაბაზრო ურთიერთობების მნიშვნელობის გადააზრებამ სოციალური კვლავწარმოების კონცეფცია, რომელიც იქამდე პოლიტეკონომიაში მხოლოდ საბაზრო საფუძველზე განიხილებოდა.“ სრულად... წყარო: emc.org.ge

თბილისი. ღირსეული შრომის პლატფორმა ეხმიანება გონიოში სასტუმროს მშენებლობის პროცესში დასაქმებული თორმეტი პირისთვის კომპანია შპს ,,ლაბაუ გონიოს“ მიერ კუთვნილი შრომითი ანაზღაურების არ გადახდის, ხელფასის მოპარვის ფაქტს.  „Მშრომელები აცხადებენ, რომ სამუშაოების შესრულების მიუხედავად, დამსაქმებელი კომპანია მათ კუთვნილ ხელფასებს დღემდე არ უხდის. დასაქმებულების მიმართ არსებული სახელფასო დავალიანება დღეის მდგომარეობით დაახლოებით 27 000 ლარს შეადგენს. Მოვუწოდებთ შრომის ინსპექციას სისტემური მუშაობა დაიწყოს საქართველოში დამსაქმებლების მიერ მშრომელთა შრომითი ანაზღაურების უკანონოდ მითვისების (მოპარული ხელფასის) პრაქტიკის აღმოსაფხვრელად და ახალი მანდატის ფარგლებში სამუშაო ადგილზე დასაქმებულთა შრომითი უფლებების შემოწმებისას, ერთ-ერთ პრიორიტეტულ მიმართულებად დაისახოს იმ დამსაქმებელთა გამოვლენა და სამართლებრივი პასუხიმგებლობა, რომელთაც ნორმალიზებული აქვთ მოპარული ხელფასის პრაქტიკა სამუშაო ადგილზე“, ნათქვამია ერთობლივ განცხადებაში. სრულად... წყარო: gyla.ge

იმერეთი. EDEC, UNDP-თან თანამშრომლობით, იწვევს ახალგაზრდებს იმერეთის, სამეგრელო-ზემო სვანეთისა და შიდა ქართლის რეგიონებიდან, მონაწილეობა მიიღონ პროექტში „დევნილთა უფლებების დაცვა COVID - 19 კრიზისის დროს საქართველოში“. „პროექტის მიზანია ხელი შეუწყოს იძულებით გადაადგილებულ და კონფლიქტის შედეგად დაზარალებულ ახალგაზრდებს ჩაერთონ კოვიდ - 19 პანდემიის შედეგად თავიანთ თემში შექმნილი გამოწვევებისა და პრობლემების გადაჭრაში“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია, მწვანე ალტერნატივა და ადამიანის უფლებების სწავლებისა და მონიტორინგის ცენტრი აქვეყნებს ერთობლივ განცხადებას ნამახვანის ჰესის პროექტის საპროტესტო აქციის დაშლისა და „ენკას” მიერ სამშენებლო სამუშაოების განახლებზე. „ადგილობრივი მოსახლეობის მოთხოვნები, რომლებიც თითქმის 100 დღეა რიონის ხეობაში აპროტესტებდნენ კომპანია „ენკასა“ და ხელისუფლების უკანონო ქმედებებს, სამართლიანი და კონსტრუქციულია. ვითვალისწინებთ, რა პროექტის ზემოქმედების ქვეშ მოქცეულ საზოგადოებას, კომპანიასა და სახელმწიფო უწყებებს შორის კონფლიქტის მზარდ ხასიათს და ასევე, იმას, რომ დღემდე არ არსებობს საკმარისი ინფორმაცია პროექტის განხორციელებასთან დაკავშირებული საფრთხეების შესახებ, მოვითხოვთ:  საქართველოს გარემოს დაცვისა და სოფლის მეურნეობის სამინისტრომ და სსიპ ტექნიკური და სამშენებლო ზედამხედველობის სააგენტომ არ დაუშვან „ენკა რინიუებლზის“ მიერ სამშენებლო სამუშაოების (მათ შორის, მოსამზადებელი სამუშაოების) წარმოება მანამ, სანამ კანონის მოთხოვნების შესაბამისად, არ იქნება შესწავლილი და შეფასებული პროექტის განხორციელების შემთხვევაში გარემოსთვის, ადამიანის სიცოცხლისა და ჯანმრთელობისთვის, კულტურული მემკვიდრეობისა და მატერიალური ფასეულობებისათვის შექმნილი საფრთხეები“...  სრულად... წყარო: gyla.ge

გურია. ადამიანის უფლებების სწავლებისა და მონიტორინგის ცენტრი (EMC) ბუკნარში მიმდინარე მოვლენებზე ვრცელ მიმოხილვას გთავაზობთ.  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ვიდეოში „რიონის ხეობის გადარჩენისთვის" - გიჩვენებთ, როგორ იბრძვის რიონის ხეობის მოსახლეობა ნამახვან ჰესის წინააღმდეგ და როგორ ცდილობს საკუთარი ხეობის გადარჩენას. წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) სოლიდარობას უცხადებს „გლოვო“-ს კურიერებს და მოუწოდებს შრომის ინსპექციას დაუყონებლივ დაიწყოს ინსპექტირება გლოვოს კურიერების შრომითი უფლებების დაცვის მიზნით. „29 იანვარს „გლოვო“-ს კურიერების ნაწილმა სამუშაოს შესრულებაზე უარი განაცხადა, კომპანიის ოფისთან ასზე მეტი კურიერი შეიკრიბა და მძიმე სამუშაო პირობები გააპროტესტა. როგორც კურიერები ამბობენ, კომპანია პერიოდულად აუარესებს სატარიფო პირობებს, რის შედეგადაც მცირდება მათი ანაზღაურება და უარესდება სამუშაო პირობები. მძიმე სამუშაო პირობებს თან ახლავს კომპანიის მხრიდან მათ მიმართ არასათანადო, ღირსების შემლახავი დამოკიდებულება, გამომუშავებაზე მიბმული სამუშაო პრაქტიკის სირთულეები და პანდემიის გამო გაზრდილი უსაფრთხოების რისკები“, ნათქვამია ორგანიზაციის ვებგვერდზე. სრულად... წყარო: emc.org.ge

იმერეთი. საქართველოს ახალგაზრდა იურისტთა ასოციაცია (საია) იცავდა 30 იანვარს, ნამახვან ჰესის მშენებლობის მიმდებარე ტერიტორიაზე აქციის მსვლელობისას დაკავებული პირის ინტერესებს.  „დაკავებული აქციის მონაწილის მიმართ პოლიციამ ადმინისტრაციული სამართალდარღვევის ოქმი 173-ე მუხლის (პოლიციის კანონიერი მოთხოვნისადმი დაუმორჩილებლობა) საფუძვლით შეადინა. დღეს, ქუთაისის საქალაქო სასამართლომ იმსჯელა დაკავებულის სამართალდარღვევის საქმეზე. სასამართლომ აქციის მონაწილე გაათავისუფლა ადმინისტრაციული პასუხიმგებლობიდან, გამოუცხადა სიტყვიერი შენიშვნა და სასამართლო დარბაზიდან გაათავისუფლა“, ნათქვამია ორგანიზაციის ვებგვერდზე. სრულად... წყარო: www.gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს რაოდენობრივი კვლევის შედეგებს: ლგბტქ ჯგუფის სოციალური ექსკლუზიის კვლევა საქართველოში.  „კვლევის მიზანი იყო ლგბტქ ჯგუფის წინაშე მდგარი ძირითადი სოციალურ-ეკონომიკური ბარიერების გამოვლენა და ძირითად პრობლემათა აღმოსაფხვრელად საჭირო პოლიტიკის შემუშავების ხელის შეწყობა. კვლევა აჩვენებს, რომ ლგბტქ თემის წევრები სხვებთან თანასწორი და სრულყოფილი ცხოვრებით სარგებლობას ვერ ახერხებენ და მათი თავისუფლად ცხოვრების შანსები არსებითად შეზღუდულია ყველა უფლებრივ ჩარჩოსთან მიმართებით“, ნათქვამია ორგანიზაციის ვებგვერდზე. სრულად...  წყარო: emc.org.ge

აჭარა. საზოგადოებრივი ორგანიზაციები ეხმიანებიან „აჭარის კულტურული მემკვიდრეობის დაცვის საბჭოს“ წევრისთვის უფლებამოსილების შეწყვეტის ფაქტს და მიიჩნევენ, რომ ბრძანება შეიცავს სავარაუდო დისკრიმინაციის ნიშნებს და მიმართულია საბჭოს სხვა წევრების დაშინებისკენ, რათა მომავალში თავი შეიკავონ კრიტიკული მოსაზრებების დაფიქსირებისგან.  „სააგენტოს დირექტორის ბრძანების თანახმად, შოთა გუჯაბიძის სტატუსი, სააგენტოს პოლიტიკის მიმართ მისი განსხვავებული, კრიტიკული მოსაზრებების გამო შეუწყვიტეს, რაც სააგენტოს “მიზანმიმართულ დისკრედიტაციად” შეაფასა სააგენტოს დირექტორმა“, - აღნიშნულია განცხადებაში, - „28 იანვარს ცნობილი გახდა, რომ სააგენტოს დირექტორმა, ზაურ ახვლედიანმა, შოთა გუჯაბიძის კრიტიკული მოსაზრებების გამო, ისე, რომ არც კი მოუსმენია მისი მოსაზრებები, საბჭოს წევრის უფლებამოსილება შეუწყვიტა, რაც შეიცავს სავარაუდოდ დისკრიმინაციის ნიშნებს. იგი ემსახურება შოთა გუჯაბიძის დასჯას სააგენტოს უკანონო გადაწყვეტილებების მიმართ კრიტიკული მოსაზრებები გამო“. შოთა გუჯაბიძის ინტერესებს საია იცავს.  სრულად...  წყარო: gyla.ge

ქვემო ქართლი. 21 იანვარს მედიაში გავრცელებულ ინფორმაციას, რომელიც მარნეულის მუნიციპალიტეტის სოფელ მეორე ქესალოში ეთნიკურად აზერბაიჯანელი ადგილობრივი მოსახლეობისა და მართლმადიდებელი სასულიერო პირების დაპირისპირებას ეხებოდა, ტოლერანტობისა და მრავალფეროვნების ინსტიტუტი განცხადებით ეხმიანება.  „მიგვაჩნია, რომ აღნიშნულ ინციდენტზე ხელისუფლების მხრიდან პასიური რეაგირება ან მიკერძოებული, დისკრიმინაცული დამოკიდებულება კიდევ უფრო გაამწვავებს დაპირისპირებას და რელიგიურ-ეთნიკურ ნიადაგზე უფრო მასშტაბური კონფლიქტის საფრთხეს შექმნის“, - ვკითხულობთ განცხადებაში, - „TDI მოუწოდებს ხელისუფლებას, გაატაროს თანასწორუფლებიანობაზე დაფუძნებული სამართლიანი, სეკულარული პოლიტიკა და თავიდან აირიდოს დისკრიმინაციისა და შეუწყნარებლობის ახალი კერების გაჩენა“.  სრულად...   წყარო: ორგანიზაციის ვებგვერდი

თბილისი. პერსონალური მონაცემების დაცვის დღესთან დაკავშირებით, ინფორმაციის თავისუფლების განვიტარების ინსტიტუტი აქვეყნებს სტატიას, რომელიც, ელექტრონული მმართველობის პირობებში, საქართველოში პერსონალური მონაცემების დაცვას შეეხება. „ელექტრონული მმართველობის განვითარების პარალელურად, განსაკუთრებით აქტუალური გახდა პერსონალური მონაცემების დაცვის საკითხი. თანამედროვე ტექნოლოგიური პროგრესის პირობებში, ინფორმაციული და საკომუნიკაციო ტექნოლოგიების ფართო გამოყენება ახალი რისკებისა და საფრთხეების წინაშე აყენებს მოქალაქეებს“, - ვკითხულობთ სტატიაში, - „საქართველოში პერსონალურ მონაცემთა დამუშავებასა და დაცვასთან დაკავშირებული საკითხები „პერსონალურ მონაცემთა დაცვის შესახებ“ კანონით რეგულირდება. ამ კანონის მიზანია, პერსონალური მონაცემების დამუშავებისას, უზრუნველყოს ადამიანის უფლებათა და თავისუფლებათა, მათ შორის, პირადი ცხოვრების ხელშეუხებლობის დაცვა“. სრულად...  წყარო: წყარო: ორგანიზაციის ვებგვერდი

თბილისი. პანდემიის შედეგად განათლებასთან, ჯანდაცვასა და სხვა სფეროებთან დაკავშირებული სერვისების ნაწილი ონლაინ ფორმატში გადავიდა. შედეგად, პერსონალურ მონაცემთა დიდი რაოდენობა ციფრულ სივრცეში აღმოჩნდა, ხოლო მოქალაქეთა პირადი ინფორმაციის უსაფრთხოების დაცვამ განსაკუთრებული მნიშვნელობა შეიძინა. ასეთია საინფორმაციო კამპანიის მთავარი შეტყობინება, რომელიც სახელმწიფო ინსპექტორის ინიციატივით პერსონალურ მონაცემთა დაცვის დღის აღსანიშნავად მიმდინარეობს.  ერთკვირიანი კამპანია, რომელიც 22 იანვარს დაიწყო და 28 იანვარს, პერსონალურ მონაცემთა დაცვის დღეს დასრულდა, ევროკავშირის (EU), გაეროს განვითარების პროგრამისა (UNDP) და გაეროს ადამიანის უფლებათა დაცვის უმაღლესი კომისრის (OHCHR) ხელშეწყობით განხორციელდა.  სრულად...  წყარო: eeas.europa.eu

თბილისი. USAID/PROLoG-ის მხარდაჭერით, საქართველოს ადვოკატთა ასოციაციის და იურიდიული დახმარების სამსახურისთვის შემუშავდა დასაქმების ადგილზე სექსუალური შევიწროების პრევენციის და რეაგირების მექანიზმი.  მექანიზმი ხელს შეუწყობს დასაქმების ადგილზე თანაბარ მოპყრობას და დისკრიმინაციისგან თავისუფალი გარემოს შექმნას. PROLoG-მა, ასევე, მხარი დაუჭირა სასწავლო მოდულის „სექსუალური შევიწროების აღმოფხვრა და მართლმსაჯულების გაძლიერება გენდერული თანასწორობის გზით“ შემუშავებას ადვოკატთა ასოციაციის წევრი ადვოკატებისთვის, რაც დაეხმარება მათ საქმეების უფრო ეფექტურად წარმოებაში.  სრულად...   წყარო: ორგანზიაციის ვებგვერდი

იმერეთი. ადამიანის უფლებათა ცენტრის ინფორმაციით, 36 წლის კ დ, რომელიც ქუთაისში, „კლინიკა - ლჯ-ის” ქირურგიულ განყოფილებაში მედდად მუშაობდა, 2020 წლის 25 დეკემბერს სამსახურიდან გაათავისუფლეს. ამის შემდეგ, კლინიკაში დაიბარეს და შესთავაზეს, ხელი მოეწერა განცხადებაზე, სადაც ეწერა, რომ სამსახურს საკუთარი სურვილით ტოვებდა. კლინიკაში განუმარტეს, რომ თუკი კლინიკის მიმართ პრეტენზია არ ექნებოდა და განცხადებას ხელს მოაწერდა, ანტიკრიზისული დახმარების პროგრამის ფარგლებში სახელმწიფოსგან 6 თვის განმავლობაში ყოველთვიურად 200-ლარიან დახმარებას მიიღებდა. კ.დ-მ განცხადებას ხელი არ მოაწერა და სამართლებრივი დახმარების თხოვნით ადამიანის უფლებათა ცენტრს მიმართა.  ადამიანის უფლებათა ცენტრის იურისტი, ანა ჩაფიძე აცხადებს, რომ კლინიკამ კ.დ.-ს შრომითი უფლებები დაარღვია. ადამიანის უფლებატა ცენტრი „კლინიკა ლჯ“-ის ხელმძღვანელობას დაუკავშირდა. კლინიკის იურისტმა განაცხადა, რომ თანამშრომლების შემცირების მიზეზი კორონავირუსის პანდემიით შექმნილი მძიმე ეკონომიკური მდგომარეობა გახდა. ადამიანის უფლებათა ცენტრის იურისტი კლინიკა-ლჯ-ის” იურისტის მოსაზრებას არ ეთანხმება და მიიჩნევს, რომ კლინიკამ კ.დ.-ს შრომითი უფლება დაარღვია. ორგანიზაცია ამ საქმეს თვალს ყურადღებით მიადევნებს და საჭიროების შემთხვევაში დავას სასამართლოში გააგრძელებს.  ადამიანის უფლებათა ცენტრი პროექტს - „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“, საქართველოში ნიდერლანდების საელჩოს დახმარებით ახორცილებს. პროექტის მიზანია კორონავირუსის გავრცელების პრევენციის მიზნით გამოცხადებული საგანგებო მდგომარეობის და პანდემიის შემდგომ პერიოდში სავარაუდო ადამიანის უფლებების დარღვევის ფაქტების იდენტიფიცირება და ცნობიერების ამაღლება მათზე თბილისსა და საქართველოს ხუთ რეგიონში - შიდა ქართლში, კახეთში, ქვემო ქართლში, იმერეთსა და სამეგრელოში.  სრულად...   წყარო: ორგანიზაციის ვებგვერდი

თბილისი. 2008 წლის აგვისტოს მოვლენებთან დაკავშირებით, ადამიანის უფლებათა ევროპული სასამართლოს მიერ მიღებული გადაწყვეტილების შესახებ, სახალხო დამცველი განცხადებას ავრცელებს.  „აღნიშნული გადაწყვეტილება საქართველოსთვის სამართლებრივი და ისტორიული კუთხით უდიდესი მნიშვნელობისაა. ამ გადაწყვეტილებით სასამართლომ დაადასტურა, რომ რუსეთის ფედერაცია ახორციელებდა ეფექტიან კონტროლს აფხაზეთის, სამხრეთ ოსეთის და ბუფერულ ტერიტორიებზე 2008 წლის 12 აგვისტოდან 10 ოქტომბრამდე პერიოდში. აღნიშნული პერიოდის შემდგომ, რუსეთის ძლიერი წარმომადგენლობა სამხრეთ ოსეთის და აფხაზეთის ტერიტორიაზე და სამხრეთ ოსეთისა და აფხაზეთის ხელისუფლებების რუსეთის ფედერაციაზე დამოკიდებულება/დაქვემდებარება ადასტურებს, რომ რუსეთის ფედერაცია აგრძელებს „ეფექტიან კონტროლს“ აღნიშნულ ტერიტორიებზე. ამავდროულად, სასამართლოს გადაწყვეტილების საფუძველზე, რუსეთის ფედერაციას სამართლებრივი ვალდებულება აქვს უზრუნველყოს იძულებით გადაადგილებულ პირთა უსაფრთხო დაბრუნება საკუთარ სახლებში“, - აღნიშნულია განცხადებაში.  სრულად...   წყარო: ორგანიზაციის ვებგვერდი

2021 წლის 26 იანვარს 12:00 საათზე გაერთიანებული ერების ორგანიზაციაში, უნივერსალური პერიოდული მიმოხილვის (UPR) მესამე ციკლის ფარგლებში გაეროს წევრი ქვეყნები ადამიანის უფლებრივ მდგომარეობას შეაფასებენ. წევრი სახელმწიფოები ადამიანის უფლებათა დაცვის მდგომარეობის გასაუმჯობესებლად საქართველოს რეკომენდაციებს გაუზიარებენ. მოსმენა პირდაპირ ეთერში გადაიცემა - http://webtv.un.org/  გაეროს უნივერსალური პერიოდული მიმოხილვის მესამე ციკლის ფარგლებში ქვეყანაში არსებული ადამიანის უფლებათა მდგომარეობის შესაფასებლად საქართველოში მოქმედი 11 არასამთავრობო ორგანიზაცია/კოალიცია ჩაერთო. სამოქალაქო სექტორმა მიმოიხილა არსებული გამოწვევები ადამიანის უფლებათა დაცვის კუთხით და რეკომენდაციებით მიმართა საერთაშორიო პარტნიორებსა და დიპლომატიურ კორპუსს, გაეროს წევრი ქვეყნების მიერ უნივერსალურ პერიოდულ მიმოხილვაში რეკომენდაციების ასახვის მიზნით.  სრულად...   წყარო: gyla.ge

თბილისი. „უფლებები საქართველო“ საქართველოს ხელისუფლებას მიმართავს და საქართველოს მოქალაქის იტალიიდან რუსეთში ექსტრადირების შეჩერებას მოითხოვს. „უფლებები საქართველო“ მიმართავს საქართველოს შესაბამის უწყებებს, გადადგან ქმედითი ნაბიჯები იტალიაში დაკავებული საქართველოს მოქალაქის, ბორის წიკლაურის, რუსეთის ფედერაციაში ექსტრადირების შესაჩერებლად და სამშობლოში მის დასაბრუნებლად“, - ვკითხულობთ განცხადებაში, - „უფლებები საქართველო“ მოუწოდებს საქართველოს საგარეო საქმეთა სამინისტროს, გადადგას ქმედითი და დროული ნაბიჯები წიკლაურის ექსტრადირების შესაჩერებლად; საქართველოს საელჩოს იტალიაში - უზრუნველყოს წიკლაურის ოჯახის მხარდაჭერა ხელმისაწვდომი სამართლებრივი დახმარების მოძიების პროცესში. „უფლებები საქართველო“ მზადყოფნას გამოთქვამს, იტალიაში შიდა სამართლებრივი მექანიზმების ამოწურვის შემდგომ, წარმოადგინოს წიკლაურის ინტერესები ადამიანის უფლებათა ევროპული სასამართლოს წინაშე“. სრულად...  წყარო: ორგანზიაციის ვებგვერდი

თბილისი. საქართველოს სტრატეგიული კვლევებისა და განვითარების ცენტრმა, პროდუქციის უსაფრთხოების კონტროლის მოთხოვნით, პეტიცია შეიმუშვა.  „საქართველოში სამომხმარებლო ნაწარმის აბსოლუტური უმრავლესობის უსაფრთხოების მოთხოვნები დადგენილი არ არის და არ მოქმედებს სახელმწიფო კონტროლი. საქართველოს მოქალაქეების, მათ შორის მომავალი თაობების სიცოცხლე და ჯანმრთელობა დაცული არ არის. მოვითხოვთ საქართველოს პარლამენტმა რაც შეიძლება მოკლე ვადებში უზრუნველყოს ყველა სახის სამომხმარებლო პროდუქციის უსაფრთხოების მოთხოვნების დადგენა და უსაფრთხოების სახელმწიფო კონტროლის დაწესება, ევროკავშირის მოდელის ანალოგიურად“, - აცხადებენ პეტიციის ავტორები. სრულად...  წყარო: გვერდი სოციალურ ქსელში

თბილისი. სახალხო დამცველის აპარატმა, სექსუალური შევიწროების შესახებ, პრაქტიკული სახელმძღვანელო მოამზადა.  სახელმძღვანელოში თავმოყრილია სექსუალურ შევიწროებასთან დაკავშირებული კომპლექსური საკითხები. გამოცემის მიზანია სხვადასხვა სფეროს წარმომადგენლებს სექსუალური შევიწროების სპეციფიკის აღქმაში დაეხმაროს.  სრულად...   წყარო: ორგანიზაციის ვებგევრდი

ადამიანის უფლებათა ევროპული სასამართლოს მიერ 2008 წლის აგვისტოს მოვლენებთან დაკავშირებით მიღებული გადაწყვეტილების თაობაზე, ევროკავშირის საგარეო ქმედებათა სამსახურის პრეს-სპიკერი განცხადებას ავრცელებს... „გადაწყვეტილებაში მოცემულია მკაფიო დასკვნა, რომ 2008 წლის 12 აგვისტოს შემდეგ, რუსეთის ფედერაციამ სამხრეთ ოსეთსა და აფხაზეთზე ეფექტიანი კონტროლის განხორციელებისას, ადამიანის უფლებათა კონვემციის სხვადასხვა მუხლი დაარღვია“, - აღნიშნულია განცხადებაში, - „სამართლიანობის მიღწევა და პასუხისმგებლობა კონფლიქტის მოგვარების მნიშვნელოვანი ნაწილია და ევროკავშირი რუსეთის ფედერაციას ამ გადაწყვეტილების სატანადო შესრულების უზრუნველყოფისკენ მოუწოდებს. ევროკავშირი სრულ მზაობას გამოხატავს, რომ ხელის შეუწყოს საქართველოში არსებული კონფლიქტების მოგვარებას, რისთვისაც, ასევე, საჭიროა ზალისხმევა წარსული კონფლიქტების მემკვიდრეობის აღმოსაფხვრელად“.  სრულად...   წყარო: eeas.europa.eu