თბილისი. საქართველოს ახალგაზრდა იურისტთა ასოციაცია (საია) 2020 წლის საპარლამენტო არჩევნების სადამკვირვებლო მისიის წინასაარჩევნო გარემოს, არჩევნების დღისა და არჩევნების შემდგომი პერიოდის მონიტორინგის ანგარიშს აქვეყნებს. ორგანიზაციამ მიგნებებზე დაყრდნობით, შეიმუშავა რეკომენდაციები, რომელთა ნაწილი 2021 წლის საარჩევნო რეფორმის ფარგლებში დამტკიცდა. თუმცა, საიას შეფასებით კვლავ რჩება საკითხები, რომელთა გათვალისწინებაც, ეფექტურ აღსრულებასთან ერთად, კრიტიკულად მნიშვნელოვანია საარჩევნო პროცესების გასაუმჯობესებლად. სრულად... წყარო: gyla.ge

თბილისი. 5 ივლისიდან ევროკავშირისა (EU) და გაეროს განვითარების პროგრამის (UNDP) ხელშეწყობით, 2021 წლის ადგილობრივი არჩევნების მედიაში გაშუქების მონიტორინგი დაიწყო. მედიამონიტორინგი მოიცავს 54 ეროვნულ და რეგიონულ მედია-საშუალებას და სრული საარჩევნო ციკლის მანძილზე გაგრძელდება. ასევე, გავრცელდება არჩვენების შემდგომ პერიოდზეც (2021 წლის ივლისიდან 2022 წლის მარტამდე). მონიტორინგს ახორციელებენ ორგანიზაციები: საქართველოს ჟურნალისტური ეთიკის ქარტია, ინტერნიუს საქართველო და CRRC-საქართველო. სრულად... წყარო: www.ge.undp.org

თბილისი. ქალთა მოძრაობის ინფორმაციით, 21 ივნისს, საქართველოს პარლამენტის იურიდიულმა კომიტეტმა საქართველოს ორგანული კანონის „საქართველოს საარჩევნო კოდექსის“ ცვლილებების შეტანის შესახებ კანონპროექტის მეორე მოსმენით განხილვისას არსებითად შეცვალა ადგილობრივი თვითმმართველობის არჩევნებისთვის პარტიული (პროპორციული) სიების შედგენის წესი.  ცვლილების თანახმად: პოლიტიკური პარტია ვალდებული იქნება 2028 წლამდე ჩასატარებელი ადგილობრივი თვითმმართველობის ყველა არჩევნებისთვის ისე შეადგინოს პარტიული სია, რომ სამი კანდიდატიდან ერთი მაინც იყოს განსხვავებული სქესის წარმომადგენელი. ორგანიზაციის განმარტებით, ეს ინიციატივა არსებითად აუარესებს საარჩევნო კოდექსის არსებულ ნორმას, რომელიც პოლიტიკურ პარტიას ავალდებულებდა, 2028 წლამდე ჩასატარებელ ადგილობრივი თვითმმართველობის ორგანოთა საერთო არჩევნებისთვის წარდგენილ სიაში ყოველი მეორე განსხვავებული სქესის კანდიდატი ჰყოლოდა. საზოგადოებრივი ორგანიზაციების ნაწილი მოუწოდებს პარლამენტს, პლენარულ სხდომაზე მხარი არ დაუჭიროს ინიცირებულ ცვლილებას, რაც შეასუსტებს ადგილობრივ დონეზე ქალთა წარმომადგენლობას, შეაფერხებს არსებითი თანასწორობის მიღწევას და საერთაშორისო ვალდებულებების შესრულებას. სრულად... წყარო: ქალთა მოძრაობის გვერდი სოციალურ ქსელში

თბილისი. „საერთაშორისო გამჭვირვალობა-საქართველო“ საარჩევნო კოდექსში შესატანი ცვლილებების არსს მიმოიხილავს და ადარებს ამჟამად მოქმედ კანონს. დეტალურად გაეცანით ორგანიზაციის შეფასებებსა და რეკომენდაციებს: ცესკოს დაკომპლექტების წესზე; ცესკოს წევრების დასანიშნად დაგეგმილ დროებით რეგულაციაზე; ცესკოს თავმჯდომარის მოადგილეების რაოდენობის ზრდაზე; საოლქო და საუბნო კომისიების ფორმირების წესზე; შემაჯამებელი ოქმების შესწორების საკითხზე; არჩევნების შედეგების გადათვლის რეგულაციებზე; საკრებულოებში მანდატების განაწილებისა და საარჩევნო ბარიერის შესახებ; საარჩევნო აგიტაციის შეზღუდვასა და სხვა მნიშვნელოვან საკითხებზე; სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის თავმჯდომარემ პარლამენტის იურიდიულ საკითხთა კომიტეტის წევრებს მიმართვა გაუგზავნა, სადაც ის დეპუტატებს მოუწოდებს გადახედონ პოლიტიკური პარტიების კანონსა და საარჩევნო კოდექსში დაგეგმილ ცვლილებებს. საკანონმდებლო ინიციატივა ბოიკოტის რეჟიმში მყოფი პარტიებისთვის სახელმწიფო დაფინანსების შეწყვეტას ან შეჩერებას, ასევე უფასო საეთერო დროის ჩამორთმევას ითვალისწინებს. როგორც საზოგადოებისათვის ცნობილია, ამ კანონპროექტებზე მიმდინარე წლის მარტში ვენეციის კომისიამ და ეუთო/ოდირმა ერთობლივი დასკვნა მიიღეს, რომელშიც მკაცრად გააკრიტიკეს ის. ორგანიზაციები მიიჩნევენ, რომ პარტიებისთვის სახელმწიფო დაფინანსების შეწყვეტა საფრთხეს უქმნის მათი საქმიანობის გაგრძელების შესაძლებლობას და, ზოგადად, პარტიულ პლურალიზმს. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციამ (საია) პარლამენტს საარჩევნო კოდექსში შესატან ცვლილებებზე დასკვნა წარუდგინა. ორგანიზაცია მიესალმება საარჩევნო კანონმდებლობის გაუმჯობესებას და მასში ევროპული საბჭოს პრეზიდენტის, შარლ მიშელის 19 აპრილის დოკუმენტის დიდი ნაწილის ასახვას, თუმცა საიას კანონპროექტის მიმართ შენიშვნები შემდეგ საკითხებზე აქვს: საოლქო კომისიების დაკომპლექტება; ამომრჩევლის ნების კონტროლი; ადგილობრივი თვითმმართველობის საარჩევნო სისტემა; საარჩევნო დავების გასაჩივრების ვადები; სავალდებულო გადათვლა; სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) იუსტიციის უმაღლესი საბჭოს მოსამართლე წევრების არჩევნებს შიდაკლანურ როტაციად აფასებს. „დღეს მართლმსაჯულების სისტემის ძირითადი გამოწვევა კლანური მმართველობა და მისი ალიანსია ხელისუფლებასთან. წლების განმავლობაში ამ პროცესზე დაკვირვება აჩვენებს, რომ ის ძირითადად არაკონკურეტულ გარემოში მიმდინარეობს და საბჭოს შემადგენლობაში, როგორც წესი, მოსამართლეთა გავლენიანი ჯგუფის ლიდერები ხვდებიან, რომელთა უმრავლესობასაც უკავია ან წლების მანძილზე ეკავა მენეჯერული თანამდებობა. არჩევნები განახლებასთან და ახალ პერსპექტივებთან ასოცირდება, თუმცა მოლოდინები ამ შემთხვევაში უსაფუძვლოა“, ნათქვამია განცხადებაში. სრულად... წყარო: gyla.ge

თბილისი. საერთაშორისო გამჭვირვალობა - საქართველოს განცხადების საფუძველზე, საქართველოს ჟურნალისტური ეთიკის ქარტიის საბჭომ გადაწყვეტილება მიიღო, რომ ტელეკომპანია „რუსთავი 2”-ის ჟურნალისტმა ნათია ლაზაშვილმა, ქარტიის პირველი პრინციპი (ინფორმაციის სიზუსტე) დაარღვია. „განცხადების საფუძველი გახლდათ „რუსთავი 2”-ის ეთერით 2020 წლის 14 დეკემბერს 9 საათიან კურიერში გასული სიუჟეტი, რომელშიც წამყვანმა აღნიშნა, რომ „საერთაშორისო გამჭვირვალობა - საქართველომ” საპარლამენტო არჩევნების შედეგებთან დაკავშირებით პოზიცია შეცვალა, რაც საბჭოს შეფასებით, არასწორ ინფორმაციას წარმოადგენდა. ჩვენი ორგანიზაცია აქტიურად იცავს მედიის და ჟურნალისტების უფლებებს და მათ გამოხატვის თავისუფლებას, რომელიც დღეს სერიოზული გამოწვევების წინაშე დგას. თუმცა მნიშვნელოვანია ასევე, რომ მედიის წარმომადგენლებმა დაიცვან საყოველთაოდ აღიარებული პროფესიული და ეთიკური სტანდარტები ქვეყანაში მიმდინარე პროცესების გაშუქებისას“, ნათქვამია ორგანიზაციის განცხადებაში.  სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ანგარიშს: „პროპაგანდისტული ნარატივები Facebook-ზე 2020 წლის საპარლამენტო არჩევნების პერიოდში“... „ანგარიში მიმოიხილავს ღირებულებით საკითხებზე პროპაგანდისტული ნარატივების გამავრცელებელი ფეისბუქ გვერდების შესწავლის საფუძველზე გამოვლენილ აქტივობას და მოიცავს, როგორც რაოდენობრივ, ისე თვისებრივ მიგნებებს. ანგარიში ასევე მიმოიხილავს გვერდების კოორდინაციას საარჩევნო სუბიექტებთან, პროპაგანდისტული ნარატივის გამავრცელებელი გვერდების გზავნილების ანალიზს პოლიტიკურ დისკურსთან და საარჩევნო პროცესებთან თანხვედრაში“. სრულად... წყარო: isfed.ge

თბილისი. გაეცანით სამართლიანი არჩევნებისა და დემოკრატიის საერთაშორისო საზოგადოების (ISFED) მიერ მომზადებულ 2020 წლის საპარლამენტო არჩევნების სოციალური მედიის მონიტორინგის საბოლოო ანგარიშს... „ანგარიში მოიცავს საქართველოში სოციალური მედიის სივრცეში 2020 წლის 1 სექტემბრიდან 21 ნოემბრის ჩათვლით პერიოდში მიმდინარე ძირითადი ტენდენციების ანალიზს. კერძოდ, აღწერილია არჩევნებში რეგისტრირებული პოლიტიკური პარტიებისა და კანდიდატების ოფიციალური გვერდების, ადგილობრივი თვითმმართველობის ორგანოების ოფიციალური გვერდების აქტივობა, ასევე პოლიტიკური მიზნით მოქმედ არაოფიციალურ, ანონიმურ გვერდებზე დაკვირვების შედეგები და სხვა მნიშვნელოვანი ტენდენციები, რომლებიც მიზნად ისახავენ, ამა თუ იმ ფორმით გავლენა მოახდინონ ამომრჩევლის ნებაზე“. სრულად... წყარო: www.isfed.ge

თბილისი. საქართველოს ახალგაზრდა იურისტთა ასოციაციამ (საია) ანგარიშის „საარჩევნო დავების ანალიზი“ პრეზენტაცია გამართა. „ანგარიშის მიზანია, გამოკვეთოს ის ძირითადი ტენდენციები და საკანონმდებლო ხარვეზები, რომლებიც ხელს უშლის საარჩევნო დავების სამართლიან გადაწყვეტას და აჩენს უნდობლობას საარჩევნო პროცესების მიმართ. დოკუმენტში საია აფასებს 2020 წლის საპარლამენტო არჩევნებთან დაკავშირებულ საარჩევნო დავებს, როგორც წინასაარჩევნო, ასევე, კენჭისყრის დღეს და შემდგომ პერიოდში. ანგარიშში მოცემულია საარჩევნო დავების განხილვის პროცესში გამოვლენილი ძირითადი ხარვეზები. ასევე, გაანალიზებულია საარჩევნო ადმინისტრაციებისა და სასამართლოების მიერ მიღებულ გადაწყვეტილებებში ასახული პრობლემური პრაქტიკა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველომ მოამზადა კვლევა იმის შესახებ, თუ რომელ ტელევიზიებში ანთავსებდნენ პარტიები პოლიტიკურ რეკლამას 2016-2020 წლების არჩევნების დროს.  „პოლიტიკური პარტიები წინასაარჩევნო პერიოდში სატელევიზიო პოლიტიკური რეკლამის განთავსებაში სოლიდურ თანხას ხარჯავენ, რაც მაუწყებლების შემოსავლის მნიშვნელოვან ნაწილს წარმოადგენს. წინამდებარე კვლევის ფარგლებში შევისწავლეთ 2016-2020 წლებში გამართული 4 არჩევნების ფარგლებში პოლიტიკური სუბიექტების მიერ წინასაარჩევნო პერიოდში სატელევიზიო პოლიტიკური რეკლამის განთავსებასთან დაკავშირებული მონაცემები. კერძოდ, გავაანალიზეთ პოლიტიკური სუბიექტების მიერ აუდიტის სამსახურსა და ცენტრალურ საარჩევნო კომისიაში წარდგენილი მონაცემები. პარტიების მიერ რეკლამის განთავსების პრაქტიკაც აჩვენებს იმ პოლარიზაციას, რომლითაც ქართული პოლიტიკური და მედია სივრცე გამოირჩევა“, - ვკითხულობთ კვლევის შესავალ ნაწილში.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციამ (საია) პარლამენტს საარჩევნო კოდექსის ცვლილებაზე დასკვნა წარუდგინა. „ინიციატივა ითვალისწინებს საარჩევნო რეგისტრაციის გაუქმებას იმ სუბიექტისათვის, რომლის წინასაარჩევნო კამპანიაში პოლიტიკური ლიდერის რანგში მონაწილეობს პირი, რომელიც არ აკმაყოფილებს კონსტიტუციით დადგენილ რომელიმე ცენზს. პარტიების თავისუფლების შემზღუდველი ნორმები მოითხოვს სიზუსტის და განჭვრეტადობის იმაზე მკაცრ ტესტს, ვიდრე ეს სხვა, არაპოლიტიკურ გაერთიანებებთან მიმართებით გამოიყენება. აუცილებელია, რომ დარღვევისთვის შერჩეული პასუხისმგებლობის ზომა იყოს შემაკავებელი, პროპორციული და დარღვევასთან უშუალოდ დაკავშირებული. პარტიისთვის საარჩევნო რეგისტრაციის უალტერნატივო წესით გაუქმება ასეთი არ არის. საია მოუწოდებს პარლამენტს, არ დაუშვას პოლიტიკური გაერთიანებების ბლანკეტური, არაპროპორციულად შემზღუდველი, დაუსაბუთებელი და თვითნებურად მათი გზიდან ჩამოშორების საფრთხის შემცველი ნორმების გაჩენა კოდექსში და არ მიიღოს ეს კანონპროექტი“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო და სამართლიანი არჩევნები (ISFED) აქვეყნებს ერთობლივ შეფასებებს და რეკომენდაციებს პოლიტიკურ პარტია „ქართულ ოცნებასა“ და „მოქალაქეებს“ შორის გაფორმებული მემორანდუმის საფუძველზე შემუშავებულ საარჩევნო კოდექსში შესატან ცვლილებებთან დაკავშირებით. „ასევე, გამოთქმულია მოსაზრებები საარჩევნო კანონმდებლობისა და პრაქტიკის დახვეწის მიზნით იმ პრობლემათა გადასაჭრელად, რომლებიც მთელი საარჩევნო ციკლის პროცესში უარყოფით გავლენას ახდენდნენ თანასწორ და თავისუფალ საარჩევნო გარემოზე. ყურადღება ეთმობა იმ საკითხებსაც, რომლებსაც შემოთავაზებული საკანონდებლო ცვლილებების პროექტი არ ითვალისწინებს, მაგრამ საკვანძო მნიშვნელობა აქვს ქვეყანაში საარჩევნო გარემოს გაუმჯობესებისა და არჩევნების შედეგების სანდოობის გაზრდის კუთხით“. სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) წარმოგიდგენთ თამაშობანა tamashobana-სთან ერთად შექმნილ სამაგიდო თამაშს „საარჩევნო ასოციაციები“.  „ესაა სამაგიდო თამაში ორ ენაზე (ქართულად და ინგლისურად), სადაც მოთამაშეებს შეუძლიათ ხატვით, პანტომიმით ან მეტყველებით ახსნან ბარათზე დატანილი სიტყვები - არჩევნებთან დაკავშირებული ტერმინები, ცნებები და პროფესიები“. სრულად... წყარო: ორგანიზაციის გვერდი სოციალურ ქსელში

თბილისი. საარჩევნო სისტემების საერთაშორისო ფონდს (IFES) ორგანიზებით, გაიმართება ვებინარი: დეზინფორმაციის გენდერული განზომილებები არჩევნებში, პოლიტიკასა და ციფრული ინფორმაციის სივრცეში. „ტრადიციულად IFES-ის ვებინარი გაიმართება პირდაპირი ტრანსლაციით, ზუმის პლატფორმის გამოყენებით და უზრუნველყოფილი იქნება სინქრონული თარგმანი ინგლისურიდან ალბანურ, სომხურ, ქართულ, მაკედონიურ, რუსულ, სამხრეთ სლავურ და უკრაინულ ენებზე.  2021 წლის 24 თებერვალი, ოთხშაბათი (14-15.30 ევროპის ცენტრალური დრო), თბილისის დროით 17:00 საათზე“. გთხოვთ რეგისტრაცია გაიაროთ ბმულზე... სრულად... წყარო: ორგანიზაციის გვერდი სოციალურ ქსელში

თბილისი. ევროპის საბჭოსა და მთავრობის ადმინისტრაციის მიერ „მე ვირჩევ თანასწორობას” კამპანიის ფარგლებში ჩატარდა თანასწორობის რეპორტიორის კონკურსი. ლალე სოფიევა კონკურსის ერთერთი გამარჯვებულია და ის, ესეში, თავისი დიდი ბებიის ფარი-ხანუმ სოფიევას შესახებ გვიყვება. „მინდა, გაგაცნოთ ფარი-ხანუმ სოფიევა, დემოკრატიული გზით არჩეული პირველი მუსლიმი ქალი მსოფლიოში, რომელმაც თავისი სამაგალითო და დღემდე საიდუმლოებით მოცული ისტორიებით მსოფლიო გააოცა და ასი წლის შემდეგაც მისი საქმიანობა მისაბაძია. ფარი-ხანუმ სოფიევა არის ჩემი დიდი ბებია. დაიბადა 1884 წელს, გარდაბნის მუნიციპალიტეტის სოფელ ყარაჯალაში“... სრულად... წყარო: www.coe.int

თბილისი. სამართლიანი არჩევნებისა და დემოკრატიის საერთაშორისო საზოგადოება საარჩევნო ადმინისტრაციის წარმომადგენლებისა და არჩევნებში ჩართული მხარეების მიერ დასმულ შეკითხვებს ეხმაურება. შეკითხვები შეეხება 2020 წლის 31 ოქტომბრის საპარლამენტო არჩევნების ხმების პარალელური დათვლის (PVT) შედეგების შესახებ, მათ შორის უბნების 8%-ზე გამოვლენილი დისბალანსების თაობაზე.  „სამართლიანი არჩევნების“ მმართველი რგოლის ცვლილების შემდეგ, საზოგადოებაში გაჩენილ შეკითხვებზე ამომწურავი პასუხების გასაცემად, ორგანიზაციის თანამშრომლებისა და გამგეობის წევრების მიერ, გადაწყდა შემაჯამებელ ოქმებში გამოვლენილი ხარვეზების ხელახალი, სიღრმისეული შესწავლა. ამ მიზნით, ორგანიზაციის სათაო და რეგიონული ოფისების წარმომადგენლებმა, იანვრის პირველ ნახევარში, გადაამოწმეს ხმების პარალელური დათვლის შერჩევაში შესული ყველა საარჩევნო უბნის შემაჯამებელი ოქმი და თანდართული დოკუმენტები (850 უბანი), მათ შორის 25 სპეციალური, ე.წ. COVID-უბნისა და პენიტენციურ დაწესებულებებში გახსნილი სამი საარჩევნო უბნის შემაჯამებელი ოქმები“ - ნათქვამია ორგანიზაციის მიერ გავრცელებულ ინფორმაციაში, „- გადამოწმების ფარგლებში “სამართლიანმა არჩევნებმა” გამოავლინა ის შემაჯამებელი ოქმები, რომლებშიც საარჩევნო სუბიექტების მიერ მიღებული ხმების და ბათილად მიჩნეული ბიულეტენების ჯამი მეტი, ტოლი ან ნაკლები იყო არჩევნებში მონაწილე ამომრჩეველთა საერთო რაოდენობაზე. გადამოწმების პროცესში გაანალიზდა თანდართული დოკუმენტაციაც (შესწორების ოქმები, ახსნა-განმარტებები და განკარგულებები), აგრეთვე, „სამართლიანმა არჩევნებმა“ შეადარა დამკვირვებლებისთვის უბნის დახურვისას გადაცემული შემაჯამებელი ოქმების დამოწმებული ასლები და ცენტრალური საარჩევნო კომისიის ვებ გვერდზე ატვირთული შემაჯამებელი ოქმები“.  სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველომ, 2020 წლის 1 სექტემბრიდან 17 ნოემბრის ჩათვლით, საპარლამენტო არჩევნების კამპანიის დაფინანსების საკითხები შეისწავლა და პოლიტიკური პარტიების მიერ მიღებულ შემოწირულებებში 2020 წლის 1 იანვრიდან გამოკვეთილი ტენდენციებიც მიმოიხილა.  ორგანიზაციის განცხადებით, იმ 9 საარჩევნო სუბიექტიდან, რომელმაც არჩევნებში 1%-ის ოდენობის ხმა მაინც მიიღო, ერთმა სუბიექტმა („გირჩი”) შევსებული ფინანსური დეკლარაციები სახელმწიფო აუდიტის სამსახურს არ მიაწოდა, შესაბამისად. ანგარიშში გამოკვეთილი მიგნებები ძირითადად ეყრდნობა 8 საარჩევნო სუბიექტის მიერ წარდგენილი ფინანსური დეკლარაციებისა და წინასაარჩევნოდ მიმდინარე პროცესების ანალიზს.  სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო თვლის, რომ საარჩევნო და პოლიტიკური პარტიების კანონმდებლობაში შესატანი ცვლილებები დემოკრატიულ სტანდარტებს არ აკმაყოფილებს. „მიგვაჩნია, რომ პარტიების დაფინანსების წესის წარმოდგენილი ცვლილების ძირითადი ნაწილი ეწინააღმდეგება სახელმწიფოს მიერ პარტიების დაფინანსების ევროპულ სტანდარტებს და არალეგიტიმური საფუძვლით მძიმე დარტყმას მიაყენებს ოპოზიციური პარტიების ფინანსურ მდგომარეობას, რაც უარყოფითად აისახება პოლიტიკურ პლურალიზმზე და კონკურენტულ პოლიტიკურ გარემოზე. ამასთანავე, არაუფლებამოსილი პირის საარჩევნო კამპანიაში მონაწილეობისთვის საარჩევნო სუბიექტისთვის საარჩევნო რეგისტრაციის გაუქმება არაპროპორციულად მძიმე სანქციაა და ატარებს მისი პოლიტიკური მიზნებით გამოყენების დიდ საფრთხეს“, ნათქვამია განცხადებაში. სრულად... წყარო: transparency.ge

თბილისი. 25 დეკემბერს „სამართლიანი არჩევნების” ოფისში გაიმართა ორგანიზაციის გამგეობის ბრიფინგი, სადაც გამგეობის წევრებმა ბაია პატარაიამ და თამარა სართანიამ წარადგინეს მოკვლევის ანგარიში და გამგეობის რეკომენდაციები სამომავლო ნაბიჯებთან დაკავშირებით. „კომისიას მიაჩნია, რომ აღმასრულებელმა დირექტორმა ვერ გაითვალისწინა არსებული პოლიტიკური კონტექსტი და საარჩევნო სუბიექტების მიერ მიღებული ხმების დათვლის ფორმულაში აღმოჩენილი ხარვეზის შესახებ დროულად არ მიაწოდა ინფორმაცია საზოგადოებას, რითიც რისკის ქვეშ დააყენა ორგანიზაციის რეპუტაცია და, ზოგადად, PVT-ის მეთოდოლოგიის სანდოობა. ამასთანავე, კომისიის მიერ მოკვლეული ინფორმაციით, არ იკვეთება აღმასრულებელ დირექტორზე ზეწოლის ან დაშინების მცდელობა, რაც მას ამ ინფორმაციის დამალვას აიძულებდა“, ნათქვამია განცხადებაში.  სრულად... წყარო: isfed.ge

თბილისი. „საერთაშორისო გამჭვირვალობა - საქართველოს” მიერ 2020 წლის 1 ივლისიდან 22 ნოემბრამდე საპარლამენტო არჩევნებისთვის განხორციელებულმა დაკვირვებამ აჩვენა, რომ საარჩევნოდ ადმინისტრაციული რესურსების გამოყენება საქართველოსთვის კვლავ პრობლემურია. „ძალადობის შემთხვევების არაეფექტიანი გამოძიება, საჯარო ინსტიტუტების, მათ შორის საარჩევნო კომისიების პოლიტიზება და მმართველი პარტიის მიერ საბიუჯეტო ორგანიზაციების თანამშრომელთა მობილიზება საარჩევნო კამპანიისთვის, საგამოძიებო უწყებების გამოყენება პოლიტიკური ოპონენტების დისკრედიტირებისათვის და სხვა მანკიერი ტენდენციები არჩევნებიდან არჩევნებამდე მოუგვარებელ საკითხებად რჩება“, ნათქვამია ორგანიზაციის საბოლოო ანგარიშში. სრულად... წყარო: transparency.ge