თბილისი. საერთაშორისო გამჭვირვალობა - საქართველოს წარმომადგენლებმა პარლამენტის აპარატის თანამშრომლებს ტრენინგები ჩაუტარეს. განხილული საკითხები: კიბერჰიგიენა; პერსონალური მონაცემების დაცვის თანამედროვე ტენდენციები; ინფორმაციის თავისუფლება და ინფორმაციის კატეგორიები (კონფიდენციალური და საჯარო ინფორმაცია). ტრენინგები განხორციელდა შვედეთის საერთაშორისო განვითარების სააგენტოს (Sida) ფინანსური მხარდაჭერით. სრულად...  წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2022 წლის 30 მაისს OECD-მ საქართველოში კორუფციული გარემოს შეფასების პილოტური ანგარიში გამოაქვეყნა. „მიუხედავად იმისა, რომ ანგარიში არ მოიცავს ინფორმაციას თითოეულ შეფასებულ სექტორულ მიმართულებაზე ქვეყნის მიერ მიღებული ქულებისა და ინდიკატორების შესრულების რეიტინგების შესახებ, ანგარიშის აღწერილობით ნაწილზე დაყრდნობით შესაძლოა ითქვას, რომ შეფასებული ცამეტი მიმართულებიდან თითქმის ყველა საქართველოს მიერ შესრულების დაბალი ხარისხით ხასიათდება“. ვრცლად... წყარო: idfi.ge

თბილისი. 11 ივლისს, 18:00 საათზე ღია საზოგადოების ფონდი გამართავს დისკუსიას იპოდრომის კორტების შესახებ. „დისკუსია შეეხება იპოდრომის პარკის რეაბილიტაციის გეგმას, რომელიც მოქალაქეთა ჩართულობის გარეშე, უნებართვო მშენებლობის ფორმით მიმდინარეობს, ასევე, იპოდრომის მიმდებარედ არსებული საჩოგბურთო კორტების პრობლემური გასხვისების პროცესს, რომელიც ღია საზოგადოების ფონდის კვლევასა და სტატიაშია ასახული... სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს კვლევამ პარტიების დაფინანსების შესახებ, კიდევ ერთხელ გამოკვეთა, რომ საქართველოში პარტიებს შორის ფინანსური უთანასწორობა და პოლიტიკური კორუფციის არაეფექტიანი სახელმწიფო ზედამხედველობა მთავარ პრობლემებად რჩება. კერძოდ, 2021 წელს: 17-მა პარტიამ მთლიანობაში დაახლოებით 43 მლნ ლარის ოდენობის შემოსავალი მიიღო და 41.9 მლნ ლარის ხარჯი გაწია, რომელთა დაახლოებით 60% - „ქართული ოცნებაზე“ მოდიოდა მმართველი პარტიის შემომწირველებმა ჯამში დაახლოებით 320 მლნ ლარის ღირებულების ტენდერები მოიგეს და 19 მლნ ლარის გამარტივებული შესყიდვის კონტრაქტები მიიღეს. ამ კომპანიებმა და მათთან პირდაპირ ან ირიბად დაკავშირებულმა შემომწირველებმა იგივე პერიოდში დაახლოებით 4.5 მლნ ლარი გაიღეს „ქართული ოცნების” სასარგებლოდ საკანონმდებლო ცვლილებებით, ორმა პარტიამ - „საქართველოს ლეიბორისტულმა პარტიამ” და პარტიამ „ლელო საქართველოსათვის”, სახელმწიფო დაფინანსების მიღების უფლება დაკარგა“. პოლიტიკური კორუფციის ან სხვა ტიპის შესაძლო დარღვევები, ასევე, ორგანიზაციის რეკომენდაციები დეტალურად ნახეთ კვლევაში... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიზს: საქართველოს მთავრობის სარეზერვო ფონდის ხარჯვა 2021 წელს. კვლევის თანახმად, 2021 წლის სარეზერვო ფონდიდან გამოყოფილი თანხების განკარგვის პრაქტიკა ნაკლებად არის შესაბამისობაში ფონდის მიზნებთან და პრინციპებთან. 2021 წელს გამოყოფილი თანხების უმეტესობის ბიუჯეტში გათვალისწინება შესაძლებელი იყო. 2017-2021 წლებში შინაგან საქმეთა სამინისტროს თანამშრომლების ფულადი ჯილდოებით (პრემია) წახალისებისთვის მთავრობის სარეზერვო ფონდიდან გამოიყო ჯამურად 20.5 მილიონი ლარი. სრულად... წყარო: idfi.ge

თბილისი. 7 ივლისს, სოციალური სამართლიანობის ცენტრმა გამართა ორი კვლევის პრეზენტაცია.: მოსამართლეთა დისციპლინური პასუხისმგებლობის სისტემა... საქმეთა ელექტრონული განაწილების სისტემა სასამართლოში... სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველოს“ ცნობით, ორგანიზაციამ ახალ პუბლიკაციაში თავი მოუყარა პრემიერ ღარიბაშვილის მიმართ წლების განმავლობაში დაგროვილ ბრალდებებსა და კითხვებს, რომლებზეც საზოგადოებას დღემდე არ აქვს პასუხი. „მასთან დაკავშირებული სავარაუდო კორუფციული და ადამიანის უფლებების დარღვევები არ გამოძიებულა; ირაკლი ღარიბაშვილს არც პოლიტიკური პასუხისმგებლობა აუღია რომელიმე მათგანზე. „ვინ მართავს საქართველოს“ არის პუბლიკაციების ახალი სერია, რომლის მიზანია, წინა პლანზე გამოიტანოს კორუფციული შინაარსის ის ბრალდებები და პასუხგაუცემელი კითხვები, რომლებიც დაგროვდა ქვეყნის მართვაში მონაწილე კონკრეტულ თანამდებობის პირებზე“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ“ 2013-2021 წლებში სახელმწიფო ქონების პრივატიზების პროცესში მნიშვნელოვანი კორუფციული რისკები და კონკრეტული ფაქტები გამოავლინა, როცა სახელმწიფო ქონება კონკრეტული ადამიანების პირადი ინტერესების სასარგებლოდ იყიდება. „ვფიქრობთ, რომ სახელმწიფო ქონების პრივატიზების პროცესი არასაკმარისად გამჭვირვალეა. პროაქტიულად არ არის ხელმისაწვდომი პირდაპირი პრივატიზაციის შესახებ ინფორმაცია და მთავრობის განკარგულებები“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაცია (GYLA) აქვეყნებს იუსტიციის უმაღლესი საბჭოს მონიტორინგის N10 (2021 წლის) ანგარიშს. „საბჭოს მონიტორინგის პროცესში გამოვლინდა, რომ სისტემის მთავარი გამოწვევა კვლავ კლანური მმართველობაა. პრობლემურია მოსამართლეთა დანიშვნა/ნომინირების საკითხიც. კლანის ძალაუფლების ერთ-ერთ ბერკეტს სასამართლოს თავმჯდომარეები წარმოადგენენ.  მათი დანიშვნისას საბჭო იყენებს ე.წ. „მბრუნავი კარის“ სისტემას. ასევე, კვლავ ჭიანურდება დისციპლინური სამართალწარმოების ვადები“. სრულად... წყარო: gyla.ge

თბილისი. გაეცანით კვლევის ანგარიშს - კორპორაციული მმართველობის, კერძოდ კორპორაციული ანგარიშგებების სისტემის დანერგვის შესახებ ასოცირების ხელშეკრულებით ნაკისრი ვალდებულებების შესრულების მიმდინარეობის მონიტორინგი და შეფასება. კვლევა...  კვლევა მომზადდა საქართველოს ახალგაზრდა ეკონომისტთა ასოციაციის იმერეთის წარმომადგენლობის მიერ, საქართველოს სტრატეგიული კვლევებისა და განვითარების ცენტრი-ს მხარდაჭერით, პროექტის „სამოქალაქო საზოგადოების ინიციატივა“ ფარგლებში.  პროექტი ხორციელდება ევროკავშირისა და კონრად ადენაუერის ფონდის მხარდაჭერით. სრულად...  წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: კეთილსინდისიერება საჯარო სამსახურში. კვლევის მიგნებების თანახმად, „219 საჯარო დაწესებულებიდან მიღებული ინფორმაციის მიხედვით მხოლოდ 23 უწყებაშია შიდა სამართლებრივი დოკუმენტით დარეგულირებული თანამშრომელთა ეთიკისა და ქცევის ზოგადი წესები. ბოლო სამი წლის განმავლობაში ეთიკის ნორმების დარღვევები აღრიცხულია მხოლოდ 40 საჯარო დაწესებულებაში. გამოკითხული რესპონდენტების 27%-მა არ იცოდა, არსებობდა თუ არა მათ დაწესებულებაში სტრუქტურული ერთეული, რომელიც პასუხისმგებელი იყო მხილების შესახებ განცხადების მიღებასა და რეაგირებაზე“. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, პრემიერ-მინისტრმა ირაკლი ღარიბაშვილმა 22 ივნისს პარლამენტში გამოსვლისას განაცხადა, რომ საქართველო კორუფციასთან ბრძოლაში ერთ-ერთი მოწინავე სახელმწიფოა. TI Georgia-ს თქმით, საქართველოს მთავრობა ხშირად იყენებს საერთაშორისო რეიტინგების არასწორ ინტერპრეტაციას ქვეყანაში არსებული რეალური პრობლემების დასამალად. პრემიერი ამჯერადაც „საერთაშორისო გამჭვირვალობის“ 2021 წლის „კორუფციის აღქმის ინდექსის“ (CPI) მონაცემებს იმოწმებდა. ირაკლი ღარიბაშვილმა თქვა, რომ CPI-ის მიხედვით საქართველო 2012 წელს 51-ე ადგილას იყო, ხოლო 2021 წელს 45-ე ადგილასაა, თუმცა არ უხსენებია, რომ მთავარი განმსაზღვრელი ინდექსში მიღებული ქულაა. „საქართველოს შემთხვევაში კი ქულა 2012 წლის შემდეგ საგრძნობლად არ გაუმჯობესებულა - 2012 წელს ქვეყანას 100-დან 52 ქულა ჰქონდა, ხოლო 9 წლის შემდეგ, 2021 წელს 55 აქვს, რაც ქვეყანაში ანტიკორუფციული რეფორმების სტაგნაციაზე მიუთითებს. 55 ქულა საშუალო მაჩვენებელია. მაგალითისთვის, საუკეთესო შედეგის მქონე 10 ქვეყნის ქულები 80-ს აღემატება. მან თქვა, რომ საქართველო ასოცირების ტრიოში უკრაინასა და მოლდოვასთან შედარებით უპირობო ლიდერია. CPI-ის შეფასებით საქართველოს მართლაც აქვს უკეთესი შედეგი, რაც დიდწილად წვრილმანი მექრთამეობის დაბალი დონითაა განპირობებული. თუმცა, მექრთამეობის წინააღმდეგ წარმატებული რეფორმები 18 წლის წინ ჩატარდა და ვერ ჩაითვლება დღევანდელი ხელისუფლების მიღწევად. CPI-ის ქულები სწორედ იმაზე მიუთითებს, რომ მსგავსი ამბიციის რეფორმები ბოლო 9 წლის განმავლობაში არ განხორციელებულა. ამასთან, მოლდოვასა და უკრაინისგან განსხვავებით, CPI მხოლოდ საქართველოსთან მიმართებაში იყენებს ტერმინ „სახელმწიფოს მიტაცებას“, რაც პრემიერ-მინისტრს ასევე არ უხსენებია“. სრულად... წყარო: TI Georgia-ს გვერდი სოციალურ ქსელში

ინფორმაციის თავისუფლების განვითარების ინსტიტუტის (IDFI) წარმომადგენლებმა, ევრაზიის აკადემიური ანტიკორუფციული ქსელის ფარგლებში ორგანიზებული პოდკასტის (UNCHAINED podcast) ფარგლებში საქართველოში ანტიკორუფციული რეფორმების მდგრადობის საკითხი განიხილეს. „მიუხედავად იმისა, რომ საქართველო უკანასკნელი 15 წლის განმავლობაში იყო ლიდერი აღმოსავლეთ პარტნიორობის ქვეყნებში ანტიკორუფციული რეფორმების განხორციელების თვალსაზრისით, საქართველოს ანტიკორუფციული მაჩვენებლები უარესდება. სამოქალაქო საზოგადოება თანხმდება, რომ  მნიშვნელოვანია ანტიკორუფციული რეფორმების გაგრძელება და საერთაშორისო ორგანიზაციების რეკომენდაციების შესრულება.” სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ (TI Georgia) აქვეყნებს 2021 წლის ანგარიშს, სადაც ორგანიზაცია გაწეული სამუშაოების და მნიშვნელოვანი მოვლენების შესახებ გიყვებათ. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს შეფასებას ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონში შეტანილ ცვლილებებთან დაკავშირებით. ორგანიზაცია მიიჩნევს, რომ „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონში შეტანილი ცვლილებები არ არის საკმარისი ქვეყანაში ამ მიმართულებით არსებული გამოწვევების აღმოსაფხვრელად და აუცილებელია, საქართველოს მთავრობამ ამბიციური საპასუხო ნაბიჯები გადადგას. „მნიშვნელოვანია, ხელისუფლებამ ძალისხმევა არ დაიშუროს MONEYVAL-ისა და FATF-ის რეკომენდაციების, მათ შორის, ბენეფიციარ მესაკუთრეებთან მიმართებით არსებული რეკომენდაციების შესასრულებლად, რამდენადაც აღნიშნული რეკომენდაციები წარმოადგენს ძირითად ფუნდამენტს, რომლის შესრულებითაც სახელმწიფოებმა ფულის გათეთრებისა და ტერორიზმის დაფინანსებასთან ბრძოლის საერთო მიზანს შეიძლება მიაღწიონ“, ნათქვამია შეფასებაში. სრულად... წყარო: idfi.ge

თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, 2 ივნისს გამოქვეყნდა აშშ-ის სახელმწიფო დეპარტამენტის 2021 წლის რელიგიის თავისუფლების ანგარიში საქართველოს შესახებ. „ანგარიშში მიმოხილულია კოვიდ 19-ის დროს რელიგიური ნიშნით დისკრიმინაციისა და უთანასწორობის, რელიგიური ორგანიზაციებისა და სასულიერო პირების სავარაუდო უკანონო თვალთვალისა და მიყურადების საკითხები; რელიგიის თავისუფლებასთან მიმართებით პრეცედენტული სასამართლო გადაწყვეტილებები, მათ შორის TDI-ს საკონსტიტუციო სარჩელები და სამართალწარმოების შედეგები; საბჭოთა პერიოდში ჩამორთმეული ქონების რესტიტუციის საკითხი; რელიგიური ნიშნით დისკრიმინაცია და რელიგიის თავისუფლების შეზღუდვა საგანმანათლებლო სისტემაში; რელიგიური ორგანიზაციების დაფინანსების, სიძულვილის ენის, საეკლესიო ანტისემიტიზმის კუთხით არსებული პრობლემები და რელიგიის თავისუფლების მდგომარეობა ოკუპირებულ ტერიტორიებზე. სახელმწიფო დეპარტამენტის ანგარიშში ასახულია არასამთავრობო ორგანიზაციების პოზიციები, მათ შორის ვრცლად არის აღწერილი ტოლერანტობისა და მრავალფეროვნების ინსტიტუტის (TDI) შეფასებები და აქტივობები საქართველოში რელიგიისა და რწმენის თავისუფლების დაცვასა და პოლიტიკასთან დაკავშირებით“, ნათქვამია ორგანიზაციის ვებგვერდზე. სრულად... წყარო: tdi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2017 წლიდან 2021 წლის ჩათვლით, საქართველოს მასშტაბით 7.1 მილიონი ერთეული ვიდეოჯარიმა გამოიწერა, ხოლო მათ შედეგად დარიცხული თანხა დაახლოებით 302 მილიონ ლარს აღწევს. „2020 წელს ჯარიმების საერთო რაოდენობა მნიშვნელოვნად შემცირდა, რაც შესაძლოა დაკავშირებული იყოს როგორც პანდემიასთან და მის სამართავად დაწესებულ შეზღუდვებთან, ასევე წინასაარჩევნო პერიოდში კონტროლის შემსუბუქებასთან. 2020-2021 წლებში, 2019 წელთან შედარებით, თითქმის განახევრდა იმ პირთა რაოდენობა, ვისაც დააკლდათ ან გაუნულდათ ქულები მართვის მოწმობაზე“. სრულად... წყარო: idfi.ge

თბილისი. „საერთაშორისო საბიუჯეტო პარტნიორობის“ (IBP) გლობალური ანგარიშის მიხედვით, 2021 წლის „ღია ბიუჯეტის ინდექსში“ საქართველომ 100 შესაძლებელი ქულიდან 87 ქულა მიიღო, რაც 2019 წელთან შედარებით (81 ქულა), წინსვლაა. საერთაშორისო გამჭვირვალობა - საქართველოს ინფორმაციით, ამ მაჩვენებლით 120 ქვეყნის მსოფლიო რეიტინგში საქართველო პირველ ადგილზე გავიდა, მაშინ როდესაც 2019-ის კვლევის შედეგებით იგი მე-5 ადგილზე იყო. ორგანიზაციის ცნობით, საქართველოს კვლავ აქვს გამოწვევები საბიუჯეტო პროცესში მოქალაქეების ჩართულობის კუთხით. კერძოდ, 100 შესაძლებელი ქულიდან საბიუჯეტო პროცესებში მოქალაქეთა ჩართულობის უზრუნველყოფის მხრივ საქართველომ 44 ქულა (მსოფლიოში მე-4 ადგილი) მიიღო, ბიუჯეტზე ზედამხედველობის მხრივ კი - 74 ქულა (21-ე ადგილი). სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანგარიშს: ნორმატიული აქტების შემუშავების პროცესში საჯარო-კერძო დიალოგის ხარისხის შეფასება - 2020-2021 წწ. „ანგარიშის მიზანია, შეაფასოს კერძო სექტორის ჩართულობის ხარისხი მნიშვნელოვანი ეკონომიკური ზეგავლენის მქონე კანონებისა და დადგენილებების მომზადების პროცესში. ანგარიში მოიცავს საჯარო და კერძო სექტორებს შორის დიალოგის ხარისხის შეფასებას 18 ნორმატიული აქტის მომზადების პროცესში, რომლებიც მიღებული იქნა 2020 წლის იანვრიდან 2021 წლის სექტემბრამდე პერიოდში. შესაფასებლად შეირჩა 8 კანონი, 8 კანონქვემდებარე ნორმატიული აქტი და 2 მუნიციპალიტეტის ორგანოს ნორმატიული აქტი. შერჩეული მუნიციპალიტეტებია ოზურგეთი და ზუგდიდი“. სრულად... წყარო: idfi.ge

თბილისი. 23 მაისს თავისუფლების განვითარების ინსტიტუტმა (IDFI) საჯარო ინფორმაციის ხელმისაწვდომობის 2021 წლის მონაცემები შეაჯამა და სახალხო დამცველის აპარატს, რომელმაც ინფორმაციის ხელმისაწვდომობის კუთხით 100% მაჩვენებელი წარმოადგინა - სპეციალური სიგელი გადასცა. „თავისუფლების განვითარების ინსტიტუტის (IDFI) კვლევის თანახმად, მიუხედავად საქმისწარმოების ელექტრონულო სისტემაზე გადასვლისა, რაც თავისთავად აიოლებს ინფორმაციის გაცემას და ხელს უწყობს სტანდარტის ამაღლებას, ქვეყანაში საჯარო ინფორმაციის ხელმისაწვდომობის ხარისხი 2017 წლიდან ყოველწლიურად უარესდება და 2021 წელს ინფორმაციის ხელმისაწვდომობის საერთო რიცხვი მხოლოდ 54%-ს შეადგენს. ამ ფონზე, სახალხო დამცველის აპარატი წლების განმავლობაში ინარჩუნებს საჯარო ინფორმაციის ხელმისაწვდომობის საუკეთესო მაჩვენებელს და ჯეროვნად ასრულებს საჯარო ინფორმაციის გაცემის კანონით გათვალისწინებულ ვალდებულებას“, ნათქვამია ომბუდსმენის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციების, ადამიანის უფლებათა დამცველების და აქტივისტების საარსებო სამარვლებრივი გარემოს და პრაქტიკის ანგარიშის – სსო მეტრის პრეზენტაცია გაიმართა 24 მაისს. 2021 წლის სსო მეტრის თანახმად, საქართველო საზოგადოებრივი ორგანიზაციების, ადამიანის უფლებათა დამცველებისა და აქტივისტებისთვის გარემო მაქსიმალური 7 ქულიდან 4. 7 ქულით შეფასდა (კანონმდებლობა: 5.2 ქულა, პრაქტიკა 4.3 ქულა). სსო მეტრის შედეგების მიხედვით: საქართველო, საზოგადოებრივი ორგანიზაციებისთვის საშუალო რისკის ქვეყანას წარმოადგენს. ანგარიში მომზადდა სამოქალაქო საზოგადოების ინსტიტუტის (CSI), საქართველოს ახალგაზრდა იურისტთა ასოციაციის (GYLA) და ინფორმაციის თავისუფლების განვითარების ინსტიტუტის თანამშრომლობითა (IDFI) და საზოგადოებრივი ორგანიზაციების მონაწილეობით. ანგარიში განხორციელდა პროექტის – „სამოქალაქო საზოგადოების ორგანიზაციების გაძლიერების და ხელსაყრელი გარემოს შექმნის გზამკვლევის“ ფარგლებში, რომლის მხარდამჭერია არაკომერციული სამართლის ევროპული ცენტრი (ECNL) და ევროკავშირი (EU). პროექტი აღმოსავლეთ პარტნიორობის 6 ქვეყანაში მიმდინარეობს. ანგარიში: სსო მეტრი, 2021... შეფასების ინსტრუმენტი...

თბილისი. გაეროს ქალთა ორგანიზაციამ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მენეჯმენტთან თანამშრომლობით საქართველოში Global Rights for Women წარმომადგენლები მოიწვია.  ექსპერტები შეაფასებენ ძალადობაგამოვლილი ქალებისთვის სახელმწიფოს მიერ შეთავაზებულ მომსახურებებს, კერძოდ თავშესაფრებსა და კრიზისულ ცენტრებში არსებულ სერვისებს, და მათი გაუმჯობესების მიზნით მოამზადებენ რეკომენდაციებს. სრულად...  წყარო: ორგანიზაციის გვერდი სოციალურ ქსელში