თბილისი. საქართველოში ევროკავშირის წარმომადგენლობა, საქართველოში აკრედიტებული ევროკავშირის ქვეყნების საელჩოებთან კოორდინაციით, 2021 წლის 3 ოქტომბერს, ადგილობრივი არჩევნების პირველი ტურის შემდეგ კომენტარს აქვეყნებს. „ჩვენ მივესალმებით იმ ფაქტს, რომ საქართველოში სრულმასშტაბიანი საერთაშორისო საარჩევნო სადამკვირვებლო მისია ჩამოვიდა. ამ მისიამ დაასკვნა, რომ არჩევნები ზოგადად კარგად იყო ადმინისტრირებული - თუმცა გამძაფრებული პოლარიზაციით ხასიათდებოდა. საარჩევნო სუბიექტებს შესაძლებლობა ჰქონდათ საარჩევნო კამპანია თავისუფლად და კონკურენტულ გარემოში წარემართათ და რომ არჩევნების დღე მოწესრიგებულად და გამჭვირვალედ მიმდინარეობდა. მან ასევე ხაზი გაუსვა მნიშვნელოვან ხარვეზებს, განსაკუთრებით დაშინების, ამომრჩეველთა მოსყიდვისა და კანდიდატებსა და ამომრჩევლებზე განხორციელებული ზეწოლის ფაქტების შესახებ ფართოდ გავრცელებულ და თანმიმდევრულ განცხადებებს და არათანასწორ საასპარეზო პირობებს. გარდა ამისა, რესურსებს შორის მნიშვნელოვანი დისბალანსი, კამპანიის დაფინასების არასაკმარისი მონიტორინგი და ხელისუფლებაში ყოფნით მინიჭებული უპირატესობა მმართველ პარტიას აძლევდა ხელს. საარჩევნო კამპანიაში ქალთა არასაკმარისი წარმომადგენლობა ადასტურებს, რომ საჭიროა უფრო მეტი ვალდებულების აღება პოლიტიკაში ადეკვატური წარმომადგენლობის უზუნველსაყოფად“.  სრულად... წყარო: eeas.europa.eu

თბილისი. საქართველოს ახალგაზრსა იურისტთა ასოციაცია (საია) 2021 წლის ადგილობრივი თვითმმართველობის არჩევნების სადამკვირვებლო მისიის ფარგლებში საზოგადოებას კენჭისყრისა და ხმების დათვლის პროცესის შესახებ ინფორმაციას აცნობს. „საიას შეფასებით, 2 ოქტომბრის არჩევნებზე ხმის მიცემისას პროცედურული ხარვეზები გამოვლინდა კენჭისყრის დღის სხვადასხვა ეტაპზე; უბნების ნაწილზე ორგანიზაციას შეეზღუდა დაკვირვების შესაძლებლობა; საარჩევნო რეგულაციების დარღვევის ფაქტები გამოვლინდა უბნების დახურვის შემდგომაც“. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს დოკუმენტს, რომელიც აანალიზებს პოლიტიკური პარტიების ხედვებს სოციალური პოლიტიკის განხორციელების მიმართულებით. „COVID-19-ის პანდემიამ კიდევ უფრო დაამძიმა მოსახლეობის სოციალურ-ეკონომიკური მდგომარეობა და ისინი უმწვავესი პრობლემების, მათ შორის, უკიდურესი სოციალურ-ეკონომიკური მოწყვლადობის, საკვების დეფიციტის, უსახლკარობის, წინაშე დააყენა. ამ პრობლემების მოგვარებაში მუნიციპალიტეტების როლი არსებითია - სწორედ ადგილობრივმა ხელისუფლებამ უნდა შეისწავლოს დეტალურად მოსახლეობის გამოწვევები და გაატაროს მათ საჭიროებებზე მორგებული, ეფექტიანი ინტერვენციები. სამწუხაროდ, მიუხედავად იმისა, რომ COVID-19-ის პანდემიამ გამოუსწორებელი ზიანი მიაყენა მოქალაქეების სოციალურ-ეკონომიკურ მდგომარეობას, პოლიტიკური პარტიების წინასაარჩევნო პროგრამები არ ითვალისწინებს წარმოშობილი სირთულეების დაძლევის კონკრეტულ, სპეციფიკურ გზებს“. სრულად... წყარო: socialjustice.org.ge

თბილისი. საერთაშორისო გამჭვირვალობა - საქართველო, სამართლიანი არჩევნებისა და დემოკრატიის საერთაშორისო საზოგადოება და საქართველოს ჟურნალისტური ეთიკის ქარტია აქვეყნებს ერთობლივ ანგარიშს: საქართველოს მუნიციპალიტეტის ორგანოთა 2021 წლის არჩევნების წინასაარჩევნო გარემოს ერთობლივი შეფასება. „შეჯამების სახით შეიძლება ითქვას, რომ წინასაარჩევნო გარემო იყო მეტნაკლებად კონკურენტული, ყველა პარტიას შეეძლო ეწარმოებინა წინასაარჩევნო კამპანია, თუმცა მმართველი პარტია სარგებლობდა დიდი უპირატესობით, მის მხარეს ადმინისტრაციული და სხვა ტიპის რესურსების მობილიზაციის გამო. წინასაარჩევნო გარემო დააზიანა პოლიტიკური ნიშნით ზეწოლის, მუქარის, ასევე სამსახურიდან გათავისუფლებისა ან წასვლის იძულების ფაქტების სიმრავლემ და შესაბამისი სახელმწიფო უწყებების მხრიდან ასეთი შემთხვევების არაეფექტიანმა გამოძიებამ“. სრულად... წყარო: transparency.ge

თბილისი. „საერთაშორისო გამჭვირვალობა - საქართველო“ 2021 წლის 2 ოქტომბრის ადგილობრივი თვითმმართველობის არჩევნებს 300-მდე დამკვირვებლით გაუწევს მონიტორინგს. „ორგანიზაციის სტაციონარული დამკვირვებლები მთელი ქვეყნის მასშტაბით 200 საარჩევნო უბანზე იქნებიან გადანაწილებულნი. გარდა ამისა, საარჩევნო პროცესებს 40 მობილური ჯგუფიც მიადევნებს თვალს“.  სრულად... წყარო: transparency.ge

თბილისი. საქართველოს პოლიტიკის ინსტიტუტი (GIP) აქვენებს ნინო სამხარაძის ბლოგპოსტს: საქართველო დემოკრატიზაციის ჰორიზონტზე: რატომ არის 2021 წლის არჩევნები მეტი, ვიდრე თვითმმართველობის არჩევნები. „ოქტომბრის თვითმმართველობის არჩევნები 2021 წელს გაცილებით მნიშვნელოვანი პოლიტიკური მოვლენაა, ვიდრე ოდესმე. საქართველოს განსაკუთრებით სჭირდება, რომ, ბოლოდროინდელი დემოკრატიული უკუსვლის ფონზე, ნებისმიერი შანსი გამოიყენოს ძლიერი დემოკრატიული ინსტიტუტების, ჯანსაღი პოლიტიკური კულტურის გასავითარებლად. წინააღმდეგ შემთხვევაში, ქვეყანა როგორც შიდაპოლიტიკური, ისე საგარეოპოლიტიკური განვითარების ორივე ფრონტზე ფუნდამენტური პრობლემების წინაშე აღმოჩნდება“. სრულად... წყარო: gip.ge

სამოქალაქო საზოგადოების ინსტიტუტი აგრძელებს კამპანიას „პირველად თვითმართველობის არჩევნებზე“. კამპანიის მეორე ეტაპის ფარგლებში, რომელიც თანატოლგანმანათლებლობას ემსახურება, პირისპირ შეხვედრები გაიმართა გორში, სოფელ მაჭახელასა და სოფელ ჭარნალში, ონლაინ შეხვედრა – ხელვაჩაურის ცენტრის ახალგაზრდებთან. ამ შეხვედრებზე მოწვეულ ახალგაზრდებს თანატოლებმა, რომლებიც აქტიურად არიან ჩართულნი კამპანიაში, გაუზიარეს ინფორმაცია თვითმმართველობის, არჩევნებისა და სამოქალაქო საზოგადოების განვითარებაში ახალგაზდების როლის შესახებ. შეხვედრების მასპინძლები და სპიკერები იყვნენ: ლიკა ქოქოლაძე, ნათია ფუტკარაძე, თაკო საგინაძე, რომან სურმანიძე, თორნიკე ქათამაძე, მარიამ ხმიადაშვილი, იაკობ მაღალაშვილი. კამპანია ხორციელდება სამოქალაქო საზოგადოების ინსტიტუტის მიერ პროექტის „ადგილობრივი განვითარების აქტორებს შორის მყარი კავშირების დამყარება“ (მეორე ფაზა) ფარგლებში, გერმანული ორგანიზაცია „პური მსოფლიოს“ მხარდაჭერითა და ხელვაჩაურის მუნიციპალიტეტის ახალგაზრდულ ცენტრთან თანამშრომლობით. წყარო: civilin.org

თბილისი. 30 სექტემბერს, სამართლიანი არჩევნებისა და დემოკრატიის საერთაშორისო საზოგადოებამ (ISFED) 2021 წლის მუნიციპალური არჩევნების ჭრილში სოციალური მედიის მონიტორინგის მე-2 შუალედური ანგარიში წარმოადგინა, რომელიც მოიცავს 23 აგვისტოდან 12 სექტემბრის ჩათვლით პერიოდს. „საანგარიშო პერიოდში აქტიური იყო არჩევნებში მონაწილე 32 პოლიტიკური პარტიის 318 ოფიციალური ორგანიზაციული ფეისბუქგვერდი. ყველაზე მეტი გვერდით „ერთიანი ნაციონალური მოძრაობა“ სარგებლობდა. მას აქტიური გვერდების რაოდენობით პარტია „საქართველოსთვის“ მოჰყვება. ინტერაქციით კი, წინა საანგარიშო პერიოდის მსგავსად, „ქართული ოცნების“ ოფიციალური გვერდები გამოირჩევა“. სრულად... წყარო: isfed.ge

თბილისი. სოციალური სამართლიანობის ცენტრი აქვეყნებს დოკუმენტს, რომელშიც წარმოდგენილია ეთნიკური უმცირესობების საჭიროებებთან და ეთნიკური უმცირესობებით კომპაქტურად დასახლებულ რეგიონებთან დაკავშირებით პოლიტიკური პარტიების წინასაარჩევნო პროგრამებისა და ხედვების შეფასება. „სამწუხაროდ, პოლიტიკური პარტიების ინტერესი ეთნიკური უმცირესობების თემების მიმართ კვლავ დაბალია და მათ სპეციფიკურ საჭიროებებზე, წუხილებზე და ინტერესებზე ორიენტირებული ცვლილების ხედვები და გზები პროგრამებში თითქმის არ გვხდება“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციამ (საია) 2021 წლის ადგილობრივი თვითმმართველობის არჩევნების გრძელვადიანი სადამკვირვებლო მისიის მე-2 შუალედური ანგარიში მოამზადა. „საიამ აღირცხა როგორც „ქართული ოცნების“, ისე ზოგიერთი ოპოზიციური პარტიისა და დამოუკიდებელი კანდიდატის სასარგებლოდ ამომრჩევლის მოსყიდვის, აგიტაციაში უკანონო მონაწილეობისა და ადმინისტრაციული რესურსის გამოყენების შემთხვევები. გამოწვევად რჩება ხელისუფლების პროექტების პერსონოფიცირება და პარტიასთან აფილირება, რაც შლის ზღვარს სახელმწიფოს და პარტიას შორის“. სრულად... წყარო: gyla.ge

თბილისი. „საერთაშორისო გამჭვირვალობა - საქართველომ“ 2021 წლის 2 აგვისტოდან 12 სექტემბრის ჩათვლით მუნიციპალიტეტის ორგანოთა არჩევნების კამპანიის დაფინანსების საკითხები შეისწავლა. „კვლევისთვის შეირჩა არჩევნებში მონაწილე ის 13 საარჩევნო სუბიექტი, რომელსაც სახელმწიფო ბიუჯეტი აფინანსებს ან წლის განმავლობაში მინიმუმ 100,000 ლარი შესწირეს. როგორც ჯამურად მიღებული შემოსავლების, ისე გაწეული ხარჯების მხრივ (თითოეული 12 მილიონამდე იყო) მმართველი პარტიის ფინანსები ერთად აღებული დანარჩენი 12 პარტიისას თითქმის 2.5-ჯერ აღემატებოდა, რაც პარტიებს შორის ფინანსების უკიდურესად არათანაბარ გადანაწილებაზე მიუთითებს, ეს კი საარჩევნო გარემოს აზიანებს“... სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: სიკვდილი, როგორც საარჩევნო კამპანიის ძირითადი ნარატივი საქართველოში. „სიკვდილის თემით მანიპულირება ქართული პოლიტიკური სივრცისთვის არახალია. 2012 წელს პირველად მოხდა საქართველოში არჩევნების გზით ძალაუფლების გადაცემა, თუმცა იმდროინდელი საარჩევნო კამპანიაც არა პოლიტიკური დებატებისა და ამომრჩეველთა ინფორმირებულობის, არამედ ოპონენტების მორალური დელეგიტიმაციისკენ იყო მიმართული. ... თუ 1990-იანებსა და 2000-ების დასაწყისში პოლიტიკურ ასპარეზზე სიკვდილის თემა და მისით მანიპულირება ძირითადად პოლიტიკოსებისა და პოლიტიკასთან დაკავშირებულ პირებზე გადიოდა, თანამედროვე პერიოდში ამ საკითხით მანიპულირებას მსგავსი ფილტრი აღარ გააჩნია და ყველა ასაკის, წარმომავლობისა თუსოციალური წარმომადგენლობის ადამიანის გარდაცვალება მარტივად შეიძლება გამოიყენონ პოლიტიკურ დაპირისპირებაში –განსაკუთრებით კი წინასაარჩვენო პერიოდში“. სრულად... წყარო: idfi.ge

თბილისი. „საერთაშორისო გამჭვირვალობა-საქართველო“ არჩევნების წინ მედიაგარემოს შეფასების ანგარიშს აქვეყნებს. მასში მოყვანილი კონკრეტული მაგალითები აღწერს იმ ძირითად ტენდენციებს და გამოწვევებს, რომლის წინაშეც დღეს ქართული მედია დგას. ანგარიშის თანახმად, „ჟურნალისტებისათვის პროფესიული საქმიანობის შესრულება სიცოცხლისა და ჯანმრთელობისათვის საშიში გახდა, განსაკუთრებით კი კრიტიკული მედიის წარმომადგენლებისათვის“... სრულად... წყარო: transparency.ge

თბილისი. 28 სექტემბერს საქართველოს სახალხო დამცველი ნინო ლომჯარია თვითმმართველობის არჩევნებზე სადამკვირვებლო მისიით ჩამოსულ საერთაშორისი ანალიტიკოსებს შეხვდა.  „შეხვედრაზე ნინო ლომჯარიამ ადამიანის უფლებების ჭრილში წინასაარჩევნო გარემოზე დაკვირვების შედეგები წარმოადგინა და სტუმრებს სახალხო დამცველის მანდატი გააცნო. მხარეებმა განიხილეს საარჩევნო კანონმდებლობა, მოქმედი რეგულაციების დაცვის ხარისხი და სხვა საკითხები“. სრულად... წყარო: ombudsman.ge

თბილისი. სამართლიანი არჩევნებისა და დემორატიის საერთაშორისო საზოგადოების ინფორმაციით, ფეისბუქზე საარჩევნო პროცესების კვალდაკვალ ორგანიზებულად გააქტიურდნენ ან/და იქმნებიან ანონიმური გვერდები და ყალბი ანგარიშები, რომლებიც დამაზიანებელ ინფორმაციას ათავსებენ და ჯგუფებში კოორდინირებულად ავრცელებენ. ისინი ცდილობენ არჩევნებთან დაკავშირებულ საკითხებზე საინფორმაციო ქაოსის შექმნას და ამომრჩევლის შეცდომაში შეყვანას. ორგანიზაციის შეფასებით, კამპანიის მიზანია, ხელოვნურად შექმნას ისეთი ფონი, თითქოს არჩევნებთან დაკავშირებით აბსურდული დეზინფორმაციული ბრალდებები ვრცელდება, და ამით ობიექტური კრიტიკა გადაიფაროს. ამ კამპანიის უკან მდგომი პირები საინფორმაციო ქაოსის შექმნას, ამომრჩეველთა დაბნევასა და კრიტიკული მოსაზრებების დისკრედიტაციას ცდილობენ. სრულად... წყარო: isfed.ge

თბილისი. „საერთაშორისო გამჭვირვალობა - საქართველო“ აქვეყნებს „ადმინისტრაციული რესურსების გამოყენება საქართველოს მუნიციპალიტეტის ორგანოთა 2021 წლის არჩევნებისთვის“ კვლევის შუალედურ ანგარიშს. ორგანიზაციის მიერ, 2021 წლის 1 ივნისიდან 25 სექტემბრამდე მუნიციპალიტეტის ორგანოთა არჩევნებისთვის განხორციელებულმა დაკვირვებამ აჩვენა, რომ საარჩევნოდ ადმინისტრაციული რესურსების გამოყენება საქართველოსთვის კვლავ პრობლემურია. „საბიუჯეტო ორგანიზაციების თანამშრომლებზე პოლიტიკური ნიშნით განხორციელებული ზეწოლის, სამსახურიდან გათავისუფლების და ოპოზიციური პარტიების კანდიდატების შევიწროების სავარაუდო შემთხვევების არაეფექტიანი გამოძიება, ასევე, საჯარო ინსტიტუტების პოლიტიზება და მმართველი პარტიის მიერ საბიუჯეტო ორგანიზაციების თანამშრომელთა საარჩევნო კამპანიისთვის მასშტაბური მობილიზება, საბიუჯეტო პროგრამების ვიწროპარტიული მიზნით გამოყენება და სხვა მანკიერი ტენდენციები სამართლიანი საარჩევნო გარემოსთვის მთავარ გამოწვევას წარმოადგენს“. სრულად... წყარო: transparency.ge

აჭარა. „სამოქალაქო საზოგადოების ინსტიტუტი“ და „ხელვაჩაურის ახალგაზრდული ცენტრი“, კამპანიის – „პირველად თვითმართველობის არჩევნებზე“ ფარგლებში, ახალგაგზრდებს შეხვედრებზე იწვევს.  შეხვედრების მიზანია თვითმმართველობის საქმიანობისა და მნიშვნელობის შესახებ მათი ცნობიერების ამაღლება, თვითმმართველობის განვითარებაში ახალგაზრდების როლის გაძლიერება და არჩევნებში მონაწიელობის მხარდაჭერა.  28 სექტმბერს 14:00 საათზე შეხევდრა სოფელ მაჭახელაში, ცხემლარას ხიდთან გაიმართება; 16:00 საათზე - სოფელ ჭარნალში, ბაღთან. 29 სექტემბერს 14:00 საათზე გაიმართება ონლიან შეხვედრა ხელვაჩაურის ცენტრის ახალგაზრდებთან. ბმული   კამპანია „პირველად თვითმართველობის არჩევნებზე“ ხორციელდება „სამოქალაქო საზოგადოების ინსტიტუტის“ მიერ, პროექტის – „ადგილობრივი განვითარების აქტორებს შორის მყარი კავშირების დამყარება“ (მეორე ფაზა) ფარგლებში, გერმანული ორგანიზაცია „პური მსოფლიოს“ მხარდაჭერით და ხელვაჩაურის მუნიციპალიტეტის ახალგაზრდულ ცენტრთან თანამშრომლობით.  სრულად...   წყარო: civilin.org

თბილისი. დღეს, „სამართლიანი არჩევნებისა და დემოკრატიის საერთაშორისო საზოგადოებამ“ (ISFED) წარმოადგინა კვლევა - „საზოგადოების დამოკიდებულება საარჩევნო პროცესების მიმართ“. კვლევის ფარგლებშიც შესწავლილ იქნა საზოგადოების დამოკიდებულება როგორც, ზოგადად, არჩევნებში მონაწილეობის, ისე - საარჩევნო პროცესების მიმდინარეობისა და საარჩევნო დარღვევების მიმართ.   ორგანიზაციის მიერ გავრცელებული ინფორმაციის თანახმად, დოკუმენტი ეფუძნება რაოდენობრივი და თვისებრივი კვლევის შედეგებს. რაოდენობრივი კვლევის ფარგლებში, მონაცემები სატელეფონო გამოკითხვის მეთოდით შეგროვდა. ინტერვიუები ქართულ, სომხურ, აზერბაიჯანულ და რუსულ ენებზე 3100 ზრდასრულ ადამიანთან ჩატარდა. მონაცემები წარმომადგენლობითია საქართველოს მოსახლეობისთვის, ოკუპირებულ ტერიტორიებზე მცხოვრები მოსახლეობის გარდა. თვისებრივი კვლევის ფარგლებში, ჩატარდა ექვსი ფოკუს ჯგუფი სოციალურად მოწყვლად მოსახლეობასთან თბილისიში, ზუგდიდში და სოფელ შილდაში. ასევე, ჩატარდა ექვსი ინტერვიუ საჯარო მოხელეებთან თბილისიდან, ზუგდიდიდან და სოფელ შილდიდან და ოთხი ინტერვიუ ბიზნესების წარმომადგენლებთან თბილისიდან და ზუგდიდიდან.  სრულად...   წყარო: ორგანიზაციის ვებგვერდი

თბილისი. საქართველოში ადგილობრივი თვითმმართველობის ორგანოების არჩევნებთან დაკავშირებით, 2 და 3 ოქტომბერს არასამთავრობო ორგანიზაციების მედია ცენტრი იმუშავებს.  მედია ცენტრში, არჩევნებზე დამკვირვებელი არასამთავრობო ორგანიზაციები ჟურნალისტებს ინფორმაციას მიაწვდიან არჩევნების მიმდინარეობის შესახებ. ცენტრში ბრიფინგებს გამართავენ:  საქართველოს ახალგაზრდა იურისტთა ასოციაცია;  სამართლიანი არჩევნებისა და დემოკრატიის საერთაშორისო საზოგადოება;  საერთაშორისო გამჭვირვალობა – საქართველო;  მრავალეროვანი საქართველო; •ადამიანის უფლებათა ცენტრი. არასამთავრობო ორგანიზაციების მედია ცენტრი იმუშავებს სასტუმრო „რუმსში“ – თბილისი, მერაბ კოსტავას ქუჩა 14; დარბაზი Garden Hall.  მედია ცენტში დაიშვებიან მხოლოდ ორჯერ ვაქცინირებული პირები.  სრულად...   წყარო: osgf.ge

თბილისი. საინიციატივო ჯგუფი „იპოდრომი-უბეტონო მხარე“ თბილისის მერობის კანდიდატებისთვის საჯარო დისკუსიას აწყობს. დისკუსიის მიზანია, მომავალი მერობის კანდიდატებმა მოსახლეობას, პარკის სამომავლო განვითარებასთან დაკავშირებით, თავიანთი ხედვა გააცნონ, იმსჯელონ იპოდრომის პრობლემასა და ამ პრობლემიდან გამოსავლის ოპტიმალურ გზებზე. „ყოფილი იპოდრომის ტერიტორიაზე მეთერთმეტე თვეა უკანონო მშენებლობა მიმდინარეობს. თბილისის მერიას პროექტის განხორციელებისათვის საჭირო დოკუმენტაცია არ მოეპოვება. გარდა ამისა, პროექტმა თავისი შინაარსიდან გამომდინარე, ადგილობრივ მოსახლეობასა და იპოდრომის მომხმარებლებს შორის ჩანასახშივე გამოიწვია პროტესტი, ვინაიდან თბილისის მერიის მიერ წარმოდგენილ „ცენტრალ პარკის“ ესკიზურ პროექტში სრულიად უგულვებელყოფილია პარკის ისტორია, მისი სოციალური მნიშვნელობა, განსაკუთრებული სპეციფიკა და ბუნებრივი განაშენიანება, უბნისა და ქალაქის საერთო კონტექსტი და რაც ყველაზე მნიშვნელოვანია, თავად მომხმარებელი“, - აღნიშნულია საინიციატივო ჯგუფის მიერ გავრცელებულ განცხადებაში. სრულად...  წყარო: osgf.ge

თბილისი. დღეს, „სამართლიანო არჩევნებისა და დემოკრატიის საერთაშორისო საზოგადოებამ”(ISFED) 2021 წლის ადგილობრივი თვითმმართველობის არჩევნების ოფიციალური წინასაარჩევნო პერიოდის მეორე შუალედური ანგარიში წარმოადგინა.  ანგარიში მოიცავს 2021 წლის 31 აგვისტოდან 21 სექტემბრის ჩათვლით პერიოდს, ასევე, ისეთ ცალკეულ მოვლენებს, რომლის განვითარება 31 აგვისტომდე დაიწყო, მონიტორინგის პერიოდშიც მიმდინარეობდა ან მის შესახებ მონიტორინგის პერიოდში გახდა ცნობილი.  სრულად...   წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველომ“ საარჩევნო დარღვევებისა და მათზე რეაგირების ბლოგი განაახლა.  მონაცემები 22 სექტემბრამდე პერიოდს მოიცავს.  სრულად...   წყარო: ორგანიზაციის ვებგვერდი