თბილისი. 19 ოქტომბერს საქართველოს ჟურნალისტური ეთიკის ქარტიამ, პარტნიორ ორგანიზაციებთან ერთად, წინასაარჩევნო კამპანიის გაშუქების მედიამონიტორინგის შუალედური ანგარიში წარმოადგინა. გაეროს განვითარების პროგრამის პროექტის - „საქართველოს 2017 წლის ადგილობრივი თვითმმართველობის არჩევნების მედიამონიტორინგი" - ფარგლებში, ევროკავშირის ფინანსური დახმარებით, ქარტია ტელემედიის მიერ 2017 წლის ადგილობრივი თვითმმართველობის არჩევნების გაშუქებას აკვირდება. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა-საქართველო” (TI), ციანიდის საქმესთან დაკავაშირებით, ჟურნალისტების წინააღმდეგ გაკეთებულ განცხადებებს ეხმაურება. „მედიის წარმომადგენლები უფლებამოსილი არიან განახორციელონ კონტროლი ხელისუფლების საქმიანობაზე და მოსახლეობას ინფორმაცია მიაწოდონ ქვეყანაში არსებული მაღალი საზოგადოებრივი ინტერესის შემცველი საკითხების შესახებ. „ციანიდის” საქმის მიმართ, რომლის სასამართლო სხდომის დახურვამ კრიტიკა დაიმსახურა, მომეტებული საჯარო ინტერესი არსებობს. მედიის მიერ გავრცელებულ ჩანაწერებს გარკვეული წვლილი შეაქვს საზოგადოებაში ამ თემაზე არსებულ დისკუსიაში, შეიცავს რა მნიშვნელოვანი მოწმეების ჩვენებებს, რომელიც უშუალოდ "ციანიდის” საქმეში ფიგურირებდნენ. შესაბამისად, ჟურნალისტებს ჰქონდათ სრული უფლება მოპოვებული მასალა გაესაჯაროებინათ, მიუხედავად იმისა, რომ გავრცელებული მასალა დახურული სასამართლო სხდომის ჩანაწერს წარმოადგენს", - აცხადებს TI. სრულად  წყარო: ორგანიზაციის ვებგვერდი

თბილისი. ევროპის დამოუკიდებელი პრესის საბჭოების ალიანსის (AIPCE) ყოველწლიურ კონფერენცია 2019 წელს საქართველოში გაიმართება. ეს გადაწყვეტილება 13 ოქტომბერს ბუდაპეშტში გამართულ კრებაზე გახდა ცნობილი. AIPCE 1999 წელს შეიქმნა და ის 34 ქვეყნის თვითრეგულირების ორგანოებს აერთიანებს. საქართველოდან ალიანსის წევრია ჟურნალისტური ეთიკის ქარტია. ალიანსის წვერები ყოველ წელს იკრიბებიან და ეთიკური ჟურნალისტიკის გამოწვევებს განიხილავენ. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს განცხადებით მომართა ორგანიზაცია „საფარმა", რომელიც მიიჩნევდა, რომ მაია ასათიანის საავტორო გადაცემა „პროფილში" ქარტიის მე-7 პრინციპი დაირღვა. „სადავო გადაცემაში რესპონდენტის სტატუსით მოწვეული იყო მარიამი, 5 შვილის დედა, ყოფილი ჟურნალისტი, რომელიც თავს სექს სამუშაოთი ირჩენს. პირის, რომელიც სექსუალური მომსახურებით იღებს შემოსავალს, გადაცემაში მოწვევა სტუდიის სტუმრების მიერ მის საქციელის განსჯის/შეფასების მიზნით, უკვე დისკრიმინაციის წინაპირობაა. გადაცემის სტუმრები მას ეკითხებიან როგორ არის შინაგანად, არის თუ არა მისთვის ეს საქმიანობა (სექსუალური მომსახურება) მორალურად ძნელი, ჰკიცხავენ თუ რატომ ვერ ახერხებს უფრო „პატიოსანი" გზით შემოსავლის მიღებას". სტუმრების განცხადებებს არ ემიჯნება ჟურნალისტიც. საქართველოს ჟურნალისტურმა ეთიკის ქარტიამ მიიღო გადაწყვეტილება, რომ გადაცემა „პროფილში" მაია ასათიანმა დაარღვია ქარტიის მეშვიდე პრინციპი. სრულად... წყარო: sapari.ge

თბილისი. "საერთაშორისო გამჭვირვალობა-საქართველო” (TI) ციანიდის საქმესთან დაკავშირებით ჟურნალისტების პროკურატურაში შესაძლო დაბარების ფაქტს ეხმაურება. საქმე ეხება მედიაში დახურული სასამართლო სხდომის მასალების გასაჯაროებას. ორგანიზაციის მიერ გავრცელებული განცხადების მიხედვით, კანონმდებლობის თანახმად, ჟურნალისტი არ არის ვალდებული იყოს მოწმე და მისცეს ჩვენება პროფესიული საქმიანობისას მიღებულ ინფორმაციასთან დაკავშირებით, მათ შორის, გათქვას ინფორმაციის წყარო. TI მიიჩნევს, რომ, მაღალი საზოგადოებრივი ინტერესიდან გამომდინარე, მიუხედავად სასამართლო სხდომის დახურვისა, ჟურნალისტებს სრული უფლება ჰქონდათ, მოპოვებული მასალა გაესაჯაროებინათ. შესაბამისად, ორგანიზაცია მოუწოდებს პროკურატურს, იმოქმედოს საქართველოს კანონმდებლობისა და საუკეთესო ევროპული გამოცდილების შესაბამისად და არ დაიბაროს ჟურნალისტები დაკითხვაზე მედიაში გავრცელებული ჩანაწერების გამო. სრულად წყარო: ორგანიზაციის გვერდი სოციალურ ქსელში

თბილისი. ტელეკომპანია „ობიექტივში" გასულ ვიდეორგოლებთან დაკავშირებით, „საერთაშორისო გამჭვირვალობა - საქართველო" განცხადებას აქვეყნებს. „15 ივნისს კომუნიკაციების ეროვნულმა კომისიამ ტელეკომპანია „რუსთავი 2” დამრღვევად იმის გამო ცნო, რომ არაწინასაარჩევნო პერიოდში მის ეთერში პოლიტიკური რეკლამა გაუშვა. საქმე პრეცედენტული იყო და ამ გადაწყვეტილებით მაუწყებლებს არასაარჩევნო პერიოდში პოლიტიკური რეკლამის ეთერში გაშვება აეკრძალათ. მიუხედავად ამისა, ბოლო ორი კვირის განმავლობაში ტელეკომპანია „ობიექტივის" ეთერში აქტიურად გადის სხვადასხვა ვიდეორგოლი, რომელშიც პოლიტიკური გაერთიანება „საქართველოს პატრიოტთა ალიანსის" წევრები საუბრობენ სხვადასხვა თემაზე, მათ შორის, კონსტიტუციის ფორმირების საკუთარ ხედვაზე, ხელისუფლების შეცდომებზე და მაყურებლებს პარტიის მიერ დაგეგმილ დემონსტრაციაში მონაწილეობის მიღებისკენ მოუწოდებენ. მიგვაჩნია, რომ აღნიშნული ქმედებით, ასევე, უნდა დაინტერესდეს საქართველოს კომუნიკაციების ეროვნული კომისია და სახელმწიფო აუდიტის სამსახური", - ვკითხულობთ განცხადებაში. სრულად  წყარო: ორგანიზაციის ვებგვერდი

სამცხე-ჯავახეთი. ახალციხის დემოკრატიული ჩართულობის ცენტრის ორგანიზებით, სამცხე-ჯავახეთში მოქმედი მედიასაშუალებებისთვის, დღეს გაიმართა ტრენინგი თემაზე: "2017 წლის არჩევნები და მედიის როლი". ტრენინგს „საქართველოს ახალგაზრდა იურისტთა ასოციაციის" წარმომადგენელი უძღვებოდა. შეხვედრის ძირითად მიზანს წარმოადგენდა ჟურნალისტების ინფორმირება ისეთ საკითხებზე, როგორიცაა: საარჩევნო დავები და მოსარჩელეთა წრე, დისციპლინური პასუხისმგებლობა, დისციპლინური პასუხისმგებლობის დაკისრების წესი, ადმინისტრაციული პასუხისმგებლობა, ადმინისტრაციული პასუხისმგებლობის საქმისწარმოება, კენჭისყრის დღის გაშუქების პრინციპები. სრულად წყარო: ორგანიზაციის გვერდი სოციალურ ქსელში

თბილისი. IDFI აქვეყნებს გიორგი ლომთაძის ბლოგპოსტს, საზოგადოებრივი მაუწყებლის რეფორმასთან დაკავშირებით. მასალა ვრცლად მიმოიხილავს მაუწყებლის ფინანსური, ადამიანური რესურსების გამოყენებისა და რეფორმის მიმდინარეობის სხვა საკითხებს. „საზოგადოებრივ მაუწყებელში მასშტაბური რეფორმა მიმდინარეობს. ამ რეფორმის წარმატებაზე დამოკიდებულია, თუ რამდენად შეძლებს მაუწყებელი, შეასრულოს მასზე კანონით დაკისრებული ფუნქცია - შექმნას და იყოს საჯარო სიკეთე, და რაც ყველაზე მნიშვნელოვანია დაიბრუნოს საზოგადოებრივი ნდობა. თუმცა, ჩვენ მიერ მიღებულმა ინფორმაციამ დაადასტურა ის სამწუხარო რეალობა, რომ ასეთი მნიშვნელოვანი ცვლილებების დროსაც კი, საზოგადოებრივი მაუწყებელი, დიდ წილად, ინფორმაციულ ვაკუუმში იმყოფება. მას არ გააჩნია 2016 წლამდე არსებული ფინანსური და სარეიტინგო მონაცემები, ხოლო არსებული მონაცემები მხოლოდ ზოგადი ხასიათისაა. ასეთ პირობებში, შეუძლებელია რეალური პრობლემების გამოვლენა და მათთვის სწორი გადაწყვეტილებების შერჩევა. იმ შემთხვევაში, თუ გადაწყვეტილებების მიღება ინფორმაციულ ვაკუუმში გაგრძელდება, ყოველთვის იარსებებს ეჭვები იმის შესახებ, რომ ეს გადაწყვეტილებები, მაგალითად, გადაცემების დახურვა, არა ობიექტურ გათვლებს, არამედ სუბიექტურ და პოლიტიკურ ფაქტორებს შეიძლება ემყარებოდეს", - ვკითხულობთ მასალაში. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" ეხმაურება საზოგადოებრივი მაუწყებლის მენეჯმენტის გადაწყვეტილებას, ტექნიკური გადაიარაღების გამო, ახალი სატელევიზიო სეზონის 2018 წლის იანვრიდან დაწყების თაობაზე. ორგანიზაციის განცხადებაში ნათქვამია, რომ ეს გადაწყვეტილება, შესაძლოა, არღვევდეს კანონს; კიდევ უფრო ბუნდოვანს ხდიდეს მაუწყებლის რეფორმის მიზანს; არ ასახავს მაუწყებლისთვის დადგენილ პროგრამულ პრიორიტეტებს. „"მაუწყებლობის შესახებ” საქართველოს კანონი საზოგადოებრივი მაუწყებლის შინაარსობრივ ვალდებულებებს განსაზღვრავს, მათ შორის მაუწყებელი ვალდებულია: უზრუნველყოს აუდიტორიის დროული და ყოველმხრივი ინფორმირება საქართველოში, მის რეგიონებსა და მსოფლიოში მიმდინარე მნიშვნელოვანი მოვლენების შესახებ; საუკეთესო დროს გადასცეს ახალი ამბებისა და საზოგადოებრივ-პოლიტიკური პროგრამები, ხოლო საარჩევნო კამპანიის მსვლელობისას – აგრეთვე წინასაარჩევნო დებატები; ამავე კანონის მიხედვით, საზოგადოებრივი მაუწყებელს ევალება შეასრულოს სამეურვეო საბჭოს მიერ შემუშავებული პროგრამული პრიორიტეტები, რომლის მიხედვითაც საინფორმაციო გადაცემებსა და ახალ ამბებთან ერთად პრიორიტეტად საზოგადოებრივ მაუწყებელზე პოლიტიკურ-ანალიტიკური გადაცემების, ჟურნალისტური გამოძიების, კულტურული, საგანმანათლებლო და შემეცნებითი გადაცემების არსებობას სახავს. იმ შემთხვევაში, თუ მენეჯმენტი პროგრამულ პრიორიტეტებს არ შეასრულებს და საბჭო არ განახორციელებს ქმედით ღონისძიებებს მის შესასრულებლად, კანონი პარლამენტის მიერ სამეურვეო საბჭოსთვის უნდობლობის გამოცხადების საკითხის დაყენებას ითვალისწინებს", - ვკითხულობთ განცხადებაში. ორგანიზაცია მოუწოდებს საზოგადოებრივი მაუწყებლის სამეთვალყურეო საბჭოსა და საქართველოს პარლამენტს, მეტად დაინტერესდნენ ტელევიზიაში მიმდინარე პროცესებით. სრულად  წყარო: ორგანიზაციის ვებგვერდი

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციები განცხადებას ავრცელებენ აზერბაიჯანელი ჟურნალისტის აფგან მუხთარლის საქმეზე. „საქართველოს ეროვნული პლატფორმის წევრი ორგანიზაციები მივიჩნევთ, რომ გამოძიებას ჰქონდა საკმარისი დრო საქმის ობიექტური და დეტალური გამოძიებისთვის, თუმცა პროცესი ცალსახად ფერხდება, რაც ლახავს ქვეყნის იმიჯს საერთაშორისო საზოგადოების წინაშე და კითხვის ნიშნის ქვეშ აყენებს ადამიანის უფლებებისა და უსაფრთხოების დაცვას საქართველოში, რაც თავის მხრივ, მნიშვნელოვან გამოწვევას წარმოადგენს ქვეყნის პლურალისტური, დემოკრატიული, ღირსეული განვითარების გზაზე. ყოველივე აღნიშნულიდან გამომდინარე, ხელმომწერი ორგანიზაციები მოვითხოვთ ობიექტურად იქნას გამოძიებული აფგან მუხთარლის საქმე და დაისაჯოს დამნაშვეები. ასევე მოვითხოვთ, დაუყოვნებლივ მოხდეს საზოგადოების დეტალური ინფორმირება გამოძიების მიმდინარეობის შესახებ, რათა პასუხი გაეცეს საზოგადოებაში არსებულ ყველა კითხვას. ამასთანავე, მივმართავთ ადამიანის უფლებათა დაცვისა და სამოქალაქო ინტეგრაციის კომიტეტს უზრუნველყოს ჟურნალისტის საქმის მოსმენა, ხოლო საქართველოს პარლამენტმა შეასრულოს მასზე დაკისრებული საჯარო ფუნქცია და მაღალი საზოგადოებრივი ინტერესის გათვალისწინებით, შექმნას დროებითი საპარლამენტო საგამოძიებო კომისია", ნათქვამია განცხადებაში. სრულად... წყარო: qartia.org.ge

თბილისი. „საქართველოს ახალგაზრდა იურისტთა ასოციაცია" ნეგატიურად აფასებს საქართველოს პარლამენტში ინიცირებულ „მაუწყებლობის შესახებ" საქართველოს კანონის პროექტს, რომელიც იურიდიულ საკითხთა კომიტეტის გადაწყვეტილებით შექმნილი სამუშაო ჯგუფის ავტორობით შემუშავდა. საია-ს მოსაზრებით, კანონპროექტი აერთიანებს არაერთ ინიციატივას, რომელიც არ არის თავსებადი საზოგადოებრივი მაუწყებლის კანონით გარანტირებულ სტატუსსა და ფუნქციასთან, არსებითად ამცირებს საზოგადოებრივი მაუწყებლის ანგარიშვალდებულებისა და გამჭვირვალობის დღეს მოქმედ სტანდარტს, ზრდის კორუფციული გარიგებების დადების რისკს, ისევე როგორც დაუსაბუთებლად ამცირებს სამეურვეო საბჭოს, როგორც მაკონტროლებელი ორგანოს უფლებამოსილებებს. „მომზადებული კანონპროექტის საერთო ანალიზის შედეგად შეიძლება ცალსახად ითქვას, რომ შემოთავაზებული ცვლილებების უცვლელი სახით მიღება სერიოზულ ეჭვ ქვეშ დააყენებს საზოგადოებრივი მაუწყებლის კანონით გარანტირებულ სტატუსს - პოლიტიკური და კომერციული გავლენისაგან თავისუფალი, საზოგადოებრივი ინტერესების შესაბამისი, მრავალფეროვანი პროგრამების საზოგადოებისათვის მიწოდების მიზნით დაფუძნებული მაუწყებელი, რომელიც არის საქართველოს კანონმდებლობის შესაბამისად სახელმწიფო ქონების საფუძველზე ტელე-რადიომაუწყებლობისათვის შექმნილი, საჯარო დაფინანსებით მოქმედი, ხელისუფლებისაგან დამოუკიდებელი და საზოგადოების წინაშე ანგარიშვალდებული საჯარო სამართლის იურიდიული პირი, რომელიც არ ექვემდებარება არც ერთ სახელმწიფო უწყებას", - ნათქვამია ორგანიზაციის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტია ბავშვთა საკითხების გაშუქების მედიამონიტორინგის შუალედურ შედეგებს აქვეყნებს. ანგარიშში მოცემულია 2017 წლის 1 აპრილიდან 1 ივლისამდე პერიოდში ჩატარებული მონიტორინგის შეჯამება. მონიტორებმა გააანალიზეს როგორც პრესაში, ისე ონლაინ და სამაუწყებლო მედიაში გამოქვეყნებული ყველა მასალა, რომელიც პირდაპირ ან ირიბად ეხებოდა ბავშვს. მონიტორები აკვირდებოდნენ ცალკეულ თემებთან დაკავშირებით ბავშვების გაშუქებას, ასევე, მათ შესახებ მომზადებული მასალების ეთიკურ სტანდარტებთან შესაბამისობას; ყურადღებას აქცევდნენ, თუ რა ჭრილში, რა კონტექსტში შუქდებოდა ბავშვებთან დაკავშირებული საკითხები; როგორ ჩანდნენ ბავშვები ჟურნალისტურ მასალებში და რა თემებთან დაკავშირებით საუბრობდნენ ისინი. მონიტორინგი გაეროს ბავშვთა ფონდის მხარდაჭერით ხორციელდება. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს განცხადებით მიმართა ორგანიზაციამ „პარტნიორობა ადამიანის უფლებებისთვის" (PHR). PHR მიიჩნევდა, რომ 2017 წლის 23 მაისს ინტერნეტ გადაცემა „ბავშვების დროში" ნაჩვენები კადრებით დაირღვა ჟურნალისტური ეთიკის მე-8 და მე-10 პრინციპი. გადაცემა ბავშვთა ონანიზმს ეხებოდა. ქარტიის სარეზოლუციო ნაწილში აღნიშნულია, რომ გადაცემის ავტორმა - ნინი ოგბაიძემ დაარღვია საქართველოს ჟურნალისტური ეთიკის ქარტიის მე-8 და მე-10 პრინციპი. სრულად... წყარო: ორგანიზაციის ვებ-გვერდი სოციალურ ქსელში

თბილისი. „საერთაშორისო საზოგადოება საქართველოში" მიიჩნევენ, რომ უცნობია, რა ბედი ელით საზოგადოებრივ მაუწყებელში დასაქმებულ ადამიანებს, რომელთა გადაცემები 17 ივლისს იხურება. ეს ორანიზაციის მიერ გამოქვეყნებულ განცხადებაშია ნათქვამი. „საერთაშორისო გამჭვირვალობა - საქართველომ" საზოგადოებრივი მაუწყებლისგან გამოითხოვა ინფორმაცია იმის შესახებ, მიმდინარე რეფორმის ფარგლებში რამდენი ადამიანი გაათავისუფლეს სამსახურიდან ან რამდენი თანამშრომლის გათავისუფლება იგეგმება. თუმცა, არხზე გადაცემების დახურვიდან ერთი კვირით ადრე, 10 ივლისის მონაცემებით, საზოგადოებრივ მაუწყებელს ჩვენს კითხვებზე პასუხი არ ჰქონდა. მათ მოგვწერეს, რომ "საშტატო განრიგი დამტკიცებული არ არის”, ხოლო "განმარტების გაკეთება იმის შესახებ, თუ რას აპირებს და გეგმავს მომავალში საზოგადოებრივი მაუწყებელი საკადრო საკითხთან დაკავშრებით, არ წარმოადგენეს საჯარო ინფორმაციის კატეგორიას", - წერია განცხადებაში. „საერთაშორისო გამჭვირვალობა - საქართველო" საზოგადოებრივ მაუწყებელს მოუწოდებს გაასაჯაროვოს ინფორმაცია, ამასთან, აცხადებს, რომ აქტიურად დააკვირდება მაუწყებელზე მიმდინარე რეფორმას და მზად არის უფასო სამართლებრივი კონსულტაცია გაუწიოს საზოგადოებრივი მაუწყებლის იმ თანამშრომლებს, რომლებიც თავიანთ გათავისუფლებას დაკავებული პოზიციიდან უკანონოდ ან უსამართლოდ მიიჩნევენ. სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები ეხმიანებიან საქართველოს პარლამენტში ინიცირებულ კანონპროექტს, რომლითაც „მაუწყებლობის შესახებ" საქართველოს კანონში ცვლილებები შედის. „მივიჩნევთ, რომ შემოთავაზებული ცვლილებები გულისხმობს საზოგადოებრივი მაუწყებლის საქმიანობის გამოსვლას საჯარო კანონმდებლობის რეგულირების ფართო სფეროდან, მაუწყებლის ანგარიშვალდებულების სტანდარტის გაურესებას, მაუწყებელში დაცული ინფორმაციის მისაწვდომობისა და სახელმწიფო შესყიდვების გამჭვირვალედ წარმართვის გარანტიების შესუსტებას, ასევე, საზოგადოებრივ მაუწყებელში დასაქმებულ პირთა შრომითი უფლებების დაცვის გარანტიების გაუქმებას, არ შეესაბამება საზოგადოებრივი მაუწყებლის საჯარო ბუნებასა და ფუნქციებს და ასუსტებს მაუწყებელზე საზოგადოებრივი კონტროლის განხორციელების შესაძლებლობებს" - ნათქვამია განცხადებაში. განცხადების ხელმომწერი საზოგადოებრივი ორგანიზაციები მიიჩნევენ, რომ ამ ცვლილებებით, სახელმწიფო შესყიდვების შესახებ კანონმდებლობა აღარ გავრცელდება მაუწყებლის მიერ შეძენილ ტელერადიოპროდუქციაზე; გაუარესდება საზოგადოებრივი მაუწყებელში დაცული საჯარო ინფორმაციის მისაწვდომობის სტანდარტი; მაუწყებელზე აღარ გავრცელდება საბიუჯეტო ორგანიზაციების მარეგულირებელი კანონმდებლობა; დაუსაბუთებლად გაფართოვდება სახელმწიფო ბიუჯეტის ხარჯვის უფლებამოსილება; გაუქმდება საზოგადოებრივ მაუწყებელში დასაქმებულ პირთა შრომითი უფლებების დაცვის სპეციალური გარანტიები და მოუწოდებენ საქართველოს პარლამენტს, უზრუნველყოს ცვლილებების გამჭვირვალე საპარლამენტო განხილვა, რომელზეც ყველა დაინტერესებულ მხარეს მიეცემა მოსაზრების წარდგენის შესაძლებლობა. სრულად  წყარო: ადამიანის უფლებების სწავლებისა და მონიტორინგის ცენტრის ვებგვერდი

იმერეთი. ქუთაისის ახალგაზრდული ცენტრის წევრმა გიორგი აბესაძემ ჩაატარა მედია წიგნიერების ტრენინგი. ტრენინგი მიზნად ისახავდა ახალგაზრდების ცნობიერების ამაღლება სოციალური მედიის და ყალბი ინფორმაციის გავრცელების თავიდან აცილების საკითხებზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 11 ივლისს, დემოკრატიული ჩართულობის ცენტრებში 2017 წლის თვითმმართველობის არჩევნებთან დაკავშირებით მედიაცენტრები გაიხსნება. „მედიაცენტრები მოქალაქეებს, ჟურნალისტებს, არასამთავრობო ორგანიზაციებს, კანდიდატებსა და პოლიტიკურ პარტიებს შესთავაზებს ღია და ნეიტრალურ სივრცეებს ინფორმაციის გავრცელებისა და დისკუსიებისთვის. მედიაცენტრები ხელს შეუწყობს კანდიდატებსა და მათ ამომრჩევლებს შორის დიალოგის წარმართვას, რათა მოქალაქეები გაეცნონ კანდიდატების საარჩევნო პროგრამებს და ინფორმირებული არჩევანი გააკეთონ", ნათქვამია დემოკრატიული ჩართულობის ცენტრების ვებ-გვერდზე სოციალურ ქსელში. სრულად... წყარო: ცენტრის ვებ-გვერდები სოციალურ ქსელში

თბილისი. „საერთაშორისო გამჭვირვალობა საქართველო" მარნეულის სათემო რადიოს ჟურნალისტებზე შესაძლო ზეწოლასთან დაკავშირებით, სამართალდამცავ ორგანოებს მიმართავს. როგორც საზოგადოებისთვის ცნობილია, მარნეულის სათემო რადიოს ხელმძღვანელი კამილა მამედოვა ხელისუფლებასა და ხელისუფლებასთან დაახლოებული პირების მხრიდან რადიოში გასული კრიტიკული მასალების გამო ზეწოლაზე საუბრობს. ალიევას თქმით, მას და მის ჟურნალისტებს ემუქრებოდნენ პირად საუბრებში, სატელეფონო ზარებით და სოციალური მედიის გზავნილებით. ასევე, ფეისბუქში შეიქმნა ყალბი პროფილი, რომელიც კამილა მამედოვოს პირადი ცხოვრების შესახებ ინფორმაციას ავრცელებდა. 1 ივლისს კამილა მამედოვამ პოლიციას აღნიშნული ფაქტების გამოძიების მიზნით მიმართა. პოლიციიდან პასუხი ამ დრომდე არ ყოფილა. „საერთაშორისო გამჭვირვალობა - საქართველო" მოუწოდებს სამართალდამცავ ორგანოებს დროულად გამოიძიონ ჟურნალისტებზე შესაძლო ზეწოლის ფაქტი და საჯაროდ გაავრცელონ ინფორმაცია გამოძიების მიმდინარეობისა და შედეგების შესახებ. ხელისუფლებისა და სხვადასხვა პოლიტიკური ჯგუფების წამომადგენლებს კი მოვუწოდებთ მეტი პასუხისმგებლობით მოეკიდონ ჟურნალისტებთან ურთიერთობას, გაიაზრონ მათი როლი და დამოუკიდებელი მედიის მნიშვნელობა. „საერთაშორისო გამჭვირვლობა - საქართველო" ხაზს უსვამს, რომ, სხვადასხვა დროს, წერდა წინასაარჩევნო პერიოდში რეგიონულ მედიაზე ზეწოლის ფაქტების გახშირების ტენდენციის თაობაზე და აღნიშნავს, რომ, მოახლოებული ადგილობრივი არჩევნების წინ, გადამწვეტად მნიშვნელოვანია, ყველა მსგავს შემთხვევა სამართალდამცავების მხრიდან დროული და ადეკვატური რეაგირება მოყვეს, რათა წინასაარჩევნო პერიოდში ჟურნალისტებს თავიანთი პროფესიული მოვალეობის შესრულების საშუალება მიეცეთ. სრულად წყარო: „საერთაშორისო გამჭვირვალობა საქართველოს" ვებგვერდი

თბილისი. USAID-საქართველო 2016-2017 წლებში, მედიის განვითარების პროგრამის - „მედია - მთავრობის გამჭვირვალობისა და ანგარიშვალდებულებისთვის" (M-TAG) ფარგლებში, საქართველოში განხორციელებული პროექტების შესახებ ინფოგრაფიკას აქვეყნებს. მონაცემების თანახმად, პროგრამის ფარგლებში, დღეს საქართველოს 15 მედიასაშუალება ამზადებს ექვსენოვან მასალებსა და გადაცემებს - ქართულ, აბხაზურ, ოსურ, აზერბაიჯანულ, სომხურ და რუსულ ენებზე; პროგრამა მართავს მულტიმედიური განათლების ცენტრს (MEC), როგორც ჟურნალისტების განათლების ტექნიკური მხარდაჭერის ლაბორატორიას, რომლის ბაზაზეც სწავლება 600-ზე მეტმა მსმენელმა გაიარა. პროგრამის მხარდაჭერით, IREX-მა 9 ინტერნეტმედიასაშუალებისთვის გააუმჯობესა კონტენტის მენეჯმენტის (CMS) შესაძლებლობები; ასევე, განავითარა მობილური აპლიკაციები, სადაც პარტნიორი რადიოები და ტელევიზიები აქვეყნებენ ტექსტურ, ფოტო და ვიდეომასალებს. პროგრამის დახმარებით, ნინოწმინდის საერთო რადიო პოპულარობის ახალ საფეხურზე გადავიდა და პირველი კომერციული სარეკლამო ხელშეკრულებები გააფორმა; ორწლიანი მუშაობის შედეგად კი, იქამდე ნაკლებადცნობილი პორტალი „ქუთაისი პოსტი" ახლა კვარტალში 170 000 ვიზიტორს ითვლის. IREX-ის მედიაპარტნიორებმა გასულ წელს ჟურნალისტიკის 6 პრიზი მოიპოვეს; IREX-მა მეთვალყურეობა გაუწია 3 სპეციალური ტრენინგ-კურსის მონაწილეების 500-ზე მეტ ნამუშევარს. ორგანიზაციის განვითარებისა და სტრატეგიული დაგეგმვის, ფინანსების მართთვის, გაყიდვებისა და მარკეტინგის მიმართულებებით გაწეული კონსულტაციებით, M-TAG დაეხმარა მედიაპარტნიორებს, განევითარებინათ თავიანთი საქმე;. პროგრამის ფარგლებში, ჩატარდა, ასევე, ტრენინგები სარედაქციო მართვის, მულტიმედია და ონლაინ პროდუქტების, საგამომცემლო საქმის, მონაცემებისა და ინფოგრაფიკის მიმართულებებით. გასულ წელს IREX-მა გააუმჯობესა 45-ზე მეტი მედიაწარმომადგენლის უნარები და კომპეტენცია განათლების, ევროინტეგრაციისა და სამრეწველო ნარჩენების ინტეგრირების თვალსაზრისით. პროგრამა „მედია - მთავრობის გამჭვირვალობისა და ანგარიშვალდებულებისთვის" (M-TAG), რომლსაც USAID $5.5 მილიონით აფინანსებს, 2014-2019 წლებს მოიცავს. £332,443-ით პროგრამის თანადამფუძნებელია საქართველოში ბრიტანეთის საელჩო. სრულად წყარო: USAID-საქართველოს ოფიციალური ფეისბუქგვერდი

სამეგრელო. საქართველოს ჟურნალისტური ეთიკის ქარტიისა და გაეროს ბავშვთა ფონდის ერთობლივი პროექტის ფარგლებში, ბავშვთა საკითხების გაშუქების შესახებ ტრენინგი სამეგრელოში ბაზირებული ონლაინგამოცემა livepress.ge-დან დაიწყო. ქარტიის ტრენერი, ზვიად ქორიძე 4 დღის განმავლობაში რედაქციაში მუშაობდა, ბავშვებთან დაკავშირებული სიღრმისეული მასალების მომზადების თაობაზე. Livepress.ge-ის გარდა, კონკურსის წესით, შეირჩა კიდევ სამი მედიასაშუალება: ტელეკომპანია პირველი, რეგიონულ მაუწყებელთა ასოციაცია და ტელეკომპანია გურჯაანი. ქარტიის ტრენერები ზვიად ქორიძე და ნინო ჯაფიაშვილი უახლოეს პერიოდში მათაც ეწვევიან. ამავე ფორმატში ტრენინგი უკვე გაიმართა პანკისის სათემო რადიოშიც. რედაქციებში მუშაობა ნაწილია იმ პროექტისა, რომლის ფარგლებში, ასევე, ტარდება მედიამონიტორინგი ბავშვთა საკითხების გაშუქებისას წარმოშობილი პრობლემების იდენტიფიცირებისთვის, გაიმართა შეხვედრები მოსწავლეებთანაც და ჩატარდა დისკუსია საბავშვო გადაცემების და არხების შესახებ. სრულად წყარო: საქართველოს ჟურნალისტური ეთიკის ქარტიის ვებგვერდი

თბილისი. 3 თვიანი ტრენინგების კურსის შემდეგ ეკონომიკურმა მედია სკოლამ ჟურნალისტები დააჯილდოვა. „მედია სკოლის მიზანია ჟურნალისტებისთვის ფინანსური განათლების ამაღლება. ჟურნალისტებმა ეკონომიკის საფუძვლები სპეციალური კურსისა და სახელმძღვანელოების მიხედვით შეისწავლეს", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი

თბილისი. საქართველოს ჟურნალისტური ეთიკის ქარტის საბჭო მარნეულის სათემო რადიოს თანამშრომლებისთვის მუშაობაში შესაძლო ხელის შეშლის გამოძიებას ითხოვს. როგორც საბჭოს განცხადებაშია ნათქვამი, საქართველოს ჟურნალისტური ეთიკის ქარტიას მიმართა მარნეულის სათემო რადიოს ხელმძღვანელმა კამილა მამედოვამ, რომლის თქმითაც, მასზე და რადიოს სხვა ჟურნალისტებზე, ბოლო ერთი კვირის განმავლობაში, სხვადასხვა პირის მხრიდან ხორციელდება ზეწოლა, ემუქარებიან, აყენებენ სიტყვიერ შეურაცხყოფას სოციალური ქსელებისა და სატელეფონო ზარების მეშვეობით. ჟურნალისტებმა პოლიციას უკვე მიმართეს. საბჭოს ინფორმაციით, კამილა მამედოვა ამბობს, რომ ზეწოლა მას შემდეგ დაიწყო, რაც რადიო „მარნეულმა" გამოაქვეყნა მასალა ეთნიკური უმცირესობებით მჭიდროდ დასახლებულ რეგიონებში (ქვემო ქართლი) სამოქალაქო თანასწორობის საკითხებში საქართველოს სახელმწიფო მინისტრის წარმომადგენლის მოვალეობის შემსრულებლის უკონკურსოდ დანიშვნის შესახებ. საქართველოს ჟურნალისტური ეთიკის ქარტიის საბჭო მოუწოდებს სამართალდამცავ ორგანოებს, დროულად და ადეკვატურად გამოიძიონ ჟურნალისტებისთვის შესაძლო ხელის შეშლისა და მუქარის ფაქტი. სრულად წყარო: საქართველოს ჟურნალისტური ეთიკის ქარტიის ვებგვერდი