თბილისი. საქართველოს ახალგაზრდა იურისტთა ასოციაცია (საია) 6 თვის მანძილზე პენსიის დაზოგვის გამო პენსიონერისათვის საპენსიო თანხის გადახდის შეჩერებას საია საკონსტიტუციო სასამართლოში ასაჩივრებს. „საიამ პენსიონერ მედია კვაჭაძის სახელით საკონსტიტუციო სასამართლოს მიმართა. წარდგენილი სარჩელით საია ითხოვს „სახელმწიფო პენსიის შესახებ“ კანონის და საქართველოს ჯანდაცვის მინისტრის ბრძანების იმ ნორმის არაკონსტიტუციურად ცნობას, რომელიც ითვალისწინებს პენსიის შეჩერებას, თუ პენსიონერმა 6 თვის განმავლობაში საბანკო ანგარიშზე დატოვა პენსია. პენსიონერს აქვს პენსიის განახლების მოთხოვნის უფლება, თუმცა მას აუნაზღაურდება მხოლოდ ერთი წლის პენსია“, ნათქვამია ორგანიზაციის ვებგვერდზე. სრულად... წყარო: gyla.ge

კავშირი „საფარი“ აქვეყნებს theguardian.com-ზე გავრცელებული ბლოგ პოსტის ქართულენოვან თარგმანს. „იაპონურ საზოგადოებაში გავრცელებული სილამაზის სტანდარტების გამო, მხედველობის პრობლემების მქონე ქალებს აქ დამსაქმებელი აიძულებს, სათვალის ნაცვლად კონტაქტური ლინზები გამოიყენონ. ჰეშთეგი „სათვალის აკრძალვა“ (#メガネ着用禁止) იაპონიის სოციალურ ქსელებში ამ კვირაში ძალზე პოპულარული გახდა მას შემდეგ, რაც ტელეარხმა Nippon-მა სიუჟეტი გაუშვა იმ კომპანიების შესახებ, რომლებიც თავის ახლო- ან შორსმხედველი თანამშრომლებისგან სამუშაო ადგილას სათვალის ნაცვლად კონტაქტური ლინზების გამოყენებას მოითხოვდნენ. ფლეშმობის ფარგლებში, იაპონელმა ქალებმა Twitter-ზე თავისი სათვალის ან სათვალეში გადაღებული ფოტოების გამოქვეყნება დაიწყეს. ზოგიერთმა მსგავსმა ტვიტმა 25 000 რეტვიტიც კი დააგროვა“. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ლევან აკინის ფილმის „და ჩვენ ვიცეკვეთ“ პრემიერის წინააღმდეგ ქართული მარშის ლიდერებისა და ლევან ვასაძის მიერ ორგანიზებულ ძალადობრივ აქციას. ორგანიზაცია მოუწოდებს ხელისუფლებას მიიღოს დროული სამართლებრივი ზომები ძალადობის ორგანიზებაზე პასუხისმგებელი პირების მიმართ. „ამასთან, არსებითი შეცდომა, რომელიც ხელისუფლებამ დაუშვა პრემიერამდე გაკეთებული მუქარის შემცველი განცხადებების იგნორირება და მათზე გამოძიების დაწყებისგან თავის შეკავება. გამოძიებას და შეკრების ორგანიზატორების დაკითხვას პრევენციული ფუნქცია ექნებოდა და მათ ძალადობრივ ინიციატივებს შეზღუდავდა“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. სამოქალაქო პლატფორმა „არა-ფობიას" 2019 წლის 8 ნოემბერს ფილმის "And then We Danced" პრემიერასთან დაკავშირებით განვითარებულ მოვლენებს ეხმაურება.  „მიგვაჩნია, რომ სამართალდამცავი უწყებების მიერ გატარებული ღონისძიებები არ ყოფილა საკმარისი ძალადობრივი ჯგუფების ქმედებებისა და მათგან მომდინარე საფრთხეების აღსაკვეთად. მნიშვნელოვანია სახელმწიფომ გამოავლინოს შესაბამისი ძალისხმევა და მკვეთრი პოლიტიკური ნება სიძულვილით მოტივირებული დანაშაულების წინააღმდეგ საბრძოლველად. ამასთან, აუცილებელია გატარდეს ღონისძიებები ძალადობრივი ჯგუფების ქმედებების მზარდი ტენდენციის წინააღმდეგ, რაც აღვივებს დაპირისპირებას საზოგადოებაში და ქმნის დაუცველ და არატოლერანტულ გარემოს“, - აღნიშნულია განცხადებაში.  სრულად...  წყარო: www.gdi.ge

თბილისი. თბილისისა და ბათუმის კინოთეატრებში, ფილმის “და ჩვენ ვიცეკვეთ” (And then we danced) ჩვენებასთან დაკავშირებული ვითარების გამო, საქართველოს ჟურნალისტური ეთიკის ქარტიის საბჭო განცხადებას ავრცელებს.  „ქარტიის საბჭო მოუწოდებს: აქციების ორგანიზატორებს - მუშაობაში ხელი არ შეუშალონ მედიის წარმომადგენლებს; სამართალდამცავ უწყებას - განსაკუთრებული ყურადღება გამოიჩინონ ამბის გასაშუქებლად მისული ჟურნალისტების უსაფრთხოების დასაცავად. ქარტიის საბჭო, ასევე, მიმართავს მედიის წარმომადგენლებს, მაქსიმალურად აღიჭურვონ ამომცნობი, მაიდენტიფიცირებელი ნიშნებით (ბეიჯით, ჟილეტით და ა.შ.), რათა სამართალდამცავებმა საჭიროების შემთხვევაში მარტივად შეძლონ მათი ამოცნობა და უსაფრთხოების უზრუნველყოფა“, - ნათქვამია განცხადებაში.  სრულად...  წყარო: https://www.qartia.ge

თბილისი. კავშირი საფარი აქვეყნებს საინფორმაციო ბლოგპოსტს, რომელიც პაემანზე ნარკოტიკების შეტყუებით სექსუალურ ძალადობაზე მოგვითხრობს. რა ხერხებს მიმართავენ მოძალადეები თქვენს წინააღმდეგ, როგორ უნდა დაიცვათ მათგან თავი და რა ზომებს უნდა მიმართოთ ინციდენტის შემთხვევაში - ამ კითხვებზე პასუხს ორგანიზაციის ბლოგპოსტში იპოვით. „ზოგადად, „პაემანზე გაუპატიურების ნარკოტიკად“ შეიძლება ჩაითვალოს ნებისმიერი ნარკოტიკი, რომელიც პოტენციური მსხვერპლის გონების დაბინდვას და მისი წინააღმდეგობის უნარის წართმევის მდგომარეობას იწვევს, მათ შორის ზოგიერთი ურეცეპტოდ დაშვებული პრეპარატი, ასევე ე. წ. ქუჩის ნარკოტიკები, მაგალითად ჰეროინი. ასევე „პაემანზე გაუპატიურების ნარკოტიკად“ შეიძლება გამოყენებულ იქნას კანაფიც და დიდი რაოდენობით ალკოჰოლიც. თუმცა, „პაემანზე გაუპატიურების ნარკოტიკებად“ მოძალადეები მაინც სპეციფიკურ პრეპარატებს იყენებენ, რომელთა ასპროცენტიანი შედეგის იმედი აქვთ“. სრულად... წყარო: sapari.ge

თბილისი. ადამიანის უფლებათა ცენტრი ივლისის, აგვისტოს, სექტემბრისა და ოქტომბრის თვეების წარმატებული საქმეების შესახებ ჩანაწერს ავრცელებს.  მათ შორისაა ისეთი საქმეები, როგორიცაა: სასამართლოს მიერ თბილისის მერიისთვის თბილისის ზღვის ტერიტორიაზე გამაფრთხილებელი ბანერებისა და კედლის მოწყობის დავალება;  20 ივნისის აქციის დროს დაკავებულ პირთა საქმეებზე ადმინისტრაციული საქმის წარმოების შეწყვეტა;  საჯარო რეესტრის მიერ საოკუპაციო ხაზთან მდებარე მიწის ნაკვეთის მოქალაქისთვის საკუთრებაში დარეგისტრირების დავალება;  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) საკონსტიტუციო სასამართლოს სარჩელით მიმართა.  EMC არაკონსტიტუციურად მიიჩნევს კანონმდებლობის იმ ნორმებს, რომელიც ერთი მხრივ, გაფიცვის უფლების ფარგლებს, და მეორე მხრივ, მისი შეზღუდვის საფუძვლებსა და პროცედურებს ადგენს.  სრულად...  წყარო: emc.org.ge

თბილისი. საფარის ბენეფიციარს, რომელიც ქმართან გაცილებულია, ყოფილმა მეუღლემ იმის გამო უჩივლა, რომ შვილს ჩაცმულობასთან დაკავშირებით შენიშვნა მისცა. „შემაკავებელი ორდერის თანახმად, დედას აეკრძალა შვილთან ურთიერთობა 15 დღის ვადით. ბავშვის დედამ დახმარებისთვის კავშირ „საფარს“ მიმართა. „საფარის“ იურისტმა თეა თადაშვილმა დედის მიმართ გამოწერილი შემაკავებელი ორდერი სასამართლოში გაასაჩივრა. 2019 წლის 6 ნოემბრის გადაწყვეტილებით, თბილისის საქალაქო სასამართლოს ადმინისტრაციულ საქმეთა კოლეგიამ სარჩელი დააკმაყოფილა და დედის წინააღმდეგ გამოწერილი შემაკავებელი ორდერი გააუქმა“, ნათქვამია ორგანიზაციის ვებ-გვერდზე. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) ქვეყანაში აზარტულ თამაშებთან დაკავშირებით არსებული პრობლემების გადაჭრისთვის სახელმწიფოსგან აქტიური პოლიტიკის გატარებას მოითხოვს. „ხელმისაწვდომი კვლევების თანახმად, საქართველოში, აზარტულ თამაშებში მოსახლეობის, მათ შორის ბავშვების, ჩართულობა საგანგაშოდ მაღალია. აზარტული თამაშების გავრცელება და სოციალურ-ეკონომიკური მოწყვლადობა ერთმანეთთან მჭიდროდ გადაჯაჭვული მოვლენებია და, ცალკეულ შემთხვევებში, ერთმანეთს განაპირობებენ კიდეც“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, პროკურატურამ ბრალი წარუდგინა პირს, რომელიც მის მიმართ გამოძალვის მიზნით განხორციელებულ ფიზიკურ და ფსიქოლოგიურ ძალადობაზე დავობს. „საია მიიჩნევს, რომ თენგიზ ერგემლიძეს ბრალი უსაფუძვლოდ, არასაკმარისი მტკიცებულებების პირობებში წარედგინა, რაც აჩენს ეჭვებს, რომ პროკურატურა მიკერძოებულად მოქმედებს“. სრულად... წყარო: gyla.ge

თბილისი. 7 ნოემბერს EMC-მ პრესკონფერენცია ჩაატარა და შეაფასა თემირლან მაჩალიკაშვილის სიცოცხლის ხელყოფის საქმის გამოძიების ფარგლებში ჩატარებული ახალი საგამოძიებო მოქმედებები, მათ შორის, სახელმწიფო უსაფრთხოების სამსახურის (სუს) ამჟამინდელი და ყოფილი მაღალჩინოსნების გამოკითხვის პროცესი. „სუს-ის მაღალი თანამდებობის პირების განმარტებებმა აჩვენა, რომ ამ სისტემაში კრიტიკულად მნიშვნელოვანი გადაწყვეტილებები, მათ შორის, სპეცრაზმისა და ლეტალური ძალის გამოყენების შესახებ, სათანადო ანალიზისა და ადეკვატური სამართლებრივი სტანდარტების გარეშე მიიღება. ცხადად ჩანს, რომ ამ პროცესში პრობლემურია სათანადო კოორდინაცია და არ არსებობს ფორმალურად გაწერილი პროცედურული სტანდარტები. უწყების შიგნით პროცესების ამ ფორმით ორგანიზება და გადაწყვეტილებების მიღების ეს წესი ადამიანის უფლებების დარღვევის ძალიან მაღალ რისკებს ქმნის და უკიდურესად შემაშფოთებელი პრაქტიკაა“, ნათქვამია ორგანიზაციის გვერდზე. სრულად... წყარო: emc.org.ge

თბილისი. საქართველოს სახალხო დამცველის ინიციატივით და გაეროს განვითარების პროგრამის (UNDP) მხარდაჭერით 2019 წლის 5 ნოემბრიდან გაეროს შეზღუდული შესაძლებლობის მქონე პირთა უფლებების კომიტეტის ზოგადი კომენტარები სახალხო დამცველის ვებ-გვერდზე ქართულ ენაზე იქნება ხელმისაწვდომი. „სახალხო დამცველი იმედოვნებს, რომ დასახელებული საერთაშორისო დოკუმენტების ქართულ ენაზე მისაწვდომობა მნიშვნელოვნად შეუწყობს ხელს შეზღუდული შესაძლებლობის მქონე პირებს და სფეროში მომუშავე ორგანიზაციებს ყოველდღიურ საქმიანობაში, უფლებების ადვოკატირების პროცესში აქტიურად გამოიყენონ კომიტეტის მიდგომები და განმარტებები, რაც გააუმჯობესებს ქვეყანაში შშმ პირთა უფლებების დაცვის ხარისხს“, - ნათქვამია სახალხო დამცველის აპარატის მიერ გავრცელებულ ინფორმაციაში. სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება მედიაში გავრცელებულ ინფორმაციას სოფელ ხულგუმოსთან (ახალქალაქის მუნიციპალიტეტი) ადგილობრივი ქრისტიანული სალოცავის დარბევის შესახებ. ორგანიზაცია საქართველოს შინაგან საქმეთა სამინისტროს სავარაუდოდ, სიძულვილით მოტივირებული დანაშაულის სწრაფი და ეფექტიანი გამოძიებისკენ მოუწოდებს. „რელიგიური შეუწყნარებლობით მოტივირებულ დანაშაულებს უმცირესობათა ჯგუფების უსაფრთხოებასა და ინტეგრაციის პროცესზე ნეგატიური სოციალური გავლენა აქვთ, სწორედ ამიტომ არსებითია სამართალდამცავმა ორგანოებმა დროული, ეფექტიანი და სისტემური რეაგირება მოახდინონ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სახალხო დამცველმა საქართველოს პრემიერ-მინისტრს და საქართველოს შინაგან საქმეთა მინისტრს მიმართა ზოგადი წინადადებით, ბოლო წლებში ლგბტ+ თემის წარმომადგენლების გამოხატვის და შეკრების თავისუფლებების შეზღუდვის ინდივიდუალური ფაქტები სახელმწიფო პოლიტიკის დონეზე გაანალიზდეს და ამ მიმართულებით, ერთიანი პრევენციული და რეაქტიული ღონისძიებები დაიგეგმოს.  „სახალხო დამცველმა ზოგად წინადადებაში მიმოიხილა ლგბტ+ ადამიანების გამოხატვის თავისუფლების რეალიზების მხრივ ქვეყანაში არსებული მდგომარეობა იმ ფაქტების ფონზე, რომელსაც ადგილი ჰქონდა 2018 წლის სექტემბრიდან 2019 წლის ივლისის ჩათვლით. კერძოდ, ყურადღება გაამახვილა 2018 წლის 9 სექტემბერს საფეხბურთო მოედანზე ლგბტ+ სიმბოლიკის შეტანის აკრძალვის საკითხზე, ასევე, 2019 წლის 18-23 ივნისს დაგეგმილი „ღირსების მარშის“ ირგვლივ განვითარებული მოვლენებსა და ლგბტ+ ადამიანების წინააღმდეგ ჰომოფობიურად განწყობილი ულტრა მემარჯვენე ჯგუფების გაძლიერების ტენდენციაზე. სახალხო დამცველის შეფასებით, თვალსაჩინოა, რომ შინაგან საქმეთა სამინისტროს მიერ გატარებული ღონისძიებები ლგბტ+ ადამიანების გამოხატვის თავისუფლების უფლების დაცვის კუთხით, ბუნდოვანია და არ ადასტურებს უფლებათა დაცვის სისტემური ხედვის არსებობას და ფაქტების პოტენციური შედეგების ანალიზს“, - ვკითხულობთ გავრცელებულ ინფორმციაში.  სრულად... წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ქამრან მამედოვის წერილს: დომინანტური მზერა საქართველოს აზერბაიჯანული თემის მიმართ. „იმისათვის, რომ განვსაზღვროთ, თუ რას ნიშნავს უმცირესობების მიმართ დომინანტური მზერა, უპირველეს ყოვლისა, უნდა გავარკვიოთ, რა არის საქართველო და ქართველი, რადგანაც უმცირესობების მიმართ მზერას უმეტესად განსაზღვრავს ის, თუ სად გადის ზღვარი ე.წ. ქართველს, ანუ ჩვენიანს, და სხვებს შორის. საქართველოში ამის შესახებ ორგვარი ნარატივია დომინანტური. ერთის მიხედვით, ქართველი არის ეთნიკური ქართველი და, ამავე დროს, მართლმადიდებელი. ხოლო, ვინც ამ ფორმულის მიღმა რჩება, ისინი წარმოადგენენ უმცირესობებს, უცხოს, პრობლემას. ამის საუკეთესო მაგალითია კავკასიის კვლევითი რესურსების ცენტრის ბოლო კვლევა, რომლის მიხედვითაც, მოსახლეობის თითქმის ნახევარი ეთნიკურ და რელიგიურ მრავალფეროვნებას უარყოფითად მიიჩნევს“, ნათქვამია წერილში. სრულად... წყარო: emc.org.ge

თბილისი. საქართველოს სახალხო დამცველი შინაგან საქმეთა სამინისტროს მოუწოდებს გატარდეს პროაქტიული პრევენციული ღონისძიებები „ქართული მარშის“ მიერ კინოფილმის „და ჩვენ ვიცეკვეთ“ ჩვენებისას თბილისისა და ბათუმის კინოთეატრების შესასვლელების ბლოკირების დაანონსებასთან დაკავშირებით. „სახალხო დამცველი განმარტავს, რომ შეკრებისა და მანიფესტაციის უფლებით დაცულია მხოლოდ მშვიდობიანი შეკრების შესაძლებლობა და არა იმგვარი ქმედებები, რომლებიც მიზნად ისახავს სხვათა უფლებებისა და თავისუფლებების შეზღუდვას. აღნიშნული მიზნით, შეკრებებისა და მანიფესტაციების შესახებ საქართველოს კანონი აქციის ორგანიზატორებს და მონაწილეებს გარკვეულ ვალდებულებებს აკისრებს, მათ შორის დაუშვებელია შეკრებისა და მანიფესტაციის ჩატარებისას შენობების შესასვლელების ბლოკირება“, - აღნიშნულია განცხადებაში. სრულად...  წყარო: http://ombudsman.ge

თბილისი. ათი საზოგადოებრივი ორგანიზაცია, ფილმის „და ჩვენ ვიცეკვეთ“ პრემიერის დღესთან დაკავშირებით, მედიაში გავრცელებულ მუქარას ეხმაურება. „განსხვავებული შეხედულებების მქონე ადამიანებზე ფიზიკური ძალადობა და მათი საკუთრების დაზიანება არის ის მეთოდი, რომელიც „ქართულ მარშს“ და სხვა ძალადობრივ ჯგუფებს წარსულშიც გამოუყენებიათ. შესაბამისად, მათი მუქარის გამო რეალური საფრთხე ექმნებათ იმ პირებს, რომლებსაც განზრახული აქვთ, 8 ნოემბერს ფილმის პრემიერას დაესწრონ. ხელისუფლების პოლიტიკური რიტორიკა და გზავნილები დაუცველი ჯგუფების მიმართ უმეტესწილად ორაზროვანია და ეწინააღმდეგება ადამიანის უფლებებისა და თანასწორუფლებიანობის ცნებებს. ხელისუფლება არათუ რიტორიკის დონეზე არ ეწინააღმდეგება მსგავსი ჯგუფებისგან მომდინარე საფრთხეებს, არამედ ასეთი ფაქტების რეაგირების გარეშე დატოვებით, ხელს უწყობს მათ ძალადობრივ ქმედებებს“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ აქვეყნებს ბლოგპოსტს: რას ნიშნავს როცა ხარ საზოგადოებრივად აქტიური ქალი საქართველოში. „ბოლო პერიოდის განმავლობაში განსაკუთრებით გააქტიურდა დისკუსია ქალების საზოგადოებრივ ცხოვრებასა და პოლიტიკაში მონაწილეობის თაობაზე. საქართველოს მოსახლეობის უმრავლესობა საზოგადოებრივ ცხოვრებაში ქალების აქტიურად მონაწილეობას დადებითად აფასებს. საზოგადოებრივი აზრის კვლევის თანახმად, საქართველოს მოსახლეობის 65% მხარს უჭერს პარლამენტში სავალდებულო გენდერული კვოტის შემოღებას. ქალთა უფლებების გაძლიერებისთვის უკანასკნელ წლებში მნიშვნელოვანი საკანონდებლო ცვლილებები განხორციელდა, მათ შორის პარლამენტის გენდერული თანასწორობის საბჭოს ძალისხმევით. თუმცა საკანონმდებლო თვალსაზრისით ყველა წინ გადადგმული ნაბიჯი აზრს კარგავს, თუ ქალების პოლიტიკური და საზოგადოებრივი აქტიურობისა და კრიტიკული პოზიციების გამო მათ წინააღმდეგ ფსიქოლოგიური ტერორის განხორციელების შემთხვევაში, სახელმწიფოს და მმართველი პოლიტიკური ჯგუფების მხრიდან ეფექტური რეაგირება არ იქნება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საზოგადოებრივი ორგანიზაციები 20-21 ივნისის მოვლენების შედეგად დაზარალებულებისთვის სამართლებრივი სტატუსის მინიჭებას მოითხოვენ და სპეციალურ განცხადებას ავრცელებენ.  „ხელმომწერი ორგანიზაციები ვეხმაურებით 20-21 ივნისის მოვლენების შედეგად დაზარალებული პირებისათვის სამართლებრივი სტატუსის მინიჭებაზე უარის თქმის ფაქტს და მოვუწოდებთ პროკურატურას, დროულად მოახდინოს ყველა დაზარალებული პირისათვის დაზარალებულის სტატუსის მინიჭება და საქმის დროული, სრულყოფილი და ობიექტური გამოძიება“, - ვკითხულობთ განცხადებაში, - „მოვუწოდებთ საქართველოს გენერალურ პროკურატურას: დაუყოვნებლივ მიანიჭოს დაზარალებულის სტატუსი ყველა იმ პირს, რომლებიც 20-21 ივნისის მოვლენების შედეგად სამართალდამცავთა ქმედებების შედეგად დაზიანდნენ; მიმდინარე საქმეზე დროულად ჩატარდეს ეფექტიანი, ობიექტური და მიუკერძოებელი გამოძიება; მაღალი საზოგადოებრივი ინტერესის გათვალისწინებით, პერიოდულად მოხდეს საზოგადოების ინფორმირებულობა საქმეზე მიმდინარე გამოძიების პროგრესის შესახებ“.  სრულად...  წყარო: article42.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამუნა ქებურიას ინტერვიუს გარემოს დაცვის საკითხებში საჯარო პოლიტიკის მრჩეველ და აქტივისტ, სამუელ რიევასთან. ინტერვიუ ეხება ჩილეში, 20 ოქტომბერს დაწყებულ საპროტესტო გამოსვლებს, რომელსაც მნიშვნელოვანი პოლიტიკური ცვლილებები მოჰყვა. „აქ მნიშვნელოვანი ისაა, რომ მეტროს ტარიფების ზრდამდე იყო გარკვეული სიტუაცია, რამაც ძალიან გააბრაზა ხალხი. გაკეთდა რამდენიმე განცხადება მინისტრების მხრიდან, საიდანაც ისინი ხუმრობდნენ და დასცინოდნენ იმ სირთულეებს, რასაც რიგითი ადამიანები ყოველდღიურობაში აწყდებიან. შესაბამისად, ხალხი უკვე ძალიან გაღიზიანებული იყო. მთელი ეს მოვლენები - მინისტრების აგდებული დამოკიდებულება, პროტესტის დელეგიტიმაციის მცდელობა, რიგითი ადამიანების ყოველდღიურ ყოფაზე მიყენებული დარტყმა ძერწავდა იმ დიდ კონტექსტს, სადაც შემდეგ მოვლენები ისე განვითარდა, როგორც განვითარდა“... სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, გაეროს შშმ პირთა უფლებების კომიტეტმა გაეროს შშმ პირთა უფლებების კონვენციის იმპლემენტაციის შესახებ საქართველოს მთავრობის მიერ წარდგენილი რიგით პირველი ანგარიშის წინასასესიო განხილვა ჩანიშნა. „დოკუმენტის პირველადი განხილვა 2020 წლის 30 მარტი - 3 აპრილის შუალედში მოხდება, რომლის შედეგადაც კომიტეტი მას კიდევ ერთხელ - პლენარულ სესიაზე განიხილავს. აღნიშნული პროცედურების შედეგად, საქართველოს მთავრობისა და სამოქალაქო სექტორის მიერ წარდგენილი ანგარიშებისა და ინფორმაციის საფუძველზე, კომიტეტი შეიმუშავებს საქართველოს მიმართ დასკვნით რეკომენდაციებს. ეს იქნება პირველი შემთხვევა, როდესაც კომიტეტის მიერ შეფასდება ქვეყანაში კონვენციის იმპლემენტაციის ხარისხი, მათ შორის, გაანალიზდება პროცესის პოზიტიური ასპექტები და მნიშვნელოვანი გამოწვევები“, ნათქვამია ორგანიზაციის ვებგვერდზე. სრულად... წყარო: gyla.ge